ପର୍ତମ୍ମୁ 24
24
ଇସାକନ୍ ଆସନ୍ ଆଇବଜନ୍
1ତିଆଡିଡ୍ ଅବ୍ରାଆମନ୍ ବୁଡାଏନ୍ ଆରି ଗୋଗୋୟ୍ ବର୍ସେଙ୍ ଡେନ୍, ଆରି, ପ୍ରବୁ ଅବ୍ରାଆମନ୍ଆଡଙ୍ ଅଡ଼୍କୋନ୍ ଆବିସୟ ଆସିର୍ବାଦଏନ୍ । 2ତିଆସନ୍ ଆନିନ୍ ଆସିଙନ୍ ଅଡ଼୍କୋନ୍ ଆକାବ୍ବାଡ଼ା ଆଡନେ ଆବୁଡା କମ୍ୱାରିନ୍ଆଡଙ୍ ବରେନ୍, “ଞେନ୍ କାକୁର୍ତିତନାୟ୍, ଆମନ୍ ବୁଲୁଲୋଙ୍ଞେନ୍ ଅସିନମ୍ ଡକ୍କୋଆ; 3ଞେନ୍ ରୁଆଙନ୍ ଡ ପୁର୍ତିନ୍ ଆଗନବ୍ଡେଲ୍ମର୍ ସଦାପ୍ରବୁ ଇସ୍ୱରନ୍ ଆଞୁମ୍ଲୋଙ୍ ଆମନ୍ଆଡଙ୍ ଅଃପର୍ମାଡ଼ାତମ୍, ଅଙ୍ଗା ଆକିଣାନିୟ୍ ଆ ମନ୍ରାଜି ଆମଙ୍ ଞେନ୍ ଡକୋତନାୟ୍, ଆମନ୍ ଆନିଞ୍ଜି ଆମଙ୍ ସିଲଡ୍ ଡାଙ୍ଗଡ଼ାଅଞେନ୍ ଆନବ୍ଞାଙ୍ବୟ୍ ଆସନ୍ ଅନ୍ନିଙ୍ ଆଇବୟ୍ ସରିନ୍ ବିବାଡଙ୍ନେତଡ୍ । 4ବନ୍ଡ, ଆମନ୍ ଡେସାଞେନ୍ ଆକୁଲମ୍ଜି ଆମଙ୍ ଇୟ୍ଲେ ଡାଙ୍ଗଡ଼ାଅଞେନ୍ ଇସାକନ୍ ଆସନ୍ ଆଇବଜନ୍ ଓରୋଙାୟ୍ ।”
5ତି ଆବନେଡ଼ା ତି ଆକମ୍ୱାରିନ୍ ଆନିନ୍ଆଡଙ୍ ବରେନ୍, “ଅନିଙ୍ ଆଇବୟ୍ ଞେନ୍ ସରିନ୍ କେନ୍ ଆଡେସା ଆଜନିର୍ ଆସନ୍ ଅଃନଡ଼େଲଡେନ୍, ଏତ୍ତେଲ୍ଡେନ୍ ଆମନ୍ ଅଙ୍ଗା ଆଡେସା ସିଲଡ୍ ଜିର୍ରାୟ୍, ତି ଆଡେସା ଡାଙ୍ଗଡ଼ାଅନନ୍ଆଡଙ୍ ଓରୋଙେ ପଙ୍ ?”
6ଅବ୍ରାଆମନ୍ ବର୍ରନେ, “ଜାଗର୍ତ; ଡାଙ୍ଗାଡ଼ାଅନ୍ଞେନ୍ଆଡଙ୍ ଆଙ୍ଗିୟ୍ ତେତ୍ତେ ଓରୋଙ୍ଡଙ୍ ।” 7ଇନିଆସନ୍ଗାମେଣ୍ଡେନ୍ ରୁଆଙନ୍ ଆଗନବ୍ଡେଲ୍ମର୍ ଅଙ୍ଗା ଆ ସଦାପ୍ରବୁ ଇସ୍ୱର ଆପେୟ୍ଞେନ୍ ଆସିଙ୍ ଡ କନୋଡ୍କୋଡ୍ ଡେସାଞେନ୍ ସିଲଡ୍ ଞେନ୍ଆଡଙ୍ ଓରୋଙ୍ଲିଁୟ୍ ଡ ଞେନ୍ ସରିନ୍ କଡାଡ଼ିଲନ୍, ଆରି, ଞେନ୍ କେଜ୍ଜାନମ୍ କେନ୍ ଆଡେସା ଏତିୟ୍ତମ୍ ଗାମ୍ଲେ ପର୍ମାଡ଼ାଲନ୍ନେ, ମୁକାବାନମ୍ ଆନିନ୍ ଆ କବରପାଙ୍ଲଙ୍ମରନ୍ ଆପାୟ୍ତେ; ସିଲତ୍ତେ ଆମନ୍ ଡାଙ୍ଗଡ଼ାଅଞେନ୍ ଆଞାଙ୍ବୟ୍ନେ ଆସନ୍ ତି ତେତ୍ତେ ସିଲଡ୍ ଅବୟ୍ ଆଇସିଜନ୍ ଓରୋଙାୟ୍ । 8ତି ଆଡେସା ସିଲଡ୍ ଅନ୍ନିଙ୍ ଆଇସିୟ୍ ଜନିରନ୍ ଆସନ୍ ଅହନଡ଼େଲୋନଙ୍, ତିଡେନ୍ କେନ୍ ପର୍ମାଡ଼ାଲୋଙ୍ଞେନ୍ ସିଲଡ୍ ଆମନ୍ ଅଡ଼ୁର୍ତମ୍; ବନ୍ଡ ଆମନ୍ ଡାଙ୍ଗାଡ଼ାଅନ୍ଞେନ୍ଆଡଙ୍ ତି ଆଡେସା ଓରୋଙ୍ଡଙେ । 9ସିଲତ୍ତେ ତି ଆ କମ୍ୱାରି ଆ ସାଉକାରନ୍ ଅବ୍ରାଆମନ୍ ଆବୁଲୁଲୋଙନ୍ ଆସିନ୍ ଡକ୍କୋଲେ ପର୍ମାଡ଼ାଲନେ । 10ତି ସିଲଡ୍ଲ୍ଲନ୍ ତି ଆ କମ୍ୱାରି ଆ ସାଓକାରନ୍ ଆ ଓଟଜି ସିଲଡ୍ ଦସଟା ଓଟନ୍ ଡ ଆ ପ୍ରବୁନ୍ ଅଡ଼୍କୋନ୍ ମନଙ୍ ଆଜନବ୍ ଞମ୍ଲେ ଅରାମନଅରୟିମ୍#24:10 ଆଗ୍ରାମ୍ଗାମ୍ ମେସୋପଟାମିଆ ଆଡେସା ନାଓରନ୍ ଆଗଡ଼ାବା ଜିରେନ୍ । 11ତି ସିଲଡ୍ଲ୍ଲନ୍ ସାଲ୍ଲୁମ୍ ଓଲେନ୍ ଆଡିଡ୍, ଅଙ୍ଗା ଆବନେଡ଼ା ଡାଙ୍ଗଡ଼ିବଜଞ୍ଜି ଗେନ୍ଡାବାନ୍ ଇୟ୍ତାଜି, ତି ଆବନେଡ଼ା ଆନିନ୍ ଗଡ଼ାନ୍ ଆନେଙ୍ ଆ କୁଆବା ଓଟଞ୍ଜିଆଡଙ୍ ଅବ୍ତୁଡ଼ୁମ୍ଲେ ଅବ୍ଲୁଡ୍ଲୁଡେନ୍ । 12ଆନିନ୍ ଏନ୍ନେଲେ ପାର୍ତନାଲନେ, “ଏ ପ୍ରବୁ , ସାଉକାରଞେନ୍ ଅବ୍ରାଆମନ୍ ଆ ଇସ୍ୱର, କାକୁର୍ତିତନାୟ୍ ଲଙେ ପାର୍ତନାଞେନ୍ ଅମ୍ଡଙା ଆରି ସାଉକାରଞେନ୍ ଅବ୍ରାଆମନ୍ଆଡଙ୍ ସାୟୁମା । 13ଗିଜା ଞେନ୍ କେନ୍ ଆ କୁଆବା ତନଙ୍ତାୟ୍, ଆରି କେନ୍ ଆଗଡ଼ାମରଜି ଆଡାଙ୍ଗଡ଼ିଜି ଡାଆନ୍ ଆପନାଙ୍ ଆସନ୍ ଇୟ୍ତାଜି; 14ଆନିଞ୍ଜି ଆମଙ୍ ସିଲଡ୍ ଅନ୍ନିଙ୍ ଆ ଡାଙ୍ଗଡ଼ିବୟ୍, ଗରେଣ୍ତାଲୋଙନ୍ ଆ ଡାଆ ଞେନ୍ଆଡଙ୍ ଗାଡାନେନ୍ ଆସନ୍ ତିୟ୍ତିଁୟ୍ଡେନ୍ । କେନ୍ ଆବର୍ନେ ବର୍ରନାୟ୍ଡେନ୍ ତି ଆ ଡାଙ୍ଗଡ଼ି ଗାଡାନା, ଡ ଓଟନମ୍ଜି ଜାୟ୍ ଅବ୍ଗାଡାତାୟ୍, ତିଡେନ୍ ଆନିନ୍ କମ୍ୱାରିନମ୍ ଇସାକନ୍ ଆସନ୍ ବାନ୍ନାସେ ଡାଙ୍ଗଡ଼ିବୟ୍ ଡେଏତୋ; ସିଲତ୍ତେ ଆମନ୍ ସାଉକାରଞେନ୍ ଆସନ୍ ସାୟୁମେନ୍, କେନ୍ ଆତେ ଞେନ୍ ଜନାତିଁୟ୍ ।”
15କେନ୍ ଆବର୍ନେ ବର୍ନା ବର୍ନା ଅବ୍ରାଆମନ୍ ଆବୋଞାଙ୍ ଆଞୁମ୍ ନାଓରନ୍ ଆଡୁକ୍ରିନ୍ ମିଲ୍କାନ୍ ଆ ଡାଙ୍ଗାଡ଼ାଅନ୍ ବତୁଏଲନ୍ । ଆ ଡାଙ୍ଗଡ଼ିଅନନ୍ ରିବିକାନ୍ ଆ ତାରଙ୍ଲୋଙନ୍ ଗରେଣ୍ଡାନ୍ ବୋୟ୍ଲେ ଜିର୍ରାୟ୍ । 16ତି ଆଡାଙ୍ଗଡ଼ିସିୟ୍ ମାଡ୍ଡ ମନଙ୍ ଆରି ଏର୍ବିବାନେ । ଅନ୍ନିଙ୍ ଆ ଓବ୍ବାମର୍ ବାତ୍ତେ ଡଅଙ୍ଡାଗୋ ଇର୍ସେ କାବ୍ବାଡ଼ାନ୍ ଏର୍ଲନୁମ୍ । ଆନିନ୍ କୁଆବାନ୍ ଜିର୍ରେ ଗରେଣ୍ତାଲୋଙନ୍ ଡାଆନ୍ ବବ୍ରିୟ୍ଲେ ବୋୟ୍ଲେ ୟର୍ରନାୟ୍ । 17କେନ୍ ଏନ୍ନେଗନ୍ ଆଡିଡ୍ ତି ଆ କମ୍ୱାରି ଇର୍ରେ ଆନିନ୍ଆଡଙ୍ ଇୟ୍ଲେ ବରେ, “ଞେନ୍ କାକୁର୍ତିତନାୟ୍, ଗରେଣ୍ତାଡାନମ୍ ସିଲଡ୍ ଞେନ୍ଆଡଙ୍ ଗାଡାନେନ୍ ଆସନ୍ ଡାଆନ୍ ତିୟିଁୟ୍ ।”
18ସିଲତ୍ତେ ଆନିନ୍ ବର୍ରନେ, “ଆଜ୍ଞା, ଗାଡାନା,” କେନ୍ ଆବର୍ନେ ବର୍ରନ୍ ଗରେଣ୍ତାଡାନ୍ ଆସିଲୋଙନ୍ ସିଲଡ୍ ଜାୟ୍ତାନ୍ ଲପଡ୍ଲନ୍ ଆନିନ୍ଆଡଙ୍ ଗାଡାନେନ୍ ଆସନ୍ ତିୟେନ୍ । 19ଆରି ଗାଗାନ୍ ଆସନ୍ ଡାଆନ୍ ତିୟ୍ଲେ ଆନିନ୍ ଆନିନ୍ଆଡଙ୍ ବରେନ୍, “ଓଟନମ୍ଜି ଅଡ଼୍କୋନ୍ ଗାଡାନେନ୍ ଅନ୍ରଙ୍ ସାଡେଞ୍ଜି ଜାୟ୍ ଡାଆନ୍ ଗେନ୍ଲେ ତିୟ୍ତାୟ୍ ।” 20ସିଲତ୍ତେ ଆନିନ୍ ଡୋଙ୍କାଲୋଙନ୍ ଗରେଣ୍ତାଡାନ୍ ଲାଲେ ଡାଆନ୍ ଆଗନେନ୍ ଆସନ୍ କୁଆବାନ୍ ଲଇୟ୍ଲେ ଅଡ଼୍କୋନ୍ ଆଓଟ ଆସନ୍ ଡାଆନ୍ ଗନେନ୍ । 21ସିଲତ୍ତେ ତି ଆଓବ୍ବାମର୍ ଏର୍ସେଡ୍ମଡ୍ନେନ୍ ଆନିନ୍ଆଡଙ୍ ଆଙାଙ୍ଲେ ଡକୋଲନ୍; ଆରି, ପ୍ରବୁ ଆଜନିରନ୍ ଗବ୍ଡେଲ୍ତେ ଅଡ଼େ ଇଜ୍ଜା, ତି ଆଜନନା ଆସନ୍ ଅବ୍କଡ଼ିଙ୍ଲନ୍ ଡକୋଲନ୍ ।
22ଆରି, ଓଟଞ୍ଜି ଗାଡାନେନ୍ ଆସ୍ରାଡେଞ୍ଜି ସିଲଡ୍ ତି ଆ ଓବ୍ବାମର୍ ଆନିନ୍ ଆସନ୍ ସୁନ୍ନା ଜୋଡ଼ୋର୍ମୁଜନ୍ ଡ ଆସିଲୋଙନ୍ ଆସନ୍ ବାଗୁ ସୁନ୍ନା କାନ୍ସନ୍ ପାଙ୍ଲେ ବରେନ୍ । 23“କାକୁର୍ତିତନାୟ୍, ଆମନ୍ ଆନା ଆଡାଙ୍ଗଡ଼ିଅନ୍, ଞେନ୍ଆଡଙ୍ ବରିଁୟ୍ । ଆପେୟ୍ନମ୍ ଆସିଙ୍ ଇନ୍ଲେଞ୍ଜି ଆସନ୍ ତଗଲନ୍ ଆଡ୍ରକୋନେ ଡକୋପଙ୍ ?”
24ସିଲତ୍ତେ ଆନିନ୍ ଜାଲଙ୍ଲେ ବର୍ରନେ, “ନାଓରନ୍ ଆଡୁକ୍ରି ମିଲ୍କାନ୍ ସିଲଡ୍ କନୋଡନ୍ ଆଡ୍ରେନ୍ ଆଅନ୍ ବତୁଏଲନ୍, ଆଡାଙ୍ଗଡ଼ିଅନ୍ ଞେନ୍ ।” 25ଆନିନ୍ ଆରି ବର୍ରନେ, “ଅସିଙ୍ଲେନ୍ ଅଲାମନ୍ ଡ ଜନ୍ତୁଜି ଆଜନୋମ୍ ଆସନ୍ ନିୟ୍ ଗୋଗୋୟ୍ ଡକୋ, ଆରି ଆମନ୍ ଆସନ୍ ଡରକୋନେନ୍ ଜାୟ୍ ଡକୋ ।”
26ତିଆଡିଡ୍ ତି ଆ ମନ୍ରା ବରୁମ୍ଲେ ପ୍ରବୁନ୍ଆଡଙ୍ ଲୋମ୍ଲେ ବର୍ରନେ । 27“ସାଉକାରଞେନ୍ ଅବ୍ରାଆମନ୍ ଆ ସଦାପ୍ରବୁ ଇସ୍ୱରନ୍ଆଡଙ୍ ସନେଙ୍କେନ୍ ଡେଏତୋ, ଇନିଆସନ୍ଗାମେଣ୍ଡେନ୍ ଆନିନ୍ ସାଉକାରଞେନ୍ ଆସନାୟୁମ୍ ଡ ଆଜାଡ଼ିନ୍ ଆନବ୍ତୁୟ୍ ଆସନ୍ ଆଙ୍ଗିୟ୍ଜା ଅଃସାଡ୍ଲନେ; ଆରି, ପ୍ରବୁନ୍ ଞେନ୍ଆଡଙ୍ ସାଉକାରଞେନ୍ ଆକୁଲମ୍ଞ୍ଜି ଆସିଙ୍ ଆ ତଙର୍ଗଡ୍ ଓରୋଙ୍ଲିଁୟ୍ ।”
28ଆରି ତି ଆଡାଙ୍ଗଡ଼ି ଇର୍ରେ ଆୟୋଙନ୍ ଆସିଙ୍ ଆମନ୍ରାଜିଆଡଙ୍ କେନ୍ ଆବର୍ନେ ଅବ୍ଜନାଏନ୍ । 29ଆରି ରିବିକାନ୍ ଆବବ୍ରେ ଅବୟ୍ ଡକୋଏନ୍, ଆଞୁମନ୍ ଲାବନ୍; ତି ଆଲାବନ୍ ତି ଆ ମନ୍ରା ଆରନବାଙ୍ ଆସନ୍ କୁଆବାନ୍ ଇୟେନ୍ । 30ଆରି ତି ଆ ମନ୍ରା ଞେନ୍ଆଡଙ୍ କେନ୍ ଆବର୍ନେ ବର୍ରିୟ୍, “ଆତନାନନ୍ ରିବିକାନ୍ ଆମଙ୍ସିଲଡ୍ କେନ୍ ଆବର୍ନେ ଅମ୍ଡଙେନ୍ ଆରି ଆତନାନନ୍ ଆଜୋଡ଼ୋର୍ମୁଜନ୍ ଡ ଆସିଲୋଙନ୍ ଆକାନ୍ସ ଗିୟ୍ଲେ ତି ଆ ମନ୍ରା ଆମଙ୍ବା ଇୟେନ୍,” ଆରି, ଆନିନ୍ କୁଆବାନ୍ ଓଟଞ୍ଜି ସରିନ୍ ଆତନଙ୍ ଆଗ୍ରିଜେନ୍ ବରେନ୍, 31“ପ୍ରବୁ ଆରାସିର୍ବାଦଲମନ୍ ଆମନ୍ରା ଆମନ୍, ଅସିଙନ୍ ଗନ୍ନାୟ୍, ଆମନ୍ ଇନିବା ଡାଣ୍ତନ୍ ତନଙ୍ଲେ ଡକୋତନ୍ ? ଞେନ୍ ଅସିଙନ୍ ଡ ଓଟଞ୍ଜି ଆସନ୍ ଡରକୋନେନ୍ ତୁବ୍ଲାୟ୍ ।”
32ସିଲତ୍ତେ ତି ଆ ମନ୍ରା ଅସିଙନ୍ ଗନ୍ଲନ୍ ଓଟଞ୍ଜି ଆଡଅଙ୍ଲୋଙ୍ ଆଜିନିସ ଉଜେନ୍, ଆନିନ୍ ଆନିଞ୍ଜିଆଡଙ୍ ଅଲାମନ୍ ଆରି ଜନ୍ତୁଜି ଆଜନୋମ୍ଜି ତିୟେନ୍, ଆରି ଆନିନ୍ ଡ ଆମନ୍ରାଞ୍ଜିଆଡଙ୍ ଆଜଙ୍ନେନ୍ ଆସନ୍ ଡାଆନ୍ ତିୟେନ୍ । 33ସିଲତ୍ତେ ଆମୁକାବାନ୍ ଗାଗାନେନ୍ ଆସନ୍ ଜନୋମଞ୍ଜି ପାଙ୍ଲାୟ୍ଜି; ବନ୍ଡ ଆନିନ୍ ବର୍ରନେ, “ବର୍ନେଞେନ୍ ଅନ୍ରଙ୍ ବର୍ନାଞନ୍ ଜାୟ୍ ଞେନ୍ ଅଃଗାଗାନାୟ୍ ।” ସିଲତ୍ତେ ଲାବନନ୍ ବର୍ରନେ, “ବର୍ନା ।”
34ଆନିନ୍ ବର୍ରନେ, “ଞେନ୍ ଅବ୍ରାଆମନ୍ ଆ କମ୍ୱାରି ।” 35ପ୍ରବୁନ୍ ସାଉକାଞେନ୍ଆଡଙ୍ ଜବ୍ର ଆସିର୍ବାଦଏନ୍; ତିଆସନ୍ ଆନିନ୍ ବେସି ଗମାଙେନ୍; ଆରି ପ୍ରବୁନ୍ ଆନିନ୍ଆଡଙ୍ ମଣ୍ତାତାଙ୍ଲେୟନ୍ ମେଣ୍ତାନ୍ ଡ ରୁପାନ୍ ସୁନାନ୍ ଆରି କମ୍ୱାରି କମ୍ୱାରିବଜନ୍, ଆରି, ଓଟନ୍ ଗୋଡୋଁୟନ୍ ତିୟେନ୍ । 36ଆରି ସାଉକାରଞେନ୍ ଆଡୁକ୍ରି ସାରାନ୍ ଆନ୍ନୁଡିଇଙ୍ ଆଡିଡ୍ ଆନିନ୍ ଆସନ୍ ଅବୟ୍ ଓବ୍ବାସିଜନ୍ କୋଡେନ୍ ଆରି ଆନିନ୍ ଆନିନ୍ଆଡଙ୍ ଆନର୍ଜେନ୍ ଅଡ଼୍କୋନ୍ ତିୟେନ୍ । 37ଆରି ପ୍ରବୁଞେନ୍ ଞେନ୍ଆଡଙ୍ ଅଃପର୍ମାଡ଼ାଲେ ବର୍ରିୟ୍, “ଞେନ୍ ଅଙ୍ଗା ଆ ମନ୍ରାଜି ଆମଙ୍ ଏଡକୋତନାୟ୍, ଆମନ୍ ଅଅନ୍ଞେନ୍ ଆଞାଙ୍ବୟ୍ନେ ଆସନ୍ କେନ୍ ଆକିଣାନ୍ ଆଡେସା ଆ ମନ୍ରାଜି ଆନ୍ନିଙ୍ ଆଡାଙ୍ଗଡ଼ିଅନ୍ ଅଃଜାଏ; 38ବନ୍ଡ ଆପେୟ୍ଞେନ୍ ଆ କେଜ୍ଜା ଆ ମନ୍ରାଜି ଆମଙ୍ ଇୟ୍ଲେ ଡାଙ୍ଗଡ଼ାଅଞେନ୍ ଆସନ୍ ଡାଙ୍ଗଡ଼ିନ୍ ଓରୋଙାୟ୍ ।” 39ତିଆଡିଡ୍ ପ୍ରବୁଞେନ୍ଆଡଙ୍ ବର୍ରାୟ୍, “ଓଡେନ୍ନଙ୍ ଅନ୍ନିଙ୍ ଆଡାଙ୍ଗଡ଼ି ଞେନ୍ ସରିନ୍ ଅଃଜିର୍ରାୟ୍ଡେନ୍ ଞେନ୍ ଇନିଏଙ୍ଗାନାୟ୍ ?” 40ସିଲତ୍ତେ ଆନିନ୍ ବର୍ରନେ, “ଅଙ୍ଗା ଆ ସଦାପ୍ରବୁ ଞେନ୍ ମାନ୍ନେତାୟ୍, ଆନିନ୍ ଆମନ୍ ସରିନ୍ ଆ ପାଙ୍ଲଙ୍ବରନ୍ ଆପ୍ପାୟ୍ଲେ ଜନିର୍ନମ୍ ଗବ୍ଡେଲ୍ତେ; ସିଲତ୍ତେ ଆମନ୍ ଆପେୟ୍ଞେନ୍ ଆ କେଜ୍ଜା ସିଲଡ୍, ଡାଙ୍ଗଡ଼ାଅଞେନ୍ ଆସନ୍ ଡାଙ୍ଗଡ଼ିବଜନ୍ ଓରୋଙାୟ୍ । 41ଆରି ଆମନ୍ କେଜ୍ଜାଞେନ୍ ଆ ମନ୍ରାଜି ଆମଙ୍ବା ଇୟେନ୍ଡେନ୍, କେନ୍ ଆପର୍ମାଡ଼ା ସିଲଡ୍ ଅନୁରନ୍ ଞାଙ୍ତେ; ଆନିଞ୍ଜି ଡାଙ୍ଗଡ଼ିବଜନ୍ ଅଃତିୟ୍ଲମ୍ଞ୍ଜିଡେନ୍, ପର୍ମାଡ଼ାନ୍ ସିଲଡ୍ ଅନୁରନ୍ ଞାଙ୍ତେ ।”
42ତିଆସନ୍ ଲଙେ ଞେନ୍ କେନ୍ ଆକୁଆବା ଅଡ଼ୋଲେ ଏନେଲେ ପାର୍ତନାଲନାୟ୍, ସାଉକାରଞେନ୍ ଅବ୍ରାଆମନ୍ ଆ ପ୍ରବୁ ଇସ୍ୱର, ଞେନ୍ ଇନି ଲୁମ୍ତାୟ୍ ଆମନ୍ ଆସିର୍ବାଦଇଁୟ୍ । 43ଗିଜା, ଞେନ୍ ନମି କେନ୍ ଡାଆନ୍ ଡକୋନ୍ ଆକୁଆବା ଆତନଙ୍ । ସିଲତ୍ତେ ଡାଆନ୍ ଆଗନେନ୍ ଆସନ୍ ଅନ୍ନିଙ୍ ଆଡାଙ୍ଗଡ଼ିବୟ୍ ଞେନ୍ ବର୍ରାୟ୍ଡେନ୍, ଗରେଣ୍ତାଲୋଙ୍ନମ୍ ସିଲଡ୍ ଞେନ୍ଆଡଙ୍ ଅସୋୟ୍ ଗାଡାନେନ୍ ଆସନ୍ ଡାଆନ୍ ତିୟିଁୟ୍; 44ଆରି, ତି ଆ ଡାଙ୍ଗଡ଼ିସିୟ୍ ବର୍ରଣ୍ଡେନ୍, ଆମନ୍ ଗାଡାନା ଡ ଓଟନମ୍ଞ୍ଜି ଆସନ୍ ନିୟ୍ ଡାଆନ୍ ଗେନ୍ଲେ ତିୟ୍ତାୟ୍; ଏତ୍ତେଲ୍ଡେନ୍ ପ୍ରବୁନ୍ ସାଉକାରଞେନ୍ ଆଡାଙ୍ଗାଡ଼ାଅନ୍ ଆସନ୍ ପ୍କେନ୍ ଆ ଡାଙ୍ଗଡ଼ିସିୟ୍ ସେଡାଲେତିୟ୍ଲିଁୟ୍ । 45କେନ୍ ଆବର୍ନେ ଞେନ୍ ଅମ୍ମଲଙ୍ଞେନ୍ ବାତ୍ତେ ପାର୍ତନାଲନାୟ୍, ତି ଆବନ୍ନେଡ଼ା ରିବିକାନ୍ ଆତାରଙ୍ଲୋଙ୍ ଗରେନ୍ଣ୍ତାନ୍ ଞମ୍ଲେ ଜିର୍ରାୟ୍ ଆରି ଆନିନ୍ କୁଆବାନ୍ ଜିର୍ରେ ଡାଆନ୍ ଆଗ୍ରେନେନ୍ ଆଡିଡ୍ ଞେନ୍ ଆନିନ୍ଆଡଙ୍ ବର୍ରାୟ୍, ଡାଆନ୍ ଆଗନା ଆସନ୍ ଞେନ୍ଆଡଙ୍ ତିୟିଁୟ୍ । 46ସିଲତ୍ତେ ଆନିନ୍ ଆଡେନ୍ନାଲୋଙନ୍ ଆଗରେନ୍ଣ୍ତାଡା ଅବ୍ତାୟ୍ବେଙ୍ଲେ ବର୍ରନେ ଗାଡାନା, ଆରି ଞେନ୍ ଓଟନମ୍ଞ୍ଜି ଜାୟ୍ ଅବ୍ଗାଡାତାୟ୍ ସିଲତ୍ତେ ଞେନ୍ ଗାଲାୟ୍, ଆରି ଆନିନ୍ ଓଟଞ୍ଜିଆଡଙ୍ ଅବ୍ଗାଡାଏନ୍ । 47ତି ସିଲଡ୍ଲ୍ଲନ୍ ଞେନ୍ ଆନିନ୍ଆଡଙ୍ ବର୍ରାୟ୍, “ଆମନ୍ ଆନା ଆ ଡାଙ୍ଗଡ଼ିଅନ୍ ?” ସିଲତ୍ତେ ଆନିନ୍ ବର୍ରନେ, “ନାଓରନ୍ ଆ କେଜ୍ଜା ମିଲ୍କାନ୍ ଆ ଡାଙ୍ଗାଡ଼ାଅନ୍ ବତୁଏଲନ୍, ଆଡାଙ୍ଗଡ଼ିଅନ୍ ଞେନ୍ ।” ସିଲତ୍ତେ ଞେନ୍ ଆମୁଲୋଙନ୍ ଜୋଡ଼ୋର୍ମୁଜନ୍ ଡ ଆସିଲୋଙନ୍ କାନ୍ସନ୍ ଅବ୍ରୁଲାୟ୍ । 48ଆରି ଞେନ୍ ଲବ୍ଡୁୟ୍ ବବ୍ଲନ୍ ପ୍ରବୁ ଲୋମ୍ଲାୟ୍, ଆରି, ଆନ୍ନା ସାଉକାରଞେନ୍ ଆଡାଙ୍ଗାଡ଼ାଅନ୍ ଆସନ୍ ଆବୋଞାଙନ୍ ଆଡାଙ୍ଗଡ଼ିଅନ୍ ଆଜନା ଆସନ୍ ଆଜାଡ଼ିନ୍ ଞେନ୍ଆଡଙ୍ ତାଙର୍ଲେ ଓରୋଙ୍ଲିଁୟ୍, ସାଉକାଞେନ୍ ଅବ୍ରାଆମନ୍ ଆ ପ୍ରବୁ ଇସ୍ୱରନ୍ଆଡଙ୍ ସେଙ୍କେନ୍ଲାୟ୍ । 49ତିଆସନ୍ ଆମ୍ୱେଞ୍ଜି ସାଉକାରଞେନ୍ ବାତ୍ତେ ସନାୟୁମନ୍ ଡ ଆଜାଡ଼ିନ୍ ଆଞନର୍ରମ୍ ଆସନ୍ ଏଅଡ଼େଏଣ୍ଡେନ୍, ବର୍ନାବା; ଆରି ଅଃନଡ଼େଲଡେନ୍, ବର୍ନାବା; ସିଲତ୍ତେ ଞେନ୍ ଅର୍ଜଡ଼ୋମ୍ଗଡ୍ ଇଜ୍ଜଡେନ୍ ଅର୍କାବଡ଼ିଗଡ୍ ୟର୍ତନେ ।
50ତିଆଡିଡ୍ ଲାବନନ୍ ଡ ବତୁଏଲନ୍ ଜାଲଙେଞ୍ଜି, “ପ୍ରବୁନ୍ଆମଙ୍ ସିଲଡ୍ କେନ୍ ଗଡେଏନ୍, କେନ୍ ଆସନ୍ ଞେନ୍ ମନଙ୍ ଅଡ଼େ ମନଙ୍ ତଡ୍ ଇନ୍ନିଙ୍ ବର୍ରନ୍ ଏରପ୍ତିଆୟ୍ । 51ଗିଜା, ରିବିକାନ୍ ମ୍ମୁକାବାନମ୍ ଡକୋ, ଆନିନ୍ଆଡଙ୍ ଓରୋଙ୍ଲେ ଜିରା, ପ୍ରବୁ ଆବର୍ନେ ଅନ୍ତମ୍ ଆନିନ୍ ସାଉକାରନମ୍ ଆଡାଙ୍ଗାଡ଼ାଅନ୍ ଆଡୁକ୍ରି ଡେଏତୋ ।” 52ତିଆଡିଡ୍ ଅବ୍ରାଆମନ୍ ଆ କମ୍ୱାରି ଆମଙଞ୍ଜି ସିଲଡ୍ କେନ୍ ଆବର୍ନେ ଅମ୍ଡଙ୍ଡାଲେ ପ୍ରବୁନ୍ଆଡଙ୍ ତୁଡ଼ୁମ୍ଲେ ଲୋମେନ୍ । 53ତି ସିଲଡ୍ଲ୍ଲନ୍ ତି ଆ କମ୍ୱାରି ରୁପାନ୍ ଡ ସୁନାନ୍ ସିନ୍ରିନ୍ ତବ୍ଲେ ରିବିକାନ୍ଆଡଙ୍ ତିୟେନ୍; ଆରି, ଆବବ୍ରେନ୍ ଡ ଆୟୋଙନ୍ ଜାୟ୍ ମଡ଼ଗ୍ଗା ଆଜିନିସ ତିୟେନ୍ ।
54ସିଲତ୍ତେ ଆନିନ୍ ଡ ଆଗଡ଼ିଞ୍ଜି ଗାଗାଡାଲନ୍ ତି ତେତ୍ତେ ତଗଲନ୍ ଲୁଡେଞ୍ଜି; ତି ସିଲଡ୍ଲ୍ଲନ୍ ଆନିଞ୍ଜି ଡୋତାନ୍ ଡୋଲନ୍, ତି ଆକମ୍ୱରି ବର୍ରନେ, “ସାଉକାରଞେନ୍ ଆମଙ୍ ୟର୍ନେନ୍ ଆସନ୍ ତିୟିଁୟ୍ବା ।” 55ସିଲତ୍ତେ ରିବିକାନ୍ ଆବବ୍ରେନ୍ ଡ ଆୟୋଙନ୍ ବର୍ରଞ୍ଜି, “କେନ୍ ଆଡାଙ୍ଗଡ଼ି ଅମଙ୍ବାଲେନ୍ ବପାଲ୍ଲି ଇଜ୍ଜାଡେନ୍ ଦସଡିନା ଡକୋନେତୋ, ସିଲଡ୍ ଆନିନ୍ ଜିରେତୋ ।”
56ବନ୍ଡ ଆନିନ୍ ଆନିଞ୍ଜିଆଡଙ୍ ବରେନ୍, “ଞେନ୍ଆଡଙ୍ ଏଅବ୍ଡିଙ୍ଡଙିୟ୍, ଇନିଆସନ୍ଗାମେଣ୍ଡେନ୍ ପ୍ରବୁନ୍ ଆନିୟମ୍ ଗବ୍ଡେଲେନ୍; ନମି ସାଉକାରଞେନ୍ ଆମଙ୍ ଆଜନିର୍ ଆସନ୍ ଞେନ୍ଆଡଙ୍ ତିୟିଁୟ୍ବା ।”
57ସିଲତ୍ତେ ଆନିଞ୍ଜି ବର୍ରଞ୍ଜି, “ଞେନ୍ ଡାଙ୍ଗଡ଼ିନ୍ଆଡଙ୍ ଓଡ୍ଡେଲେ ଆ ତେମଡନ୍ ଏବର୍ବା ।” 58ତି ସିଲଡ୍ଲ୍ଲନ୍ ଆନିଞ୍ଜି ରିବିକାନ୍ଆଡଙ୍ ଓଡ୍ଡେଲେ ବରେଞ୍ଜି, “ଆମନ୍ କେନ୍ ଆ ମନ୍ରା ସରିନ୍ ଜିର୍ତେପଙ୍ ?” ସିଲତ୍ତେ ଆନିନ୍ ବର୍ନେ, “ଓଓ ଞେନ୍ ଜିର୍ତେ ।”
59ତିଆଡିଡ୍ ଆନିଞ୍ଜି ଆ ତନାନନ୍ ରିବିକାନ୍ଆଡଙ୍ ଡ ଆ ଆକମ୍ବାରିବଜଞ୍ଜି, ଆରି, ଅବ୍ରାଆମନ୍ ଆକମ୍ବାରି ଡ ଆମନ୍ରାଞ୍ଜିଆଡଙ୍ ଆପ୍ପାୟେଞ୍ଜି । 60ଆରି ରିବିକାନ୍ଆଡଙ୍ ଆସିର୍ବାଦଲେ ବରେଞ୍ଜି, “ଆମନ୍ ତନାନ୍ଲେନ୍, ଅଜାର ଅଜାର ଆ ମନ୍ରା ଆୟୋଙ୍ ଡେଅମ୍ତୋ; କେଜ୍ଜାନମ୍ ବନେରାନମ୍ଜି ଆଗଡ଼ା ଜିନୟେତଜି ।” 61ତି ସିଲଡ୍ଲ୍ଲନ୍ ରିବିକାନ୍ ଡ ଆକମ୍ବାରିବଜଞ୍ଜି ଓଟଲୋଙନ୍ ଡାୟ୍ଲେ ତି ଆ ମନ୍ରା ସନ୍ଡୋଙ୍ଲେ ଜିରେଞ୍ଜି । କେନ୍ ଅନ୍ତମ୍ ତି ଆକମ୍ବାରି ରିବିକାନ୍ଆଡଙ୍ ଓରୋଙେନ୍ ।
62ତିଆଡିଡ୍ ଇସାକନ୍ ଅର୍ଜଡ଼ୋମ୍ଗଡ୍ ଆଡେସାବା ଆଡ୍ରକୋଲନ୍ ଆସନ୍ ବେର-ଲଅୟ-ରୋୟି ଆଞୁମ୍ ଆଡ୍ରକୋନେ ସିଲଡ୍ ଇୟ୍ଲେ ୟର୍ରନାୟ୍ । 63ଆରି ଆସ୍ରାଲ୍ଲୁମେନ୍ ଆଡିଡ୍ ବସେଙନ୍ ଆଗନିୟ୍ ଆସନ୍ ଇୟେନ୍; ତି ଆଡିଡ୍ ଓଟଞ୍ଜି ଆଜିର୍ତାଞଞ୍ଜି ଗିଜେନ୍ । 64ତି ଆଡିଡ୍ ରିବିକାନ୍ ଇସାକନ୍ଆଡଙ୍ ଗିୟ୍ଲେ ଓଟଲୋଙନ୍ ସିଲଡ୍ ପଡ୍ଲନେ । 65ଆରି ରିବିକାନ୍ ଅବ୍ରାଆମନ୍ ଆକମ୍ବାରିଆଡଙ୍ ବରେନ୍, “ଇନ୍ଲେଞ୍ଜି ଆର୍ନବାଙ୍ ଆସନ୍ ବସେଙନ୍ ସିଲଡ୍ ଆନା ଜିର୍ତାୟ୍, ତି ଆଓବାମର୍ ଆନା ?” ସିଲତ୍ତେ କମ୍ବାରିମରନ୍ ଜାଲଙ୍ଲେ ବରେନ୍, “ଆନିନ୍ ପ୍ରବୁଞେନ୍,” ତି ଆସନ୍ ରିବିକାନ୍ ଞରୁମ୍ରାମ୍କାବନ୍ ପାଙ୍ଲେ ୟୁମ୍ରାମ୍ଲନେ ।
66ସିଲତ୍ତେ ତି ଆକମ୍ବାରି ଇସାକନ୍ଆଡଙ୍ ଆନିନ୍ ଆର୍ଲୁମେନ୍ ଆକାବ୍ବାଡ଼ା ଅଡ଼୍କୋନ୍ ଅବ୍ଜନାଏନ୍ । 67“ତି ଆଡିଡ୍ ଇସାକନ୍ ରିବିକାନ୍ଆଡଙ୍ ଜାଲେ ଆୟୋଙନ୍ ସାରାନ୍ ଆତମ୍ବୁସିଙ୍ବା ଓରୋଙ୍ଲେ ଆନିନ୍ଆଡଙ୍ ବିବାଲନେ; ଆରି, ଆନିନ୍ ଆନିନ୍ଆଡଙ୍ ଡୁଙ୍ୟମେନ୍ ।” ସିଲତ୍ତେ ଇସାକନ୍ ଆୟୋଙନ୍ ଆର୍ନବୁ ଆ ଡୁକ୍କ ସିଲଡ୍ ବନବ୍ୟୋନ୍ ଞାଙେନ୍ ।
Currently Selected:
ପର୍ତମ୍ମୁ 24: NTJaa20
Highlight
Copy
Compare
Share
Want to have your highlights saved across all your devices? Sign up or sign in
The Juray Soura Bible © The Word for the World International and Juray Soura Translation Samithi, Gajapati, Odisha. 2025
