ପର୍ତମ୍ମୁ 20
20
ଅବ୍ରାଆମନ୍ ଡ ଅବିମେଲକନ୍
1ତେତ୍ତେସିଲଡ୍ ଅବ୍ରାଆମନ୍ ଅର୍ଜଡ଼ୋମ୍ ଆ ଡେସାବାନ୍ ଜିର୍ରେ କାଦେସନ୍ ଡ ସୁର ଗଡ଼ାନ୍ ଆମଡ୍ଡି ଗରାରଲୋଙନ୍ ଇୟ୍ଲେ ଡକୋନେ । 2ଆରି ଅବ୍ରାଆମନ୍ ଆ ଡୁକ୍ରିନ୍ ସାରାନ୍ ଆବର୍ନେ ବର୍ରନେ, “ଆନିନ୍ ତନାଞେନ୍; ତିଆସନ୍ ଗରାରନ୍ ଆ ରାଜା ଅବିମେଲକନ୍ ମନ୍ରାନ୍ ଆପ୍ପାୟ୍ଲେ ସାରାନ୍ଆଡଙ୍ ଓରୋଙେଞ୍ଜି ।” 3ତି ଆତଗଲ୍ ଇସ୍ୱରନ୍ ଅବିମେଲକନ୍ ଆ ଗନୁମ୍ତେବାନ୍ ଜିର୍ରେ ଇୟ୍ଲେ ବରେ, “ଗିଜା, ଆମନ୍ ରବୁତମ୍, ଇନିଆସନ୍ଗାମେଣ୍ଡେନ୍ ଅଙ୍ଗା ଆଇବୟ୍ ଆମନ୍ ଓରୋଙେନ୍ ଆନିନ୍ ଆବିବାନେ#20:3 ଆସୁଉଙ୍ନେ, ଆ ଅୟ୍ତବନ୍ ଡକୋ ।”
4ବନ୍ଡ ଅବିମେଲକନ୍ ଆନିନ୍ ସରିନ୍ ଅଃଲୁଲନ୍ ଆସନ୍ ବର୍ରନେ, “ଏ ପ୍ରବୁ, ଅଙ୍ଗା ଆଡେସାବାୟ୍ ଏର୍ଡୋସା, ଆନିଞ୍ଜିଆଡଙ୍ ତୁମ୍ ପଙ୍ ଆମନ୍ ରବ୍ବୁତେ ? 5ଅବ୍ରାଆମନ୍ ଆନିନ୍ଡମ୍ ଞେନ୍ଆଡଙ୍ ଅଃବର୍ରନେ, ଆନିନ୍ ତନାଞେନ୍, ଆରି ତି ଆଇବୟ୍ ନିୟ୍ ଆନିନ୍ଡମ୍ ବର୍ରନେ ଆନିନ୍ ବବ୍ରେଞେନ୍; ତିଆସନ୍ ଲଗଡ୍ ମନନ୍ ଡ ଏର୍ଡୋସା ଅସିନ୍ ବାତ୍ତେ ଞେନ୍ କେନ୍ ଆକାବ୍ବାଡ଼ା ଲୁମ୍ଲାୟ୍ ।”
6ସିଲତ୍ତେ ଇସ୍ୱରନ୍ ଅବିମେଲକନ୍ ଆଗନୁମ୍ତେବାନ୍ ଆନିନ୍ଆଡଙ୍ ବରେନ୍, “ଆମନ୍ ଲଗଡ୍ ମନନମ୍ ବାତ୍ତେ କେନ୍ ଆକାବ୍ବାଡ଼ା ଲୁମେନ୍; କେନ୍ଆତେ ଞେନ୍ ଜନା; ଆରି, ଞେନ୍ ଜାୟ୍ ବିରୁଦଲେନ୍ ଇର୍ସେନ୍ କାବ୍ବାଡ଼ାନ୍ ଆଲନୁମ୍ ଆମନ୍ଆଡଙ୍ ରୟଙନ୍ ଏତିୟ୍ଲମ୍; କେନ୍ ଆସନ୍ ଆନିନ୍ଆଡଙ୍ ଆସନୁଙେ ଆସନ୍ ଆମନ୍ଆଡଙ୍ ଏତିୟ୍ଲମ୍ । 7ତିଆସନ୍ ନମିୟ୍ଞେନ୍ ଅବ୍ରାଆମନ୍ ଆଡୁକ୍ରି ଆବ୍ୟରା; ଇନିଆସନ୍ଗାମେଣ୍ଡେନ୍ ଆନିନ୍ ପୁର୍ବାଃତେବର୍ନେମର୍, ଆନିନ୍ ଆମନ୍ ଆସନ୍ ପାର୍ତନାତନେ, ଏତ୍ତେଲ୍ଡେନ୍ ଆମ୍ୱେନ୍ ଅମେଙ୍ତବେନ୍; ବନ୍ଡ ଆନିନ୍ଆଡଙ୍ ଅଃନାବ୍ୟର୍ରଡେନ୍, ଆଜାଡ଼ିନ୍ ଆମ୍ବେନ୍ ଡ ଅସିଙ୍ନମ୍ ଆ ମନ୍ରାଜି ସରିନ୍ ରବୁତବେନ୍, କେନ୍ଆତେ ଜନାଅମ୍ତୋ ।”
8ଅବିମେଲକନ୍ ଆବାର୍ତାନ୍ ଅନ୍ର୍ରଙନ୍ ଡୋତାନ୍ ଡୋଲନ୍ ଆକମ୍ୱାରିଞ୍ଜିଆଡଙ୍ ଓଡ୍ଡେଲେ ଆଗନୁମ୍ନ୍ତେବରନ୍ ଆରବ୍ଜନାଏଞ୍ଜି ସିଲଡ୍, ଆନିଞ୍ଜି ମାଡ ବତଙେଞ୍ଜି । 9ସିଲତ୍ତେ ଅବିମେଲକନ୍ ଅବ୍ରାଆମନ୍ଆଡଙ୍ ଓଡ୍ଡେଲେ ବରେନ୍, “ଆମନ୍ ଅମଙ୍ଲେନ୍ ଇନିବା ଏନ୍ନେଲେ ଲୁମେନ୍ ? ଆମନ୍ ଞେନ୍ଆଡଙ୍ ଡ ଡେସାଲେନ୍ ଅବ୍ସୟ୍ପଏନ୍ ଞେନ୍ ବିରୁଦଲୋଙ୍ଲମ୍ ଇନ୍ନିଙ୍ ପଙ୍ ଆ ଡୋସା ଏଲୁମ୍ଲାୟ୍ ? ଆମନ୍ ଅମଙ୍ଲେନ୍ ଏନ୍ନେଲେ ଆଲନୁମ୍ ଲୁମେନ୍ ।” 10ଅବିମେଲକନ୍ ଅବ୍ରାଆମନ୍ଆଡଙ୍ ଓଡ୍ଡେଲେ ବରେନ୍, “ଆମନ୍ ଇନି ଗିୟ୍ଲେ ଏନ୍ନେଲେ ଆଲନୁମ୍ ଲୁମେନ୍ ?” 11ତିଆଡିଡ୍ ଅବ୍ରାଆମନ୍ ବର୍ରନେ, “କେନ୍ ଆଡେସାଲୋଙ୍ ଇସ୍ୱରନ୍ଆଡଙ୍ ଇନ୍ନିଙ୍ ଅଃବତଙେଜି; ତିଆସନ୍ ଞେନ୍ ଇୟମ୍ଲାୟ୍ କେନ୍ ଆନିଞ୍ଜି ଡୁକ୍ରିଞେନ୍ ଲୋବଡାଲେ ଞେନ୍ଆଡଙ୍ ରବ୍ବୁତିଞ୍ଜି । 12ଆନିନ୍ ତନାନ୍ଞେନ୍, କେନ୍ଆତେ ଆଜାଡ଼ିନ୍, ଇନିଆସନ୍ଗାମେଣ୍ଡେନ୍ ଆନିନ୍ ଆପ୍ପେୟ୍ଲେନ୍ ଆ ଡାଙ୍ଗଡ଼ିଅନ୍, ବନ୍ଡ ଅୟୋଙ୍ଞେନ୍ ଆ ଡାଙ୍ଗଡ଼ିଅନ୍ ତଡ୍, ଆରି, ଡୁକ୍ରିଞେନ୍ ଡେଏନ୍ । 13ଅଙ୍ଗା ଆଡିଡ୍ ଇସ୍ୱରନ୍ ଞେନ୍ଆଡଙ୍ ଆପ୍ପେୟ୍ ସିଙନ୍ ସିଲଡ୍ ଆପ୍ପାୟ୍ଲିଁୟ୍, ତିଆଡିଡ୍ ଞେନ୍ ଆନିନ୍ଆଡଙ୍ ବର୍ରାୟ୍, ଆମନ୍ ଞେନ୍ଆଡଙ୍ ସାୟୁମିୟ୍, ଞେନ୍ ଅଙ୍ଗା ଅଙ୍ଗା ଆଡ୍ରକୋନେରେଙ୍ ଜିର୍ତବୋ, ତି ଆଡ୍ରକୋନେରେଙ୍ ଆମନ୍ ଞେନ୍ଆଡଙ୍ ବୋଞାଙ୍ଞେନ୍ ଗାମ୍ଲେ ବର୍ନା ।”
14ତିଆଡିଡ୍ ଅବିମେଲକନ୍ ଆ ଡୁକ୍ରିନ୍ ସାରାନ୍ଆଡଙ୍ ଆବ୍ଡିଡେନ୍ ଆରି ମେଣ୍ତାନ୍, ତାଙ୍ଲିୟନ୍ ଆରି କମ୍ୱାରିବଜନ୍ ଡ କମ୍ବାରିମରଞ୍ଜି ଓରୋଙ୍ଲେ ଅବ୍ରାଆମନ୍ଆଡଙ୍ ତିଏନ୍ କି ଆ ଡୁକ୍ରିନ୍ ସାରାନ୍ ନିୟ୍ ଆବ୍ଡିଡେନ୍ । 15ତି ସିଲଡ୍ଲ୍ଲନ୍ ଆନିନ୍ ଅବ୍ରାଆମନ୍ଆଡଙ୍ ବର୍ରନେ, “ଗିଜା, କେନ୍ ଅଡ଼୍କୋନ୍ ଡେସାଲେନ୍ ମୁକାବାନମ୍ ଡକୋ, ଅଙ୍ଗାଲୋଙ୍ ଇସ୍ସୁମ୍ନମ୍, ତେତ୍ତେ ଡକୋନା ।” 16ଆରି, ଆନିନ୍ ସାରାନ୍ଆଡଙ୍ ବରେନ୍, “ଗିଜା, ଞେନ୍ ବବ୍ରେନମ୍ଆଡଙ୍ ବଅଜାର ଆଗନଡ୍ ରୁପ୍ପାନ୍ ତିୟ୍ଲାୟ୍; ଗିଜା, ତି ଆତେ ଆମନ୍ ଆସନ୍ ଆଗ୍ରଟେଏନ୍ ଅଡ଼୍କୋନ୍ ଆବର୍ନେ ଆସନ୍ ଅଡ଼୍କୋମନ୍ରାନ୍ ଆଗନିୟ୍ଗିୟ୍ଲୋଙ୍ ଅମଡନ୍ ଆଡରଙ୍ନେ ଅନ୍ତମ୍; ଆରି ଅଡ଼୍କୋନ୍ ଆବର୍ନେଜି ଆମନ୍ ଆସନ୍ ନିଆୟ୍ ପନ୍ସୁଆତିନ୍ ଡେଏନ୍ ।”
17ତି ସିଲଡ୍ଲ୍ଲନ୍ ଅବ୍ରାଆମନ୍ ଇସ୍ୱରନ୍ ଆମଙ୍ବା ଆ ପାର୍ତନାଲନ୍, ଇସ୍ୱରନ୍ ଅବିମେଲକନ୍ଆଡଙ୍ ଡ ଆଡୁକ୍ରିନ୍ଆଡଙ୍ ଆରି ଆକମ୍ୱାରିଞ୍ଜିଆଡଙ୍ ମବ୍ନଙେଞ୍ଜି; ତି ସିଲଡ୍ଲ୍ଲନ୍ ଆନିଞ୍ଜି ପସିଜେଞ୍ଜି । 18ଇନିଆସନ୍ଗାମେଣ୍ଡେନ୍ ଅବ୍ରାଆମନ୍ ଆଡୁକ୍ରି ସାରାନ୍ ଆଲତେଙ୍ଲୋଙ୍ ପ୍ରବୁନ୍ ଅବିମେଲକନ୍ ଆସିଙ୍ ଆ ମନ୍ରାଜି ଆଡୁକ୍ରି ଆ ଡରକ୍କୋଅନନ୍ ଡଙ୍ଡଙେନ୍ ।
Currently Selected:
ପର୍ତମ୍ମୁ 20: NTJaa20
Highlight
Copy
Compare
Share
Want to have your highlights saved across all your devices? Sign up or sign in
The Juray Soura Bible © The Word for the World International and Juray Soura Translation Samithi, Gajapati, Odisha. 2025
