ମୂଲୁ 45
45
ତାୟିୟାଁଣି ଜସେପ ପୁଣ୍ମ୍ବିକିହା କଡିନାୟି
1ଏଚେଟିଏ ଜସେପ ତାନି ଟଟତା ନିଚାମାଚି ଲ଼କୁ ନ଼କିତା ଜାହାରାଇଁ ସା଼ସା ଆ଼ହାଲି ଆ଼ଡାଆନା କାଜା ଗିୟାଁତଲେ ଏଲେଇଚେସି, “ନା଼ ତା଼ଣାଟି ବାରେ ଲ଼କୁଣି ପାଙ୍ଗାତା ପାଣ୍ତାଦୁ।” ଏଚେଟିଏ ଆମ୍ବାଆରି ଏ଼ୱାଣି ତଲେ ଡ଼ୟାଆଲିଏ, ଜସେପ ତାନି ତାୟିୟାଁ ନ଼କିତା ତା଼ନୁ ଆମ୍ବାଆସି ଇଞ୍ଜିହିଁ ଏଲେଇଚେସି। 2ଏ଼ୱାସି କାଜା ଗିୟାଁ ତଲେ ଇଲେକିଁ ଡ଼ୀତେସି, ମିସରତି ଲ଼କୁ, ଅ଼ଡ଼େ ପା଼ର ରାଜା ଇଜତି ଲ଼କୁ ଜିକେଏ ଏ଼ଦାଆଁ ୱେଚେରି। 3ଜସେପ ତାନି ତାୟିୟାଁଣି ଏଲେଇଚେସି, “ନା଼ନୁ ଜସେପତେଏଁ; ନା଼ ଆ଼ବା ନୀଏଁ ପାତେକା ନୀଡା ମାନେସି କି ?” ଏଚେଟିଏ ତାମି ତାୟିୟାଁ ତାନି ନ଼କିତା ଆଜିତାକି ଏ଼ନାଆଁୱା ୱେସାଲି ଆ଼ଡାଆତେରି। 4ଏଚେ଼ଟିଏ ଜସେପ ଏ଼ୱାରାଇଁ ଏଲେଇଚେସି, “ବାତିମା଼ଲି ମାଞ୍ଜାଇଁ ନା଼ ଡାଗେ ୱା଼ଦୁ।” ଏଚେଟିଏ ଏ଼ୱାରି ଡାଗେ ହାଜାଲିଏ, ଏ଼ୱାସି ଏଲେଇଚେସି, “ନା଼ନୁ ମୀ ତାୟି ଜସେପତେଏଁ, ଆମ୍ବାଆରାଇଁ ମୀରୁ ମିସରତା ହାଜିମାଚି ଲ଼କୁକି ପା଼ର୍ଚା ମାଚେରି। 5ସାମା ମୀରୁ ନାଙ୍ଗେ ଇମ୍ବାଆଁ ପା଼ର୍ତାତେରି ଈଦାଆଁ ତାକି ନୀଏଁ ଦୁକୁ, ଅ଼ଡ଼େ ମୀରୁ ମିଙ୍ଗେ ତାକି ବିଲ୍କି ଆ଼ଆଦୁ। ଇଚିହିଁ ମାହାପୂରୁ ମା଼ ଲ଼କୁତି ଜୀୱୁ ନୀଟ୍ହାଲି ମୀ ନ଼କିତା ନାଙ୍ଗେ ପାଣ୍ତାତେସି। 6ମେହ୍ଦୁ ନୀଏଁ ଦେ଼ସାତା କାର୍ୱୁ ଆ଼ହାଁ ରୀ ବାର୍ସା ଆ଼ହାମାନେ; ଅ଼ଡ଼େ ପା଼ସା ବାର୍ସା ବା଼କି ମାନେ, ଏ଼ ବିତ୍ରା ତା଼ସା କି ଆର୍ନା ଦା଼ଃନାୟି ଆ଼ଏ। 7ମାହାପୂରୁ ନାଙ୍ଗେ ମୀ ନ଼କିତା ଈଦାଆଁତାକି ପାଣ୍ତା ମାଞ୍ଜାନେସି, କି ମୀରୁ ଦାର୍ତିତା ନୀଡାହାଁ ଡ଼ୟିଦେରି, ଅ଼ଡ଼େ ମୀ ଜୀୱୁ ନୀଡିତିହିଁ ମୀ କୂଲୁ ଏ଼ପା ଆ଼ନେ। 8ଏ଼ଦାଆଁତାକି ମୀରୁ ନାଙ୍ଗେ ଇମ୍ବାଆଁ ପାଣ୍ତା ମାଞ୍ଜଅତେରି, ସାମା ମାହାପୂରୁ ପାଣ୍ତାମାଞ୍ଜାନେସି; ଏ଼ୱାସି ନାଙ୍ଗେ ପା଼ରତି ତାଞ୍ଜି ଅ଼ଡ଼େ ତାନି ଇଲୁତି କାଜାସି ଅ଼ଡ଼େ ବାରେ ମିସର ଦେ଼ସାତି ସା଼ଲୱି କିନାତେଏଁ କିହାମାଞ୍ଜାନେସି।”
9“ଏ଼ଦାଆଁତାକି ମୀରୁ ତବେ ହାଜାହାଁ ନା଼ ଆ଼ବାଇଁ ୱେହ୍ଦୁ, ନୀ ମୀର୍ଏସି ଜସେପ ଇଲେକିଁ ୱେସାମାଞ୍ଜାନେସି, ମାହାପୂରୁ ନାଙ୍ଗେ ବାରେ ମିସର ଦେ଼ସାତି ସା଼ଲୱି କିନାସି କିହାମାଞ୍ଜାନେସି; ମୀରୁ ୱେ଼ଡ଼ାକିଆନା ନା଼ ତା଼ଣା ୱା଼ଦୁ। 10ମୀରୁ ମୀ ମୀର୍କା ମା଼ସ୍କା, ତାଙ୍ଗା ମୀର୍କା ମା଼ସ୍କା, କ଼ଡି, ଗରି ମୀ ବାରେ ଦ଼ନ ତଲେ ଗ଼ସନ୍ ରା଼ଜିତା ବାସା କିହାଁ, ନା଼ ଡାଗେ ଡ଼ୟିଦେରି। 11ଏ଼ ଟା଼ୟୁତା ନା଼ନୁ ମିଙ୍ଗେ ପ଼ହିକିୟାଇଁ; ଇଚିହିଁ ଅ଼ଡ଼େ ପା଼ସା ବାର୍ସା କାର୍ୱୁ ମାନେ, ଆ଼ଆତିଁ ମୀରୁ ଅ଼ଡ଼େ ମୀ କୁଟମି ବାରେ କା଼କୁଲି ଆ଼ଦେରି।”
12“ମେହ୍ଦୁ ନା଼ ଗୂତି ମିଙ୍ଗେ ଈ କାତା ୱେସିମାଞ୍ଜାନେ, ଈଦାଆଁ ନା଼ କାନୁ ଅ଼ଡ଼େ ନା଼ ଊଣା ତାୟି ବିନ୍ୟାମିନ୍ତି କାନୁ ମେସିମାନେ। 13ଏ଼ଦାଆଁତାକି ମୀରୁ ଈ ମିସର ଦେ଼ସାତି ବାତ୍କୁତି ବା଼ଡ଼୍ୟୁ ଏ଼ନା ଏ଼ନାଆଁ ମେସିମାଞ୍ଜେରି ଏ଼ ବାରେ ନା଼ ଆ଼ବାଇଁ ୱେସାନା ଏ଼ୱାଣାଇଁ ତବେ ଇମ୍ବାଆଁ ତାଦୁ।”
14ଏଚେଟିଏ ଏ଼ୱାସି ତାନି ଊଣା ତାୟି ବିନ୍ୟାମିନ୍ତି ହେର୍କିତା ପମାହାଁ ଡ଼ୀତେସି; ବିନ୍ୟାମିନ୍ ଜିକେଏ ଏ଼ୱାଣି ହେର୍କିତା ପମାହାଁ ଡ଼ୀତେସି। 15ଇଞ୍ଜାଁ ଜସେପ ଏଟ୍କାତି ତାୟିୟାଁଇଁ ନଣ୍ତାହାଁ ଏ଼ୱାରାଇଁ ଆସାହାଁ ଡ଼ୀତେସି। ଏଚେଟିଏ ତାମି ତାୟିୟାଁ ଏ଼ୱାଣି ତଲେ କାତା ଆ଼ତେରି।
16ଏଚେଟିଏ ଜସେପତି ତାୟିୟାଁ ୱା଼ହାମାନେରି, ଲ଼କୁତି ଈ ହା଼ଡା ପା଼ରତି ଇଜ ୱେ଼ଙ୍ଗାଲିଏ, ପା଼ର ଅ଼ଡ଼େ ତାନି ହ଼ଲିୟାଙ୍ଗା ବାରେ ରା଼ହାଁ ଆ଼ତେରି। 17ଇଞ୍ଜାଁ ପା଼ର ଜସେପଇଁ ଏଲେଇଚେସି, “ନୀନୁ ମୀ ତାୟିୟାଁଣି ଏଲେଇନାମୁ, ‘ମୀରୁ ଈ କାମା କିଦୁ; ମୀ ଗା଼ଡ଼୍ଦେୟାଁଣା କା଼ଦି ଏ଼କ୍ହାଁ କିଣାନ ଦେ଼ସାତା ହାଜୁ। 18ଇଞ୍ଜାଁ ତାମି ଆ଼ବା ଅ଼ଡ଼େ ତାମି ଇଲୁ କୁଟମିତି ଆସାହାଁ ମା଼ ତା଼ଣା ୱା଼ପେରି। ମା଼ମ୍ବୁ ମିଙ୍ଗେ ମିସର ଦେ଼ସାତି ନେହିଁ ଟା଼ୟୁ ହିୟାନମି, ଅ଼ଡ଼େ ମୀରୁ ଦେ଼ସାତି ନେହା ନେହାଣି ଲେ଼ମ୍ବାଲି ଆ଼ଡିଦେରି। 19ନୀଏଁ ମା଼ ହୁକୁମି ତଲେ ଈ କାମା କିଦୁ, ମୀରୁ ନୀଏଁ ମୀ କକାରି ପ଼ଦାଁ ଅ଼ଡ଼େ ମୀ ଡକ୍ରିସିକାକି ମିସର ଦେ଼ସାଟି ସଗଡ଼ିକା ଅ଼ହିଁ ହାଜୁ ଇଞ୍ଜାଁ ମୀ ଆ଼ବାଇଁ ତାଚିହିଁ ୱା଼ଦୁ। 20ଅ଼ଡ଼େ ମୀ ଆ଼ସ୍ତିତି ଅଣ୍ପାଆଦୁ; ଇଚିହିଁ ମିସର ଦେ଼ସାତି ବାରେ ନେହିଁ ଆ଼ସ୍ତି ମୀଦି।’”
21ଏଚେଟିଏ ଜାକୁବତି ମୀର୍କା ଏଲେକିହିଁ କିତେରି; ଜସେପ ପା଼ର ରାଜା ହୁକୁମି ଲେହେଁ ଏ଼ୱାରାକି ସଗଡ଼ିକା, ଜିରୁତା ତିଞ୍ଜାଲି କା଼ଦି ହୀତେସି। 22ବାରେ ତାକି ର଼ ର଼ ଜ଼ଡ଼ୁ ବାସ୍ତେରିକା ହୀତେସି, ସାମା ବିନ୍ୟାମିନ୍କି ତୀନି ୱାଞ୍ଜା ସେକଲ#45:22 ୩.୫ କେ଼ଜି ୱେଣ୍ତି ଟାକାୟାଁ ଅ଼ଡ଼େ ପା଼ସା ଜ଼ଡ଼ୁ ବାସ୍ତେରି ହୀତେସି। 23ଇଞ୍ଜାଁ ତାମି ଆ଼ବାକି ମିସର ଦେ଼ସାତି ନେହିଁ ନେହିଁ ଦିଣ୍ସୁ ଏକ୍ହିଁ ଦସଗଟା ଗା଼ଡ଼୍ଦେୟାଁ ଅ଼ଡ଼େ ତିଞ୍ଜାଲି ଆର୍ନା, ରୂଟି, ଅ଼ଡ଼େ କା଼ଦି ଏକ୍ହାଁ ଦସଗଟା ଗା଼ଡ଼୍ଦେୟାଁ ପାଣ୍ତିତେସି। 24ଇଞ୍ଜାଁ ଏ଼ୱାସି ଏ଼ୱାରାଇଁ ଏଲେଇଚେସି, “ଜାଗ୍ରାତା ଜିରୁତା ଆସ୍ପି ଆ଼ଆଦୁ; ଇଲେକିଁ ଜସେପ ତାନି ତାୟିୟାଁଣି ହେଲ ହୀହାଁ ପାଣ୍ତାଲିଏ, ଏ଼ୱାରି ହାଚେରି।”
25ଏଚେଟିଏ ଏ଼ୱାରି ମିସର ଦେ଼ସାଟି ହାଜାହାଁ କିଣାନ ଦେ଼ସାତା ତାମି ଆ଼ବା ଜାକୁବ ତା଼ଣା ହାଚେରି। 26ଇଞ୍ଜାଁ ଏ଼ୱାରି ତାମି ଆ଼ବାଇଁ ଏଲେଇଚେରି, “ଜସେପ ନୀଏଁ ପାତେକା ନୀଡାମାନେସି, ଅ଼ଡ଼େ ଏ଼ୱାସି ମିସର ଦେ଼ସାତି ସା଼ଲୱି କିନାସି ଆ଼ହାମାନେସି।” ଏଚେଟିଏ ଜାକୁବ ହିୟାଁ ଆ଼ଟ୍ୱା ଆ଼ତେ ଅ଼ଡ଼େ ଏ଼ୱାରାଇଁ ନାମାଆତେସି।
27ଇଞ୍ଜାଁ ଜସେପ ଏଚେକା କାତା ଏ଼ୱାରାଇଁ ୱେସାମାଚେସି, ଏ଼ ବାରେ କାତା ତାମି ଆ଼ବାଇଁ ୱେସ୍ତେରି, ସାମା ଏ଼ୱାସି ଏଚେ଼ତା ତାଙ୍ଗେ ଅ଼ହାଲି ତାକି ଜସେପ ପାଣ୍ତାମାନି ସଗଡ଼ିକା ମେସ୍ତେସି, ଏଚିବେ଼ଲା ତାମି ଆ଼ବା ଜାକୁବତି ଜୀୱୁ ତୀରି ଆ଼ତେ। 28ଏଚେଟିଏ ଇସ୍ରାୟେଲ ଏଲେଇଚେସି, “ସାରି ଆ଼ତେ, ନା଼ ମୀର୍ଏସି ଜସେପ ନୀଞ୍ଜୁ ପାତେକା ନୀଡାମାନେସି; ନା଼ନୁ ହାଇଁ, ହା଼ନି ନ଼କେଏ ଏ଼ୱାଣାଇଁ ମେହ୍ଇଁ।”
Currently Selected:
ମୂଲୁ 45: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
