उत्पत्ती 29
29
याकुब लाबान हिऱ्यो मिलानो
1उवतो याकुब तान वाट देर लिदो, एने पुर्व उगे वाला देसाम आवो। 2एने तो निजेर टाकीन दिख्यो काय खेता माय एक वावड़ी हे, एने तीन आहने मेंड्रा बोकड्यान तीन टोला बोह रेनाह; काहाकाय जो दिगोड़ ती वावड़ीन मुयाला पोर डाप मेलाय रेतालो, जा माय रेन टोलाह पाणी पिवाड़ाय जातालो, तो जुलूम बारो इतो। 3एने जुलबुखे आखा टोला ताहरी टोलवाय जाताला, तेवी गोवाल्या वावड़ीन मुयाला पोर रेन दिगोड़ सेटा केरताला, तेवी मेंड्रा बोकड्याह पाणी पिवड़ावताला, एने पोशा दिगोड़ हेरकावीन डाप देताला।
4तेवी याकुब गोवाल्याह फुशो, “एय मारा बाहख, तुमू का वाला हेते?” ता केयो, “आमु हारान गावा वाला हेते।”
5तेवी याकुब ताह फुशो, “काय तुमू नाहोरान नातण्याक लाबानाह ओलेखतेह?” ता केया, “होव आमु ताह ओलेखतेह।”
6पुशो तो ताह फुशो, “काय तो हाजालोच हे?” ता केया, “होव हाजालोच हे एने पोली देख, तान सोरी राहेल मेंड्रा बोकड्याह लेन आवणे बाज रेनीह।”
7याकुब केयो, “एवी ते दिह जुलूम हे, जेनवेराह टुलो एणेन टेम नाय मिले; केरीन मेंड्रा बोकड्याह पाणी पिवाड़ीन पोशा लिजाईन चारो।”
8पुण ता केया, “आमु एवी ओहलो केरता नाह केर सेकते, जुलबुखे आखा मेंड्रा बोकड्यान टोला टोलवातेह, तेवी दिगोड़ वावड़ीन मुयाला पोर रेन हेरकावतेह, एने तेवी आमु मेंड्रा बोकड्याह पाणी पिवाड़तेह।” 9तान ज्यी वातु चालु एती, तेवी राहेल तीन आबाख ने मेंड्रा बोकड्या लेन आव लागी, काहाकाय ती मेंड्रा बोकड्यान चाऱ्या केरताली। 10याकुब तान मामाख सोरी राहेलीह एने तीन मेंड्रा बोकड्याह देखीन आहने जायीन वावड़ीन मुयाला पोर रेन देगड़ाह हेरकावीन तान मामाख ने मेंड्रा बोकड्याह पाणी पिवाड्यो 11तेवी याकुब राहेलीह गुल्या दिनो एने मोठेच रिड़नो। 12एने याकुब राहेलीह केय दिनो, “मी तारो फुहवाण्यो बाहख हे, मतलब रिबीकान सोरो हे,” तेवी ती दोवड़ीन गीयी एने तीन आबाख केय देनी।
13तान बाणजाहख याकुबान खुबेर सापड़ाताच लाबान ताह मिलने दुवड़नो, एने गिले मिलीन गुल्या दिनो, ओवतो तान गेर लियावो, एने याकुब लाबानाह आखी वात होमलाड्यो। 14तेवी लाबान याकुबाह केयो, “तु ते खेरिस मारो आड़ एने माह हे।” एने याकुब एक मोयनो बोर ता हिऱ्यो रिनो।
याकुब राहेल एने लियान केरता लाबानान सेवा केरने
15तेवी लाबान याकुबाह केयो, “तु मारो बायबोंद हे, केरीन तुवाह फुकेट सेवा केरावणो मार केरता हाजो नाय मिले; केरीन माहु के मी तुवाह सेवान बोदले काय आपु?” 16लाबानान दुय सोऱ्यु एत्यु, जी माय डावाली सोरीन नाव लिया एने आतली सोरीन नाव राहेल एतो। 17लियान निजेर ते दुंदवाल्लीह एती, पुण राहेल गाटाली एने हाजी देखाताली।
18याकुब राहेलीह मोंग केरतालो, केरीन याकुब लाबानाह केयो, “मी तारी आतली सोरी राहेलीन केरता सात वोरह्या तारी सेवा केरूह।”
19लाबान याकुबाह केयो, “तिह पारका एदम्या आपणे रेन तुवाह आपणे हाजो रेय; केरीन तु मार फाय रे।” 20तेवी याकुब राहेलीन केरता सात वोरह्या सेवा किऱ्यो; एने ता राहेलीन मोंग ने केरता ताह थोड़ाच दिह्यान बाराबोर लागा।
21उवतो याकुब सात वोरह्या सेवा पुरी केरीन लाबानाह केयो, “मारी बायकु माहु आप दे, एने मी ती हिऱ्यो जाह, काहाकाय मारो टेम पुरो एय जायेल हे।” 22तेवी लाबान तावाला आखा माणहाह हादिन टुलो किऱ्यो, एने वाराड़ान खाणो खावड़ायो। 23पुण रातीन टेम माय लाबान तान डावाली सोरी लियाह याकुब फाय ली गीयो, एने तो तीन आहने गीयो। 24लाबान तान सोरी लियाह तीन सेवा केरनेन केरता तान पावेरनी जिल्पाह आप्यो। 25वेगोच मालुम पोड़नो काय ज्यी ते लिया हे, केरीन तो लाबानाह केयो, “तु मार हिऱ्यो ज्य काय किरेल हे; मी तार हिऱ्यो रेन जो तारी सेवा किऱ्यो, ते काय राहेल ने केरता नाह किऱ्यो? उवतो तु मार हिऱ्यो काहा ओहली कोपेट किरेल हे?”
26लाबान याकुबाह केयो, “आमरी न्या ओहली रिती नाय मिले काय डावाली सोरीन पेल, आतली सोरीन वाराड़ केर देय। 27ज्यीन इप्तो ते पुरो केर, उवतो दिहरी सोरी बी ती सेवान केरता जुड़ी, पुण तु उंजु मार हिऱ्यो रेन पुशो सात वोरह्या वोर सेवा किरहे।”
28याकुब तोहलोच किऱ्यो, एने लियान एक इप्तो पुरो किऱ्यो; तेवी लाबान ताह तान आतली बेटीख राहेल बी आप्यो, काय ती तान बायकु बुणे। 29लाबान तान सोरी राहेलीन सेवा केरनेन केरता बिल्हा बी आप्यो। 30तेवी याकुब राहेलीन आहने बी गीयो, एने याकुब लिया रेन वोदार मोंग राहेल पोर केरतालो; केरीन लाबाना फाय रेन सात वोरह्या पुशो तान सेवा किऱ्यो।
याकुब ने सोरा
31जेवी बोगवान दिख्यो काय याकुब लिया रेन वोदार मोंग राहेल पोर किरेह, केरीन तीन खुलो उगाड़ दिनो, पुण राहेल वान्ठीच रेनी। 32तेवी लिया पेटावाली एनी, एने तीन एक सुरो पायदा इनो; एने ती तान नाव ज्यो किन रूबेन मेली, “काय बोगवान मारो दुखाह पोर निजेर टाकेल हे, काहाकाय मार एदमी मार पोर मोंग ना किरेत; पुण एवी तो मार पोर मोंग केरी।” 33पोशी ती पेटावाली एनी एने तीन एक सुरो पायदा इनो; तेवी ती ज्य किन तान नाव शिमोन #29:33 शिमोन होमेलनारमेली, काहाकाय ती केताली; मारा एदम्यान मार पोर मोंग नाय मिले एने बोगवान ज्य देखीन माहु ज्यो बी सुरो आपेल हे। 34पोशी ती पेटावाली एनी एने तीन एक सुरो पायदा इनो; एने ती केयी, “एविन फेराह मारो एदमी माहु जुड़ जाय, काहाकाय तान मारा तीन सोरा पायदा इयेल हेते,” केरीन तान नाव लेवी मेलाय गीयो। 35एने पोशी ती पेटावाली एनी एने तीन एक सुरो पायदा इनो; एने ती केयी “एविन फेराह ते मी बोगवानान बोड़ाय केरूह,” केरीन ती तान नाव यहुदा मेली; पासाण तीन खुलो बोंद एय गीयो।
Currently Selected:
उत्पत्ती 29: Nii2025
Highlight
Copy
Compare
Share
Want to have your highlights saved across all your devices? Sign up or sign in
The Nahali Bible © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2025
