गिनती 36
36
बिहाव करी हुयी टुरियों को हिस्सा
1फिर यूसुफियों को कुलों म सी गिलाद, जो माकीर को टुरा अऊर मनश्शे को नाती होतो, ओको वंश को कुल को पूर्वजों को घराना को मुख्य मुख्य आदमी मूसा को जवर जाय क उन प्रधानों को सामने, जो इस्राएलियों को पूर्वजों को घराना को मुख्य आदमी होतो कहन लग्यो, 2“यहोवा न हमरो प्रभु ख आज्ञा दी होती, कि इस्राएलियों ख चिट्ठी डाल क देश बाट देजो; अऊर तब यहोवा की या भी आज्ञा हमरो प्रभु ख मिली, कि हमरो सगो रिश्तेदार सलोफाद को हिस्सा ओकी टुरियों ख देजो। 3पर यदि हि इस्राएलियों को अऊर कोयी कुल को आदमियों सी बिहाव होयेंन, त उन्को हिस्सा हमरो पूर्वजों को हिस्सा सी छूट जायेंन, अऊर जो कुल म हि ब्याही जायेंन उच कुल को हिस्सा म मिल जायेंन; तब हमरो हिस्सा घट जायेंन। 4अऊर जब इस्राएलियों को जुबली#36:4 इस्राएलियों को आजादी को पचासवों साल को साल होयेंन, तब जो कुल म हि ब्याही जायेंन ओको हिस्सा म उन्को हिस्सा सामिल कर लियो जायेंन; अऊर हि हमरो पूर्वजों को कुल को हिस्सा सी हमेशा लायी छूट जायेंन।”
5तब परमेश्वर सी आज्ञा पा क मूसा न इस्राएलियों सी कह्यो, “यूसुफ वंशीय ठीक कह्य हय। 6सलोफाद की टुरियों को बारे म परमेश्वर न या आज्ञा दी हय, कि जो वर जेकी नजर म अच्छो लगय वा ओको सीच ब्याही जाये; पर वा अपनो मूल आदमी कोच गोत्र को कुल म ब्याही जाये। 7अऊर इस्राएलियों को कोयी कुल को हिस्सा दूसरो कुल को हिस्सा म नहीं मिल सकेंन; इस्राएली अपनो अपनो मूल आदमी को कुल को हिस्सा पर बन्यो रहेंन। 8अऊर इस्राएलियों को कोयी कुल म कोयी की बेटी होना जो हिस्सा पान वाली होना, वा अपनोच मूल आदमी को कुल को कोयी आदमी सी ब्याही जाये, येकोलायी कि इस्राएली अपनो अपनो मूल आदमी को हिस्सा को अधिकारी रहेंन। 9कोयी कुल को हिस्सा दूसरो कुल म मिलनो नहीं पायेंन; इस्राएलियों को हर एक कुल को लोग अपनो अपनो हिस्सा पर बन्यो रहेंन।”
10परमेश्वर की आज्ञा को अनुसार जो ओन मूसा ख दी सलोफाद की टुरियों न करयो। 11मतलब महला, तिर्सा, होग्ला, मिल्का, अऊर नोआ, जो सलोफाद की टुरियां होती, उन्न अपनो काका भाऊवों सी बिहाव करयो। 12हि यूसुफ को टुरा मनश्शे को वंश को कुलों म ब्याही गयी, अऊर उन्को हिस्सा उन्को मूल आदमी को कुल को गोत्र को अधिकार म बन्यो रह्यो।
13जो आज्ञाये अऊर नियम परमेश्वर न मोआब को अराबा म यरीहो को जवर की यरदन नदी को किनार पर मूसा को द्वारा इस्राएलियों ख दियो हि याच आय।
The Lodhi Bible © The Word for the World International and Lodhi Translation Samithi, Gondia, Maharashtra 2025