ପର୍ତମ୍ମୁ 6
6
ମନ୍ରାନ୍ ଆପେଲ୍ଲା
1ଏଙ୍ଗାଲେ ପୁର୍ତିଲୋଙନ୍ ମନ୍ରାଞ୍ଜି ଗୋଗୋୟ୍ଲେ ପାଙେନ୍, ଆରି ଆନିଞ୍ଜି ଗୋଗୋୟ୍ ଆଇସିଜନ୍ କୋଡେଞ୍ଜି, 2ତିଆବନେଡ଼ା ଇସ୍ୱରନ୍ ଆ ଡାଙ୍ଗାଡ଼ାଅନ୍ଜି ମନ୍ରାଞ୍ଜି ଆ ଡାଙ୍ଗଡ଼ିଅଞ୍ଜି ଆମନନଙନ୍ ଗିୟ୍ଲେ, ଆନାଜି ଆନିଞ୍ଜି ମନ୍ନାଏଞ୍ଜି ଆନିନ୍ ଆନିଞ୍ଜି ସରିନ୍ ବିବାଲଞ୍ଜି । 3ପ୍ରବୁନ୍ ଗାମେନ୍, “ପୁରାଡ଼ାଞେନ୍ ଅଡ଼୍କୋ ଡିନାନ୍ ମନ୍ରାନ୍ ଆମଙ୍ ଅଃଡକୋଏ; ଇନିଆସନ୍ଗାମେଣ୍ଡେନ୍ ଆନିଞ୍ଜି ଜେଲୁଡଅଙ୍ ତୁମ୍, ତିଆସନ୍ ଆନିଞ୍ଜି ବସଅ ବକୁଡ଼ି ବର୍ସେଙ୍ ତୁମ୍ ଅମେଙ୍ତଜି ।” 4ତିଆବନେଡ଼ା, ପୁର୍ତିଲୋଙନ୍ ସୋଡ଼ା ଆରି ବୋର୍ସା ମରଞ୍ଜି ଡକୋଏଞ୍ଜି ତି ସିଲଡ୍ଲ୍ଲନ୍ ଇସ୍ୱରନ୍ ଆଡାଙ୍ଗାଡ଼ାଅଞ୍ଜି ମନ୍ରାନ୍ ଆଡାଙ୍ଗାଡ଼ିଅଞ୍ଜି ସରିନ୍ ଡକୋଲଞ୍ଜି । ଆମଙଞ୍ଜି ସିଲଡ୍ ପସିଜନ୍ କୋଡେଞ୍ଜି ଆନିଞ୍ଜି ନିୟ୍ ଆପର୍ତମ୍ମୁ ସୋଡ଼ାବୋର୍ସାମର୍ଜି ଡକୋଏଞ୍ଜି ।
5ପ୍ରବୁନ୍ ଆଗ୍ରିଜେନ୍ ପୁର୍ତିଲୋଙନ୍ ପେଲ୍ଲାମରଞ୍ଜି ଗୋଗୋୟ୍ଲେ ପାଙେନ୍ ଆରି ଆନିୟମଞ୍ଜି ଅଡ଼୍କୋନ୍ ମନଙ୍ତଡ୍, 6ତିଆସନ୍ ପ୍ରବୁନ୍ ପୁର୍ତିଲୋଙନ୍ ମନ୍ରାନ୍ ଆଗ୍ରବ୍ଡେଲେନ୍ ଆସନ୍ ଆ ମନ୍ନଲୋଙନ୍ ଅନିୟମ୍ଡାଏନ୍ 7ପ୍ରବୁନ୍ ଗାମେନ୍, “କେନ୍ ଆ ପୁର୍ତିଲୋଙ୍ ଞେନ୍ ଗରଡ଼େଲାଞନ୍ ଆମନ୍ରା ଆରି ଜନ୍ତୁନ୍, ଅନ୍ତିଡନ୍ ଅଡ଼୍କୋନ୍ ଅବ୍ସସତାୟ୍, ଇନିଆସନ୍ଗାମେଣ୍ଡେନ୍ ଆନିଞ୍ଜିଆଡଙ୍ ଗରଡ଼େଲାଞନ୍ ଆସନ୍ ମନ୍ନଲୋଙ୍ଞେନ୍ ଅନିୟମ୍ଡାଏନ୍ ।” 8ବନ୍ଡ ପ୍ରବୁନ୍ ନୋଅନ୍ଆଡଙ୍ କାନକାରମ୍ ଗାମେନ୍ ।
ନୋଅନ୍ ଡ ବୁବ୍ଡାନ୍
9ନୋଅନ୍ ଆକେଜ୍ଜା । ତି ଆବନେଡ଼ା ନୋଅନ୍ ଡରମ୍ମମର୍ ଡ ଲବଡ୍ଡିମର୍ ଡକୋଏନ୍ । ଡର୍ନେନ୍ ବାତ୍ତେ ନୋଅନ୍ ଇସ୍ୱରନ୍ଆଡଙ୍ ସଣ୍ଡୋଙେନ୍, 10ନୋଅନ୍ ଆ ଡାଙ୍ଗାଡ଼ାଅନ୍ ୟାଗି ଆଞୁମଞ୍ଜି ସେମ, ଆମ ଡ ଜେପତ, 11ତି ଆବନେଡ଼ା ଇସ୍ୱରନ୍ ପୁର୍ତିନ୍ ଆ ମନ୍ରାଜି ଆଗ୍ରିଜେନ୍ ପେଲ୍ଲାମର୍ଜି ଡକୋଏନ୍, ଆରି ସଙ୍ଗତ୍ତାନ୍ ଡକୋଏନ୍ । 12ଇସ୍ୱରନ୍ ପୁର୍ତିନ୍ ଆଗ୍ରିଜେନ୍ ପେଲ୍ଲାମରନ୍ ଗୋଗୋୟ୍ଲେ ପାଙେନ୍, ଆରି ଅଡ଼୍କୋନ୍ ଆ ପରାନ୍ନା ପେଲ୍ଲା ଡକୋଏଞ୍ଜି ।
13ଇସ୍ୱରନ୍ ନୋଅନ୍ଆଡଙ୍ ବରେନ୍, “ଅଡ଼୍କୋ ଜାତି ମରଞ୍ଜି ଆସନ୍ ଅନଞିଡ୍ ଜୋଗାନ୍ ତୁୟାୟ୍ଲାୟ୍ । ଞେନ୍ ଆନିଞ୍ଜିଆଡଙ୍ ରବ୍ବୁତାଜି, ଇନିଆସନ୍ଗାମେଣ୍ଡେନ୍ ଆ ସଙ୍ଗତାଞ୍ଜି ପୁର୍ତିଲୋଙନ୍ ଗୋଗୋୟ୍ଲେ ପାଙ୍ତେ । 14ଗୋପର ଅରାନ୍ ବାତ୍ତେ ଆମନ୍ ଆସନ୍ ଅବୟ୍ ଜାଜ୍ଜନ୍ ତୁବା; ଆନ୍ନା ଆନ୍ନା ବକରାନ୍ ତୁବ୍ଲେ ଅମ୍ମଗଡ୍ ଡ ବାରେଗଡ୍ ତାରୁନ୍ ବାତ୍ତେ ଜବ୍ଲିଡ୍ବା । 15ଜାଜ୍ଜ ଏନ୍ନେଗନ୍ ତୁବା ଅରଣ୍ଡଡିନ୍ ଆଡନେଙ୍ଗା ୟାଗିସଅ ସନ୍ତି, ରନକୋଡନ୍ ପଚାସ ସନ୍ତି, ତୋଣ୍ଡୋନ୍ ଆଡନେଙ୍ଗା ତିରିସି ସନ୍ତି । 16ଆଜିଅଲନ୍ ସିଲଡ୍ ବସନ୍ତି ଅମ୍ରେଙ୍ଲେ ଜାୟ୍ତାନ୍ ଜର୍କାନ୍ ତୁବା ଆରି ତିଗଡ୍ ଡୁଆରାନ୍ ଡକ୍କୋଆ । ଆରି ୟାଗିମଲା ଏମ୍ମେଲେ ଜାଜ୍ଜନ୍ ତୁବା । 17ଅଡ଼୍କୋନ୍ ଆ ପରାନ୍ନାଜି ଅନବ୍ସେଡନ୍ ଆସନ୍ ଞେନ୍ ପୁର୍ତିନ୍ ଅଃବୁବ୍ଡାତାୟ୍ । ପୁର୍ତିଲୋଙନ୍ ଡକୋନ୍ ଅଡ଼୍କୋନ୍ ଆ ପରାନ୍ନାନ୍ ରବୁଆୟ୍ତଜି, 18ବନ୍ଡ ଆମ୍ବେନ୍ ସରିନ୍ ଞେନ୍ ସିବ୍ଡେୟ୍ ବର୍ତନାୟ୍ । ଡୁକ୍ରିନମ୍, ଡାଙ୍ଗାଡ଼ାଅନ୍ନମ୍ଜି, ଆରି କଉନ୍ନମ୍ଜି ସରିନ୍ ଜାଜ୍ଜଲୋଙନ୍ ଗନ୍ନାବା । 19ପରାନ୍ନାନ୍ ଆନବ୍ମେଙ୍#6:19 ଡନୋବନ୍ ଆଞନାଙ୍ ଆସନ୍ ଆସନ୍ ଅଡ଼୍କୋ ଜନ୍ତୁଜି ଅବୟ୍ ଆଇନ୍ ଡ ଅବୟ୍ ଓବ୍ବାନ୍ ଆତେ ପାଙ୍ଲେ ଆମନ୍ ସରିନ୍ ଜାଜ୍ଜଲୋଙନ୍ ଗନ୍ନାବା । 20ଅଡ଼୍କୋନ୍ ଏର୍ଜାଡ଼ିକାନ୍ ଆ ଅନ୍ତିଡ୍, ଜନ୍ତୁନ୍, ଆରି କିମ୍ପୋଙନ୍ ବାତ୍ତେ ଆତ୍ରଙିୟ୍ତନ୍ ଆଜନ୍ତୁଜି ଅବୟ୍ ଓବ୍ବାନ୍ ଡ ଅବୟ୍ ଆଇନ୍ ପରାନ୍ନାନ୍ ଆନବ୍ମେଙ୍#6:20 ଡନୋବନ୍ ଆଞନାଙ୍ ଆସନ୍ ଆସନ୍ ଅମଙ୍ବାନମ୍ ଜିର୍ତାଜି । 21ଆମ୍ବେନ୍ ଆସନ୍ ଡ ଜନ୍ତୁଜି ଆସନ୍ ଅଡ଼୍କୋନ୍ ଆ ଜନୋମ୍ଜି ପାଙ୍ବା ।” 22ଇସ୍ୱରନ୍ ଆବ୍ରାଞେନ୍ ଅନ୍ତମ୍ ନୋଅନ୍ ଅଡ଼୍କୋନ୍ ଆ କାବ୍ବାଡ଼ା ଲୁମେନ୍ ।
Currently Selected:
ପର୍ତମ୍ମୁ 6: NTJaa20
Highlight
Copy
Compare
Share
Want to have your highlights saved across all your devices? Sign up or sign in
The Juray Soura Bible © The Word for the World International and Juray Soura Translation Samithi, Gajapati, Odisha. 2025
