उत्पत्ती 33
33
याकुब एसावाह मिलने
1जेवी याकुब निजेर टाकीन दिख्यो, ते ताह एसाव चार होव एदम्याह आरही लेन आवतालो देखानो, तेवी तो सोराह आंग आंगे वाटीन राहेल एने लिया एने दुय पावेरन्युह होप दिनो। 2याकुब तान पावेरन्युह एने त्युन सोराह आखान ओंगाण एने तान पासाण लिया एने तीन सोराह मिल्यो, एने आखान पासाण राहेल एने युसूपाह मिल्यो। 3एने याकुब सोताच आखान ओंगाण गीयो एने सात वारीन बुय पोर पोड़ीन वोंद्यो, एने तान बायाख ने आहने गीयो। 4तेवी एसाव याकुबाह देखताच मिलने दुवड़नो, एने ताह साती हिऱ्यो लागाड़ीन गिले मिलीन गुल्या दिनो; ओवता ता दुयू रेड़ पोड़ना। 5एसाव तान सोमोरल्या सोरा एने बायकुह देखीन फुशो, “न्या जा तार हेऱ्या हेते, ज्या कुण हेते?”
याकुब केयो, “तारा पावरान सोरा हेते, जाह बोगवान गीण केरीन माहु आपेल हे।” 6ओवत्यु याकुबान दुय पावेरन्यु तीन सोरा हेऱ्यु आहने आवीन वोंद्यु। 7तान पासाण लिया एने तीन सोरा आहने आवीन वोंद्या; एने सेवली बुखेत राहेल एने युसूफ आहने आवीन एसावाह वोंद्या।
8तेवी एसाव फुशो, “तारो तो मुटलो टुलो जो माहु वाटे मिलायेल इतो, तान काय मतलब एतो?”
याकुब जापाप आप्यो, ज्य काय मारा मालक्यान गीण मार पोर रेय।
9पुण एसाव केयो, “एय मारा बाहख, मार फाय ते जुलूम हे; जो काय तारो हे तो तारोच रेय।”
10याकुब ताह केयो, “नाह नाह, केदी तारी गीण मार पोर एय ते मारी बेट राख ले। काहाकाय मी तुवाह दिख लियेल हे, ते सोमजीले माहु बोगवानान देरसेन जुड़ेल हे, एने तु मार पोर खुस इयेल हे। 11केरीन ज्यी बेट तुवाह ली मुकलेल हे, मिल ले; काहाकाय बोगवान मार पोर गीण किरेल हे, एने मार फाय जुलूम हे।” एने तो ताह जुलूम रावणी किऱ्यो, तेवी तो ती बेटीह मिल लिदो।
12उवतो एसाव केयो, “चाला एवी आपु जाता, मी बी तार हिऱ्योच आवथु।”
13याकुब ताह केयो, “एय मालीक तुवाह ते मालुम हे मार हेऱ्या आतल्या सोरा हेते एने मेंड्रा बोकड्या एने गायु हेत्यु; एने त्युन आतल्या वासड़ा हेते, केदी ताह एक दिह बी आखलाय जाय, ते आखान आखा मोर जाती। 14केरीन मारा मालीक तु माहु रेन ओंगाण जा, एने मी ज्या जेनवारे जिह चालती तिहे, एने सोरा जिह केरीन चालती तिह केरीन मी बाग बागे चालीन सेईर गावा माय मारा मालीक फाय पोचुह।”
15तेवी एसाव केयो, “उवतो मी मारा हाथीम रेन थोड़ाक जाणाह तारी मुदेक केरनेन केरता आरही सोड़ीन जाव।”
पुण याकुब केयो, “ज्य काहा? ओलोच जुलूम हे, काय मार मालक्यान गीण मार पोर रेय।” 16तेवी एसाव ते दिहच सेईर उगे जाणेन वाट दिर लिदो। 17पुण याकुब तारीन चालीन सुक्कोत #33:17 सुक्कोत खोपड़ोमाय गीयो, एने ता तान केरता एक गेर बांद्यो, एने जेनवेरान केरता खोपड्यु बाणायो, ता माय ता जागान नाव सुक्कोत पोड़नो।
18एने याकुब जो पद्दनराम माय रेन आयेल इतो, तो कनान देसान शेकेम हेयराम हाजो हुकेच पोचीन गावान आहने एक खेताम तोम्बु उब राख्यो। 19एने बुय ने जी जागे तो पाड़ावो किरेल इतो, तो तो खेत शेकेम ने आबोख हमोर फाय एक होव चांदीन सिक्का आपीन वेचातो लियेल इतो।#योहान 4:5 20तेवी याकुब ता एक वेदी बाणायो, एने नाव एल एलोहे#33:20 एल एलोहे बोगवान इस्राएल ने इस्राएलान बोगवान मिल्यो।
Currently Selected:
उत्पत्ती 33: Nii2025
Highlight
Copy
Compare
Share
Want to have your highlights saved across all your devices? Sign up or sign in
The Nahali Bible © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2025
