गिनती 26
26
इस्राएलियों की दूसरी जनगणना
1महामारी को बाद फिर परमेश्वर न मूसा अऊर हारून याजक को टुरा एलीआज़ार सी कह्यो, 2“इस्राएलियों की पूरी मण्डली म जितनो बीस साल को, यां ओको सी जादा उमर को हय, इस्राएल को उन सब लोगों की जो युद्ध म जान को लायक हंय, उन्को पूर्वजों को घराना को अनुसार गिनती करो।”
3तब मूसा अऊर एलीआज़ार याजक न यरीहो को जवर यरदन नदी को किनार पर मोआब को अराबा म उन्ख समझाय क कह्यो, 4“बीस साल को अऊर ओको सी जादा उमर को लोगों की गिनती लेवो, जसो कि परमेश्वर न मूसा अऊर इस्राएलियों ख मिस्र देश सी निकल आवन को समय आज्ञा दी होती।”
5रूबेन जो इस्राएल को बड़ो टुरा होतो; ओको हि टुरा होतो; मतलब हनोक, जेकोसी हमोकियों को कुल चल्यो; अऊर पल्लू, जेकोसी पल्लूइयों को कुल चल्यो; 6हेस्रोन, जेकोसी हेस्रोनियों को कुल चल्यो; अऊर कर्मी, जेकोसी कर्मियों को कुल चल्यो। 7रूबेनियों को कुल योच होतो; अऊर इन्म सी जो गिन्यो गयो हि तैंतालीस हजार सात सौ तीस आदमी होतो। 8अऊर पल्लू को टुरा एलीआब होतो। 9अऊर एलीआब को टुरा नमूएल, दातान, अऊर अबीराम होतो। हि उच दातान अऊर अबीराम आय जो सभासद होतो; अऊर जो समय कोरह की मण्डली न परमेश्वर सी झगड़ा करयो होतो, ऊ समय वा मण्डली म मिल क हि भी मूसा अऊर हारून सी झगड़ा करयो होतो; 10अऊर जब उन ढायी सौ आदमियों को आगी म भस्म होय जानो सी वा मण्डली मिट गयी, उच समय धरती न मुंह खोल क कोरह सहीत ओको अनुयायियों ख भी निगल लियो; अऊर हि सब मर गयो; अऊर हि लोगों लायी चेतावनी को चिन्ह बन गयो। 11पर कोरह को टुरा नहीं मरयो होतो।
12हि अपनो अपनो कुल को अनुसार शिमोन को टुरा होतो; मतलब नमूएल, जेकोसी नमूएलियों को कुल चल्यो; अऊर यामीन, जेकोसी यामीनियों को कुल चल्यो; अऊर याकीन, जेकोसी याकीनियों को कुल चल्यो; 13अऊर जेरह, जेकोसी जेरहियों को कुल चल्यो; अऊर शाऊल, जेकोसी शाऊलियों को कुल चल्यो। 14शिमोनियों को कुल योच होतो; इन्म सी बाविस हजार दोय सौ आदमी गिन्यो गयो।
15गाद को टुरा जिन्कोसी उन्को कुल निकल्यो हि यो होतो; मतलब सपोन, जेकोसी सपोनियों को कुल चल्यो; अऊर हाग्गी, जेकोसी हाग्गियों को कुल चल्यो; अऊर शूनी, जेकोसी शूनियों को कुल चल्यो; अऊर ओजनी, जेकोसी ओजनियों को कुल चल्यो; 16अऊर एरी, जेकोसी एरियों को कुल चल्यो; 17अऊर अरोद, जेकोसी अरोदियों को कुल चल्यो; अऊर अरेली, जेकोसी अरेलियों को कुल चल्यो। 18गाद को वंश को कुल योच होतो; इन्म सी चालीस हजार पाच सौ आदमी गिन्यो गयो।
19यहूदा को एर अऊर ओनान नाम को टुरा त भयो, पर हि कनान देश म मर गयो। 20अऊर यहूदा को जिन टुरावों सी उन्को कुल निकल्यो हि यो होतो; मतलब शेला, जेकोसी शेलियों को कुल चल्यो; अऊर पेरेस, जेकोसी पेरेसियों को कुल चल्यो; अऊर जेरह, जेकोसी जेरहियों को कुल चल्यो। 21अऊर पेरेस को टुरा हि होतो; हेस्रोन, जेकोसी हेस्रोनियों को कुल चल्यो; अऊर हामूल, जेकोसी हामूलियों को कुल चल्यो। 22यहूदियों को कुल योच होतो; इन्म सी छिहत्तर हजार पाच सौ आदमी गिन्यो गयो।
23इस्साकार को टुरा जिन्कोसी उन्को कुल निकल्यो हि यो होतो; तोला, जेकोसी तोलियों को कुल चल्यो; अऊर पुव्वा, जेकोसी पुव्वियों को कुल चल्यो; 24अऊर याशूब, जेकोसी याशूबियों को कुल चल्यो; अऊर शिम्रोन, जेकोसी शिम्रोनियों को कुल चल्यो। 25इस्साकारियों को कुल योच होतो; इन्म सी चौंसठ हजार तीन सौ आदमी गिन्यो गयो।
26जबूलून को टुरा जिन्कोसी उन्को कुल निकल्यो हि यो होतो; सेरेद, जेकोसी सेरेदियों को कुल चल्यो; अऊर एलोन जेकोसी एलोनियों को कुल चल्यो; अऊर यहलेल, जेकोसी यहलेलियों को कुल चल्यो। 27जबूलूनियों को कुल योच होतो; इन्म सी साठ हजार पाच सौ आदमी गिन्यो गयो।
28यूसुफ को टुरा जिन्कोसी उन्को कुल निकल्यो हि मनश्शे अऊर एप्रैम होतो।
29मनश्शे को टुरा यो होतो, माकीर, जेकोसी माकीरियों को कुल चल्यो; अऊर माकीर सी गिलाद पैदा भयो; गिलाद सी गिलादियों को कुल चल्यो। 30गिलाद को टुरा हि होतो; ईएजेर, जेकोसी ईएजेरियों को कुल चल्यो; अऊर हेलेक, जेकोसी हेलेकियों को कुल चल्यो; 31अऊर अस्रीएल, जेकोसी अस्रीएलियों को कुल चल्यो; अऊर शेकेम, जेकोसी शेकेमियों को कुल चल्यो; 32अऊर हेपेर, जेकोसी हेपेरियों को कुल चल्यो; अऊर शमीदा, जेकोसी शमीदियों को कुल चल्यो; 33अऊर हेपेर को टुरा सलोफाद ख टुरा नहीं, केवल टुरियां भयी; इन टुरियों को नाम महला, नोआ, होग्ला, मिल्का अऊर तिर्सा हंय। 34मनश्शे को कुल त योच होतो; अऊर इन्म सी जो गिन्यो गयो हि बावन हजार सात सौ आदमी होतो।
35एप्रैम को टुरा जिन्कोसी उन्को कुल निकल्यो हिच होतो; शूतेलह, जेकोसी शूतेलहियों को कुल चल्यो; अऊर बेकेर, जेकोसी बेकेरियों को कुल चल्यो; अऊर तहन, जेकोसी तहनियों को कुल चल्यो। 36अऊर शूतेलह को यो टुरा भयो; एरान, जेकोसी एरानियों को कुल चल्यो। 37एप्रैमियों को कुल योच होतो; इन्म सी बत्तीस हजार पाच सौ आदमी गिन्यो गयो।
अपनो कुलों को अनुसार यूसुफ को कुल को लोग योच होतो।
38बिन्यामीन को टुरा जिन्कोसी उन्को कुल निकल्यो हिच होतो; बेला जेकोसी बेलियों को कुल चल्यो; अऊर अशबेल, जेकोसी अशबेलियों को कुल चल्यो; अऊर अहीराम, जेकोसी अहीरामियों को कुल चल्यो; 39अऊर शपूपाम, जेकोसी शपूपामियों को कुल चल्यो; अऊर हूपाम, जेकोसी हूपामियों को कुल चल्यो। 40अऊर बेला को टुरा अर्द अऊर नामान होतो; तथा अर्द सी अर्दियों को कुल, अऊर नामान सी नामानियों को कुल चल्यो। 41अपनो कुलों को अनुसार बिन्यामीनी योच होतो; अऊर इन्म सी जो गिन्यो गयो हि पैंतालीस हजार छे सौ आदमी होतो।
42दान को टुरा जेकोसी उन्को कुल निकल्यो यो होतो; शूहाम, जेकोसी शूहामियों को कुल चल्यो। अऊर दान को कुल योच होतो। 43अऊर शूहामियों म सी जो गिन्यो गयो उन्को कुल म चौंसठ हजार चार सौ आदमी होतो।
44आशेर को टुरा जिन्कोसी उन्को कुल निकल्यो हिच होतो; यिम्रा, जेकोसी यिम्रियों को कुल चल्यो; यिश्री, जेकोसी यिश्रियों को कुल चल्यो; अऊर बरीआ, जेकोसी बरीइयों को कुल चल्यो। 45फिर बरीआ को यो टुरा भयो; हेबेर, जेकोसी हेबेरियों को कुल चल्यो; अऊर मल्कीएल, जेकोसी मल्कीएलियों को कुल चल्यो। 46अऊर आशेर की टुरी को नाम सेरह हय। 47आशेरियों को कुल योच होतो; इन्म सी त्रेपन हजार चार सौ आदमी गिन्यो गयो।
48नप्ताली को टुरा जिन्को सी उन्को कुल निकल्यो हिच होतो; मतलब यहसेल, जेको सी यहसेलियों को कुल चल्यो; अऊर गूनी, जेको सी गूनियों को कुल चल्यो : 49येसेर, जेकोसी येसेरियों को कुल चल्यो; अऊर शिल्लेम, जेकोसी शिल्लेमियों को कुल चल्यो। 50अपनो कुलों को अनुसार नप्ताली को कुल योच होतो; अऊर इन्म सी जो गिन्यो गयो हि पैंतालीस हजार चार सौ आदमी होतो।
51सब इस्राएलियों म सी जो गिन्यो गयो हिच होतो; छे लाख एक हजार सात सौ तीस आदमी होतो।
52फिर परमेश्वर न मूसा सी कह्यो, 53“इन्क, इन्की गिनती को अनुसार, वा जमीन इन्को भाग होन लायी बाट दी जाये। 54मतलब जो कुल म जादा होना उन्ख जादा हिस्सा, अऊर जेको म कम होना उन्ख कम हिस्सा देवो; हर एक कुल ख ओको भाग ओको गिन्यो हुयो लोगों को अनुसार दियो जाये। 55पर देश को बटवारा चिट्ठी डाल क करयो जाये; इस्राएलियों को पूर्वजों को एक एक कुल को नाम, जसो जसो निकलेंन वसो वसो हि अपनो हिस्सा पायेंन। 56चाहे बहुतों को हिस्सा होना चाहे थोड़ो को हिस्सा होना, जो जो हिस्सा बाट्यो जायेंन ऊ चिट्ठी डाल क बाट्यो जायेंन।”
57फिर लेवियों म सी जो अपनो कुलों को अनुसार गिन्यो गयो हिच आय; मतलब गेर्शोनियों सी निकल्यो हुयो गेर्शोनियों को कुल; कहात सी निकल्यो हुयो कहातियों को कुल; अऊर मरारी सी निकल्यो हुयो मरारियों को कुल। 58लेवियों को कुल यो आय; मतलब लिब्नियों को, हेब्रोनियों को, महलियों को, मूशियों को, अऊर कोरहियों को कुल। अऊर कहात सी अम्राम पैदा भयो। 59अऊर अम्राम की पत्नी को नाम योकेबेद हय, वा लेवी को कुल की होती जो लेवी को वंश म मिस्र देश म पैदा भयी होती; अऊर ओन अम्राम सी हारून अऊर मूसा अऊर ओकी बहिन मरियम ख भी जनम दियो होतो। 60#गिनती ३:२अऊर हारून सी नादाब, अबीहू, एलीआज़ार, अऊर ईतामार पैदा भयो। 61नादाब अऊर अबीहू ऊ समय मर गयो होतो, जब उन्न परमेश्वर को सामने अस्विकृत आगी चढ़ायी होती। 62सब लेवियों म सी जो गिन्यो गयो, मतलब जितनो आदमी एक महीना को या ओको सी जादा उमर को होतो, हि तेईस हजार होतो; हि इस्राएलियों को बीच येकोलायी नहीं गिन्यो गयो, कहालीकि उन्ख देश को कोयी हिस्सा नहीं दियो गयो होतो।
63मूसा अऊर एलीआज़ार याजक जिन्न मोआब को अराबा म यरीहो को जवर की यरदन नदी को किनार पर इस्राएलियों ख गिन लियो, उन्को गिन्यो हुयो लोग इतनोच होतो। 64पर जिन इस्राएलियों ख मूसा अऊर हारून याजक न सीनै को जंगल म गिन्यो होतो, उन्म सी एक भी आदमी यो समय को गिन्यो हुयो म नहीं होतो। 65कहालीकि परमेश्वर न उन्को बारे म कह्यो होतो, “हि जरूर जंगल म मर जायेंन।” येकोलायी यपुन्ने को टुरा कालेब अऊर नून को टुरा यहोशू ख छोड़ क, उन्म सी एक भी आदमी नहीं बच्यो।
The Lodhi Bible © The Word for the World International and Lodhi Translation Samithi, Gondia, Maharashtra 2025