गिनती 28
28
हर दिन कि भेंट
(निर्गमन २९:३८-४६)
1फिर परमेश्वर न मूसा सी कह्यो, 2“इस्राएलियों ख या आज्ञा देवो, ‘मोरो चढ़ावा, मतलब मोख मनभावन सुगन्ध देन वालो मोरो हवन रूपी भोजन, तुम लोग मोरो लायी उन्को नियमित समयों पर चढ़ावन लायी याद रखो।’ 3अऊर तय उन्को सी कह्य : जो जो तुम्ख परमेश्वर लायी चढ़ानो होना हि यो हंय; मतलब हमेशा की होमबलि लायी एक एक साल को दोय निर्दोष मेंढी को नर बच्चा हर दिन चढ़ायो करजो। 4एक बच्चा ख सुबेरे अऊर दूसरो ख शाम को समय चढ़ाजो; 5अऊर मेंढी को नर बच्चा को पीछू एक लीटर जैतून को तेल सी एक किलो सान्यो हुयो मैदा को दसवों अंश अच्छो चुन को अन्नभेट चढ़ाजो। 6या हमेशा की होमबलि आय, जो सीनै पहाड़ी पर परमेश्वर को सुखदायक सुगन्ध वाली बलि होन लायी ठहरायो गयो। 7अऊर ओकी पेयबलि म हर एक मेंढी को बच्चा को संग एक लीटर अंगूर को रस होयेंन अंगूर को रस परमेश्वर लायी पवित्र जागा म चढ़ावो। 8अऊर दूसरो मेंढी को बच्चा ख शाम को समय चढ़ाजो; अन्नभेट अऊर पेयबलि सहीत सुबेरे की होमबलि को जसो ओख परमेश्वर ख सुखदायक सुगन्ध देन वाली बलि कर क् चढ़ाजो।
आरामदिन को बलिदान
9“तब आरामदिन ख दोय निर्दोष मेंढी को एक साल को नर बच्चा, अऊर अन्नभेट लायी तेल सी सान्यो हुयो अच्छो चुन को दोय दसवों अंश अच्छो चुन अऊर पेयबलि सहीत चढ़ाजो। 10हमेशा होमबलि अऊर ओको पेयबलि को अलावा हर एक आरामदिन को योच होमबलि ठहरयो हय।
हर महीना की भेंट
11“फिर अपनो महीना को सुरूवात म हर महीना परमेश्वर लायी होमबलि चढ़ावो; मतलब दोय गोरा, एक मेंढा, अऊर एक एक साल को निर्दोष मेंढी को सात नर बच्चा; 12अऊर बछड़ा को संग अन्नभेट लायी तेल सी सान्यो हुयो एपा को तीन दसवों अंश अच्छो चुन, अऊर ऊ एक मेंढा को संग तेल सी सान्यो हुयो एपा को दोय दसवों अंश अच्छो चुन; 13अऊर हर एक मेंढी को बच्चा को संग अन्नभेट को रूप म तेल सी सान्यो हुयो एपा को दसवों अंश अच्छो चुन, उन सब ख अन्नभेट कर क् चढ़ाजो; ऊ सुखदायक सुगन्ध देन लायी होमबलि अऊर परमेश्वर लायी हवन ठहरेंन। 14अऊर उन्को संग चढ़ायो जान वालो दोय लीटर अंगूरीरस होना; मतलब बछड़ा को संग दोय लीटर अंगूरीरस, मेंढा को संग देढ़ लीटर अंगूरीरस, अऊर मेंढी को बच्चा को संग एक लीटर अंगूरीरस दियो जाये; साल को सब महीना म सी हर एक महीना ख याच होमबलि ठहरे। 15अऊर एक बकरा पापबलि कर क् परमेश्वर लायी चढ़ायो जाये; या नियमित होमबलि को अलावा ओको पेयबलि को संग चढ़ायो जाये।
फसह को पर्व को बलिदान
(लैव्यव्यवस्था २३:५-१४)
16“तब पहिलो महीना को चौदावों दिन ख यहोवा की फसह को पर्व हय। 17अऊर उच महीना को पन्द्रावों दिन एक त्यौहार मनायो करे; सात दिन तक चलय हय ऊ समय केवल अखमीरी रोटी खायी जाये। 18पहिलो दिन पवित्र सभा हो; अऊर ऊ दिन मेहनत को कोयी काम नहीं करयो जाये; 19ओको म तुम परमेश्वर लायी एक बलि, मतलब होमबलि चढ़ावो; अऊर दोय बछड़ा, एक मेंढा, अऊर एक एक साल को सात निर्दोष मेंढी को नर बच्चा होनो चाहिये; 20अऊर उन्को अन्नभेट जैतून को तेल सी सान्यो हुयो अच्छो चुन को होना; बछड़ा को संग एपा को तीन दसवों अंश, अऊर मेंढा को संग एपा को दोय दसवों अंश अच्छो चुन हो। 21अऊर सातों मेंढी को बच्चां म सी हर एक बच्चा को संग एपा को दसवों अंश चढ़ावो। 22अऊर एक बकरा भी पापबलि कर क् चढ़ावो, जेको सी तुम्हरो लायी पश्चाताप होयेंन। 23सुबेरे की होमबलि जो हमेशा की होमबलि ठहरी हय, ओको अलावा इन्क चढ़ावो। 24यो रीति सी तुम उन सातों दिनों म भी अग्निबलि को भोजन चढ़ावो, जो परमेश्वर ख सुखदायक सुगन्ध देन लायी होना; या हमेशा होमबलि अऊर ओको पेयबलि को अलावा चढ़ायो जाये। 25अऊर सातवों दिन भी तुम्हरी पवित्र सभा होयेंन; अऊर ऊ दिन मेहनत को कोयी काम मत करो।
कटनी को त्यौहार की भेंट
(लैव्यव्यवस्था २३:१५-२२)
26“फिर पहिली फसल को दिन म, जब तुम अपनी कटनी को त्यौहार म परमेश्वर लायी नयो अन्नभेट चढ़ावो, तब भी तुम्हरी पवित्र सभा होयेंन; अऊर मेहनत को कोयी काम मत करो। 27अऊर एक होमबलि चढ़ावो, जेको सी परमेश्वर लायी सुखदायक सुगन्ध होयेंन; मतलब दोय बछड़ा, एक मेंढा, अऊर एक एक साल को सात मेंढी को नर बच्चा; 28अऊर उन्को अन्नभेट जैतून को तेल सी सान्यो हुयो अच्छो चुन को होना; मतलब बछड़ा को संग एपा को तीन दसवों अंश, अऊर मेंढा को संग एपा को दोय दसवों अंश चढ़ावो, 29अऊर सातों मेंढी को बच्चां म सी एक एक बच्चा को संग एपा को दसवों अंश अच्छो चुन चढ़ावो। 30अऊर एक बकरा भी चढ़ावो, जेको सी तुम्हरो लायी पश्चाताप होयेंन। 31#व्यवस्थाविवरन १६:९-१२हि सब निर्दोष होना; अऊर हमेशा होमबलि अऊर ओकी अन्नभेट अऊर पेयबलि को अलावा येख भी चढ़ावो।
The Lodhi Bible © The Word for the World International and Lodhi Translation Samithi, Gondia, Maharashtra 2025