उत्पत्ती 26
26
इसाहाक गरार माय रेणु
1ता देसाम काल पुड़नो, तो ता पेल्ला कालाह रेन आलेग इतो; जो अब्राहाम ने टेम माय पुड़ेल इतो। केरीन इसाहाक गरार माय पलिश्ती देसान राजा अबीमेलेक फाय गीयो। 2ता बोगवान ताह देरसेन आपीन केयो, “तु मिस्र माय मा जाहे; मी जो देस तुवाह केह ता देसाम रे। 3तु ज्याच देसाम रे, एने मी तार आरही रेह, एने तुवाह बोरकेत आपुह; एने ज्या आखा देस मी तुवाह एने तारी वोसीह आपुह; जो सुगोण मी तारा आबाख अब्राहाम हिऱ्यो खायेल इतो, तीह मी पुरो केरूह।#उत्पत्ती 22:16-18 4एने मी तारी वोसीह चांदण्यान गेत वोदाडुह, एने तारी वोसीह ज्या सोब देस आपुह, एने देरती पोर वाला आखा देस तारी वोसीन कारेण सोताह बोरकेत वाला सोमजेती। 5काहाकाय तारो आबोख अब्राहाम मारी वात मान्यो, एने मी जो ताह हुपेल इतो, ताह एने मारा उकुमाह, विद्युह एने नेमाह मानेल इतो।” 6केरीन इसाहाक गरार गावाम रेय गीयो।
7जेवी ता वाला माणहे तान बायकुन बाराम फुशा, तेवी तो बिन ज्य सोचीन काय केदी मी ज्यीह मारी बायकु हे, केह ताहार न्या वाला माणहे रिबीकान केरीन माहु मार देती, काहाकाय ती जुलूम हाजी हे, केरीन तो जापाप आप्यो ज्यी मारी बोणीख हे।#उत्पत्ती 12:13; 20:3 8जेवी ताह ता जुलूम दिह रेतालोन एय गीया, तेवी एक दिह पलिश्ती राजा अबीमेलेक खिड़की माय रेन निवड़ीन दिख्यो काय इसाहाक तान लाडी रिबीका हिऱ्यो गांडाय केरने बाज रिनोह। 9तेवी अबीमेलेक इसाहाकाह हादिन केयो, “ती तारी बायकु हे, उवतो तु काहा मारी बोणीख हे, इही केरीन आमुह केतालो?”
इसाहाक ताह जापाप आप्यो, “माहु ओहली बिय एती काय तीन केरता एगदो माहु मार टाकी।”
10अबीमेलेक ताह केयो, “तु आमु हिऱ्यो ज्य काय किऱ्यो? काहाकाय आमरा पोरजा माय रेन एगदो तार बायकुह आथ लागाड़तो, ते तु आमुह पापाम फासाड़तो।” 11केरीन अबीमेलेक तान आखा पोरजान माणहा उकुम आप्यो, “जो कुण ज्या एदम्याह निह ते ती बायकुह आथ लागाड़ी, तो मारा टाकाय जाय।”
12ओवतो इसाहाक ता देसाम जुतो जुप्यो, एने ती वोरीह होव गुणा पाक पाकाड्यो; एने बोगवान ताह जुलूम बोरकेत आप्यो। 13इसाहक जुलूम होवटो मालदेन कामायो, एने तो मालमातो एदमी बोण गीयो। 14जेवी ता फाय मेंड्रा, बोकड्या डोरे, एने जुलूम होवटा पावोर पावेरन्यु, एय गीया, तेवी पलिश्ती माणहे ताह कुयराणे बाज गीया। 15केरीन जोल्यु वावड्युह तान आबाख अब्राहामान पावोर अब्राहाम जीवतालोच इतो, तेवी खुदेल एता, त्युह पलिश्ती जातीन माणहे माटड्या केरीन बुज देना।
16तेवी अबीमेलेक इसाहाकाह केयो, “एवी तु आमरो देस सोड़ीन जातरे; काहाकाय तु आमुह रेन वोदार ताकेत वालो बोण जायेल हे।” 17केरीन इसाहाक ता रेन जात रिनो, एने गरार ने गाटा माय तोम्बु बाणावीन ता रेणे बाज गीयो। 18तेवी जी वावड्यु तान आबोख अब्राहाम ने टेम माय खोदायेल एत्यु, एने अब्राहामान मोरनेन पासाण, पलिश्ती माणहे बुज दियेल एता, त्युह, इसाहाक पुशो खोदाड्यो; एने त्युन तोच नाव मिल्यो, जो तान आबोख मिलेल इतो।
19पोशा इसाहाक ने पावोर गाटा माय एक वावड़ी खोदताला, तेवी ताह पाण्यान एक जिर सापेड़नो। 20पुण गरार ने गोवाल्या इसहाकान गोवाल्या हेऱ्या राड़ केरीन केयो, “ज्यो पाणी आमरो हे।” केरीन इसाहाक ती वावड़ीन नाव एसेक#26:20 एसेक राड़ीन मिल्यो, काहाकाय ता ता हेऱ्या राड़ किरेल एता।
21पोशा इसाहाक ने पावोर दिहरी वावड़ी खोद्या; एने ता तीन केरता बी राड़ केऱ्या, केरीन तो तीन नाव सित्ना #26:21 सित्ना विरोदीनमिल्यो। 22तेवी इसाहाक तारेन सिटो जात रिनो, एने पुशो ता एक वावड़ी खोदाड्यो; एने तीन केरता ता राड़ नाह केऱ्या; केरीन तो तीन नाव रहोबोत #26:22 रहोबोत चोवड़ो जागोमिल्यो, एने इसाहाक केयो, “एवी ते बोगवान आमरी केरता जुलूम जागो आपेल हे, एने आमु ज्या देसाम फुलहु फोलहु।”
23इसाहाक तो जागो सोड़ीन बेर्शेबा माय गीयो। 24एने ते दिह राती बोगवान ताह देरसेन आपीन केयो, “मी तारा आबाख अब्राहाम ने बोगवान हे, मा बिय, काहाकाय मी तार हिऱ्यो हे, एने मारा चाकऱ्या अब्राहाम ने कारेण तुवाह बोरकेत आपुह, एने तारी वोसीह वोदाडुह।” 25तेवी इसाहाक बोगवानान केरता एक वेदी बाणायो, एने बोगवानान बोक्ती किऱ्यो, एने तान तोम्बु ताच बाणायो; एने ताहारूस इसहाकान पावोर एक वावड़ी खोद्या।
इसाहाक ने अबीमेलेक हेऱ्यो वायदो केरने
26तेवी अबीमेलेक तान सेल्लो आपणाराह अहुज्जत एने तान सेनापती पिकोलाह आरही लेन, इसाहकाह मिलने गरार गावा माय गीयो।#उत्पत्ती 21:22 27इसाहाक ताह केयो, “तुमू ते माहु दुसमोनाय केरीन माहु तुमरी विचीम रेन काड़ दियेल एता, एवी मार फाय काहा आवाह?”
28ता जापाप आप्या, “आमु सोता दिखेल हेते, काय बोगवान तार हिऱ्यो रिथे; केरीन आमु विचार केऱ्या काय तु बोगवाना उगे रेन बोरकेत वालो हे, एवी आमरी एने तारी विचीम सुगोण खावाय जाय, एने आमु तुवा हेऱ्या ज्या बाराम वाचा बांदाड़े; ज्यी आमरी आसा हे। 29काय जीह केरीन आमु तुवाह आथ नाह लागाड्या, पुण तार हेऱ्या निस्ता बोलोच किरेल हेते, एने तुवाह हाजी हुकेच वाटे लागाड़ेल एता, तिहेच केरीन तु बी आमु हिऱ्यो काय बाक्तो मा किरहे, एने तु बोगवानान उगे रेन बोरकेत वालो माणुह हे।” 30तेवी इसाहाक ताह पावणो दिऱ्यो, एने ता खादा पिदा। 31दिहरी दिह वेगाच उठीन ता आपसाम सुगोण खादा; एने इसाहाक ताह वाटे लागाड्यो, एने ता हाजी हुकेच तान गेर फिरना।
32ते दिहच इसहाकान पावरे आवीन तान खुदेल ती वावड़ीन बाराम इसाहाकाह केया, “आमुह पाण्यान एक जिर सापड़ेल हे।” 33तेवी इसाहाक ती वावड़ीन नाव शिबा #26:33 शिबा सुगोणमिल्यो; केरीन ता हेयरान नाव आज वोर बेर्शेबा #26:33 बेर्शेबासुगोण ने वावड़ीकेवाथे।
एसाव ने विदेश्यु लाड्यु
34जेवी एसाव चालीह वोरह्यान इनो, तेवी तो हित्ती बेरीन सोरी यहुदीत, एने हित्ती एलोन ने सोरी, बासमत हिऱ्यो वाराड़ केर लिदो। 35एने ज्यु दुय बायकुन केरता इसाहाक एने रिबीकान मोनाम दुख लागो।
Currently Selected:
उत्पत्ती 26: Nii2025
Highlight
Copy
Compare
Share
Want to have your highlights saved across all your devices? Sign up or sign in
The Nahali Bible © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2025
