नेवताळा ना काम 10
10
कुरनेलीयुस अने पतरस
1केसर्या ह़ेर मे कुरनेलीयुस नाम नो एक माणेह हतो, तीहयो एक ईतालीयानी नाम ना सीपायड़ा ना एक टोळा नो सुबेदार हतो। 2तीहयो सुबेदार भगवान नो भगत हतो, अने आह़फा ना घोराणा भेळतो भगवान नी बीक मान्तो हतो, अने युहदी माणहु ने घण-जबर दान आप्तो हतो, अने दाड़ीक भगवान सी वीन्ती कर्या करतो हतो। 3तीहयो तोपीवळे तीनेक बजे हेम आहयु उजन्तु देख्यो के भगवान नो ह़रगदुत तीनीन्तां आय्न आहयु केतलो ह़मळ्यो “ए कुरनेलीयुस।”
4कुरनेलीयुस तीनी भणी एकडीट्यो भाळ्यो; अने बीहीन केदो, “ए मालीक ह़ु वात से?” ह़रगदुत केदो, “तारी वीन्ती अने दान, भगवान ने तां पुग जेलु से अने तीहयो तने फोम करलो से। 5एतरे हाव तु अदमड़ा ने याफा ह़ेर मे मोकलीन सीमोन ने आञे बोलाय ले, जे पतरस केवाये। 6तीहयो सीमोन, एक चमायड़ान्तां पोरणो से। तीनु घोर दर्या धेड़े से।” 7अने तीहयो ह़रगदुत तां गेथो जत र्यो, ता कुरनेलीयुस आह़फा ना बे पावर्या ने जे तीनी ह़ाते रेत्ला, अने एक भगत सीपायड़ु ने बोलायो, 8अने तीमने आखी वात ह़मजाड़ीन याफा ह़ेर मे मोकल्यो।
पतरस नो दरसन
9बीजा दाड़े तीहया चालता-चालता ह़ेर ह़ाते पुग ज्या, ता पतरस तोपीक वळे हेम घोर नी छत पोर वीन्ती करवा बाज ज्यो। 10तत्यार तीने भुक लागी, अने तीहयो खावा नो वीच्यार कर्यो; पण बीजा खाणु रांदवात बाज र्या हता; तत्यार पतरस बेह़ुद हय ज्यो। 11अने जत्यार तीहयो देख्यो के ह़रग उगड़ी जेलु से, अने एक मोट्लु चादरान तेवी कानी चीज ह़रगे गेथी अथराय्न उतरवा बाज री अने तीना च्यारोव खुणा धरती पोर मेकाय र्या। 12अने तीहयी चीज मे धरती ना आखा भाती ना चयारपोग्या जानवरु, अने घीहाय्न चालन्या जानवर, अने ह़रग ना चड़ा से। 13अने तीने एक बोली ह़मळायी के “ए पतरस उठ, अने ईमने मारीन खा।”
14पण पतरस केदो, “ए मालीक! मे ईमने कदी नी मारीन खाम। काहाके मे, मोयाळ्ळी अने वीटळ्ळी चीज हजु लग नी खादो।”
15ते बी तीहयी बोली बीजी कावा अळी तीने ह़मळायी, “भगवान जे चीज ने चोखली केदलो से, ते चीज ने तु वीटळ्ळी नी केजे।” 16आसम तीन कावा हयु; अने अळतेण तीहयी चादरा ह़रकी चीज ह़रग मे पासी उचलाय जी।
17अने पतरस जे देखलो हतो, तीहयी वात पोर वीच्यारेत करवा बाज र्यो हतो, ता कुरनेलीयुस जे माणहु ने मोकल्लो हतो, तीहया माणहु सीमोन ना घोर ना झापला पोर आवीन सीमोन नु घोर कां से? करीन पुछ र्या हता। 18अने तीहया घोर मे वाळा माणहु ने बारा रीन आड़ीन पुछ्या, “सीमोन, जे पतरस केवाये, आञेत पोरणो से ह़ु?”
19पतरस, जे दरसन देखलो तीना बारा मे वीच्यारेत करवा बाज र्यो हतो, ता भगवान नी आत्मा पतरस ने केदी, “देख, तीन माणहु तने ह़ोदवा बाज र्या। 20एतरे उठीन हेटो जा, अने धाक राख्या वगर ईमनी ह़ाते जत रे; काहाके हीमने मेत मोकल्लो से।” 21तत्यार पतरस हेटो उतरीन तीहया माणहु ने केदो, “देखो, जीने तमु ह़ोद र्या तीहयो मेत से; तमु ह़ु कामे आय र्या?”
22तीहया माणहु जपाप आप्या, “सुबेदार कुरनेलीयुस धरमी अने भगवान नी बीक मानन्यो से। आखा युहदी माणहु मे तीहयो नामह़ाद्यो से, तीने चोखलो ह़रगदुत केदलो से के तु पतरस ने तार घोर बोलाय लाव, अने जे कंय तीहयो केहे, तीनी ह़मळजे।” 23पतरस तीमने घोर मे बोलायो, अने पोरणा नो आव-भाव करे तेम तीमनो आव-भाव कर्यो। बीजा दाड़े तीहयो तीयार हय ज्यो अने तीमनी ह़ाते जत र्यो, अने याफा ह़ेर ना थोड़ाक भरहो करन्या भायु तीमनी ह़ाते ज्या। 24अने बीजा दाड़े तीहयो केसर्या ह़ेर मे पुग्या, अने कुरनेलीयुस तीना भाय-बेटा अने मोंगाळ्ळा दोस्तीदार्या ने एक्ठा करीन तीमनी वाट जोय र्यो हतो। 25जत्यार पतरस कुरनेलीयुस ना घोर मे भरायवा बाज र्यो हतो, ता तीहयो कुरनेलीयुस ने भेट्यो। अने कुरनेलीयुस पतरस ना पोगे पड़ीन पतरस ने वांद्यो। 26पण पतरस तीने उठाड़तो जाय्न केदो, “उबो हय जा। मे बी एक माणेह से।” 27अने पतरस, कुरनेलीयुस ह़ाते वात करतो-करतो घोर मे भरायो। अने तां ढेरेत माणहु ने भेळा हय रेला देखीन। 28तीहयो तीमने आहयु केदो, “तमने आहयी वात मालम से के युहदी माणहु जुगु आड़जात्या ना घोर मे उठवा-बहवा मना से। पण भगवान मने केदलो से के तु काना बी माणेह ने वीटळ्ळो ना केय। 29एतरे मने बोलाव्वा पोर, मे रोकावट वगर नो आञे आय लागलो से: हाव मे तने पुछु के तु मने काहा बोलावलो से?”
30कुरनेलीयुस केदो, “आहयीत टेमे आज गेथो च्यार दाड़ा पेले, मे मारा घोर मे बोपरी वळे, वीन्ती करवा बाज रेलो, ता एक अदमी झोळो-झोळो करत्ला लुगड़ा पेरीन मारी अगळ उचकाहलोत आवीन उबो हय ज्यो। 31अने केवा बाज ज्यो, ‘ए कुरनेलीयुस, तारी वीन्ती, अने तु गरीब ने जे दान आपलो, तीहयु भगवान ने तां पुग जेलु से। 32एतरे हाव तु अदमड़ा ने याफा ह़ेर मे मोकलीन सीमोन ने आञे बोलाय ले, जे पतरस केवाये। तीहयो एक चमायड़ान्तां पोरणो से। तीहया चमायड़ा नु घोर दर्या धेड़े से।’ 33अने तीनी वात ह़मळीन तत्यारुत माणहु ने तारीन्तां मोकली देदो, अने तु आञे आवीन भलु करलो से: हाव जे कंय भगवान तने केवा करीन हुकम आपलो से, तीहयु ह़मळवा करीन आमु आञे ह़रा भगवान अगळ हजुर से।”
पतरस नु परच्यार
34आहयु आखु ह़मळीन पतरस केदो, “हाव मने पतो चाल ज्यो, के भगवान आखा ह़ाते एकरंगो वेहवार करे। 35पण जे कोय तीनी बीक मानीन जीवे अने धरम नु काम करे, तीहयोत माणेह भगवान ने गमे, भले तीहयो कोय काहा नी हय। 36भगवान ईस्रायली माणहुन्तां आह़फा नी खबर मोकल्यो अने ईसु मसी ना लारे, जे आखा नो मालीक से, सांती नी खुस-खबर ह़मळायो। 37तमु तीहयी वात जाणो के जे गलील मे सुरु हयी अने युहन्नो बपतीस्मा आप्यो अने अळतेण तीना बारा मे एकदम सी परच्यार हयो। अने तीहयी वात आखा युहद्या मे पुग जी। 38तमु नासरत वाळा ईसु ने जाणो के भगवान तीने आह़फा नी सक्ती अने चोखली आत्मा आपीन टाळ लेदो, अने तीहयो वारला काम करतो जाय्न भलाय कर्यो, अने जेतरा बी भुतड़ा ना कब्जा मे हता, तीमने सोड़ावतो र्यो; काहाके भगवान तीनी ह़ाते हतो। 39तीहयो जे युहद्या मे, अने यरुसलेम मे जे बी काम कर्यो, तीहया काम ना आमु गवा से। पण तीने माणहु कुरुस ना लाकड़ा पोर चड़ाय्न मार नाख्या। 40पण भगवान तीने तीसरा दाड़े जीवाड़्यो अने तीने उजन्तो देखाड़्यो। 41आखा माणहु नी, पण तीना गवा ने, जीने भगवान टाळ लेदलो, मतलब अमारी अगळ उजन्तो कर्यो। तीहयो मर्या-ह़र्या मे गेथो जीवतो हय ज्यो अने अळतेण आमु तीनी ह़ाते खादा-पीदा। 42तीहयो आमने हुकम आपलो से, के तमु माणहु मे आनो परच्यार करो; अने गवाय देवो, के आहयो तीहयोत से; जीने भगवान जीवत्ला अने मरला नो नीयाव करन्यो बणावलो से। 43तीना बारा मे भगवान वगे गेथी वात केण्या गवाय देय, के जे कोय ईसु पोर भरहो करहे, तीनेत तीना नाम सी पापु नी माफी जड़हे।”
आड़जात्या माणहु पोर चोखली आत्मा उतरे
44पतरस आहयी वात केवात बाज र्यो हतोन चोखली आत्मा ह़मळन्या पोर उतरीन आय लागी। 45आड़जात्या माणहु ने बी चोखली आत्मा नो वाटो जड़ ज्यो आहयु देखीन पतरस ह़ाते आवला भरहो करन्या खतनु करला माणहु वहराय ज्या। 46अने आहया भरहो करन्या माणहु, आड़जात्या माणहु ने भात-भातीन बोली बोलत्ला अने भगवान नी बड़ाय करत्ला ह़मळी र्या हता। ता पतरस केदो, 47“आहया माणहु ने आमने जड़ली तीहयी चोखली आत्मा जड़ जेली से, ता हाव आमने पाणी ना बपतीस्मा लेवा सी कोय रोक सके ह़ुं?” 48अने पतरस आहयो हुकम आप्यो के ईमने बी ईसु मसी ना नाम पोर पाणी मे बपतीस्मा आप देवो। तत्यार तीहया बपतीस्मा लेण्या पतरस सी वीन्ती कर्या के “थोड़ाक दाड़ा तु अमारीन्तां रे।”
Currently Selected:
नेवताळा ना काम 10: PPt2025
Highlight
Share
Copy
Want to have your highlights saved across all your devices? Sign up or sign in
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025
