उत्पत्ती 6
6
माणहान जातीन खाराबी
1जेवी देरती पोर माणहान गेणती जुलूम वोड़तीच रेनी, एने तान सोऱ्यु पायदा एन्यु। 2तेवी बोगवानान सोरा माणहान सोऱ्युह देख्या काय त्यु जुलूम हाज्यु हेत्यु, एने ता जी पोटनी ती हेऱ्या वाराड़ केर लेदा। 3तेवी बोगवान केयो, “मारी जीव माणहा हेरी जेलेम बोलाचाल किरती नाय रेय, काहाकाय माणुह बी सेरीरूच हे; तान वोय एक होव विह वोरह्यान रेय।” 4ता दिह्याम देरती पोर दानव#6:4 दानव नपेली माणहे रेताला; एने ज्यान पासाण जेवी बोगवानान सोरा माणहान सोऱ्युन आहने गीया। तेवी तान उगे रेन जा सोरा पायदा एना, ता बाहदुर रेताला, जान कामान वातु वेगाला कालाम रेन नाव लायेल हे।#गिनती 13:33
5बोगवान दिख्यो काय देरती पोर माणहान बुराय वोद जाईल हे, एने तान मोनान विचार माय जो काय निकलेह तो जेलेम खाराबुच रिथे,#मत्ती 24:37; लुका 17:26; 1 पतरस 3:20 6केरीन बोगवान देरती पोर माणहाह बाणावीन पासतानो, एने तो मोना माय जुलूम दुखी इनो, 7तेवी बोगवान केयो, “मी माणहाह जाह मी बाणायेल हे देरती पोर रेन खेतेम केर देह, काय माणहे, काय जेनवारे, काय लोलनारे जेन्तु, काय जुगाम उड़नारे चिड़ा, आखाह खेतेम केर देह, काहाकाय मी ताह बाणावीन पासताथु।”
8पुण बोगवानान गीणीन निजेर नुहा पोर एती।
नुहो
9नुहान वोस ज्यी हे। नुह देरमी एदमी एने तान कालान माणहाम खेरलो माणुह एतो; एने नुह बोगवानाच ने आरही आरही चालती रिनो।
10नुहान शेम, हाम, एने येपेत नावान तीन सोरा पायदा एना। 11ती टेम माय देरती बोगवानान नेजरी माय बिगड़ी जाईल एती, एने पापा माय बोराय जाईल एती। 12एने बोगवान जेवी देरती पोर निजेर टाक्यो ते काय दिख्यो काय ती बिगड़ी जाईल हे; काहाकाय आखा माणहे देरती पोर जिव जिवान चाल बिगाड़ लियेल एता।
13तेवी बोगवान नुहा केयो, “सोब जेनवेराह खेतेम केरनेन सावाल मार सोमोर आव जाईल हे; काहाकाय न्यान कारेण देरती पापा माय बोराय जाईल हे, ता माय मी न्याह देरती हिऱ्योच खेतेम केर देह। 14केरीन तु गोपेर जाड़ान लाकड़ान एक डोंडह्यो बाणावज्ये, एने ता माय खोल्यु बाणावज्ये एने माय बाहेर ता पोर डांबेर#6:14 डांबेर चिपकाड़नेन वोस्तु लागाड़ज्ये। 15इह केरीन तु डोंडह्यो बाणावज्ये : डोंडह्यान लाम्बाय तीन होव आथ, एने चौड़ाय पाचाह आथ, एने उचाय तीस आथ रेणे जुवे। 16डोंडह्याम एक खिड़की बाणावज्ये, एने तान एक आथ उपेर रेन तान साजो बाणावज्ये, एने डोंडह्यान एक उगे एक बायणो मिलज्ये। डोंडह्या माय पेल्ली, दुसरी, तिसरी खोली बाणावज्ये। 17एने हुमेल, मी देरती पोर मुहोल दाऱ्यो पाणी पाड़ीन आखा जीवाह, जा माय जीवणान वाह हे, जुगान निड़ो रेन खेतेम किरन्यु हे; एने जोला देरती पोर हेते, ता सोब मोर जाती। 18पुण मी तुवा हिऱ्यो वाचा बांदथु; केरीन तु तारी बायकु एने सोरा, वोवड्युक न्या सोबा लेन डोंडह्या माय रिग जाज्ये। 19एने आखा जिवताला जेनवारा माय रेन, एक एक जातीन दुय दुय जोड़पा, मतलब नर एने मादा डोंडह्याम लिजाईन तार हिऱ्यो जिवताला मिलज्ये। 20एक एक जातीन चिड़ा, एने एक एक जातीन जेनवारे, एने एक एक जातीन बुई पोर लोलनारे जीव, आखाम रेन दुय दुय तार फाय आवती, काय तु ताह जिवताला मिले। 21एने बात बातीन वोस्तु ज्यु खावाय जात्युह, ताह तु लेन तार फाय टुलो केर मिलज्ये; जो तारो एने तान खाणेन केरता रेय।” 22बोगवानान उकुमीन गेत नुह आखो काम किऱ्यो।#इब्रानियो 11:7
Currently Selected:
उत्पत्ती 6: Nii2025
Highlight
Copy
Compare
Share
Want to have your highlights saved across all your devices? Sign up or sign in
The Nahali Bible © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2025
