उबजणाय कीताप 3
3
माणेह भगवान नो हुकम नी माने
1यहोवा भगवान जेतरा जंगली जानवरु बणावलो हतो, तीमनी आखा मे गड़हो चलाक हतो; तीहयो बयर ने केदो, “ह़ु ह़ाचलीन भगवान केदलो से के तमु बगीचा ना काना बी झाड़ नो फोळ नी खाजो?”#परकासीतवाक्य 12:9; योएल 2:24; परकासीतवाक्य 20:2
2बयर गड़हा ने जपाप आपी, आमु बगीचा ना झाड़ नु फोळ खाय सकीया। 3“पण भगवान केदलो से, बगीचा ना वचे लागला झाड़ नु फोळ नी खाजो, अने नी छीमजो, नीता तमु मर जहु।”
4तत्यार गड़हो बयर ने केदो, तमु पक्का नी मरो। 5भगवान जाणे के जे दाड़े तमु तीनो फोळ खाहु तत्यार तमारा डोळा उगड़ी जहे, अने तमु भला अने बुरा ग्यान ने जाणीन भगवान ने तेवा बण जहु।#यहेजकेल 28:2
6एतरे जत्यार बयर देखी के तीहया झाड़ नु फोळ खावा जुगु वारु से, अने देखवा मे मन गमता, अने अक्कल आपवा जुगु चाहवा लायक बी से, तत्यार तीहयी तीनु फोळ तोड़ी, अने तीने खादी, अने आह़फी ना लाडा ने बी आपी, अने तीहयो बी खादो। 7तत्यार बेम जणा ना डोळा उगड़ी ज्या, अने तीमने मालम पड़्यु के तीहया नांगरला से; एतरे तीहया अंजीर ना पान्टा ह़ीवीन कस्टु बणाय लेदा।
8जत्यार ह़ांत्ली टेमे तीहया बगीचा मे यहोवा भगवान ने चालतो-फीरतो ह़मळ्या ता आदम अने तीनी लाडी बगीचा ना झाड़ु ना वचे ह़ताय ज्या। 9तत्यार यहोवा भगवान आदम ने आड़ीन पुछ्यो, तु कां से?
10तीहयो केदो, मे बगीचा मे तारी अवाज ह़मळीन बीह ज्यो, काहाके मे नांगरलो हतो; एतरे मे ह़ताय ज्यो।
11“तीहयो केदो, कोय तने देखाड़्यु के तु नांगरलो से? जे झाड़ नु फोळ मे तने नी खावा करीन केदलो, ह़ु तु तीनु फोळ खादलो से?”
12आदम केदो, “जे बयर ने तु मारी ह़ाते रेवा करीन आपलो से, तीहयीत तीहया झाड़ नु फोळ मने आपी, अने मे खादो।”
13तत्यार यहोवा भगवान बयर ने केदो, तु आहयु ह़ु करी? बयर केदी, गड़हो मने बहकाड़ देदो, ता मे खादी।
भगवान नो नीयाव
14तत्यार यहोवा भगवान गड़हा ने केदो, तु जे आहयु करलो से एतरे तु आखा घोर ना जानवरु, अने आखा जंगली जानवरु सी जादा सरापीत से, तु पेट ना भरहे चाल्या करही, अने हमेसा कादो चाटतो रेही: 15अने मे तारा अने आहयी बयर ना वचमे, अने तारी अवल्यात अने आनी अवल्यात ना वचमे झगड़ो पयदा करही; तीहयो तारा मुंडा ने कचरी देहे, अने तु तीना पोग नी पाटली ने डसही।#परकासीतवाक्य 12:17
16अळी बयर ने भगवान केदो, “में तारी वेला अने तारा भारेपोगे हयवा ना दुख ने ढेरेत वदाड़ देही; तु मांदी हय्न सोरु पयदा करही; अने तारी मरजी तारा लाडा भणी हयहे, अने तीहयो तारी पोर हक करहे।”
17अने आदम सी भगवान केदो, “तु जे आह़फा नी लाडी नी वात ह़मळ्यो, अने जे झाड़ ना फोळ ना बारा मे तमने मे हुकम आपलो हतो के तु तीने नी खाजे, तीने तु खादलो से एतरे धरती तारा कारण गरा वाळी से। तु तीनु अन जलम दुख ह़ाते खाया करही; 18अने तीहयी तारी जुगु काटा अने गोखरा काटा उगाड़हे, अने तु खेतर नु अन खाही; 19अने आपणा पसीना ना रोट्ला खाया करही, अने आखरी मे कादा मे भेसकाय जही काहाके तु तीनी मे गेथो पयदा हयलो से; तु कादो ते से अने कादा मे पासो भेसकाय जही।”
20आदम आह़फा नी लाडी नु नाम हव्वा पाड़्यो; काहाके जेतरा माणेह जीवत्ला से तीहया आखा नी सुरु नी आह्य तीहयी हयी। 21अने यहोवा भगवान आदम अने तीनी लाडी नी लेदे चामड़ा ना लुगड़ा बणावीन तीमने पेराय देदो।
आदम अने हव्वा ने बगीचा मे गेथु नीकाळणु
22अळी यहोवा भगवान केदो, “माणेह भला अने बुरा नो ग्यान हात करीन अमारी मे एक ने तेम बण जेलो से: एतरे हाव ईसम नी हये के तीहयो हात बड़ावीन जीवाय ना झाड़ नु फोळ बी तोड़ीन खाय लेय अने जलम जीवत्लो रेय।” 23एतरे यहोवा भगवान आदम ने अदन ना बगीचा मे गेथो नीकाळ देदो के तीहयो तीहयी जागा मे खेती करे, जीनी मे गेथो तीने बणावलो हतो। 24एतरे आदम ने भगवान नीकाळ देदो अने जीवाय ना झाड़ नी वाट नी रखवाळी करवा करीन अदन ना बगीचा नी उगवणी वखे करुबाम#3:24 करुबाम खास भाती नो ह़रगदुत, मतलब जीना पाखड़ा रेय ने, अने च्यारो मेर फीरवा वाळी होळो-होळो धपत्ली तलवार ने टाळ्यो।#यहेजकेल 28:16
Currently Selected:
उबजणाय कीताप 3: PPt2025
Highlight
Copy
Compare
Share
Want to have your highlights saved across all your devices? Sign up or sign in
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025
