ମୂଲୁ 16
16
ହାଗାର ଅ଼ଡ଼େ ଇସ୍ମାୟେଲ
1ଅବ୍ରାମ ଡକ୍ରି ସାରି କକାରି ପ଼ଦାୟାଁ ହିଲାଆଗାଟାୟି, ଇଞ୍ଜାଁ, ହାଗାର ଇନି ମିସର ଦେ଼ସାତି ର଼ ହ଼ଲେଣି ମାଚେ। 2ଏଚେଟିଏ ସାରି ଅବ୍ରାମଇଁ ଏଲେଇଚେ, “ମେହ୍ମୁ, ପ୍ରବୁ ନାଙ୍ଗେ ବା଼ଞ୍ଜେଣି କିହାମାଞ୍ଜାନେସି, ଏ଼ଦାଆଁତାକି ନୀନୁ ନା଼ ହ଼ଲେଣି ତଲେ ଡୂରାମୁ; ଏ଼ନାଆଁତାକି ଇଚିହିଁ ଈଦାନି ୱାକିଟି ନା଼ନୁ ମୀର୍ଏଣାଇଁ ବେଟାଆ଼ଇଁ।” ଏଚେଟିଏ ଅବ୍ରାମ ସାରିନି କାତା ଆସ୍ତେସି। 3ଅବ୍ରାମ କିଣାନ ଦେ଼ସାତା ଦସ ବାର୍ସା ଡ଼ୟିତି ଡା଼ୟୁ ଅବ୍ରାମତି ଡକ୍ରି ସାରି ତାନି ମିସରତି ହ଼ଲେଣି ହାଗାରନି ଅ଼ହାଁ ତାନି ଡକ୍ରା ଅବ୍ରାମ ତଲେ ବୀହା କିତେ। 4ଏଚେଟିଏ ଅବ୍ରାମ ହାଗାର ତଲେ ଡୂରାଲିଏ ଏ଼ଦି ପୂରାମା଼ସା ଆ଼ତେ; ଅ଼ଡ଼େ ହାଗାର ପୂରାମା଼ସା ଆ଼ହାମାଇଁ ଇଞ୍ଜିଁ ପୁଞ୍ଜାହାଁ ତାନି ତ଼ଡ଼ା ସାରିନି ହୀଣି ମେସ୍ତେ।
5ଏଚେଟିଏ ସାରି ଅବ୍ରାମଇଁ ଏଲେଇଚେ, “ନା଼ ତାକି ଆ଼ହାମାନି ଈ ଲାଗେଏତି କାମା ନିଙ୍ଗେ ଆୟାପେ; ନା଼ନୁ ନା଼ ହ଼ଲେଣିନି ନିଙ୍ଗେ ହିୟାତେଏଁ, ଏ଼ଦି ତା଼ନୁ ପୂରାମା଼ସା ମାନାଣି ପୁଞ୍ଜାହାଁ, ନାଙ୍ଗେ ହୀଣି ମେସି ମାଞ୍ଜାନେ; ପ୍ରବୁ ନିଙ୍ଗେ ଅ଼ଡ଼େ ନାଙ୍ଗେ ବିଚାରା କିୟାପେସି।”
6ଏଚେଟିଏ ଅବ୍ରାମ ସାରିନି ଏଲେଇଚେସି, “ମେହ୍ମୁ ନୀ ହ଼ଲେଣି ନୀ କେୟୁତା ମାନେ; ନିଙ୍ଗେ ଏ଼ନାୟି ନେହିଁ ହ଼ତାନେ ଏଲେକିହିଁ ଏ଼ଦାନି ଲେ଼ମ୍ବାମୁ।” ଏଚେଟିଏ ସାରି ହାଗାରନି ହା଼ରେକା ସା଼ଦି କିହାଲିଏ, ଏ଼ଦି ଏ଼ଦାନି ତା଼ଣାଟି ହଟେ।
7ଏଚେଟିଏ ପ୍ରବୁତି ଦୂତୁ ଜା଼ଡ଼ାତି ର଼ ଜାର୍ଣା ଦାରିତା ଇଚିହିଁ, ସୁରତି ଜିରୁତା ଏମିନି ଜାର୍ଣା ମାନେ ଏ଼ ଦାରିତା ଏ଼ଦାନି ମେସାହାଁ ଏଲେଇଚେ, 8“ଏ଼ ସାରିନି ହ଼ଲେଣି ହାଗାର, ନୀନୁ ଆମ୍ବିଟି ୱା଼ତି ? ଅ଼ଡ଼େ ଆମ୍ବିୟା ହାଜି ?” ଏଚେଟିଏ ଏ଼ଦି ଏଲେଇଚେ, “ନା଼ନୁ ନା଼ ତ଼ଡ଼ା ସାରି ତା଼ଣାଟି ହଟିମାଇଁ।”
9ଏଚିବେ଼ଲା ପ୍ରବୁତି ଦୂତୁ ଏ଼ଦାନି ଏଲେଇଚେ, “ନୀନୁ ନୀ ତ଼ଡ଼ାନି ତା଼ଣା ୱେଣ୍ତା ହାଜାହାଁ ମା଼ନି ମାଣ୍କି ତଲେ ଏ଼ଦାଣି ତା଼ଣା ମାନାମୁ।” 10ପ୍ରବୁତି ଦୂତୁ ଅ଼ଡ଼େ ଏଲେଇଚେ, “ନା଼ନୁ ନୀ କୂଡ଼ାତି ଇଲେକିଁ ଏ଼ପାକିଇଁ, ଏ଼ୱାରି ହା଼ରେକା ତାକି ଏଜିକିହାଲି ଆ଼ଅରି।” 11ପ୍ରବୁତି ଦୂତୁ ଅ଼ଡ଼େ ଏଲେଇଚେ, “ମେହ୍ମୁ ନୀନୁ ପୂରାମା଼ସା ଆ଼ହାମାଞ୍ଜି, ନୀନୁ ର଼ କକାଣାଇଁ ଜାର୍ନି କିଦି, ଏ଼ୱାଣି ଦ଼ରୁ ଇସ୍ମାୟେଲ#16:11 ଇଚିହିଁ ମାହାପୂରୁ ୱେନାସି ଇଟାମୁ, ଇଚିହିଁ ପ୍ରବୁ ନୀ ଦୁକୁ ୱେଞ୍ଜାମାନେସି। 12ଇଞ୍ଜାଁ, ଏ଼ୱାସି ମାଣ୍ସିୟାଁ ବିତ୍ରା ଜା଼ଡ଼ାତି ଗା଼ଡ଼୍ଦେ ଲେହେଁ ନୀଡିନେସି; ଏ଼ୱାଣି କେୟୁ ବାରେତି କ଼ପାଟି ଅ଼ଡ଼େ ବାରେତି କେୟୁ ଏ଼ୱାଣି କ଼ପାଟି ଡ଼ୟିନେ, ଏ଼ୱାସି ତାନି ତାୟିୟାଁ ତା଼ଣା ବାସା କିନେସି।”
13ଅ଼ଡ଼େ ହାଗାର ତାନି ତଲେ କାତା ଆ଼ହିମାନି ପ୍ରବୁତି ଦ଼ରୁ ଏଲ୍-ରୟି#16:13 ମାହାପୂରୁ ମେହ୍ନାସି; ଇଚିହିଁ ଏ଼ଦି ଏଲେଇଚେ, “ଆମ୍ବାଆସି ନାଙ୍ଗେ ମେସ୍ତାନେସି ଏ଼ୱାଣାଇଁ ମେସ୍ତି ଡା଼ୟୁ ନା଼ନୁ କି ଅ଼ଡ଼େ ନୀଡିଇଁ!” 14ଏ଼ଦାଆଁତାକି ଏ଼ କୁହିତି ଦ଼ରୁ ବେର-ଲହୟ-ରୟି#16:14 ନାଙ୍ଗେ ମେସ୍ତାତି ଜୀୱୁ ଗାଟି କୁହି ଇଟିତେ। ଏ଼ କୁହି କାଦେସ ଅ଼ଡ଼େ ବେରଦ ମାଦି ମାନେ।
15ଏଚେଟିଏ ହାଗାର ଅବ୍ରାମ ତାକି ମୀର୍ଏଣାଇଁ ଜାର୍ନି କିତେ, ଅ଼ଡ଼େ ଅବ୍ରାମ ହାଗାର ତା଼ଣାଟି ଜାର୍ନା ଆ଼ତି ଏ଼ ମୀର୍ଏଣା ଦ଼ରୁ ଇସ୍ମାୟେଲ ଇଟିତେସି। 16ହାଗାର ଇସ୍ମାୟେଲ ଜାର୍ନାଆ଼ତି ବେ଼ଲାତା ଅବ୍ରାମକି ସା଼ରି କ଼ଡ଼ି ସ଼ବାର୍ସା ଆ଼ହାମାଚେ।
Currently Selected:
ମୂଲୁ 16: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
