ମୂଲୁ 29
29
ଜାକୁବ ଲାବନ ଇଜ ଏନାୟି
1ଏଚେଟିଏ ଜାକୁବ ହାଜାହାଁ ୱେ଼ଡ଼ା ହ଼ପୁ ୱାକିତି ଲ଼କୁ ଦେ଼ସାତା ଏଗାହାଚେସି। 2ଏଚେଟିଏ ଏ଼ୱାସି ସିନିକିତେସି, ଅ଼ଡ଼େ ମେହ୍ଦୁ, ଗୁଡିୟାତା ର଼ କୁହି, ଇଞ୍ଜାଁ ମେହ୍ମୁ ତାନି ଡାଗେ ତୀନି ଗଚି ମେ଼ଣ୍ତାୟାଁ ମାନ୍ଦା ଡୂରାମାଚୁ; ଇଚିହିଁ ଲ଼କୁ ମେ଼ଣ୍ତାୟାଁ ମାନ୍ଦାତି ଏ଼ କୁହିଟି ଏ଼ୟୁ ଊଟ୍ନେରି; ଏ଼ କୁହି ଦୁୱେରିତା ର଼ କାଜା ୱାଲି ପ୍ଡିପ୍କି ଆ଼ହାଡ଼ୟିନେ। 3ଏ଼ କୁହି ଟଟତା ବାରେ ମାନ୍ଦା କୂଡ଼ାଆ଼ନୁ; ଅ଼ଡ଼େ, ଲ଼କୁ କୁହି ଦୁୱେରିଟି ୱାଲି ଗୁଚିକିହାଁ ମେ଼ଣ୍ତାୟାଁଣି ଏ଼ୟୁ ଊଟ୍ନେରି, ଇଞ୍ଜାଁ ଅ଼ଡ଼େ ୱେଣ୍ତେ କୁହି ଦୁୱେରିତା ଏ଼ ୱାଲି ସୁଣ୍ତା ପିହ୍ନେରି।
4ଜାକୁବ ଏ଼ୱାରାଇଁ ୱେଚେସି, “ଏ଼ ତାୟିୟାଁ, ମୀରୁ ଆମିନି ଟା଼ୟୁତି ଲ଼କୁ ?” ଏ଼ୱାରି ଏଲେଇଚେରି, “ମା଼ମ୍ବୁ ହାରଣ ଗା଼ଡ଼ାତି ଲ଼କୁ।”
5ଏ଼ଦାଆଁତାକି ଜାକୁବ ୱେଚେସି, “ମୀରୁ ନାହ଼ରତି ତାଙ୍ଗା ମୀର୍ଏସି ଲାବନଇଁ ପୁଞ୍ଜାମାଞ୍ଜେରି କି ?” ଏ଼ୱାରି ଏଲେଇଚେରି, “ମା଼ମ୍ବୁ ଏ଼ୱାଣାଇଁ ପୁଞ୍ଜାମାନମି।”
6ଜାକୁବ ୱେଚେସି, “ଏ଼ୱାସି ନେହିଁ ମାନେସି କି ?” ଏ଼ୱାରି ଏଲେଇଚେରି। “ନେହିଁ ମାନେସି; ଈଦି ସିନିକିମୁ ତାନି ମା଼ଙ୍ଗା ରାହେଲ ମେ଼ଣ୍ତାୟାଁ ମାନ୍ଦା ଆସାହାଁ ୱା଼ହିମାନେ।”
7ଏଚେଟିଏ ଜାକୁବ ଏଲେଇଚେସି, “ମେହ୍ଦୁ, ନୀଏଁ ହା଼ରେକା ବେ଼ଲା ମାନେ; ମେ଼ଣ୍ତାୟାଁ ମାନ୍ଦାତି କୂଡ଼ିକିନି ବେ଼ଲା ଆ଼ହାହିଲେଏ; ମୀରୁ ମେ଼ଣ୍ତାୟାଁଣି ଏ଼ୟୁ ଊଟ୍ହାଁ ୱେଣ୍ତେ ମେଚାଲି ଅ଼ଦୁ।”
8ସାମା ଏ଼ୱାରି ଏଲେଇଚେରି, “ମା଼ମ୍ବୁ ଏଲେକିହାଲି ଆ଼ଡଅମି; ବାରେ ମାନ୍ଦା କୂଡ଼ାଆ଼ହାଲି କା଼ଚାଲି ଆ଼ନେ; ଏଚେ଼ଟିଏ କୁହି ଦୁୱେରିଟି ୱାଲି ଗୁଚିକିୱି ଆ଼ନେ, ଆ଼ତିସାରେ ମା଼ମ୍ବୁ ମେ଼ଣ୍ତାୟାଁଣି ଏ଼ୟୁ ଊଟ୍ନମି।”
9ଜାକୁବ ଏ଼ୱାରି ତଲେ ଇଲେକିଁ କାତା ଆ଼ହିମାଚାଟି, ରାହେଲ ତାମି ଆ଼ବାତି ମେ଼ଣ୍ତାୟାଁ ତାଚିହିଁ ୱା଼ତେ, ଇଚିହିଁ ଏ଼ଦି ମେ଼ଣ୍ତାୟାଁ ଗ଼ଡ଼ୁ ମାଚେ। 10ଏଚିବେ଼ଲା ଜାକୁବ ତାମି ମା଼ମା ଲାବନତି ମା଼ଙ୍ଗା ରାହେଲନି ଅ଼ଡ଼େ ମା଼ମାତି ମେ଼ଣ୍ତାୟାଁ ମେସାହାଁ, ଡାଗେ ହାଜାହାଁ କୁହି ଦୁୱେରିତି ୱାଲି ଗୁଚିକିହାଁ, ତାମି ମା଼ମା ଲାବନତି ମେ଼ଣ୍ତାୟାଁଣି ଏ଼ୟୁ ଊଟ୍ହେସି। 11ଏଚେ଼ଟିଏ ଜାକୁବ ରାହେଲଇଁ ନଣ୍ତାହାଁ କାଜା ଗିୟାଁ ତଲେ ଡ଼ୀତେସି। 12ଜାକୁବ ତା଼ନୁଏ ତାମି ଆ଼ବାତି କୁଟମି ଅ଼ଡ଼େ ରିବିକା ମୀର୍ଏସି, ଈ କାତା ୱେସ୍ତେସି; ଏଚେଟିଏ ରାହେଲ ହଟିହିଁ ହାଜାହାଁ ତାମି ଆ଼ବାଇଁ କାବ୍ରୁ ୱେସ୍ତେ। 13ଏଚେ଼ଟିଏ ଲାବନ ତାନି ବାଣ୍ଞ୍ଜା ଜାକୁବତି କାବ୍ରୁ ୱେଞ୍ଜାହାଁ, ଏ଼ୱାଣାଇଁ ବେଟାଆ଼ହାଲି ହ଼ଟେସି, ଇଞ୍ଜାଁ, ଏ଼ୱାଣାଇଁ ପମିତେସି ଅ଼ଡ଼େ ନଣ୍ତାହାଁ ତାନି ଇଜ ଅ଼ତେସି; ଏଚେଟିଏ ଜାକୁବ ବାରେ କାବ୍ରୁ ଲାବନଇଁ ୱେସ୍ତେସି। 14ଏଚେଟିଏ ଲାବନ ଏଲେଇଚେସି, “ସାତେଏ, ନୀନୁ ନା଼ ନେତେରି ଅ଼ଡ଼େ ଊୟୁ।” ଏ଼ଦାଆଁତାକି ଜାକୁବ ଲାବନ ଇଜ ର଼ ଲେ଼ଞ୍ଜୁ ଡ଼ୟିତେସି।
ଜାକୁବ ରାହେଲ ଅ଼ଡ଼େ ଲେୟାନି ବୀହା
15ଏଚେଟିଏ ଲାବନ ଜାକୁବଇଁ ଏଲେଇଚେସି, “ନୀନୁ ନା଼ କୁଟମିତି ଲ଼କୁ ଇଞ୍ଜିଁ କୂଲି ହିଲାଆନା ନା଼ ହ଼ଲିୟା କାମା କିଦି କି ? ଈଦାଆଁତାକି ଏ଼ନି କୂଲି ଅ଼ଦି ? ଏ଼ଦାଆଁ ୱେସ୍ତାମୁ।” 16ଏ଼ ଲାବନକି ରୀ ମା଼ସ୍କା ମାଚୁ; କାଜାଣି ଦ଼ରୁ ଲେୟା, ଅ଼ଡ଼େ ଊଣା ଦ଼ରୁ ରାହେଲ। 17ଲେୟା ସେରି ମାଚେ, ସାମା ରାହେଲ ଅ଼ଜିତାୟି ଅ଼ଡ଼େ ନେହିକିଁ ତ଼ଞ୍ଜାଆ଼ହିମାଚେ।
18ଅ଼ଡ଼େ ଜାକୁବ ରାହେଲଇଁ ଜୀୱୁ ନ଼ତେସି; ଏ଼ଦାଆଁତାକି ଏ଼ୱାସି ଏଲେଇଚେସି, “ନା଼ନୁ ନୀ ଊଣା ମା଼ଙ୍ଗା ରାହେଲ ତାକି ସା଼ତା ବାର୍ସା ଗତି କାମାକିଇଁ।”
19ଏଚେଟିଏ ଲାବନ ଏଲେଇଚେସି, “ଏଟ୍କା ମାଣ୍ସିକି ହୀନି କିହାଁ ନିଙ୍ଗେ ହିୟାନାୟି ହା଼ରେକା ନେହେଁ; ନା଼ ତା଼ଣା ଡ଼ୟାମୁ।” 20ଇଲେକିଁ ଜାକୁବ ସା଼ତା ବାର୍ସା ଗତି କାମା କିତେସି; ଇଞ୍ଜାଁ ରାହେଲ ତାକି ଇଲେତି ଜୀୱୁ ମାଚେ, ଏ଼ ସା଼ତା ବାର୍ସା ଅଲ୍ପ ଦିନା ଲେହେଁ ଆ଼ତେ। 21ଏଚେ଼ଟିଏ ଜାକୁବ ଲାବନଇଁ ଏଲେଇଚେସି, “ନା଼ ଗତି ପୂରା ଆ଼ତେ; ନୀଏଁ ନୀ ମା଼ଙ୍ଗା ରାହେଲନି ନାଙ୍ଗେ ହିୟାମୁ ନା଼ନୁ ଏ଼ଦାନି ତଲେ ବୀହା ଆ଼ଇଁ।”
22ଏଚେଟିଏ ଲାବନ ଏ଼ ଟା଼ୟୁତି ବାରେ ଲ଼କୁଣି ରୁଣ୍ତା କିହାଁ ବ଼ଜି କିତେସି। 23ସାମା ଲା଼ଆଁୟାଁ ବେ଼ଲାତା ଏ଼ୱାସି ତାନି ମା଼ଙ୍ଗା ଲେୟାନି ଜାକୁବ ତା଼ଣା ତାତେସି; ଇଞ୍ଜାଁ ଜାକୁବ ଲେୟା ତଲେ ଡୂରିତେସି। 24ଅ଼ଡ଼େ ଲାବନ ତାନି ମା଼ଙ୍ଗା ଲେୟାତି ହ଼ଲେଣି ଆ଼ହାଲି ସିଲ୍ପା ଇନି ତାନି ହ଼ଲେଣି ହୀତେସି। 25ସାମା ଲା଼ଇ ୱେ଼ୟାଲିଏ, ମେହ୍ଦୁ, ଏ଼ଦି ଲେୟା! ଏଚେଟିଏ ଜାକୁବ ଲାବନଇଁ ଏଲେଇଚେସି, “ନୀନୁ ନା଼ ତଲେ ଏ଼ନାଆଁତାକି ଇଲେ କିୟାତି ? ନା଼ନୁ ଏ଼ନାଆଁ ରାହେଲ ତାକି ଗତି କାମା କିହାହିଲଅଁ; ଆତିହିଁ ଏ଼ନାଆଁତାକି ନାଙ୍ଗେ ନା଼ଡ଼ିକିୟାତି ?”
26ଏଚେଟିଏ ଲାବନ ଏଲେଇଚେସି, “ପା଼ଣ୍ୱା ମା଼ଙ୍ଗା ମାଞ୍ଜା ମାଞ୍ଜାହାଁ ଊଣା ମା଼ଙ୍ଗାନି ବୀହା କିନାୟି ମା଼ ଦେ଼ସାତି ମେ଼ରା ହିଲେଏ। 27ଈ ୱା଼ରା ପୂରା କିମୁ, ଏଚେ଼ଟିଏ ଅ଼ଡ଼େ ସା଼ତା ବାର୍ସା ନା଼ ଗତି କାମା କିତିସାରେ, ରାହେଲନି ଜିକେଏ ନିଙ୍ଗେ ହିୟାଇଁ।”
28ଏଚେଟିଏ ଜାକୁବ ଏଲେକିହିଁଏ ଏ଼ ୱା଼ରା ପୂରା କିତେସି; ଏଚେଟିଏ ଲାବନ ଏ଼ୱାଣି ତଲେ ତାନି ମା଼ଙ୍ଗା ରାହେଲଇଁ ବୀହା କିତେସି। 29ଇଞ୍ଜାଁ ରାହେଲତି ହ଼ଲେଏଣି ଆ଼ହାଲି ତାକି ଏ଼ୱାସି ତାନି ବିଲ୍ହା ଇନି ହ଼ଲେଣି ହୀତେସି। 30ଏଚେଟିଏ ଏ଼ୱାସି ରାହେଲ ତଲେ ଜିକେଏ ଡୁରିତେସି, ଅ଼ଡ଼େ ଲେୟାକିହାଁ ରାହେଲଇଁ ହା଼ରେକା ଜୀୱୁ ନ଼ତେସି; ରାହେଲ ତାକି ଅ଼ଡ଼େ ସା଼ତା ବାର୍ସା ଗତି କାମା କିତେସି।
ଜାକୁବତି ମୀର୍କା ମା଼ସ୍କା
31ଏଚେଟିଏ ପ୍ରବୁ ଲେୟାନି ହୀଣି କିନାଣି ମେସାହାଁ, ଏ଼ଦାନି କକାରି ପ଼ଦାଁ ଆୟାଲି ବା଼ଡ଼୍ୟୁ ହୀତେସି, ସାମା ରାହେଲ ବା଼ଞ୍ଜେଣି ଆ଼ତେ। 32ଏଚେଟିଏ ଲେୟା ପୂରାମା଼ସା ଆ଼ହାଁ ମୀର୍ଏଣାଇଁ ଜାର୍ନି କିହାଲିଏ, ଏ଼ୱାଣି ଦ଼ରୁ ରୁବେନ୍#29:32 ମୀର୍ଏଣାଇଁ ମେହ୍ମୁ ଇଟିତେ; ଇଚିହିଁ ଏ଼ଦି ଏଲେଇଚେ, “ପ୍ରବୁ ନା଼ ଦୁକୁ ମେସାମାନେସି; ନୀଏଁ ନା଼ ଡକ୍ରା ନାଙ୍ଗେ ଜୀୱୁ ନ଼ୟାଁନେସି।” 33ଇଞ୍ଜାଁ ଏ଼ଦି ଅ଼ଡ଼େ ୱେଣ୍ତେ ପୂରାମା଼ସା ଆ଼ହାଁ ମୀର୍ଏଣାଇଁ ଜାର୍ନି କିହାଁ ଏଲେଇଚେ, “ନା଼ନୁ ହୀଣି ଗାଟାତେଏଁ, ପ୍ରବୁ ଈଦାଆଁ ୱେଞ୍ଜାହାଁ ନାଙ୍ଗେ ଈ ମୀର୍ଏଣାଇଁ ହିୟାତେସି।” ଇଞ୍ଜାଁ ଏ଼ୱାଣି ଦ଼ରୁ ସିମିୟନ#29:33 ୱେନାସି ଇଟିତେ। 34ଅ଼ଡ଼େ ୱେଣ୍ତେ ଏ଼ଦି ପୂରାମା଼ସା ଆ଼ହାଁ ମୀର୍ଏଣାଇଁ ଜାର୍ନି କିହାଁ ଏଲେଇଚେ, “ନୀଏଟି ନା଼ ଡକ୍ରା ନା଼ ତା଼ଣା ଡ଼ୟିନେସି, ଇଚିହିଁ ନା଼ନୁ ତାନି ତୀନି ଜା଼ଣା ମୀର୍କା ଜାର୍ନି କିହାମାଇଁ;” ଏ଼ଦାଆଁତାକି ଏ଼ୱାଣି ଦ଼ରୁ ଲେ଼ବି#29:34 ଜୂପ୍କା ଇଟିତେ। 35ଏଚେଟିଏ ଏ଼ଦି ଅ଼ଡ଼େ ୱେଣ୍ତେ ପୂରାମା଼ସା ଆ଼ହାଁ ମୀର୍ଏଣାଇଁ ଜାର୍ନି କିହାଁ ଏଲେଇଚେ, “ନୀଏଟି ନା଼ନୁ ପ୍ରବୁତି ଜହରା କିଇଁ।” ଏ଼ଦାଆଁତାକି ଏ଼ଦି ଏ଼ୱାଣି ଦ଼ରୁ ଜୀହୁଦା#29:35 ପ୍ରବୁତି ଜହରା ଇଟିତେ। ଏଚେଟିଏ ଏ଼ଦି କକାରି ପ଼ଦାଁ ଆ଼ହାଲି ମୁଟ୍ହେ।
Currently Selected:
ମୂଲୁ 29: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
