उबजणाय कीताप 22
22
अब्राहम नु पारख मे पड़वा ना बारा मे
1आहयी वात हयवान अळतेण आसम हयु के भगवान, अब्राहम ने आहयु कीन तीनी पारख कर्यो, “ए अब्राहम!” तीहयो केदो, “ए मालीक ह़ु केय, मे आञे से।”#ईब्रानीयो 11:17,19; उबजणाय कीताप 31:11; नीरगमन 3:4
2तीहयो केदो, “आह़फा ना सोरा ने मतलब एक खोल्या सोरा ईसाक ने, जीने तु मोंग करे, ह़ाते लीन मोरीय्या देस मे जतरे, अने तां तीने एक बड़ा नी उपर जे मे तने देखाड़ही होम बादा करीन चड़ावजे।”#2 ईतीहास 3:1
3तत्यार अब्राहम ह़वारे वेगोत उठ्यो अने आह़फा नु गदड़ु पोर लाकड़ा बांदीन आह़फा ना बे पावर्या, अने आह़फा ना सोरा ईसाक ने ह़ाते लेदो, अने होम बादा नी लेदे लाकड़ा फोड़ लेदो; तत्यार नीकळीन तीहया जागा भणी चाल्यो, जीनी वात भगवान तीनी ह़ाते करलो हतो। 4तीसरा दाड़े अब्राहम डोळा उचा करीन तीहया जागा ने नाम्बे रीन देख्यो। 5अने तीहयो आह़फा ना पावर्याम ने केदो, “गदड़ा नी ह़ाते आञे उबा रेजो; आहयो सोरो अने मे ह़ेले तक जीन, अने वांदीन, अळी पासा आवती रेहु।”
6तत्यार अब्राहम होम बादा ना लाकड़ा लेदो अने आह़फा ना सोरा ईसाक ना खांदा पोर मेल्यो, अने आक्ठु अने छुर्रो आह़फा ना हात मे लेदो; अने तीहया बेम एक्ठा चाल पड़्या। 7ईसाक आह़फा ना बाह अब्राहम ने केदो, “ए मारा बाह,” “तीहयो केदो, ए मारा सोरा, ह़ु वात से?” तीहयो केदो, “देख, आक्ठु अने लाकड़ा ते से; पण होम बादा जुगु गाडरु कां से?”
8अब्राहम केदो, “ए मारा सोरा, भगवान होम बादा नु गाडरु ने आह़फोत ह़ोदहे।” अने तीहया बेम ह़ाते-ह़ाते अगा चालता ज्या।
9जत्यार तीहया ते जागे जीने भगवान तीमने देखाड़लो हतो पुग्या; तत्यार अब्राहम तां वेदी बणावीन लाकड़ा टाळी-टाळीन मेल्यो, अने आह़फा सोरा ईसाक ने बांदीन वेदी पोर मेकला लाकड़ा नी उपर मेल देदो।#याकुब 2:21 10अळतेण अब्राहम हात अगो करीन छुर्रो ली लेदो के आह़फा ना सोरा ने बादा चड़ावे। 11तत्यार यहोवा नो दुत ह़रग सी तीने आड़ीन केदो, “ए अब्राहम, ए अब्राहम!” तीहयो केदो, “ए मालीक ह़ु केय, मे आञे से।”
12तीहयो केदो, “तीहया सोरु भणीन हात ना बड़ावे, अने नी हीने कंय करे; काहाके तु जे मारी ह़ाते आह़फा ना सोरा, अने आह़फा ना एक-खोळ्या सोरा ने बी, नी छोड़्यो; आनी सी मे जाण ज्यो के तु भगवान नी बीक माने।”
13ता अब्राहम डोळा उचा कर्यो, अने ह़ु देख्यो, के तीनी पसळ एक गाडरो आह़फा ना ह़ींगड़ा वेर एक झाटवा मे फसलो से; तत्यार अब्राहम जाय्न तीहया गाडरा ने लायो, अने आह़फा ना सोरा ना जागा पोर तीने होम बादा करीन चड़ायो। 14अब्राहम तीहया जागा नु नाम यहोवा यीरे#22:14 यहोवा यीरे यहोवा जुगाड़ करे पाड़्यो, आनी अनसारे आज तक बी केय, “के यहोवा ना बड़ा पोर जड़त्लु से।”
15अळी यहोवा नो दुत बीजी वार ह़रग मे गेथो अब्राहम ने आड़ीन केदो, 16“यहोवा नी आहयी अवाज से के मे मारीत ह़ाम खाम के तु जे आहयु काम करलो से के आह़फा ना सोरा, पण एक-खोळ्या सोरा ने बी, नी छोड़्यो;#ईब्रानीयो 6:13,14 17आहया कारण मे पक्को तने बरकत आलही; अने पक्को तारी अवल्यात ने ह़रग ना तारामंडळी, अने दर्या धेड़े ना रेळतुन तेम गीणाये नी एतरा करही, अने तारी अवल्यात तारा दुस्मन ना ह़ेर नो अदीकारी हय्हे;#ईब्रानीयो 11:12 18अने धरती ना आखा देस तारी अवल्यात नी लारे मारी सी बरकत हात करहे; काहाके तु मारु हुकम मानीन तीनु पालन कर्या।”#गलातीयो 3:16; नेवताळा ना काम 3:25 19तत्यार अब्राहम आह़फा ना पावर्यान्तां पासो आयो, अने तीहया आखा बेर्सेबा ह़ाते-ह़ाते ज्या; अने अब्राहम बेर्सेबा मे रेवा बाज ज्यो।
नाहोर नो कुळीवेलो
20आहयी वात नी बाद आसम हयु के अब्राहम ने आहयी खबर जड़ी, “मील्का ने तारा भाय नाहोर सी सोरो पयदा हयलो से।” 21मील्का ना सोरा ते आहया हया, मतलब तीनो मोट्लो सोरो उस, अने उस नो भाय बुज, अने कमुएल, जे अराम नो बाह हयो। 22अळतेण केसेद, हजो, पील्दास यीद्लाप, अने बतुएल। 23आहया आंठोव ने मील्का अब्राहम ना भाय नाहोर ना लारे पयदा करी। अने बतुएल सी रीबका पयदा हयी। 24अळी नाहोर नी रुमा नाम नी एक पावर्याण हती तीने तीहयो राख र्यो हतो; जीनी सी तेबह, गहम, तहस, अने माका पयदा हया।
Currently Selected:
उबजणाय कीताप 22: PPt2025
Highlight
Copy
Compare
Share
Want to have your highlights saved across all your devices? Sign up or sign in
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025
