ହାନାୟି 19
19
ସିନୟ ଦାରିତା ଇସ୍ରାୟେଲ
1ମିସର ଦେ଼ସାଟି ଇସ୍ରାୟେଲ ଲ଼କୁ ହ଼ଚା ୱା଼ତି ତୀନି ଲେ଼ଞ୍ଜୁତି ମୂଲୁ ଦିନାତା, ଏ଼ୱାରି ସିନୟ ବାଟାତା ଏତେରି। 2ଏ଼ୱାରି ରପିଦିମଟିଏ ହାଜାହାଁ ସିନୟ ବାଟାତା ଏଜାଲିଏ, ଏ଼ ବାଟାତା ତୂମୁୟାଁ ଗ଼ଞ୍ଜିତେରି; ଇସ୍ରାୟେଲ ଲ଼କୁ ଏ଼ ଟା଼ୟୁତା ହ଼ରୁ ନ଼କିତା ତୂମୁୟାଁ ଗ଼ଞ୍ଜିତେରି। 3ଏଚେଟିଏ ମ଼ସା ମାହାପୂରୁ ତା଼ଣା ହ଼ଚାଲିଏ, ପ୍ରବୁ ଏ଼ ହ଼ରୁଟି ଏ଼ୱାଣାଇଁ ହା଼ଟାହାଁ ଏଲେଇଚେସି; “ନୀନୁ ଜାକୁବ କୂଡ଼ାତି ଈ କାତା ଏଲେଇନାମୁ, ଅ଼ଡ଼େ ଇସ୍ରାୟେଲ ଲ଼କୁ ତା଼ଣା ଈଦାଆଁ ୱେହ୍ମୁ। 4ନା଼ନୁ ମିସର ଲ଼କୁ ତାକି ଏ଼ନାଆଁ କିତେଏଁ ଅ଼ଡ଼େ ମିଙ୍ଗେ ଏ଼ନିକିହିଁ ଡେ଼ଗା ପଟାତି ମା଼ରାୟାଁ ତଲେ ଡେ଼କାହାଁ ନା଼ ତା଼ଣା ତାତାତେଏଁ, ଏ଼ଦାଆଁ ମୀରୁ ମେସାମାଞ୍ଜେରି। 5ନୀଏଁ ମୀରୁ ନା଼ ବ଼ଲୁତା ମ଼ନ ହୀଦେରି, ଅ଼ଡ଼େ ନା଼ ମେ଼ରାତି ମା଼ନୱି ଆ଼ଦେରି, ଆତିହିଁ ମୀରୁ ବାରେ ଲ଼କୁ କିହାଁ ନା଼ କୂଡ଼ିକିତି ଦ଼ନ ଆ଼ଦେରି; ଇଚିହିଁ ବାରେ ଦାର୍ତି ନା଼ଦି। 6ଇଞ୍ଜାଁ, ମୀରୁ ନା଼ ପୂଜେରାଙ୍ଗାତି ର଼ ରାଜା କୂଡ଼ା ଅ଼ଡ଼େ ର଼ ସୁଦୁ କୂଲୁ ଆ଼ଦେରି; ଈ ବାରେ କାତା ନୀନୁ ଇସ୍ରାୟେଲ ଲ଼କୁଣି ୱେହ୍ମୁ।” 7ଏଚେଟିଏ ମ଼ସା ୱା଼ହାଁ ଲ଼କୁତି ପ୍ରାଚିନାଙ୍ଗାଣି ହା଼ଟିକିହାଁ ପ୍ରବୁ ତା଼ଣାଟି ହୁକୁମି ବେଟାଆ଼ହାମାନି ଈ ବାରେ କାତା ଏ଼ୱାରି ନ଼କିତା ଏଲେଇଚେସି। 8ଏଚେଟିଏ ବାରେ ଲ଼କୁ ରଣ୍ତିଏ ଗିୟାଁ ତଲେ ଏଲେଇଚେରି, “ପ୍ରବୁ ଏମିନି କାତା ୱେସାମାଞ୍ଜାନେସି, ଏ଼ ବାରେ ମା଼ମ୍ବୁ କିନମି।” ଏଚିବେ଼ଲା ମ଼ସା ପ୍ରବୁ ତା଼ଣା ଲ଼କୁତି କାତା ୱେସ୍ତେସି।
9ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, “ମେହ୍ମୁ ନା଼ନୁ ନୀ ତଲେ କାତା ଆୟାନି ବେ଼ଲାତା ଲ଼କୁ ଏ଼ନିକିହିଁ ଏ଼ଦାଆଁ ୱେଞ୍ଜାଲି ଆ଼ଡିନେରି, ଇଞ୍ଜାଁ ନୀ ତା଼ଣା କା଼ଲେଏ ନାମାନେରି, ଈଦାଆଁତାକି ନା଼ନୁ ହା଼ରେକା ଦୂନ୍ଦ୍ରାଟି ନୀ ତା଼ଣା ୱା଼ହିମାଇଁ।” ଏଚେଟିଏ ମ଼ସା ଲ଼କୁତି କାତା ପ୍ରବୁଇଁ ୱେସ୍ତେସି।
10ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, “ନୀନୁ ଲ଼କୁ ତା଼ଣା ହାଜାହାଁ ନୀଞ୍ଜୁ ଅ଼ଡ଼େ ୱିଏ ଏ଼ୱାରାଇଁ ସୁଦୁ କିମୁ, ଇଞ୍ଜାଁ, ଏ଼ୱାରି ଜାହା ଜାହାରା ହିମ୍ବରିକା ରା଼ଚାପେରି; 11ଅ଼ଡ଼େ ତୀନି ଦିନା ତାକି ବାରେ ଜା଼ଣା ତିୟାରା ଆ଼ପେରି; ଇଚିହିଁ ତୀନି ଦିନାତା ପ୍ରବୁ ବାରେ ଲ଼କୁ ନ଼କିତା ସିନୟ ହ଼ରୁ ଲାକ ରେ଼ଚା ୱା଼ନେସି। 12ଈଦାଆଁତାକି ନୀନୁ ଲ଼କୁତି ସା଼ରିୱାକି ହାନ୍ଦି କିହାଁ ଈ କାତା ଲ଼କୁଣି ୱେହ୍ମୁ, ମୀରୁ ହ଼ରୁତା ହ଼ଚାଲି ଅ଼ଡ଼େ ତାନି ହାନ୍ଦିତି ଡୀଗାଲି ଜାଗ୍ରାତା ଆ଼ଦୁ; ଆମ୍ବାଆସି ହ଼ରୁତି ଡୀଗିନେସି ଏ଼ୱାସି ସାତେଏ ହା଼ନେସି। 13ଆମ୍ବାଆରି କେୟୁ ଏ଼ଦାଣିତି ଡୀଗାଆପେ; ଆମ୍ବାଆସି ଡୀଗିନେସି ଏ଼ୱାସି ସାତେଏ ୱାଲ୍କା ତଲେ ପା଼ୟ୍ୱି ଆ଼ନେସି, ଆ଼ଆତିହିଁ ଆପ୍କା ତଲେ ଜୀୱି ଆ଼ନେସି; ଜ଼ନ୍ତଜିୱେଡ଼ି ଆ଼ପେ କି ମାଣ୍ସି ଆ଼ପେସି, ଏଚେଲାୱା ଜୀୱୁ ତଲେ ନୀଡଅସି; ତୀତ୍ରିତି କାଜା ହା଼ଡା ଆ଼ତିହିଁ ଏ଼ୱାରି ହ଼ରୁ ପାତେକା ୱା଼ନେରି।”
14ଏଚେଟିଏ ମ଼ସା ହ଼ରୁ ଲାକଟି ଲ଼କୁ ତା଼ଣା ରେ଼ଚା ୱା଼ହାଁ ଏ଼ୱାରାଇଁ ସୁଦୁ କିତେସି, ଇଞ୍ଜାଁ, ଏ଼ୱାରି ଜାହା ଜାହାରା ହିମ୍ବରିକା ରା଼ଚିତେରି। 15ଏଚେଟିଏ ଏ଼ୱାସି ଲ଼କୁଣି ଏଲେଇଚେସି, “ମୀରୁ ତୀନି ଦିନା ତାକି ତିୟାରା ଆ଼ଦୁ; ଇଞ୍ଜାଁ, ମୀରୁ ମୀ ଡକ୍ରିସିକା ତଲେ ଡୂରାଆଦୁ।”
16ଏଚେଟିଏ ତୀନି ଦିନାତି ୱେ଼ୟାଲିଏ, ହା଼ଗୁ ଗୂଣ୍ତେ ଅ଼ଡ଼େ ମ୍ଣିସ୍ତେ ଅ଼ଡ଼େ ହ଼ରୁ ଲାକ ଗାଡି ହା଼ଗୁ ଆନ୍ଦେରି ଆ଼ତେ ଅ଼ଡ଼େ ହା଼ରେକା କାଜା ଗିୟାଁ ତଲେ ତୀତ୍ରି ହା଼ଡା ଆ଼ହାଲି ମା଼ଟ୍ହେ; ଏଚେଟିଏ ତୂମୁ ଇଲ୍କାଣା ମାଚି ବାରେ ଲ଼କୁ ଆଜି ତାକି ତୀର୍ଗିତେରି। 17ଏଚେଟିଏ ମାହାପୂରୁ ତଲେ କାତା ଆୟାଲି ତାକି ମ଼ସା ଲ଼କୁଣି ତୂମୁୟାଁଟି ପାଙ୍ଗାତା ହ଼ପ୍ହା ତାତେସି, ଏଚେଟିଏ ଏ଼ୱାରି ହ଼ରୁ ଡ଼଼ଇ ନିତେରି। 18ଏଚିବେ଼ଲା ସିନୟ ହ଼ରୁ ବ଼ୟିଁ ତଲେ ନେଞ୍ଜାମାଚେ, ଏ଼ନିଇଚିହିଁ ପ୍ରବୁ ହିଚୁ ଗୁଦ୍ୱା ତଲେ ଏମ୍ବାଆଁ ରେ଼ଚା ୱା଼ହାମାଚେସି; ଅ଼ଡ଼େ ହଲୁତି ବ଼ୟିଁ ଲେହେଁ ଏମ୍ବାଟି ବ଼ୟିଁ ହ଼ଚିମାଚେ, ଇଞ୍ଜାଁ ହ଼ରୁ ବାରେ ହା଼ରେକା ୱୀଡିତେ#19:18 ଏଚେକା ରା଼ଚିତି ତା଼ଣା, ବାରେ ଲ଼କୁ ତୀର୍ଗିତେରି। 19ଇଞ୍ଜାଁ, ତୀତ୍ରି ହା଼ଡା ଦୀରେ ଦୀରେ ହା଼ରେକା ଗାଡି ଆ଼ହାଲିଏ, ମ଼ସା କାତା ଜ଼ଲିତେସି, ଏଚେଟିଏ ମାହାପୂରୁ ର଼ ହା଼ଡା ତଲେ ଏ଼ୱାଣାଇଁ ଏଲେଇଚେସି। 20ଏଚେଟିଏ ପ୍ରବୁ ସିନୟ ହ଼ରୁ ଲାକ, ଇଚିହିଁ, ହ଼ରୁ ସିଣ୍ତିତା ୱା଼ତି ଡା଼ୟୁ ମ଼ସାଇଁ ଏ଼ ହ଼ରୁ ସିଣ୍ତିତା ହା଼ଟିତେସି; ଏଚେଟିଏ ମ଼ସା ହ଼ରୁ ଲାକ ହ଼ତେସି। 21ଏଚିବେ଼ଲା ପ୍ରବୁ ମ଼ସାଇଁ ଏଲେଇଚେସି, “ନୀନୁ ରେ଼ଚା ହାଜାହାଁ ଲ଼କୁଣି ଜାଣ୍ତେ ହୁକୁମି ହୀମୁ, ଆ଼ଆତିହିଁ ପ୍ରବୁଇଁ ମେସାଲି ତାକି ହାନ୍ଦି ଊରିତିହିଁ ଏ଼ୱାରି ବିତ୍ରାଟି ହା଼ରେକା ନା଼ସା ଆ଼ନେରି। 22ଅ଼ଡ଼େ ଏମିନି ପୂଜେରାଙ୍ଗା ପ୍ରବୁତି ଦାରିତା ୱା଼ନେରି, ଏ଼ୱାରି ଜିକେଏ ଜାହାରାଇଁ ସୁଦୁ କିପାରି, ଆ଼ଆତିହିଁ ପ୍ରବୁ ଏ଼ୱାରାଇଁ ନା଼ସା କିନେସି।”
23ଏଚେଟିଏ ମ଼ସା ପ୍ରବୁଇଁ ଏଲେଇଚେସି, “ଲ଼କୁ ସିନୟ ହ଼ରୁତା ହ଼ଚାଲି ଆ଼ଡଅରି; ଇଚିହିଁ ନୀନୁ ଜାଣ୍ତେ ହୁକୁମି ହୀହାଁ ମାଙ୍ଗେ ଏଲେଇଞ୍ଜାମାଞ୍ଜାଦି, ହ଼ରୁତି ହାନ୍ଦି କେ଼ପାମୁ ଅ଼ଡ଼େ ଏ଼ଦାଆଁ ସୁଦୁ କିମୁ।”
24ପ୍ରବୁ ଏଲେଇଚେସି, “ହ଼ରୁଟି ରେ଼ଚା ହାଲାମୁ; ଇଞ୍ଜାଁ, ହାରଣଇଁ ତାଚିହିଁ ହ଼ଚା ୱା଼ମୁ; ସାମା ପୂଜେରାଙ୍ଗା ଅ଼ଡ଼େ ଲ଼କୁଣି ଏ଼ନିକିହିଁ ପ୍ରବୁ ଡଣ୍ତ ହୀଅସି, ଈଦାଣି ତାକି ଏ଼ୱାରି ତାନି ତା଼ଣା ୱା଼ହାଲି ହାନ୍ଦି ଗା଼ଣ୍ଆପେରି।” 25ଏଚେଟିଏ ମ଼ସା ଲ଼କୁ ତା଼ଣା ରେ଼ଚା ୱା଼ହାଁ ଏ଼ୱାରାଇଁ ଏଲେକିହିଁ ହୁକୁମି ହୀତେସି।
Currently Selected:
ହାନାୟି 19: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
