ହାନାୟି 23
23
ନୀହାଁୟି କିନି ମେ଼ରା
1ନୀନୁ ମିଚି କାତା ଜ଼ଲାଆନି; ଲାଗେଏତି ସା଼କି ଆ଼ହାଁ ଲାଗେଏତି ଲ଼କୁତି ସା଼ୟେମି କିଆନି। 2ନୀନୁ ଲାଗେଏତି କାମା କିୟାଲି ହା଼ରେକା ଲ଼କୁ ଜେ଼ଚ ହାଲାଆନି, ଇଞ୍ଜାଁ, ନୀହାଁୟି ବିଚାରା ଉଜେଏ କିହାଲି ଗାଡି ଲ଼କୁୱାକି ଆ଼ହାଁ ଜ଼ଲାଆନି; 3ଇଞ୍ଜାଁ ନୀହାଁୟିତା କାର୍ମା ଗାଟାଣାଇଁ ପାର୍ଡ଼ା କିଆନି।
4ନୀନୁ ନୀ ସାତ୍ରୁତି କ଼ଡି କି ଗା଼ଡ଼୍ଦେ ଜିରୁ ବା଼ଣା ଆ଼ହାଁ ହାଜିମାନାଣି ମେସ୍ତିହିଁ, ଏ଼ଦାଣି ୱେଟ୍ହା ତାଚାହାଁ ଏ଼ୱାଣାକି ହୀମୁ। 5ନୀନୁ ନୀ ସାତ୍ରୁତି ଗା଼ଡ଼୍ଦେ ବାର୍ୱୁ ଡେ଼କାହାଁ ତର୍ଗାମାନାଣି ମେସ୍ତିହିଁ, ଏ଼ଦାଣି ପିସାହାଁ ହାଲାଆନି, ଏ଼ଦାଣି ଏ଼ ବାର୍ୱୁଟି ପିସ୍ପି କିମୁ।
6କାର୍ମା ଗାଟାଣା ନୀହାଁୟି କିନାଟି ନୀନୁ ଏ଼ୱାଣି ଲାଗେଏ କିଆନି। 7ମିଚି ଜ଼ଲିନି ତା଼ଣାଟି ଜାହାରାଇଁ ହେକ ଇଟାମୁ; ଇଞ୍ଜାଁ ଦ଼ହ ହିଲାଆଗାଟାଣାଇଁ ଅ଼ଡ଼େ ଦାର୍ମୁ ଗାଟାଣାଇଁ ଡଣ୍ତ ହୀଆନି; ଇଚିହିଁ ନା଼ନୁ ଲାଗେଏତାଣାଇଁ ଦ଼ହ ହିଲାଆଗାଟାସି କିଅଁ। 8ନୀନୁ ଲାଂଚା ଅ଼ଆନି, ଇଚିହିଁ ଲାଂଚା ଅ଼ନାୟି ନେହିଁ ଲ଼କୁତି କାଣ୍କା କା଼ଣା କିନେ; ଅ଼ଡ଼େ ଦାର୍ମୁଗାଟାରି ବ଼ଲୁ ଉଜେଏ କିନେ।
9ନୀନୁ ଏଟ୍କା ଦେ଼ସାତାରାଇଁ ଲାଗେଏ କିଅତି, ଇଚିହିଁ ନୀନୁ ଏଟ୍କା ଦେ଼ସାତାରା ମ଼ନ ପୁଞ୍ଜିମାଞ୍ଜି, ଏ଼ନିଇଚିହିଁ ନୀନୁ ମିସର ଦେ଼ସାତା ଏଟ୍କା ଦେ଼ସାତାତି ମାଚି।
ସା଼ତା ବାର୍ସା ଅ଼ଡ଼େ ସା଼ତା ଦିନା
10ଅ଼ଡ଼େ ନୀନୁ ନୀ ବୂମିତା ସ଼ବାର୍ସା ପାତେକା ବିଚା ମାଟିଦି ଅ଼ଡ଼େ ଏମ୍ବାଆଁ କାମ୍ବିନି ଆର୍ନା କୂଡ଼ିକିଦି। 11ସାମା ସା଼ତା ବାର୍ସାତା ଏ଼ ବୂମିତି ଜ଼ମି କିଦି ଅ଼ଡ଼େ ଏ଼ଦାଣି ଉମ୍ଣା ପିହ୍ଦି; ଏଚେଟିଏ ମୀ କା଼କୁଲି ଗାଟାରି ତିଞ୍ଜାଲି ବେଟାଆ଼ନେରି; ଏ଼ୱାରି ଏ଼ନାଆଁ ପିହ୍ନେରି, ଏ଼ଦାଆଁ ଜା଼ଡ଼ାତି ଜ଼ନ୍ତ ଜୀୱେଡ଼ି ତିନୁ। ଇଞ୍ଜାଁ ମୀ ଅଙ୍ଗୁରି ବା଼ଡ଼ା ଅ଼ଡ଼େ ଜୀତ ମା଼ର୍ନୁତି ଜିକେଏ ଏଲେ କିଦି।
12ନୀନୁ ସ଼ଦିନା କାମା କିହାଁ ସା଼ତା ଦିନାତା ଜ଼ମିଦି, ଏଚେଟିଏ ନୀ କ଼ଡିୟାଁ ଗା଼ଡ଼୍ଦେୟାଁ ଜ଼ମାଲି ବେଟାଆ଼ନୁ, ଇଞ୍ଜାଁ ନୀ ହ଼ଲେଣି ମୀର୍ଏସି ଅ଼ଡ଼େ ଏଟ୍କା ଦେ଼ସାତାରି ୱା଼ହୁଟି ଜ଼ମିନେରି।
13ନା଼ନୁ ମିଙ୍ଗେ ଏ଼ନା ଏ଼ନାଆଁ ୱେସାମାଞ୍ଜାଇଁ, ଏ଼ ବାରେ ତା଼ଣାଟି ଜାଗ୍ରାତା ଆ଼ଦୁ; ଏଟ୍କା ପେ଼ଣ୍କାତି ଦ଼ର୍କା ମୀ ଅଣ୍ପୁତା ଡ଼ୟାଆପେ କି ମୀ ଗୂତିଟି ଏ଼ ହା଼ଡା ହ଼ଆପେ।
ତୀନିଗଟା କାଜା ପାର୍ବୁୟାଁ
(ହାନାୟି ୩୪:୧୮-୨୬; ୱେ ମେ଼ରା ୧୬:୧-୧୭)
14ମୀରୁ ବାର୍ସା ତାକି ତୀନି ଦେବା ନା଼ କ଼ସମି ପାର୍ବୁ କିଦେରି। 15ପୁଲା ଆଣ୍ତାଆତି ରୂଟି ତିନି ପାର୍ବୁ କିଦେରି; ନା଼ ହୁକୁମି ତଲେ ଆବିବ୍ ଲେ଼ଞ୍ଜୁତି ତୀରି କିହାମାନି ଦିନାତା ସା଼ତା ଦିନା ପୁଲା ଆଣ୍ତାଆତି ରୂଟି ତିଞ୍ଜେରି, ଇଚିହିଁ ମୀରୁ ଏ଼ ଦିନା ମିସର ଦେ଼ସାଟି ଗେଲ୍ପି ଆ଼ହାମାଞ୍ଜେରି; ଇଞ୍ଜାଁ ଆମ୍ବାଆତେରି ୱାର୍ଇ କେୟୁଟି ନା଼ ତା଼ଣା ୱା଼ଅତେରି।
16ଅ଼ଡ଼େ ମୀରୁ ଆର୍ନା ଦା଼ଃନି ପାର୍ବୁ, ଇଚିହିଁ, ଗୁଡିୟାତା ଏ଼ନାଆଁ ମାଟିଦେରି, ଏମ୍ବାତି ମୂଲୁ ପା଼ଡ଼େୟିତି ପାର୍ବୁ ମା଼ନୱି ଆ଼ଦେରି; ଇଞ୍ଜାଁ ବାର୍ସା ରା଼ନାଟି ଗୁଡିୟାଟି ଆର୍ନା କୂଡ଼ିକିନି ବେ଼ଲାତା କୂଡ଼ିକିନି ପାର୍ବୁ କିଦେରି। 17ବାର୍ସା ତାକି ତୀନି ପା଼ଲି ବାରେ ଆ଼ବାୟାଁ ପ୍ରବୁ ମାହାପୂରୁ ନ଼କିତା ୱା଼ଦେରି।
18ମୀରୁ ପୁଲା ଆଣ୍ତିତି ଆ଼ସ୍ତି ତଲେ ନା଼ ପୂଜାତି ନେତେରି ହେର୍ପଅତେରି; ଇଞ୍ଜାଁ ନା଼ ପାର୍ବୁତି କଡ଼୍ୱା ଲା଼ଆଁୟାଁ ୱେ଼ୟେ ଇଟଅତେରି।
19ମୀ ବୂମିତି ମୂଲୁ ପା଼ଡ଼େୟି ପ୍ରବୁ ମାହାପୂରୁ ଇଲୁତା ତାଦେରି। ମୀରୁ ଗରି ଡା଼ଲୁତି ତାଲିନି ପା଼ଲୁ ତଲେ ୱାଜଅତେରି।
ପାର୍ମାଣା ଅ଼ଡ଼େ ୱେହ୍ନାୟି
20ମେହ୍ଦୁ ନା଼ନୁ ମିଙ୍ଗେ ଜିରୁତା ଗେଲ୍ପାଲି ଅ଼ଡ଼େ ମିଙ୍ଗେ ନା଼ ତିୟାରା କିହାମାନି ଟା଼ୟୁତା ତାଚାଲି ମୀ ନ଼କିତା ନା଼ ର଼ ଦୂତୁଇଁ ପାଣ୍ତିମାଞ୍ଜାଇଁ। 21ଏ଼ୱାଣି କ଼ସମି ଜାଗ୍ରାତା ଆ଼ଦୁ, ଅ଼ଡ଼େ ଏ଼ୱାଣି ବ଼ଲୁତି ୱେଞ୍ଜୁ; ଏ଼ୱାଣାଇଁ କାର୍ବି କିଆଦୁ; ଇଚିହିଁ ଏ଼ୱାସି ମୀ ପା଼ପୁ ମ୍ଣେକ୍ହଅସି; ଏ଼ନିଇଚିହିଁ ଏ଼ୱାଣି ତା଼ଣା ନା଼ ଦ଼ରୁ ମାନେ। 22ସାମା ମୀରୁ ଏ଼ୱାଣି ହା଼ଡାତା ମ଼ନ ହୀଦେରି, ଅ଼ଡ଼େ ନା଼ନୁ ମିଙ୍ଗେ ଏ଼ନାଆଁ ବାରେ ୱେସ୍ତାଇଁ ଏ଼ ବାରେ ମୀରୁ କିଦେରି; ଆତିହିଁ ନା଼ନୁ ମୀ ସାତ୍ରୁୟାଁତି ସାତ୍ରୁ ଆ଼ଇଁ। 23ଇଚିହିଁ ନା଼ ଦୂତୁ ମୀ ନ଼କି ନ଼କିତା ହାଜାହାଁ ମିଙ୍ଗେ ଇମରିୟ, ହୀତିୟ, ପରିସିୟ, କିଣାନିୟ, ହିବିୟ, ଅ଼ଡ଼େ ଜିବୁସିୟ ଲ଼କୁତି ଦେ଼ସାତା ତାତାନେସି, ଇଞ୍ଜାଁ ନା଼ନୁ ଏ଼ୱାରାଇଁ ନା଼ସା କିଇଁ। 24ମୀରୁ ଏ଼ୱାରି ପେ଼ଣ୍କା ବମାୟାଁଣି ଜହରା କିଆଦୁ, ଅ଼ଡ଼େ ଏ଼ୱାସିକା ସେ଼ବା କିଆଦୁ, ଇଞ୍ଜାଁ ଏ଼ୱାସିକା କାମା ତଲେ କାମା କିଆଦୁ; ସାମା ଏ଼ୱାସିକା ହୀରୁ ୱେଃଏଲା ବାରେ ନା଼ସା କିଦେରି, ଅ଼ଡ଼େ ଏ଼ୱାସିକା ମୁସାମାନି ପେ଼ଣ୍କା ମୁଣ୍ତାୟାଁ ବାରେ ଡିକ୍ହାତୁହ୍ଦେରି। 25ମୀରୁ ମୀ ପ୍ରବୁ ମାହାପୂରୁତି ସେ଼ବା କିଦେରି; ଏଚେଟିଏ ଏ଼ୱାସି ମୀ ଆର୍ନା ଅ଼ଡ଼େ ଏ଼ୟୁଣା ବ଼ର ହିୟାନେସି, ଇଞ୍ଜାଁ, ନା଼ନୁ ମୀ ତା଼ଣାଟି ର଼ଗ ହେକ କିୟାଇଁ। 26ମୀ ଦେ଼ସାତା ଆମ୍ବାଆରି ବାଣ୍ତିତି ପାର୍ଣା ନସ୍ତ ଆ଼ଏ, ଇଞ୍ଜାଁ ଆମ୍ବାଆୟି ବା଼ଞ୍ଜେଣି ଆ଼ଏ; ନା଼ନୁ ମୀ ନୀଡିନି ବାର୍ସା ପୂରା କିଇଁ।
27ନା଼ନୁ ମୀ ନ଼କି ନ଼କିତା ନା଼ ଆଜି ପାଣ୍ତାଇଁ; ଇଞ୍ଜାଁ ନୀନୁ ଏମିନି ବାରେ ଲ଼କୁ ତା଼ଣା ହାଜି, ଏ଼ୱାରାଇଁ କିଲିବିଲି କିଇଁ ଅ଼ଡ଼େ ନା଼ନୁ ନୀ ସାତ୍ରୁୟାଁଇଁ ଜେ଼ନୁ କେ଼ର୍ୱି କିଇଁ। 28ନା଼ନୁ ମୀ ନ଼କି ନ଼କିତା ଟେ଼କେରି ୱୀହାଁୟାଁ ପାଣ୍ତାଇଁ; ଏ଼ୱି ହିବିୟ, କିଣାନିୟ ଅ଼ଡ଼େ ହୀତିୟ ଲ଼କୁଣି ମୀ ନ଼କିଟି ପେ଼ର୍ହାତୁହ୍ନୁ। 29ସାମା ରଣ୍ତିଏ ବାର୍ସା ମୀ ନ଼କିଟି ଏ଼ୱାରାଇଁ ପେ଼ର୍ହା ପାଣ୍ତଅଁ, ଏଲେକିତିହିଁ ଦେ଼ସା ହୁନା ଆ଼ନେ ଅ଼ଡ଼େ ମୀ କ଼ପାଟି ଜା଼ଡ଼ାତି ଜ଼ନ୍ତ ଜୀୱେଡ଼ି ଗାଡି ଏ଼ପା ଆ଼ନୁ। 30ମୀରୁ ଏଚେ଼ପାତେକା ଏ଼ପା ଆ଼ହା ହିଲଅତେରି ଅ଼ଡ଼େ ଦେ଼ସାତି ଅଦିକାରା କିହା ହିଲଅତେରି, ଏଚିବେ଼ଲା ପାତେକା ନା଼ନୁ ମୀ ନ଼କିଟି ଏ଼ୱାରାଇଁ ଦୀରେ ଦୀରେ ପେ଼ର୍ହା ପାଣ୍ତିଇଁ। 31ଇଞ୍ଜାଁ, ନା଼ନୁ ସୁପ ସାମ୍ଦୁରିଟି ପାଲେସ୍ତିୟ ଲ଼କୁତି ସାମ୍ଦୁରି ପାତେକା ଅ଼ଡ଼େ ବାଟାଟି ପରାତ୍ କାଡା ପାତେକା ମୀ ହାନ୍ଦି ତୀରି କିଇଁ; ଇଚିହିଁ ନା଼ନୁ ଏ଼ ଦେ଼ସାତା ବାସା କିହାମାନାରାଇଁ ମୀ କେୟୁତା ହେର୍ପାଇଁ; ଏଚେଟିଏ ମୀରୁ ମୀ ନ଼କିଟି ଏ଼ୱାରାଇଁ ପେ଼ର୍ହା ପାଣ୍ତିଦେରି। 32ମୀରୁ ଏ଼ୱାରି ତଲେ କି ଏ଼ୱାରି ପେ଼ଣ୍କା ତଲେ ଏ଼ନି ରା଼ଜିମା଼ନା ତୀରି କିଅତେରି। 33ଏ଼ୱାରି ମୀ ଦେ଼ସାତା ବାସା କିଅରି; ବାସା କିତିହିଁ ଏ଼ୱାରି ନା଼ କ଼ପାଟି ମିଙ୍ଗେ ପା଼ପୁ କିୱି କିୟାନେରି; ଇଚିହିଁ ମୀରୁ ଏ଼ୱାରି ପେ଼ଣ୍କାତି ସେ଼ବା କିଦେରି, ଆତିହିଁ ଏ଼ଦି ମିଙ୍ଗେ ତାକି ର଼ ପା଼ନ୍ଦା ଲେହେଁ ଆ଼ନେ।
Currently Selected:
ହାନାୟି 23: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
