SEFELA SA DIFELA 1
1
1 Sefela sa difela, se e leng sa ga Solomone.
SEFELA SA NTLHA
Sa Mosadi
2A a nkatle ka dikatlo
tsa molomo wa gagwe;
gonne lorato lwa gago lo molemo
bogolo go bojalwa jwa mofine.
3Ditlolo tsa gago
di na le monko o o monate;
leina la gago le ntse jaaka setlolo
se se itshelwang; ke gone ka moo
makgarebane a go ratang.
4Nkgoga,
re tlaa siana re go setse morago;
kgosi e nkisitse
mo matlwaneng a yone;
re tlaa itumela re ipela mo go wena,
re tlaa umaka lorato lwa gago
bogolo go bojalwa jwa mofine;
ba go rata ka tshiamo.
5Ke montsho, mme ke montle,
lona bomorwadia Jerusalema,
jaaka megope ya Ketare,
jaaka disiro tse di lepelelang
tsa ga Solomone.
6Lo se ka lwa nteba,
ka gobo ke le montsho,
ka gobo letsatsi le mpabotse.
Bomorwa mme ba ne ba
nkgakaletse, ba ntira molebedi
wa masimo a mafine;
mme e leng tshimo ya me ya mafine
ga ke a e lebela.
7Mpolelela,
wena yo mowa wa me o go ratang,
kwa o hudisang letsomane la gago
gone,
kwa o le bothisang gone
go le motshegare;
gonne ke tlaa bo ke nnelang
jaaka mongwe yo o kailang
mo matsomaneng
a bankane ba gago?
Sa Monna
8Fa o sa itse,
wena yo montlentle bogolo
mo basading,
tswa le motlhala wa matsomane,
mme o hudise dipotsane tsa gago
fa megopeng ya badisa.
9Moratwa wa me,
ke go tshwantshitse le pitse
mo dikareng tsa ga Faro.
10Marama a gago a mantle
ka metshopho ya moriri,
le thamo ya gago
ka majana a a tlhokegang
a a fololetsweng.
11Re tlaa go direla metsila ya gouta
e na le kgotlwana tsa selefera.
Sa Mosadi
12E rile kgosi e dutse
fa bojelong jwa yone,
bolao jwa me jwa nareto
jwa utlwatsa monko wa jone.
13Mo go nna moratwa wa me
o ntse jaaka ngatana ya mera,
e e lalang fa gare ga mabele ame.
14Mo go nna moratwa wa me
o ntse jaaka lerose la dithunya tsa
motlhatswameno
mo masimong a mafine a Enegedi.
Sa Monna
15Bona, o montle, moratwa wa me;
bona, o montle;
matlho a gago a ntse jaaka matseba.
Sa Mosadi
16Bona o montle, moratwa wa me,
ee, o natefo;
bolao jwa rona bo bile bo botala.
17Mesipuri ya ntlo ya rona
ke masetara,
le ditlhomeso tsa rona ke marukuru.
Currently Selected:
SEFELA SA DIFELA 1: TSW08NO
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1992. Used with permission. All rights reserved.