PESALEMA 111
111
Pabalelo ya Morena mo bathong ba gagwe
1Bakang Jehofa.
Ke tlaa ntshetsa Jehofa
malebogo ka pelo yotlhe ya me
mo lekgotleng la bathokgami,
le mo phuthegong.
2Ditiro tsa ga Jehofa di kgolo,
di tlhotlhomisiwa ke botlhe
ba ba kgatlhegang mo go tsone.
3Tiro ya gagwe ke tlotlo le borena,
mme tshiamo ya gagwe
e eme ka bosakhutleng.
4O dirile gore ditiro tsa gagwe
tse di gakgamatsang di gakologelwe;
Jehofa o pelotshweu,
o tletse pelotlhomogi.
5Ba ba mmoifang o ba neile dijo;
o tlaa nna a gakologelwa
kgolagano ya gagwe ka gale.
6O supeditse batho ba gagwe thata
ya ditiro tsa gagwe,
ka go ba naya boswa jwa merafe.
7Ditiro tsa diatla tsa gagwe
ke boammaaruri le tshiamiso;
dikaelo tsotlhe tsa gagwe
di tlhomame.
8Di tlhomamisitswe ka bosakhutleng
le ka bosaengkae,
di dirilwe mo boammaaruring
le mo thokgamong.
9O iseditse batho ba gagwe kgololo;
kgolagano ya gagwe
o e laoletse ruri;
leina la gagwe le boitshepo,
le a sisimogwa.
10 Go boifa Jehofa
ke tshimologo ya botlhale
botlhe ba ba dirang ka ga gone
ba na le tlhaloganyo e e molemo;
pako ya gagwe e eme
ka bosakhutleng.
Currently Selected:
PESALEMA 111: TSW08NO
Highlight
Copy
Compare
Share
Want to have your highlights saved across all your devices? Sign up or sign in
© Bible Society of South Africa 1992. Used with permission. All rights reserved.
