ରୋମିୟ 3
3
1ଆର୍ତିଙ୍ଗ୍ ଅଣଜିହୁଦି ଲୋକା ମାଣାନ୍ ଜିହୁଦି ଲୋକା ନାଣ୍ତ ସୁବିଦା ଇନିକା ? ସୁନ୍ନତ ମାଡ଼ାନ୍କୁ ନେଗିକା ଇନିକା ? 2ନାଣ୍ତ ମାନାତ୍ । ପାର୍ତୁମ୍, ମାପୁରୁ ୱାନି ମାଟାଦି ଦାୟିତ୍ ଜିହୁଦିଲୋକା ମୁସ୍କୁ ସିତା ମାନାନ୍ । 3ଆନାତ୍ ଏସ ଲୋକୁ ବିସ୍ବାସ୍ତୁ ତେବାଏର୍ । ମାତର୍ ଆକା ଇଜି ଇନିକା ମାପୁରୁଦି ବିସ୍ବାସ୍ ଆରେଏ ଆନାତ୍ ? 4ଏସାଙ୍ଗ୍ ସିଲେ । ଲୋକୁ ୱିଜେରେ ବାଣ୍ତିସ୍କିନିକାର୍ ଆତିଙ୍ଗ୍ବା, ମାପୁରୁ ସତ୍ । ସାସ୍ତ୍ରଦୁ ରାସାତାମାନାତ୍ :
“ନି ବାକ୍ୟ ଦାନ୍ ନିନୁ ସତ୍ ଇଜି ପାର୍ମାଣ୍ ଅଆୟ୍ଆନି,
ନିନୁ ବିସାର୍ ଆନିୱାଲେ ନିନୁ ଜିଣାନି ।”
5ଇବେ ଉଣ୍ତ୍ରି ମାଟା ଆନାତ୍, ଜଦି ମା ଅଦାର୍ମୁ ମାପୁରୁଦି ଦାର୍ମୁଦିକା ପାର୍ମାଣ୍ କିନାତ୍, ଆର୍ତିଙ୍ଗ୍ ମାପୁରୁ ମାଙ୍ଗିଁ ଦଣ୍ତ୍ ସିଜି ଅନ୍ୟାୟ୍ କିଜିନାନ୍ ଇଜି ଇନ୍ଡ୍ରେଙ୍ଗ୍ ଆଟ୍ନିକା ନୋ ? ନାନୁ ଲୋକା ୱାଜା ଇଜିନା । 6ଏସାଙ୍ଗ୍ ସିଲେ । ମାପୁରୁ ଜଦି ନିୟାୟ୍ କିନିକାନ୍ ଆଏନ୍, ୱାନ୍ ଏଣ୍ତେସ୍ ଦୁନିଆଦିଙ୍ଗ୍ ନ୍ୟାୟ୍ ବିସାର୍ କିନାନ୍ ?
7ମାତର୍ ଜଦି ନା ଅସତ୍ଦାନ୍ ମାପୁରୁଦି ସତ୍ମାଟା ନାଣ୍ତ ନେଗେନ୍ତାନ୍ ୱେଙ୍ଗ୍ଁନାତ୍ ମାରି ୱାନ୍ ଗୌରବ୍ ପୟ୍ନାନ୍, ନାନୁ ପାପି ଇଜି ଏନ୍ଦା ବିଚାର୍ ଆଜିନା ? 8ମାଡୁ ଏନ୍ଧା ୱେର୍ଇକା, “ରାଦୁ ତାଗ୍ଇପାଣି କିନାଟ୍, ରାଦୁ ଇବେଟ୍ତାନ୍ ନେଗି ପଲ୍ ଆସ୍ତେଙ୍ଗ୍ ?” ନାନୁ ଟିକ୍ ଇୟାୱାଜା ମାଟା ଇଜିନା ଇଜି ଦାବି କିଜି ଏସଲୋକ୍ ନାଙ୍ଗିଁ ନିଦା କିଜିନାର୍ । ୱାର୍ ଇୟାଉଣ୍ତିଙ୍ଗ୍ ଏମେ ଦଣ୍ତ୍ ପୟ୍ନି ମାଟା, ସତେନେ ପୟ୍ନିଦେର୍ ।
ଏନ୍ ଦାର୍ମୁତିକାନ୍ ସିଲେ
9ଆର୍ତିଙ୍ଗ୍ ଇଜିନା ଜିହୁଦିଲୋକା ଅବସ୍ତା ଅଣଜିହୁଦି ଲୋକା ମାଣାନ୍ ନାଣ୍ତ ନେଗିକା ? ଏସାଙ୍ଗ୍ ସିଲେ । ନାନୁ ଆଗ୍ଡ଼ିରାନ୍ ୱେର୍ତାମାନା ଜେ, ରିଏର୍ ଜିହୁଦି ନି ଅଣଜିହୁଦି ପାପ୍ତି ବାଡ଼ିଦୁ ମାନାର୍ । 10ଦର୍ମସାସ୍ତ୍ରଦୁ ରାସାତାମାନାତ୍ :
“ଦାର୍ମୁତିକାନ୍ ଏନ୍ ସିଲେନ୍, ଅରେନ୍ ବା ସିଲେନ୍,
11ଅରେନ୍ ଲୋକ୍ ବା ବୁଦିଦିକାନ୍ ନି ମାପୁରୁଦି ସତ୍ତାନ୍ ସେବାକିନିକାନ୍ ଏନ୍ ସିଲେନ୍ ।
12ୱାର୍ ୱିଜେରେ ମାପୁରୁଦି ମାଣାନ୍ ଆକ ସର୍ହାମାନାର୍;
ୱିଜେରେ ବାଣାତା ମାନାର୍ ।
ଏନ୍ ଅରେନ୍ ବା ସତ୍ପାଣି କିଏଜିନାର୍ ।
13ୱାରି ମାଟାଦୁ ସାପିସ୍କିନି ନାନି ସାଲାକି,
ୱେୟୁଦାନ୍ ମିସ୍ତି ବଲ୍ ସତାନେ,
ୱେୟୁଦାନ୍ କତ୍ନି ସାରାସ୍ତି ୱିସାମ୍ ।
14ୱାରି ମାଟା କେୟ୍ନାତ୍ ମାରି ଆନାଦୁରିଆଦୁ ବର୍ତି ।
15ୱାର୍ ଡାକ୍ତେଙ୍ଗ୍ ନି କାତ୍ତେଙ୍ଗ୍ ପୁରା ଆନାର୍;
16ୱାର୍ ଏମେ ତରିନ୍ ସନାର୍, ଆବେ ସାନିକା ନି କାସ୍ଟୁ ଗଟାନାତ୍ ।
17ୱାର୍ ସାନ୍ତିଦି ସାରି ନେସ୍ଏର୍,
18ୱାରି କାଣାଗାଦୁ ମାପୁରୁଙ୍ଗ୍ଁ ତିଲାନିକା ୱାର୍ ଅଜାଏର୍ ।”
19ମାଡ୍ ନେସ୍ନିକା, ଏମେକାର୍ ନିୟମ୍ତି ଆଡ୍ଗି, ତାନି ନିତିନିୟମ୍ ୱାର୍ ମାନାଦେଙ୍ଗ୍ ଆନାତ୍ । ମାପୁରୁ ଏସ୍ତିୱାଲେ ୱିଜୁ ଦୁନିଆଦି ବିସାର୍ କିନାନ୍, ନିୟମ୍ ମାନାଇକାର୍ ଇନି ବାଣ୍ତିସ୍ କିଜି ନିଜେଦିଙ୍ଗ୍ ଦସ୍ସିଲିକାନ୍ ଇଜି ୱେର୍ତେଙ୍ଗ୍ ଆଟ୍ଏନ୍ । 20#ଗାଲାତିୟ ୨:୧୬.ମାତର୍ ନିୟମ୍ତି ପାଣିୱିଜୁ କିଜି ଆମା ମାପୁରୁଦି ଆଗ୍ଡ଼ି ଦାର୍ମୁତିକାନ୍ ଇଜି ୱେଙ୍ଗ୍ଦେଙ୍ଗ୍ ଆଟ୍ଏନ୍ । ନିୟମ୍ତାନ୍ ଲୋକୁ କେବଲ ପାପ୍ତି ବିସୟ୍ ନେସ୍ତେଙ୍ଗ୍ ଆଟ୍ନାନ୍ ।
ବିସ୍ବାସ୍ତୁ ଦାର୍ମୁ ଆନିକା
21ମାପୁରୁ ନିଜେଦି ୱାଲେ ଲୋକାଙ୍ଗ୍ ମିସାକିଦେଙ୍ଗ୍ ଇଜି ନିୟମ୍ ଆତ୍ରେ ଆମାକା କିତାମାନାନ୍, ଆକା ଇଲେଇ ତରାତାମାନାତ୍ । ଇୟା ବିସୟ୍ତାନ୍ ମସାଦି ନିୟମ୍ ନି ବାବବାଦିର୍ ବା ସାକି ସିତାମାନାର୍ । 22#ଗାଲାତିୟ ୨:୧୬.କେବଲ ଜିସୁ କ୍ରିସ୍ତମାନୁ ବିସ୍ବାସ୍ କିନିମାଣାନ୍ ଲୋକୁ ମାପୁରୁଦି ଆଗ୍ଡ଼ି ଦାର୍ମୁତିକାନ୍ ଇଜି ୱେଙ୍ଗ୍ଁନାନ୍ । ମାପୁରୁ ଆମା ଲୋକୁତିଙ୍ଗ୍ ଆଙ୍ଗ୍ଏଜି କ୍ରିସ୍ତମାନୁ ବିସ୍ବାସ୍ କିଜିମାନି ୱିଜେରିଙ୍ଗ୍ ଇୟା ସାରି ସିନାନ୍ । 23ୱିଜେରେ ପାପ୍ କିତାମାନାର୍ ମାରି ମାପୁରୁଦି ମହିମାଦି ପୁରାଆନିମାନୁ ପୟ୍ଏତା ମାନାର୍ । 24ମାତର୍ ମାପୁରୁ କ୍ରିସ୍ତ ଜିସୁଦି ମାଣାନ୍ ଆର୍ଏନେ ଆମା ଦୟା ସିତା ମାନାନ୍, ଆକା ଏମେକାର୍ ମାନାନାର୍, ୱାରିଙ୍ଗ୍ ପ୍ରବୁ ଜିସୁ ଜିପିସ୍ନାନ୍ ମାରି ୱାର୍ ମାପୁରୁ ଆଗ୍ଡ଼ି ଦାର୍ମୁତିକାର୍ ଆନାର୍ । 25ମାପୁରୁ ଜିସୁଙ୍ଗୁଁ ଦାନ କିତାନ୍, ଏଣ୍ତେସ୍ ୱାନି ସାନିକା, ୱାନି ମାନୁ ବିସ୍ବାସ୍ କିଜିମାନି ଲୋକା ପାପ୍ କେମାଦି ଉପାୟ୍ ଆନାତ୍ । ମାପୁରୁ ନିଜେଦି ଦାର୍ମୁ ତର୍ତେଙ୍ଗ୍ ଇକା କିତାନ୍ । ମାପୁରୁ ସାସ୍ ଆସ୍ସି ଲୋକା ଆଗ୍ଡ଼ିକିତି ପାପ୍ ଆସ୍ଏନ୍ । 26ମାତର୍ ଇଲେଇ ୱାନ୍ ନିଜେଦି ଦାର୍ମୁ ତର୍ତେଙ୍ଗ୍ କିନି ଉଣ୍ତିଙ୍ଗ୍ ପାପ୍ କେମାଦି ନିୟମ୍ କିତାମାନାନ୍ । ଇୟାମାଣାନ୍ ମାପୁରୁ ତର୍ସି ସିତାମାନାନ୍ ଜେ, ୱାନ୍ ନିଜେ ଦାର୍ମୁତିକାନ୍ ମାରି ଏମେକାର୍ ଜିସୁମାନୁ ବିସ୍ବାସ୍ କିନାର୍, ଆୟା ୱିଜେରିଙ୍ଗ୍ ଦାର୍ମୁତିକାର୍ ୱାଜା ଆସ୍ନାନ୍ ।
27ଆର୍ତିଙ୍ଗ୍ ଆମା ବିସୟ୍ତାନ୍ ଗର୍ବ କିନାଟ୍ ? ସିଲେ, ଆୟାୱାଜା ମାଟା ଇନିକା ସିଲେତ୍ । ଗାର୍ବୁ କିନି ଉଣ୍ତିଙ୍ଗ୍ ମା ଇନି ମାଟା ମାନ୍ଡ୍ରେଙ୍ଗ୍ଁ ଆଟ୍ନାତ୍ ? ଇନିକା ନିୟମ୍ ପୁରାପୁରି ମାନାଜିନିକା ଇଜି ? ସିଲେ, କେବଲ ବିସ୍ବାସ୍ ନେ ମା ଗାର୍ବୁ ମାଟା । 28ମାଡ୍ ସତ୍ତାନ୍ ବୁଜାଦେଙ୍ଗ୍ ଆଟ୍ସିନାପ୍ ଜେ, ଅରେନ୍ କେବଲ ୱାନି ବିସ୍ବାସ୍ତାନ୍ ମାପୁରୁ ଆଗ୍ଡ଼ି ଦାର୍ମୁତିକାନ୍ ଆନାନ୍ ନିୟମ୍ ମାନାନି ମାଣାନ୍ ସିଲେ । 29ମାପୁରୁ ଇନିକା କେବଲ୍ ଜିହୁଦିଲୋକା ମାପୁରୁ ? ୱାନ୍ ଇନିକା ଅଣଜିହୁଦି ଲୋକା ମାପୁରୁ ଆଏନ୍ ? ସତେନେ ୱାନ୍ ୱିଜେରି ମାପୁରୁ । 30#ଗାଲାତିୟ ୩:୨୦.ମାପୁରୁ ଅରେନ୍ । ରୁଣ୍ତି ଜିହୁଦି ନି ଅଣଜିହୁଦି ଲୋକା ବିସ୍ବାସ୍ ଉଣ୍ତିଙ୍ଗ୍ ୱାନ୍ ୱାରିଙ୍ଗ୍ ଦାର୍ମୁତିକାର୍ ୱାଜା ଆସ୍ନାନ୍ । 31ତେନି ଅର୍ତ ଇନିକା, ମାଡ୍ ବିସ୍ବାସ୍ତାନ୍ ନିୟମ୍ତିଙ୍ଗ୍ଁ ନାସ୍ଟୁ କିଦେଙ୍ଗ୍ ସୋଲ୍ସିନାପ୍ ନୋ ? ଏସାଙ୍ଗ୍ ସିଲେ । ବିସ୍ବାସ୍ ତାନ୍ ମାପ୍ ନିୟମ୍ତି ମୁଲ୍ କୁନାଦି ଆଟ୍ୱା କିଜିନାପ୍ ।
Currently Selected:
ରୋମିୟ 3: Koo25
Highlight
Copy
Compare
Share
Want to have your highlights saved across all your devices? Sign up or sign in
The Konda Porja Bible © The Word for the World International and Konda Porja Translation Samithi, Dasamanthpur, Odisha 2025
