ପର୍ତମ୍ମୁ 35
35
ବଇତେଲ୍ଲୋଙନ୍ ଇସ୍ୱରନ୍ ଜାକୁବନ୍ଆଡଙ୍ ଆ ଆସିର୍ବାଦ
1ତି ସିଲଡ୍ଲ୍ଲନ୍ ଇସ୍ୱରନ୍ ଜାକୁବନ୍ଆଡଙ୍ ବରେନ୍, “ଆମନ୍ ଡୋଲନ୍ ବେତେଲନ୍ ଜିର୍ରେ ତେତ୍ତେ ଇୟ୍ଡକୋନା; ଆରି, ବୋଞାଙ୍ନମ୍ ଏସୋନ୍ ଆମଙ୍ ସିଲଡ୍ ଆଜିର୍ରେନ୍ ଆଡିଡ୍ ଅଙ୍ଗା ଆ ଇସ୍ୱର ଅବ୍ଗିୟ୍ଲନେ, ଆନିନ୍ ଆସନ୍ ତନମ୍ପିଲନ୍ ତୁବା ।” 2ସିଲତ୍ତେ ଜାକୁବନ୍ ଆସିଙ୍ମରଞ୍ଜି ଡ ଆଗଡ଼ି ମରଞ୍ଜିଆଡଙ୍ ବରେନ୍, “ଅମଙ୍ବାବେନ୍ ଅଙ୍ଗା ଅଡ଼୍କୋନ୍ ବଡେସା ଆସନୁମ୍ଞ୍ଜି ଡକୋଜି, ଆନିଞ୍ଜିଆଡଙ୍ ସବ୍ଙାୟ୍ବା, ଆମ୍ବେଞ୍ଜିଡମ୍ ମବ୍ଡ଼ିର୍ନାବା, ଆରି, ସିନ୍ରିବେଞ୍ଜି ତାମ୍ବା । 3ଆରି,ଜିରାୟ୍ବା, ଇନ୍ଲେଞ୍ଜି ଡୋଲନ୍ ବେତେଲନ୍ ଏଜିର୍ବା; ଅଙ୍ଗା ଆ ଇସ୍ୱର ଡୁକଞେନ୍ ଆଡିଡ୍ ପାର୍ତନାଞେନ୍ ଅମ୍ଡଙେନ୍, ଡ ତଙରନ୍ ଆତ୍ରଙିୟ୍ଲାଞଞ୍ଜି ଆଡିଡ୍ ଞେନ୍ ସରିନ୍ ଡକୋଲନେ, ଆନିନ୍ ଆସନ୍ ଞେନ୍ ତି ଆଡ୍ରକୋନେଲୋଙ୍ ଅବୟ୍ ତନମ୍ପିଲନ୍ ତୁବ୍ତାୟ୍ ।” 4ସିଲତ୍ତେ ଆନିଞ୍ଜି ଆମଙଞ୍ଜି ଆଡ୍ରକୋଏନ୍ ବଡେସା ଆସନୁମ୍ଞ୍ଜି ଡ ପାସିଆନ୍ ଅଡ଼୍କୋନ୍ ପାଙ୍ଲେ ଜାକୁବନ୍ଆଡଙ୍ ତିୟେଞ୍ଜି, ଆରି, ଆନିନ୍ ତି ଅଡ଼୍କୋନ୍ ପାଙ୍ଲେ ସିକିମନ୍ ଆତୁୟାୟ୍ ଅଲୋନନ୍ ଆରାନୁବ୍ ଆ ଜାୟ୍ତା ସଲେ ଡକୋଏନ୍ । 5ସିଲତ୍ତେ ଆନିଞ୍ଜି ଜିରେଞ୍ଜି; ତିଆଡିଡ୍ ୟର୍ୟର୍ମନେଙ୍ ଗଡ଼ାବାନ୍ ଇସ୍ୱରନ୍ ଆମଙ୍ ସିଲଡ୍ ବନ୍ତଙନ୍ ଆରଡ଼ୋଲାଞନ୍ ଆସନ୍ ଆନିଞ୍ଜି ଜାକୁବନ୍ ଆ ଡାଙ୍ଗାଡ଼ାଅନଞ୍ଜିଆଡଙ୍ ଅଃଗଙ୍ଜଙ୍ଲଜି । 6ତି ସିଲଡ୍ଲ୍ଲନ୍ ଜାକୁବନ୍ ଡ ଆଗଡ଼ିଞ୍ଜି ଅଡ଼୍କୋନ୍ କିଣାନ୍ ଆଡେସା ଲୁସ୍ଲୋଙ୍, ଆଗ୍ରାମ୍ଗାମ୍, ବେତେଲ୍ଲୋଙ୍ ଅଡ଼ୋଏଞ୍ଜି । 7ତେତ୍ତେ ଆନିଞ୍ଜି ଅବୟ୍ ତନମ୍ପିଲନ୍ ତୁବ୍ଲେ ତି ଆଡ୍ରକୋନେ ଆଞୁମ୍ ଏଲ-ବେତେଲ୍#35:7 ଆଗ୍ରାମ୍ଗାମ୍ ବେତେଲନ୍ ଆ ଇସ୍ୱର ଡକୋଏନ୍; ଇନିଆସନ୍ଗାମେଣ୍ଡେନ୍ ଜାକୁବନ୍ ଆବୋଞାଙନ୍ ଆବନ୍ତଙ୍ଲୋଙ୍ ଆଜିର୍ରେନ୍ ଆଡିଡ୍ ଇସ୍ୱରନ୍ ତି ଆଡ୍ରକୋନେଲୋଙ୍ ଆନିନ୍ଆଡଙ୍ ଅବ୍ଗିୟ୍ଲନେ । 8ରିବିକାନ୍ ଆନବ୍କୋକ୍କୋଡ୍ବୟ୍ ଦବୋରାନ୍ ରବୁଏନ୍ ଆରି ଆନିନ୍ଆଡଙ୍ ବେତେଲ୍ ଆର୍ଜଡ଼ୋମ୍ସିଗଡ୍ ଡକୋନ୍ ଆ ଅଲୋନନୁବନ୍ ଆଜାୟ୍ତା ତିଲେଞ୍ଜି । ତିଆସନ୍ ତେତ୍ତେ “ଅଲୋନ୍ ବାକୁତ୍ ୟନେ ଅରାନୁବ୍ ଗାମ୍ଲେ ଅବ୍ଞୁମେଞ୍ଜି,”
9ତି ସିଲଡ୍ଲ୍ଲନ୍ ଜାକୁବନ୍ ପଦ୍ଦନ୍ ଅରାମନ୍ସିଲଡ୍ ଆୟର୍ରନାଞନ୍ ଆଡିଡ୍, ଇସ୍ୱରନ୍ ଆରି ବତର ଅବ୍ତୁୟ୍ଡମ୍ଲନ୍ ଆନିନ୍ଆଡଙ୍ ଆସିର୍ବାଦଏନ୍ । 10ଇସ୍ୱରନ୍ ଆନିନ୍ଆଡଙ୍ ବରେନ୍, “ଅଞିମ୍ନମ୍ ଜାକୁବ; ବନ୍ଡ ଅଞିମ୍ନମ୍ ଆରି ଜାକୁବ ଅଃଡେଏ, ଅଞିମ୍ନମ୍ ଇସ୍ରାଏଲ୍ ଡେତେ; ଆରି ଆନିନ୍ ଆଞୁମନ୍ ଇସ୍ରାଏଲ୍ ଡକୋଏନ୍ ।” 11ଇସ୍ୱରନ୍ ଆନିନ୍ଆଡଙ୍ ଆରି ବରେନ୍, “ଞେନ୍ ଅଡ଼୍କୋନ୍ ଆରନପ୍ତି ଇସ୍ୱର; ପସିୟ୍ନମ୍ଜି ଡ ଅସିଂଙ୍ମର୍ନଞ୍ଜି ଆକେଜ୍ଜା ଗୋଗୋଜେତୋ; ଅମଙ୍ନମ୍ ସିଲଡ୍ ଅବୟ୍ କେଜ୍ଜାନ୍, ଆରି ବକେଜ୍ଜା ଡୁଙ୍ତନାୟ୍, ଆରି, ଅମଙ୍ନମ୍ ସିଲଡ୍ ରାଜାଞ୍ଜି ଡୁଙ୍ତନାଜି । 12ଆରି, ଞେନ୍ ଅବ୍ରାଆମନ୍ ଡ ଇସାକନ୍ଆଡଙ୍ ଅଙ୍ଗା ଆଡେସା ଏତିୟ୍ଲାୟ୍, ତି ଆଡେସା ଆମନ୍ଆଡଙ୍ ଡ ତ୍ତିକିଆଓୟୋଙ୍ ଆକେଜ୍ଜା ଏତିୟ୍ତାୟ୍ ।” 13ତି ଆଡ୍ରକୋନେଲୋଙ୍ ଆନିନ୍ ସରିନ୍ କେନ୍ଏଡ୍ନେଲେ ଅଲ୍ବର୍ଲେ ଇସ୍ୱରନ୍ ଆମଙନ୍ ସିଲଡ୍ ଜିରେନ୍ । 14ସିଲତ୍ତେ ଜାକୁବନ୍ ତି ଆକ୍ରଡାଡ଼ିଲଞ୍ଜି ଆଡ୍ରକୋନେଲୋଙ୍ ଅବୟ୍ ଅରେଙନ୍, ଆଗ୍ରାମ୍ଗାମ୍, ଅରେଙନ୍ ସୁବ୍ଲେ ତି ଆତୋଣ୍ତୁ ଗାଗାଡାନ୍ ଅନମଙନ୍ ତିୟେନ୍ ଆରି ମିଞଲନ୍ ଲାଏନ୍ । 15ଆରି, ଜାକୁବନ୍ ଇସ୍ୱରନ୍ ସରିନ୍ ଆକ୍ରଡାଡ଼ିଲଞ୍ଜି ଆଡ୍ରକୋନେ ଆଞୁମ୍ ବେତେଲ୍ ଡକୋଏନ୍ ।
ରାଏଲନ୍ ଆ ରନବୁ
16ତି ସିଲଡ୍ଲ୍ଲନ୍ ଆନିଞ୍ଜି ବେତେଲନ୍ ସିଲଡ୍ ଜିରେଞ୍ଜି, ବନ୍ଡ ଇପ୍ରାତାଲୋଙ୍ ଆନଡ଼ୋ ଅସୋୟ୍ ତଙରନ୍ ଆଡ୍ରକୋଏନ୍ ଆଡିଡ୍ ରାଏଲନ୍ କୋକୋଡନ୍ ବତାନ୍ ବତ୍ତାଏନ୍; ଆରି, କନୋଡନ୍ ଆସନ୍ ଆନିନ୍ ଗୋଗୋୟ୍ ଡଣ୍ତଏନ୍ । 17ଆରି କୋକ୍କୋଡନନ୍ ଆବତା ଆଗ୍ରୋଗୋଜେନ୍, ଆନବ୍କୋକ୍କୋଡ୍ବୟ୍ ଆନିନ୍ଆଡଙ୍ ବରେନ୍, “ବତଙ୍ଡଙମ୍, ଆମନ୍ କେନ୍ନିୟ୍ ଆଡିଡ୍ ଓବ୍ବାସିୟ୍ କୋଡ୍ତେ ।” 18ଡେଲୋଜନଙ୍ଡେନ୍ ଆନିନ୍ ରବୁଏନ୍, ଆରି, ଅନ୍ରଙ୍ରବୁଏନ୍ ଆଡିଡ୍ ଆ ଡାଙ୍ଗାଡ଼ାଅନ୍ ଆଞୁମ୍ ବିନୋନି#35:18 ଡଣ୍ତଡମ୍ ଆକନୋଡ୍ ଆଡାଙ୍ଗାଡ଼ାଅନ୍ ଡକୋଏନ୍; ବନ୍ଡ ଆପେୟନ୍ ଆଞୁମନ୍ ବିନ୍ୟାମିନ୍#35:18 ଅର୍ଜଡ଼ୋମ୍ ସିଞେନ୍ ଆଡାଙ୍ଗାଡ଼ାଅନ୍ ଡକୋଏନ୍ । 19କେନ୍ ଏନେଲେ ରାଏଲନ୍ ଆର୍ରବୁଏନ୍ ଆସନ୍, ଇପ୍ରାତା, ଆଗ୍ରାମ୍ଗାମ୍, ବେତଲିଅମନ୍ ଆଜନିର୍ ଆତଙର୍ବା ତନୁଲନ୍ ଡେନ୍ । 20ତି ସିଲଡ୍ଲ୍ଲନ୍ ଜାକୁବନ୍ ତି ଆମସାନ୍ନିଲୋଙ୍ ଅବୟ୍ ସୋଣ୍ତାଙନ୍ ସୁବେନ୍; ରାଏଲନ୍ ଆମସାନ୍ନିଲୋଙ୍ ତି ଆସୋଣ୍ତାଙ୍ ନମିଆନ୍ତାନ୍ ଡକୋ । 21ତି ସିଲଡ୍ଲ୍ଲନ୍ ଇସ୍ରାଏଲନ୍ ତେତ୍ତେ ସିଲଡ୍ ଜିର୍ରେ ଏଦରନ୍ ଆଗଡ଼ା ପଡ୍ଲେ ଆତୟ୍ତୟ୍ବାନ୍ ତମ୍ୱୁସିଙନ୍ ଗୁଏନ୍ ।
ଜାକୁବନ୍ ଆ ଡାଙ୍ଗାଡ଼ାଅଞ୍ଜି
22ତି ଆଡେସାଲୋଙ୍ ଇସ୍ରାଏଲନ୍ ଆଡ୍ରକୋଲନ୍ ଆଡିଡ୍ ରୁବେନନ୍ ଜିର୍ରେ ଆପେୟନ୍ ଆତିକିବୟ୍ ବିଲ୍ଆନ୍ ଆଞୁମ୍ବୟ୍ ସରିନ୍ ଲୁଡେନ୍, ଆରି, ଇସ୍ରାଏଲନ୍ ତିଆତେ ଅମ୍ଡଙେନ୍ କି ବରାବେନ୍ । 23ଜାକୁବନ୍ ଆ ଡାଙ୍ଗାଡ଼ାଅନ୍ ବାର୍ଟା ଡକୋଏଞ୍ଜି; ଆମଙ୍ଲୋଙଞ୍ଜିସିଲଡ୍ ରୁବେନନ୍ ଜାକୁବନ୍ ଆ ସୋଡ଼ା ଡାଙ୍ଗାଡ଼ାଅନ୍, ଆନିନ୍, ଆରି, ସିମିୟୋନନ୍ ଡ ଲେବିନ୍ ଆରି ଜିଉଦାନ୍ ଡ ଇସାକରନ୍ ଆରି ସବୁଲୁନନ୍, କେନ୍ଆନିଞ୍ଜି ଲେୟାନ୍ ଆଅଞ୍ଜି; 24ଆରି, ଜୋସେପନ୍ ଡ ବିନ୍ୟାମିନନ୍ ରାଏଲନ୍ ଆଅନ୍; 25ଆରି, ଦାନନ୍ ଡ ନପ୍ତାଲିନ୍ ରାଏଲନ୍ ଆକମ୍ୱାରିବୟ୍ ବିଲ୍ଆନ୍ ଆଅନ୍; 26ଆରି ଗାଦନ୍ ଡ ଆସେରନ୍ ଲେୟାନ୍ ଆକମ୍ୱାରିବୟ୍ ସିଲ୍ପାନ୍ ଆଅନ୍ । କେନ୍ ଅଡ଼୍କୋନ୍ ଜାକୁବନ୍ ଆ ଡାଙ୍ଗାଡ଼ାଅଞ୍ଜି ପଦ୍ଦନ୍ ଅରାମଲୋଙ୍ କୋଡେଞ୍ଜି ।
ଇସାକନ୍ ଆର୍ନବୁ
27ତି ସିଲଡ୍ଲ୍ଲନ୍ କିରିୟତ୍-ଅର୍ବ, ଆଗ୍ରାମ୍ଗାମ୍, ଇବ୍ରୋଣନ୍ ଆଗଡ଼ା ଆତୁୟା ମମ୍ରିନ୍ ଆଞୁମ୍, ଅଙ୍ଗାଲୋଙ୍ ଅବ୍ରାଆମନ୍ ଡ ଇସାକନ୍ ଡକୋଲଞ୍ଜି, ତି ଆଡ୍ରକୋନେଲୋଙ୍ ଜାକୁବନ୍ ଆପେୟନ୍ ଇସାକନ୍ ଆମଙ୍ବା ଅଡ଼ୋଏନ୍ । 28ଇସାକନ୍ ଆନମେଙ୍ ମିୟ୍ନୁମ୍ ସଏ ଅସିଏ ବର୍ସେ ଡକୋଏନ୍ । 29ତି ସିଲଡ୍ଲ୍ଲନ୍ ଇସାକନ୍ ବୁଡାଏନ୍ ଡ ବରିୟ୍ ମିୟ୍ନୁମ୍ଲେ ରବୁଏନ୍, ଆ ଜୋଜୋଞ୍ଜି ଆମଙ୍ବା ଅନୋରୋଙନ୍ ଡେଏନ୍; ଆରି, ଆ ଡାଙ୍ଗାଡ଼ାଅଞ୍ଜି ଏସୋନ୍ ଡ ଜାକୁବନ୍ ଆନିନ୍ଆଡଙ୍ ତିଲେଞ୍ଜି ।
Currently Selected:
ପର୍ତମ୍ମୁ 35: NTJaa20
Highlight
Copy
Compare
Share
Want to have your highlights saved across all your devices? Sign up or sign in
The Juray Soura Bible © The Word for the World International and Juray Soura Translation Samithi, Gajapati, Odisha. 2025
