ହାନାୟି 33
33
ସିନୟ ହ଼ରୁ ପିସାଲି ହୁକୁମି
1ଈଦାଣି ଡା଼ୟୁ ପ୍ରବୁ ମ଼ସାଇଁ ଏଲେଇଚେସି, ନା଼ନୁ ଅବ୍ରାହାମ, ଇସାହାକ ଅ଼ଡ଼େ ଜାକୁବ ତା଼ଣା ପାର୍ମାଣା କିହାଁ ଏମିନି ଦେ଼ସାତି କାତା ୱେସାମାଚେଏଁ, ମୀ କୂଡ଼ା ତାକି ଈ ଦେ଼ସା ହୀଇଁ, ଏ଼ ଦେ଼ସାତା ହାଜାଲି ମୀରୁ ଅ଼ଡ଼େ ମିସରଟି ୱା଼ହାମାନି ଲ଼କୁ ଈ ଟା଼ୟୁଟି ହାଜୁ; 2ନା଼ନୁ ମୀ ନ଼କି ନ଼କିତା ର଼ ଦୂତୁଇଁ ପାଣ୍ତାଇଁ; ଇଞ୍ଜାଁ ନା଼ନୁ କିଣାନିୟ, ଇମରିୟ, ହୀତିୟ, ପରିସିୟ, ହିବିୟ ଅ଼ଡ଼େ ଜିବୁସିୟ ଲ଼କୁଣି ପେ଼ର୍ହାତୁହ୍ଇଁ। 3ଈଦାଆଁତାକି ଏ଼ ପା଼ଲୁ, ଅ଼ଡ଼େ କିର୍ୟାଁ ମାନି ଦେ଼ସାତା ହାଜୁ; ସାମା ନା଼ନୁ ମୀ ତଲେ ହାଲଅଁ; ନା଼ନୁ ମୀ ତଲେ ହାଚିହିଁ ଜିରୁତା ମିଙ୍ଗେ ପା଼ୟାଇଁ, ଏ଼ନିଇଚିହିଁ ମୀରୁ କାତା ମା଼ନୱି ଆ଼ଆଗାଟାତେରି।
4ଲ଼କୁ ଈ ଲାଗେଏତି କାତା ୱେଞ୍ଜାହାଁ ଦୁକୁ କିତେରି; ଆମ୍ବାଆରି ତାମି ଆଙ୍ଗାତା ବାଂଗାରା ସାଜୁ ତୁର୍ଆତେରି। 5ଇଚିହିଁ ପ୍ରବୁ ମ଼ସାଇଁ ଏଲେଇଞ୍ଜା ମାଚେସି, “ନୀନୁ ଇସ୍ରାୟେଲ ଲ଼କୁଣି ଈ କାତା ୱେହ୍ମୁ, ମୀରୁ କାତା ମା଼ନୱି ଆ଼ଆଗାଟାତେରି; ନା଼ନୁ ହାବୁ ମୀ ତଲେ ଗା଼ଡ଼େକା ତାକି ହାଇଁ ଆତିହିଁ ମିଙ୍ଗେ ନା଼ସା କିୟାଇଁ; ମୀରୁ ନୀଏଁ ମୀ ଆଙ୍ଗାଟି ସାଜୁ ହେକ କିଦୁ, ମିଙ୍ଗେ ତାକି ଏ଼ନାଆଁ କିହାଲି ଆ଼ନେ ଏ଼ଦାଆଁ ପୁଞ୍ଜେରି।” 6ଏଚେଟିଏ ଇସ୍ରାୟେଲ ଲ଼କୁ ହରେବ୍ ହ଼ରୁଟି ହାଜି ହାଜିହିଁ ତାମି ତାମି ବାରେ ବାଂଗାରାତି ସାଜୁ ହେକ କିତେରି।
ଆଣ୍ତ୍ୱିଆ଼ନି ତୂମୁ
7ଏଚିବେ଼ଲା ଇଲେକିଁ ମାଚେ କି, ମ଼ସା ତାନି ତୂମୁ ଅ଼ହାଁ ସାହ୍ଡ଼ାତି ପାଙ୍ଗାତା ଇଚିହିଁ ଲ଼କୁ ତା଼ଣାଟି ହେକ ଗ଼ଞ୍ଜିତେସି ଅ଼ଡ଼େ ତାନି ଦ଼ରୁ ଆଣ୍ତ୍ୱିଆ଼ନି ତୂମୁ ଇଟିତେସି। ପ୍ରବୁଇଁ ପାରିନି ବାରେ ଜା଼ଣା ପାଙ୍ଗାତା ମାନି ଏ଼ ଆଣ୍ତ୍ୱିଆ଼ନି ତୂମୁତା ହାନେରି। 8ଇଞ୍ଜାଁ, ଇଲେକିଁ ଗଟୱି ଆ଼ତେ କି, ମ଼ସା ପାଙ୍ଗାତା ହ଼ଚାହାଁ ତୂମୁତା ହାନି ବେ଼ଲା ବାରେ ଲ଼କୁ ନିଙ୍ଗାହାଁ ଜାହା ଜାହାରା ତୂମୁ ଦୁୱେରିତା ନିତେରି, ଅ଼ଡ଼େ ଏଚିବେ଼ଲା ପାତେକା ମ଼ସା ଏ଼ ତୂମୁତା ହ଼ଡ଼୍ଆତେସି, ଏଚିବେ଼ଲା ପାତେକା ଏ଼ୱାରି ଏ଼ୱାଣାଇଁ ସିନିକିହିଁ ଡ଼ୟିତେରି। 9ଏଚେଟିଏ ମ଼ସା ତୂମୁତା ହ଼ଡାଲିଏ, ଦୂନ୍ଦ୍ରା ରେ଼ଚା ୱା଼ହାଁ ତୂମୁ ଦୁୱେରିତା ଡ଼ୟିତେ; ଏଚେଟିଏ ପ୍ରବୁ ମ଼ସା ତଲେ କାତା ଆ଼ତେସି। 10ତୂମୁ ଦୁୱେରିତା ମାନି ଦୂନ୍ଦ୍ରା ମେସାଲିଏ, ବାରେ ଲ଼କୁ ଜାହା ଜାହାରା ତୂମୁ ଦୁୱେରିତା ମାଞ୍ଜାହାଁ ଜହରା କିତେରି। 11ମାଣ୍ସି ଏ଼ନିକିଁ ତ଼ଣେ ତଲେ କାତା ଆ଼ନେସି, ଏଲେକିହିଁଏ ପ୍ରବୁ ଅ଼ଡ଼େ ମ଼ସା କାତା ଆ଼ତେରି; ଏଚେଟିଏ ମ଼ସା ତାନି ତୂମୁତା ୱେଣ୍ତା ୱା଼ତେସି, ସାମା ନୂନ ମୀର୍ଏସି ଜିହସୁୟ ଦ଼ରୁତି ତାନି ସେ଼ବା କିନି ଦାଂଗ୍ଣେଏସି ତୂମୁ ବିତ୍ରାଟି ହାଲାଆତେସି।
ମ଼ସା ବାତିମା଼ଲିନାୟି
12ଏଚେଟିଏ ମ଼ସା ପ୍ରବୁଇଁ ଏଲେଇଚେସି, “ମେହ୍ମୁ, ନୀନୁ ଈ ଲ଼କୁଣି ଅୟାଲି ତାକି ନାଙ୍ଗେ ଏଲେଇଞ୍ଜିମାଞ୍ଜାଦି; ସାମା ନୀନୁ ନା଼ ତଲେ ଆମ୍ବାଆରାଇଁ ପାଣ୍ତାଦି, ଈଦାଆଁ ନୀନୁ ନାଙ୍ଗେ ୱେସାମାଞ୍ଜଅତି। ଆ଼ତି ଜିକେଏ ନୀନୁ ଏଲେଇଞ୍ଜିମାଞ୍ଜାଦି, ନା଼ନୁ ଦ଼ରୁ ତଲେ ନିଙ୍ଗ ପୁଞ୍ଜାମାଞ୍ଜାଇଁ ଅ଼ଡ଼େ ନୀନୁ ନା଼ କାନୁତା କାର୍ମା ବେଟାଆ଼ନାତି ଆ଼ହାମାଞ୍ଜି। 13ନା଼ନୁ ନୀ କାନୁତା କାର୍ମା ବେଟାଆ଼ନାତେଏଁ ଆ଼ହାମାଇଁ, ଆତିହିଁ ବାତିମା଼ଲି ମାଞ୍ଜାଇଁ, ନା଼ନୁ ନୀ କାନୁତା କାର୍ମା ବେଟାଆ଼ହାଲି ତାକି ଏ଼ନିକିଁ ନିଙ୍ଗେ ପୁଞ୍ଜାଲି ଆ଼ଡାଇଁ, ଏ଼ଦାଆଁତାକି ନୀନୁ ନାଙ୍ଗେ ନୀ ଜିରୁ ତ଼ସ୍ତାମୁ; ଇଞ୍ଜାଁ, ଈ କୂଡ଼ାତାରି ନୀ ଲ଼କୁ, ଈଦାଆଁ ଅଣ୍ପାମୁ।”
14ଏଚିବେ଼ଲା ପ୍ରବୁ ଏଲେଇଚେସି, “ନା଼ନୁ ନୀ ତଲେ ହାଇଁ, ଇଞ୍ଜାଁ ନା଼ନୁ ନିଙ୍ଗେ ଜ଼ମିକିୟାଇଁ।”
15ଏଚେଟିଏ ମ଼ସା ପ୍ରବୁଇଁ ଏଲେଇଚେସି, “ନୀନୁ ମା଼ ତଲେ ହାଲଅତି, ଆତିହିଁ ଈ ଟା଼ୟୁଟି ମାଙ୍ଗେ ଅ଼ହିଁ ହାଜାଆନି। 16ଇଚିହିଁ ନା଼ନୁ ଅ଼ଡ଼େ ନୀ ଈ ଲ଼କୁ ନୀ କାନୁତା କାର୍ମା ବେଟାଆ଼ହାମାନମି, ଈଦି ନୀଏଁ ଏ଼ନିକିଁ ପୁଣ୍ମ୍ବି ଆ଼ନେ ? ଏ଼ନିକିଁ ନା଼ନୁ ଅ଼ଡ଼େ ନୀ ଈ ଲ଼କୁ ଦାର୍ତିତି ବାରେ ଲ଼କୁ କିହାଁ ନୀ ଆ଼ଚିତି ଲ଼କୁ ଆ଼ନମି, ମା଼ ତଲେ ନୀ ୱା଼ହିମାନାଣି ତଲେ ପୁଣ୍ମ୍ବି ଆ଼ନେ।”
17ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, “ଈ ଏମିନି କାତା ନୀନୁ ୱେସାମାଞ୍ଜି, ଏ଼ଦାଆଁ ନା଼ନୁ କିଇଁ, ଏ଼ନିଇଚିହିଁ ନୀନୁ ନା଼ କାନୁତା କାର୍ମା ବେଟାଆ଼ହାମାଞ୍ଜି, ଇଞ୍ଜାଁ, ନା଼ନୁ ନିଙ୍ଗେ ଦ଼ରୁ ତଲେ ପୁଞ୍ଜାମାଞ୍ଜାଇଁ।”
18ଇଞ୍ଜାଁ, ଏ଼ୱାସି ଏଲେଇଚେସି, “ନା଼ନୁ ବାତିମା଼ଲି ମାଞ୍ଜାଇଁ, ନୀନୁ ନାଙ୍ଗେ ନୀ କାଜାପା଼ଣା ତ଼ସ୍ତାମୁ।”
19ପ୍ରବୁ ଏଲେଇଚେସି, “ନା଼ନୁ ନୀ ନ଼କିତା ନା଼ ବାରେ ନେହାଣି#33:19 ନେହାଣି/କାଜାପା଼ଣା ତା଼କି କିଇଁ, ନୀ ନ଼କିତା ପ୍ରବୁତି ଦ଼ରୁ ୱେ଼କ୍ଇଁ; ନା଼ନୁ ଆମ୍ବାଆରାଇଁ କାର୍ମା ମେସାଲି ମ଼ନ କିଇଁ, ଏ଼ୱାଣାଇଁ କାର୍ମା ମେହ୍ଇଁ, ଅ଼ଡ଼େ ଆମ୍ବାଆରାଇଁ ଦୟା କିହାଲି ମ଼ନ କିଇଁ ଏ଼ୱାଣାଇଁ ଦୟା କିଇଁ।” 20ପ୍ରବୁ ଅ଼ଡ଼େ ଏଲେଇଚେସି, “ନୀନୁ ନା଼ ମୂମ୍ବୁ ମେସାଲି ଆ଼ଡଅତି; ଇଚିହିଁ ମାଣ୍ସି ନାଙ୍ଗେ ମେସାହାଁ ନୀଡଅସି।” 21ପ୍ରବୁ ଏଲେଇଚେସି, “ମେହ୍ମୁ, ନା଼ ତା଼ଣା ର଼ ଟା଼ୟୁ ମାନେ, ନୀନୁ ଏ଼ ୱାଲି ଲାକ ନିମୁ; 22ଏଚେଟିଏ ନୀ ଦାରିଟି ନା଼ କାଜାପା଼ଣା ହାନି ବେ଼ଲା ନା଼ନୁ ନିଙ୍ଗେ ନିଚାମାନି ୱାଲିତି ଏ଼ ପାରୁତା ଇଟାଇଁ ଅ଼ଡ଼େ ନା଼ ତାର୍ହାଣା ହାନାୟି ରା଼ନି ପାତେକା ନା଼ କେୟୁ ନିଙ୍ଗେ ପ୍ଡିକ୍ହା ଇଟାନେ। 23ଏଚେଟିଏ ନା଼ନୁ ନା଼ କେୟୁ ନୀ ତା଼ଣାଟି ଅ଼ତିସାରେ ନୀନୁ ନା଼ ଜେ଼ନୁ ମେହ୍ଦି, ସାମା ନା଼ ମୂମ୍ବୁ ତ଼ଞ୍ଜା ଆ଼ଏ।”
Currently Selected:
ହାନାୟି 33: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
