ହାନାୟି 15
15
ମ଼ସାତି ପା଼ଚୁ
1ଏଚିବେ଼ଲା ମ଼ସା ଇଞ୍ଜାଁ ଇସ୍ରାୟେଲ ଲ଼କୁ ପ୍ରବୁତି କ଼ସମି ଈ ପା଼ଚୁ ପା଼ଚିତେରି, ମା଼ର ପ୍ରବୁତି କ଼ସମି ପା଼ଚିନ, ଇଚିହିଁ ଏ଼ୱାସି ହା଼ରେକା କାଜା କାମା କିହାମାନେସି; ଏ଼ୱାସି ଗ଼ଡ଼ାୟାଁ ଅ଼ଡ଼େ ଗ଼ଡ଼ାୟାଁ ଲାକ କୁଗାମାନାରାଇଁ ସାମ୍ଦୁରିତା ମେତ୍ହା ମାନେସି। 2ପ୍ରବୁ ମା଼ ବା଼ଡ଼୍ୟୁ ଅ଼ଡ଼େ ପା଼ଚୁ, ଇଞ୍ଜାଁ ଏ଼ୱାସି ମା଼ ଗେଲ୍ପାନାସି ଆ଼ହାମାନେସି; ଏ଼ୱାସି ମା଼ ମାହାପୂରୁ, ମା଼ର ଏ଼ୱାଣି ଗା଼ୱୁରମି କିନ; ଏ଼ୱାସି ମା଼ ଆକୁତି ମାହାପୂରୁ, ମା଼ର ଏ଼ୱାଣି ଗୂଣୁ ପା଼ଚିନ। 3ପ୍ରବୁ ଜୁଜୁତା ଜୀଣା ଆ଼ନାସି; ପ୍ରବୁ ଏ଼ୱାଣି ଦ଼ରୁ। 4ଏ଼ୱାସି ପା଼ରତି ରାତାୟାଁଣି ଅ଼ଡ଼େ ରିଜାରି କ଼ସ୍କାଣି ସାମ୍ଦୁରିତା ମେତ୍ହା ମାନେସି; ଇଞ୍ଜାଁ ତାନି ବାଚିକିତି ବା଼ଡ଼୍ୟୁ ଗାଟାରି ସୁପ ସାମ୍ଦୁରିତା ମୁଞ୍ଜାମାନେରି। 5କୂଡ଼୍ହି ଏ଼ୟୁ ଏ଼ୱାରାଇଁ ପ୍ଡିକ୍ହାମାନୁ, ଏ଼ୱାରି ୱାଲ୍କା ଲେହେଁ ଗାଡି ଏ଼ୟୁଣା ମୁଞ୍ଜିତେରି। 6ହେ଼, ପ୍ରବୁ ନୀ ଟିଃନି କେୟୁତି ବା଼ଡ଼୍ୟୁ ତଲେ ଗା଼ୱୁରମି ଆ଼ପେ; ହେ଼ ପ୍ରବୁ, ନୀ ଟିଃନି କେୟୁ ସାତ୍ରୁୟାଁଇଁ ଗୁଣ୍ତା କିନେ। 7ନୀନୁ ନୀ କାଜା ସାମ୍ବ୍ରମି ତଲେ ନୀ କ଼ପାଟି ୱା଼ନାରାଇଁ ନା଼ସା କିନାତି; ନୀନୁ ନୀ କାର୍ବିତି ହିଚୁ ପାଣ୍ତିସାରେ ଏ଼ଦି ଏ଼ୱାରାଇଁ ନା଼ଡା ଲେହେଁ ହୂଡିନେ। 8ନୀ ମୁଙ୍ଗେଲିତି ଊକ୍ଅଡ଼ି ତଲେ ଏ଼ୟୁ ରଣ୍ତିଏ ତା଼ଣା କୂଡ଼ା ଆ଼ତୁ; ଅ଼ଡ଼େ ହାଜିମାନି ଏ଼ୟୁ ଗିଚୁ ସମାନା ନିଚାହାଁ ଡ଼ୟିତୁ; ଇଞ୍ଜାଁ ସାମ୍ଦୁରି ମାଦି କୂଡ଼୍ହି ଏ଼ୟୁ କୂଡ଼ା ଆ଼ତୁ। 9ସାତ୍ରୁୟାଁ ଏଲେଇଚେରି, ମା଼ର ଏ଼ୱାରି ଜେ଼ଚ ଜେ଼ଚ ପେର୍ହା ଅ଼ନ, ମା଼ର ଏ଼ୱାରାଇଁ ଆହ୍ନ, ମା଼ର ଦୂହାମାନି ଆ଼ସ୍ତି ବା଼ଗା କିହାଁ ଅ଼ନ; ଏ଼ୱାରି ତା଼ଣା ମା଼ ମ଼ନ ପୂରା ଆ଼ନେ; ମା଼ କାଣ୍ତାୟାଁ ପେର୍ନ, ମା଼ କେସ୍କା ଏ଼ୱାରାଇଁ ନା଼ସା କିନୁ। 10ସାମା ନୀନୁ ନୀ ଊକ୍ଅଡ଼ି ତଲେ ଊକାଲିଏ ସାମ୍ଦୁରି ଏ଼ୱାରାଇଁ ମୁସ୍ତେ, ଏ଼ୱାରି ସୀସ୍ୱା ଲେହେଁ କୂଡ଼୍ହି ଏ଼ୟୁଣା ମୁଞ୍ଜିତେରି। 11ହେ଼ ପ୍ରବୁ, ପେ଼ଣ୍କା ବିତ୍ରାଟି ନୀ ଲେହେଁ ଆମ୍ବାଆସି ? ନୀ ସମାନା ସୁଦୁତି ଜୀୱୁ ନ଼ନାସି, ସାମ୍ବ୍ରମିତା ଆଜି ହ଼ପେତାସି, ଅ଼ଡ଼େ କାବାଆ଼ନି କାମାୟାଁ କିନାସି ଆମ୍ବାଆସି ? 12ନୀନୁ ନୀ ଟିଃନି କେୟୁ ଦା଼ସ୍ତି, ଏଚେଟିଏ ଦାର୍ତି ଏ଼ୱାରାଇଁ ନା଼ସା କିତେ। 13ନୀନୁ ନୀ କାର୍ମା ତଲେ ନୀ ଗେଲ୍ପିତି ଲ଼କୁଣି ତା଼କି କିହିମାଞ୍ଜି; ନୀନୁ ନୀ ବା଼ଡ଼୍ୟୁ ତଲେ ଏ଼ୱାରାଇଁ ଜିରୁ ତ଼ସିହିଁ ନୀ ସୁଦୁ ବାସା ଟା଼ୟୁତା ଅ଼ହିମାଞ୍ଜି। 14ଲ଼କୁ ଈଦାଆଁ ୱେଞ୍ଜାମାନେରି, ଏ଼ୱାରି ତୀର୍ଗି ମାନେରି; ପାଲେସ୍ତିୟ ଲ଼କୁଣି ଦୁକୁ ଆସାମାନେ। 15ଏଚିବେ଼ଲା ଇଦମତି କାଜାରି ବିଲ୍କି ଆ଼ତେରି, ମୟାବତି ସା଼ଲୱି କିନାରି ଆଜି ତାକି ତୀର୍ଗି ମାନେରି; ଇଞ୍ଜାଁ କିଣାନତା ବାସା ଆ଼ହାମାନାରି ସା଼ସା ପିସାମାନେରି। 16ଆଜି ଅ଼ଡ଼େ ବିଲ୍କି ଏ଼ୱାରି ଲାକ ୱା଼ହାମାନେ; ହେ଼ ପ୍ରବୁ, ଏଚିବେ଼ଲା ପାତେକା ନୀ ଲ଼କୁ ହାଜା ହିଲଅରି, ଏଚିବେ଼ଲା ପାତେକା ନୀ କଡିତି ଲ଼କୁ ହାଜା ହିଲଅରି, ଏଚିବେ଼ଲା ପାତେକା ନୀ ବା଼ଡ଼୍ୟୁଗାଟି କେୟୁ ତଲେ ଏ଼ୱାରି ୱାଲି ଲେହେଁ ପାଲେଏ ମାଞ୍ଜାମାନେରି। 17ହେ଼ ପ୍ରବୁ ନୀନୁ ନୀ ଏମିନି ବାସା ଟା଼ୟୁ ତିୟାରା କିହାମାଞ୍ଜି, ପ୍ରବୁ ନୀ କେୟୁ ଏମିନି ଦାର୍ମୁ ଟା଼ୟୁ କିହାମାନେ, ନୀନୁ ଏ଼ୱାରାଇଁ ତାଚାହାଁ ନୀ ଏ଼ ଅଦିକାରା ହ଼ରୁତା ବାସା ଆୟାଲି ହୀଦି। 18ପ୍ରବୁ ଜୁଗୁ ଜୁଗୁ ତାକି କା଼ଲେଏ ରା଼ଜି କିନେସି।
ମରିୟମନି ପା଼ଚୁ
19ଇଚିହିଁ ପା଼ରତି ଗ଼ଡ଼ାୟାଁ, ରାତା ଅ଼ଡ଼େ ଗ଼ଡ଼ାୟାଁ ଲାକ ହ଼ନି ଲ଼କୁ ସାମ୍ଦୁରି ବିତ୍ରା ହ଼ଡାଲିଏ, ପ୍ରବୁ ଏ଼ୱାରି ଲାକ ସାମ୍ଦୁରିତି ଏ଼ୟୁ ୱେଣ୍ଡେ ତାତେସି; ସାମା ଇସ୍ରାୟେଲ ଲ଼କୁ ୱା଼ୟିତି ଜିରୁ ଆସାହାଁ ସାମ୍ଦୁରି ମାଦିଟି ହାଚେରି।
20ଏଚେଟିଏ ହାରଣତି ତାଙ୍ଗି ନ଼କିତା ଆ଼ନି କାତା ୱେହ୍ନି ମରିୟମ କେୟୁତା ବା଼ଜା ଅ଼ତେ ଅ଼ଡ଼େ ତାନି ଜେ଼ଚ ଜେ଼ଚ ବାରେ ଇୟାସିକା ବା଼ଜାୟାଁ ଅ଼ହାଁ ଏ଼ନ୍ଦି ଏ଼ନ୍ଦିହିଁ ହ଼ଚାୱା଼ତୁ। 21ଏଚିବେ଼ଲା ମରିୟମ ଲ଼କୁଣି ଏଲେଇଚେ, ମୀରୁ ପ୍ରବୁ ତାକି ପା଼ଚାଦୁ; ଇଚିହିଁ ଏ଼ୱାସି ହା଼ରେକା କାଜା କାମା କିହାମାନେସି; ଏ଼ୱାସି ଗ଼ଡ଼ାୟାଁ ଅ଼ଡ଼େ ଗ଼ଡ଼ାୟାଁ ଲାକ କୁଗାମାନି ଲ଼କୁଣି ସାମ୍ଦୁରିତା ମେତ୍ହା ମାନେସି।
କାମ୍ବେଲି ଏ଼ୟୁ
22ଏଚେଟିଏ ମ଼ସା ଇସ୍ରାୟେଲ ଲ଼କୁଣି ସୁପ ସାମ୍ଦୁରିଟିଏ ତା଼କିକିତେସି, ଇଞ୍ଜାଁ ଏ଼ୱାରି ସୁର ବାଟା ୱାକି ହାଚେରି, ଇଞ୍ଜାଁ ଏ଼ୱାରି ବାଟାତା ତୀନି ଦିନା ତା଼କାହାଁ ଏ଼ୟୁ ବେଟାଆ଼ଆତେରି। 23ଏଚେଟିଏ ଏ଼ୱାରି ମାରାତା ଏଜାଲିଏ, ଏମ୍ବାତି ଏ଼ୟୁ କାମ୍ବେଲି ତାକି ଗସାଲି ଆ଼ଡାଆତେରି; ଈଦାଣି ତାକି ଏ଼ ଟା଼ୟୁତି ଦ଼ରୁ ମାରା#15:23 କାମ୍ବେଲି ଆ଼ତେ। 24ଏଚିବେ଼ଲା ଲ଼କୁ ମ଼ସା କ଼ପାଟି ବା଼ଚା କିହିଁ ଏଲେଇଚେରି, “ମା଼ମ୍ବୁ ଏ଼ନାଆଁ ଗହ୍ନମି ?” 25ଏଚେଟିଏ ମ଼ସା ପ୍ରବୁ ତା଼ଣା ପ୍ରା଼ତାନା କିୟାଲିଏ ପ୍ରବୁ ତାଙ୍ଗେ ର଼ ୱେଗୁ ତ଼ସ୍ତେସି, ଏ଼ୱାସି ଏ଼ ୱେଗୁ ଅ଼ହାଁ ଏ଼ୟୁଣା ମେତ୍ହାଲିଏ, ଏ଼ୟୁ ଡ଼ାକ୍ହା ହାଚୁ। ଏ଼ ଟା଼ୟୁତା ପ୍ରବୁ ଏ଼ୱାରାକି ମେ଼ରା ଅ଼ଡ଼େ ହୁକୁମି ତୀରି କିତେସି, ଇଞ୍ଜାଁ ଏ଼ୱାରାଇଁ ତାୟିପାରି କିହାଁ ଏଲେଇଚେସି, 26“ମୀରୁ ମୀ ପ୍ରବୁ ମାହାପୂରୁ ବ଼ଲୁତା ମ଼ନ ହୀଦେରି, ଅ଼ଡ଼େ ଏ଼ୱାଣି କାନୁତା ଏ଼ନାୟି ନେହେଁ ଏ଼ଦାଆଁ କିଦେରି, ଏ଼ୱାଣି ହୁକୁମିତା ମ଼ନ ହୀଦେରି, ଅ଼ଡ଼େ ତାନି ମେ଼ରା ବାରେ ମା଼ନୱି ଆ଼ଦେରି, ଆ଼ତିହିଁ ନା଼ନୁ ମିସର ଲ଼କୁଣି ଏ଼ନି ଏ଼ନି ର଼ଗ ହୀହିମାଚେଏଁ, ଏ଼ ବାରେ ର଼ଗ ମିଙ୍ଗେ ଆୟେଏ; ଇଚିହିଁ ନା଼ନୁ ମୀ ମାହାପୂରୁତେଏଁ ଅ଼ଡ଼େ ମୀ ର଼ଗଟି ନେହିଁ କିୟାନାତେଏଁ।”
27ଏଚେଟିଏ ଏ଼ୱାରି ଏଲିମତା ୱା଼ତେରି; ଏମ୍ବାଆଁ ବା଼ରଗଟା ଏ଼ୟୁତି ଜାର୍ଣା ଅ଼ଡ଼େ ତୀନି କ଼ଡ଼ି ଦସଗଟା କାଜୁରି ମା଼ର୍କା ମାଚୁ; ଏଚେଟିଏ ଏ଼ୱାରି ଏ଼ ଏ଼ୟୁ ଦାରି ତୂମୁୟାଁ ଗ଼ଞ୍ଜିତେରି।
Currently Selected:
ହାନାୟି 15: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
