ହାନାୟି 24
24
ମେ଼ରା ପତି ରା଼ଚିନାୟି
1ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, “ନୀନୁ ହାରଣ, ନାଦବ, ଅବିହୁ ଅ଼ଡ଼େ ଇସ୍ରାୟେଲତି ପ୍ରାଚିନାଙ୍ଗା ତୀନିକ଼ଡ଼ି ଦସଜା଼ଣା, ମୀରୁ ପ୍ରବୁ ତା଼ଣା ହ଼ଚା ୱା଼ହାଁ ହେକ ମାଞ୍ଜାହାଁ ମୁନୁ କୁତାହାଁ ଜହରା କିଦୁ। 2ୱାର୍ଇ ମ଼ସା ପ୍ରବୁତି ଡାଗେ ୱା଼ନେସି, ସାମା ଏ଼ୱାରି ଡାଗେ ୱା଼ଅରି, କି ଲ଼କୁ ଏ଼ୱାଣି ତଲେ ହାଲଅରି।”
3ଏଚେଟିଏ ମ଼ସା ଲ଼କୁ ତା଼ଣା ୱା଼ହାଁ ପ୍ରବୁତି ଏ଼ ବାରେ ବ଼ଲୁ ଅ଼ଡ଼େ ବାରେ ମେ଼ରା ୱେସ୍ତେସି; ଏଚେଟିଏ ବାରେ ଲ଼କୁ ରଣ୍ତିଏ ଗିୟାଁ ତଲେ ଏଲେଇଚେରି, “ମାହାପୂରୁ ଏମିନି କାତା ୱେସାମାନେସି, ଏ଼ ବାରେ ମା଼ର ମା଼ନୱି ଆ଼ନ।” 4ଏଚେଟିଏ ମ଼ସା ପ୍ରବୁତି ବ଼ଲୁ ବାରେ ରା଼ଚିତେସି, ଇଞ୍ଜାଁ, ଲା଼ଇ ନିଙ୍ଗାହାଁ ହ଼ରୁ ଡ଼଼ଇ ର଼ ପୂଜାପିଣ୍ତା ଅ଼ଡ଼େ ଇସ୍ରାୟେଲତି ବା଼ର କୂଡ଼ା ତଲେ ବା଼ରଗଟା ୱାଲ୍କା ମୁଣ୍ତାୟାଁ କେ଼ପିତେସି। 5ଅ଼ଡ଼େ ଏ଼ୱାସି ଇସ୍ରାୟେଲ ମୀର୍କାତି ଦାଂଗ୍ଣାୟାଁଇଁ ପାଣ୍ତାଲିଏ, ଏ଼ୱାରି ପ୍ରବୁତି କ଼ସମି ହିଚୁତା ହୂଡିନି ପୂଜା ଅ଼ଡ଼େ ନେହେଁତି ପୂଜା ତାକି ବାଚା କ଼ଡି ପୂଜା କିତେରି। 6ଏଚେଟିଏ ମ଼ସା ନେତେରି ଅ଼ହାଁ ଗିନାତା ର଼ ବା଼ଗା ଇଟିତେସି ଅ଼ଡ଼େ ର଼ ବା଼ଗା ପୂଜାପିଣ୍ତା ଲାକ ଡ଼ାଞ୍ଜିତେସି। 7ଇଞ୍ଜାଁ ମେ଼ରା ପତି ଅ଼ହାଁ ଲ଼କୁତି କୀର୍କା ୱେଣ୍ମ୍ବେ ପ଼ଡ଼ୱି ଆ଼ତେସି; ଏଚେଟିଏ ଏ଼ୱାରି ଏଲେଇଚେରି, “ପ୍ରବୁ ଏ଼ନା ଏ଼ନାଆଁ ୱେସାମାଞ୍ଜାନେସି, ଏ଼ ବାରେ ମା଼ର ମା଼ନୱି ଆ଼ନ ଅ଼ଡ଼େ ଲେ଼ମ୍ୱିନ।”
8ଏଚେଟିଏ ମ଼ସା ଏ଼ ନେତେରି ଅ଼ହାଁ ଲ଼କୁ ମୁହେଁ ଡ଼ାଞ୍ଜାହାଁ ଏଲେଇଚେସି, “ମେହ୍ଦୁ ପ୍ରବୁ ମୀ ତଲେ ଈ ବାରେ ବ଼ଲୁତି ଏମିନି ରା଼ଜିମା଼ନା କିହାମାନେସି, ଏ଼ ରା଼ଜିମା଼ନାତି ନେତେରି ଈଦି।”
9ଏଚେଟିଏ ମ଼ସା, ହାରଣ, ନାଦବ, ଅବିହୁ ଅ଼ଡ଼େ ଇସ୍ରାୟେଲତି ପ୍ରାଚିନାଙ୍ଗା ତୀନି କ଼ଡ଼ି ଦସ ଜା଼ଣା ହ଼ରୁତା ହାଚେରି। 10ଏ଼ୱାରି ଇସ୍ରାୟେଲତି ମାହାପୂରୁଇଁ ମେସ୍ତେରି ଏ଼ୱାଣି ପା଼ୱୁଲି ଡ଼଼ଇତି ଟା଼ୟୁ ଉଜେଡ଼ିଗାଟି ନିଲକାନ୍ତ ୱାଲି ତଲେ କେ଼ପିତି ସମାନା ନୀଲି ହା଼ଗୁ ଲେହେଁ ମାଚେ। 11ଅ଼ଡ଼େ ଏ଼ୱାସି ଇସ୍ରାୟେଲ ଲ଼କୁତି କାଜାରି କ଼ପାଟି କେୟୁ ପେର୍ଆତେସି; ସାମା ଏ଼ୱାରି ମାହାପୂରୁଇଁ ମେସ୍ତେରି, ଇଞ୍ଜାଁ ରହେଁଏ ତିଚେରି ଅ଼ଡ଼େ ଉଟେରି।
ସିନୟ ହ଼ରୁତା ମ଼ସା
12ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, “ନୀନୁ ହ଼ରୁ ଲାକ ହ଼ଚାହାଁ ନା଼ ତା଼ଣା ୱା଼ହାଁ ଈ ଟା଼ୟୁତା ମାନାମୁ; ଏଚେଟିଏ ନା଼ନୁ ଲ଼କୁଣି ଜା଼ପ୍ହାଲି ତାକି ଏ଼ନାଆଁ ରା଼ଚାମାଇଁ, ଏ଼ଦାଆଁ, ଇଚିହିଁ, ମେ଼ରା ଅ଼ଡ଼େ ହୁକୁମିତି ଈ ରୀ ୱାଲିତି ପା଼ଟାୟାଁ ନିଙ୍ଗେ ହିୟାଇଁ।” 13ଏଚେଟିଏ ମ଼ସା ଅ଼ଡ଼େ ତାନି ସେ଼ବାକିନି ଜିହସୁୟ ନିଙ୍ଗିତେରି; ଇଞ୍ଜାଁ ମ଼ସା ମାହାପୂରୁତି ହ଼ରୁତା ହାଚେସି। 14ଅ଼ଡ଼େ ଏ଼ୱାସି ପ୍ରାଚିନାଙ୍ଗାଣି ଏଲେଇଚେସି, “ମା଼ମ୍ବୁ ଏଚିବେ଼ଲା ପାତେକା ମୀ ତା଼ଣା ୱେଣ୍ତା ୱା଼ଅମି, ଏଚିବେ଼ଲା ପାତେକା ମୀରୁ ମାଙ୍ଗେ କା଼ଚାହାଁ ଇମ୍ବାଆଁ ଡ଼ୟାଦୁ; ମେହ୍ଦୁ, ହାରଣ ଅ଼ଡ଼େ ହୁର ମୀ ତା଼ଣା ମାନେରି, ଆମ୍ବାଆରି ଗଡ଼୍ହାତି କାତା ୱା଼ତିହିଁ, ଏ଼ୱାସି ଏ଼ୱାରି ତା଼ଣା ହାଲ୍ବେସି।”
15ଏଚେଟିଏ ମ଼ସା ହ଼ରୁ ଲାକ ହାଚେସି, ଇଞ୍ଜାଁ, ଦୂନ୍ଦ୍ରା ହ଼ରୁତି ପିଡ଼୍କ୍ହେ। 16ଏଚେଟିଏ ସିନୟ ହ଼ରୁ ଲାକ ପ୍ରବୁତି ଗା଼ୱୁରମିତି ଉଜେଡ଼ି ୱା଼ତେ; ଅ଼ଡ଼େ ଏ଼ଦି ସ଼ଦିନା ପାତେକା ଦୂନ୍ଦ୍ରା ପିଡ଼୍କ୍ହା ଡ଼ୟିତେ; ଏଚେଟିଏ ସା଼ତା ଦିନାତା ଦୂନ୍ଦ୍ରା ବିତ୍ରାଟି ମ଼ସାଇଁ ହା଼ଟିତେସି। 17ଏଚେଟିଏ ଇସ୍ରାୟେଲ ମୀର୍କା ନ଼କିତା ହ଼ରୁ ସିଣ୍ତିତା ନା଼ସାକିନି ହିଚୁ ଲେହେଁ ମାହାପୂରୁତି ଗା଼ୱୁରମି ଉଜେଡ଼ି ତ଼ଞ୍ଜାଆ଼ତେ। 18ଇଞ୍ଜାଁ, ମ଼ସା ଦୂନ୍ଦ୍ରା ବିତ୍ରା ହ଼ଡାହାଁ ହ଼ରୁ ଲାକ ହାଜାହାଁ ଦୁଇ କ଼ଡ଼ି ଦିନା ଲା଼ଆଁୟାଁ ମାଦେନା ଏ଼ ହ଼ରୁ ଲାକ ଡ଼ୟିତେସି।
Currently Selected:
ହାନାୟି 24: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
