उत्पत्ति 9
9
परमेश्वर उन नूह उन सांगुळ वादा माळोद
1बाक परमेश्वर नूह अदिक आऊन चिकोरगोळी आशीष कोट्टुन अदिक आव अंदुन, “तान जिन्दगी माळी अदिक वाळुसी, अदिक पृथ्वी दा तुम्मेगी.#उत्पत्ति 1:28 2नीम्द अंज्क पृथ्वी इन सप्पा जनावर, अदिक सप्पा आकाश इन पक्षीगोळ, अदिक जमीन ईनव सप्पा रांगसावाळा कीळागोळ, अदिक समुद्र दाकळव सप्पा मेनगोळ मा बन्सकु ईत्तीत: ईव सप्पा नीम वश दा माळकु आगताव. 3सप्पा रांगसावाळा किळा नीम्द आहार आदीत; ह्यांग नीमी हिवरा हिवरा श्याणेव मार्र कोटीदीन, हांग अच ईग सप्पा येनारा कोळतीन. 4लेकीन मास इक जीव इन सांगुळ मतलब रक्ता अन सांगुळ नीव तिनबाळेतीर.#लैव्यव्यवस्था 19:26; व्यवस्थाविवरण 12:16-23; उत्पत्ति 17:10-14 5अदिक सही दा अच ना नीम्द रक्ता मतलब जीव इन बदला ताकोमाईन: सप्पा जनावरगोळ अदिक मंळसागोळ, येढ्ढु मुंदुर से अदरी ताकोमाईन; मंळसा अन जीव इन बदला ना ऊंद ऊंद वार्ट बंधु से ताकोमाईन. 6जो यावारा मंळसा अन रक्ता वाहुस्यान आऊन रक्ता मंळसा से अच वाहुसकु आदीत, यतिकी परमेश्वर मंळसा अक तान अच स्वरूप इन अनुसार माळ्यान.”#उत्पत्ति 1:26; निर्गमन 20:13
7अदिक नीव जींदगी माळी, अदिक वाळुसी, अदिक पृथ्वी मा हापाळ सा चिकोर पैदा माळकु अदुर्दा तुम्मेगी.
8बाक परमेश्वर नूह अदिक आऊन चिकोरगोळ से अंदुन, 9“केळी, ना नीम सांगुळ अदिक नीम बाद्दा जो नीम्द वंश ईत्तीत, आंदुर सांगुळ भी वादा माळतीन; 10अदिक जीत्ता प्राणीगोळ सांगुळ भी जो नीम सांगुळ आव, येन पक्षी येन मान्यागोळोव जनावर येन पृथ्वी माकळव सप्पा आळी दाकळव जनावर, पृथ्वी नव यास जीव जन्तु जहाज दा टु होटाव. 11अदिक ना नीम सांगुळ तान ईद वादा कटतीन कि सप्पा प्राणी मात जल-प्रलय सेल नाश आगतीदील: अदिक पृथ्वी इन नाश आगोर साटी मात जल-प्रलय आगतीदील.” 12बाक परमेश्वर अंदुन, “जो वादा ना नीम सांगुळ, अदिक यास जीत्ता प्राणी नीम सांगुळ आव आ सप्पा अन सांगुळ भी युग-युग इन पीढ़ीगोळ साटी कटतीन, अदुर्द ईद चिन्ह आद : 13ना बादल दा तान धनुष ईटीन, अद नान अदिक पृथ्वी इन बीच दा वादा अन चिन्ह आदीत. 14अदिक याग ना पृथ्वी मा बादल फैलुसाईन आग बादल दा धनुष कांळ्सीत. 15आग नान वादा जो नीम अदिक सप्पा जीत्ता शरीरधारी प्राणीगोळ सांगुळ कटकु आद; अदरी ना याद माळाईन, आग ईत्ता जल-प्रलय बाक आगतीदील यदुर देल सप्पा प्राणीगोळ्द विनाश आगुल. 16बादल दा जो धनुष ईत्तीत ना अदरी नोळकु ई सदा अन वादा अक याद माळाईन, जो परमेश्वर उन अदिक पृथ्वी माकळव सप्पा जीत्ता शरीरधारी प्राणीगोळ बीच दा कटकु आद.” 17बाक परमेश्वर नूह से अंदुन, “जो वादा ना पृथ्वी दाकळव सप्पा प्राणीगोळ सांगुळ कटीन, अदुर्द चिन्ह ईदा हुन.”
नूह अदिक आऊन चिकोर
18नूह उन चिकोर जो जहाज दा टु होट्टुर, आंदुर शेम, हाम अदिक येपेत ईरोर; अदिक हाम कनान उन आप्प आदुन. 19नूह उन मुर चिकोर ईंदुरा उर, अदिक ईंदुर्द वंश पुरा पृथ्वी मा फैलुसेत.
20नूह खेती किसानी माळली कुरतुन. अदिक आव अंगुर इन बेली हचदुन; 21अदिक आव अंगुर इन रास्सा कुडुकु मतवाला आदुन; अदिक तान ड्यारा अन्द बुळ्क ऊगळा आगेदुन. 22आग कनान उन आप्प हाम तान आप्प उक ऊगळा नोळदुन, अदिक व्हार्या बंदकु तान वार्टुरी हेळ बुट्टुन. 23आग शेम अदिक येपेत येढ्ढु मुंदुर कपळा हुडुकु तान खांदा मा ईटदुर, अदिक हिंद इन दी उलटा नळुकु तान आप्प उन ऊगळा मय इक होचदुर, अदिक आंदुर तान बाय हिंद माळकु ईरोर इदुरसाटी आंदुर तान आप्प उक ऊगळा नोळीदील. 24याग नूह उन नशा ईळदोत, आग आव जान्स कोंडुन कि आऊन श्याण पार आऊन सांगुळ येन माळदुन. 25इदुरसाटी आव अंदुन,
“कनान श्रापित आगुल:
अद तान वार्ट बंधु उन दासगोळ्द दास आगुल.”
26बाक आव अंदुन, “शेम उन परमेश्वर यहोवा धन्य आन,
अदिक कनान शेम उन दास आगुल.
27परमेश्वर येपेत उन वंश उक फैलुसुल;
अदिक आव शेम उन ड्यारागोळ दा बसुसुल, अदिक कनान आऊन दास आगुल.”
28जल-प्रलय इन बाद्दा नूह मुर सौ पचास वर्ष जीत्ता ईत्तुन. 29ई प्रकार देल नूह उन पुरा ऊमर उम्बत सौ पचास वर्ष इन आत; अदुर बाद्दा आव सोतोदुन.
Currently Selected:
उत्पत्ति 9: Haa25
Highlight
Copy
Compare
Share
Want to have your highlights saved across all your devices? Sign up or sign in
The Holiya Bible © The Word for the World International and Holiya Translation Samithi, Kudwa, Gondia, Maharashtra 2025
Videos for उत्पत्ति 9
Episode 36:Are We Near the End? The Bible’s Hidden Pattern
Under The Hood
EP 25. Why Do So Many Cultures Have Flood Myths? The Truth Behind the Stories
Under The Hood
Ep 34. Genesis 10: How Noah’s Sons Shaped the World & God's Redemption Story
The Bible Show
Episode 19: Feeding of Four thousand with the Syrophonecian woman
The Bible Show