Mat 9

Jesû nîwavonirie mûndû wakuîte ciîga cia mwîrî

(Mar 2.1-12; Luka 5.17-26)

1Jesû nîwatwîre îtarûrî na akîringa îria, agîcoka îtûûrarî rîa kwao. 2Nao andû amwe nîmaamûvirîre mûndû warî mûkuû ciîga ciake cia mwîrî, amamîrîte ûrîrî. Na rîrîa Jesû oonire ûrîa andû acio maarî na wîtîkio mûnene, nîwerire mûndû ûcio wakuîte ciîga cia mwîrî atîrî, “Mûvîcîwa, ûmîrîria! We nîwoverwa mevia maku.”

3Na arimû amwe a watho nîmeîrire na ngoro atîrî, “Mûndû ûyû nîwaruma Ngai!” 4Nwatî Jesû nîwamenyire maûndû marîa meciragia, nake nîwamaûririe atîrî, “Nîndûî gîtûmaga mwîcirie maûndû macûku ngororî cienyu? 5Nî ûndû ûrîkû mûvûthû, nî kuga ‘Nîwoverwa mevia maku,’ kana nîkuga ‘Ûkîra wîthiîre?’ 6Nie nîngûmwonia atî Mûrû wa Mûndû arî na wathani gûkû nthî wa kwovera andû mevia.” Jesû nîwacokire akîîra mûndû ûcio wonjete ciîga ciake cia mwîrî atîrî, “Ûkîra woce ûrîrî waku na ûthiî mûciî!”

7Nake mûndû ûcio nîwaûkîrire na akîînûka. 8Na rîrîa andû moonire ûrîa gwekîka, nîmeetigîrire na magîkumia Ngai nî ûndû wa kûva andû wathani ta ûcio.

Jesû nîwetire Mathaayo amûrûmîrîre

(Mar 2.13-17; Luka 5.27-32)

9Nake Jesû nîwaumire kûu, na arî njîrarî athiîte nîwonire mûndû wetagwa Mathaayo warutaga wîra wa gwîtia mbia cia gooti ekarîte nthî wavicirî yake. Jesû nîwamwîrire atîrî, “Nûmîrîra.”

Nake Mathaayo nîwarûngamire na akîmûrûmîrîra.

10 # Luka 15.1-2 Na rîrîa Jesû ekarîte metharî akîrîa irio arî nyomba kwa Mathaayo, etia eengî a mbeca cia gooti na evia arîa engî nîmaaûkire, magîkara nthî na makîrîa irio marî vamwe na Jesû na arutwa ake. 11Na rîrîa Afarisai moonire ûguo, nîmaaûririe arutwa ake atîrî, “Nîndûî gîtûmaga mwarimû wenyu arîcanîre na evia na etia mbeca cia gooti?”

12Nwatî rîrîa Jesû eegwire ûrîa Afarisai maaûragia nîwamacokerie atîrî, “Andû arîa arwaru nîo mavataraga ndagîtarî, nwatî tî arîa matarî arwaru. 13#Mat 12.7; Hos 6.6 Thiîni mûkamenye gîtûmi Kîam mandîko matheru marîa maugîte atîrî, ‘Nie mendaga ciîko cia ntha na tî magongoona ma nyamû.’ Nie ndiûkîte gwîta andû arîa athingu, nwatî mbûkîte gwîta evia.”

Kîûria kîgiî wînyerekia

(Mar 2.18-22; Luka 5.33-39)

14Nao arutwa a Johana Mûvatithania nîmaacokire makîthiî kûrî Jesû na makîmûûria atîrî, “Nîndûî gîtûmaga tue na Afarisai twînyerekia na arutwa aku matiînyerekagia?”

15Nake Jesû nîwamacokerie atîrî, “Mûreciria atî andû arîa metîtwe ûvikirî nwa megue kîeva vîndî îrîa marî vamwe na mûvikania? Ûguo gûtingîvotekeka. Nwatî mûthenya nîûgaakinya rîrîa mûvikania akaathengutua gatagatîrî kao, na vîndî îo nîmakenyerekia.

16“Gûtirî mûndû ûtengaga nguo ngûrû na kîraka gîcerû. Angîka ûguo, kîraka kîu nwa kîgucagucie nguo îo ngûrû, nayo îgatembûka mûno. 17Wana gûtirî mûndû wonoragîria ndivei ya kûvivwa warîo mboororî îno ngûrû, nîûndû mbooro îo nwa îtarûke na ndivei îgetîka na mbooro îgacûkanga. Ndivei ya kûvivwa warîo yonoragîrua mboororî îrîa njerû nîguo ndivei wa vamwe na mbooro itigacûke.”

Mwarî wa mûnene na mûndûmûka ûrîa wavutirie nguo ya Jesû

(Mar 5.21-43; Luka 8.40-56)

18Vîndî îrîa Jesû aamaragîria, mûnene ûmwe warî Mûyahudi nîwathiîre kûrî ke, agîturia maru mbere ya Jesû na akîmwîra atîrî, “Mwarî wakwa nîwakua warîu nwatî ûka ûmwigîrîre njara na nîakûgîa na mwoyo.”

19Kwoguo Jesû nîwarûngamire na akîmûrûmîrîra marî vamwe na arutwa ake.

20Na mûndûmûka warwarîte mûrimû wa kuura nthakame mîaka îkûmi na îîrî, nîwathiîre vuva ya Jesû na akîvutia mîthiia ya nguo yake. 21Mûndûmûka ûcio eeîraga na ngoro atîrî, “Nie nîngîvutia nguo yake tu nwa mvone.”

22Nake Jesû nîwevûgûrire, akîona mûndûmûka ûcio, na akîmwîra atîrî, “Mwarîwa, îyûmîrîrie! Gwîtîkia gwaku nîkuo gwatûma ûvone.” Na kavinda wa kau mûndûmûka ûcio nîwavonire.

23Nake Jesû nîwacokire akîthiî na agîtonya nyomba kwa mûnene ûcio. Na rîrîa oonire andû arîa maavuvaga inanda kûu mathikorî na ûrîa kîrîndî Kîamnegenaga Kîamgagîte, 24nîwaugire atîrî, “Umani muonthe! Kerîtu tî gakuû; nîkwa karî toro!” Nao andû onthe nînaamûthekerere. 25Nwatî rîrîa kîrîndî Kîamrutirwe nja, Jesû nîwatonyire varîa kerîtu kau kaarî, agîkanyita njara na gagîûkîra. 26Naguo ûvoro wîgiî ûndû ûcio nîwatambire gîcunjîrî kîonthe Kîam vûrûri ûcio.

Jesû nîwavonirie atumumu aîrî

27Nake Jesû nîwaumire kûu. Na arî njîrarî athiîte, nîwaumirwe vuva nî atumumu aîrî. Atumumu acio nîmaaugîrîrie atîrî, “Twîguîre ntha, Mûrû wa Daudi!”

28Na rîrîa Jesû aatonyire kûu nyomba, atumumu acio nîmaathiîre kûrî ke. Nake Jesû nîwamaûririe atîrî, “Mue nîmwîtîkîtie atî nie nwa nîmûvonie?”

Nao nîmaamûcokerie atîrî, “Ii Mwathani!”

29Nake Jesû nîwacokire akîvutia metho mao na akiuga atîrî, “Kûrotuîkîka wa ûguo mwîtîkîtie.” 30Nao atumumu acio nîmaavotire kwona. Nake Jesû nîwamakanirie na vinya akîmeera atîrî, “Mûtikere mûndû wana ûrîkû ûvoro ûyû!”

31Nwatî atumumu acio nîmaathiîre na magîtambia ûvoro wîgiî Jesû kûndû kuonthe gîcunjîrî kîmwe Kîam vûrûrirî ûcio.

Jesû nîwavonirie mûndû ûtaavotaga kwaria

32Na rîrîa andû acio maathiîre, andû amwe nîmaavirîre Jesû mûndû warî na ndaimono na ûtaavotaga kwaria. 33Nwatî vîndî îrîa ndaimono îo yarutûrûrirwe, mûndû ûcio nîwavotire kwaria. Nao andû onthe nîmaamakire na makiuga atîrî, “Tue tûtianona ûndû ta ûyû gûkû Isiraeli.”

34 # Mat 10.25; 12.24; Mar 3.22; Luka 11.15 Nwatî Afarisai nîmaaugire atîrî, “Nî mûnene wa ndaimono ûvecaga Jesû vinya wa kûrutûrûra ndaimono.”

Jesû nîweguîrîre andû ntha

35 # Mat 4.23; Mar 1.39; Luka 4.44 Nake Jesû nîwathiîre matûûrarî monthe na icagirî cionthe. Ke nîwathomithagia arî mavoerorî, akîvunjagia Ûvoro Mwaro wîgiî Ûthamaki wa Ngai, na akîvonia andû arîa maarî na mîrimû na wonje wa mîthemba yonthe. 36#Nda 27.17; 1Atha 22.17; 2Maû 18.16; Ezek 34.5; Mar 6.34 Na rîrîa Jesû oonire kîrîndî nîwakîguîrîre ntha, nîûndû kîonekaga gîtangîkîte na kîthînîkîte ta ng'ondu itarî na mûrîthi. 37#Luka 10.2 Nake Jesû nîwacokire akîîra arutwa ake atîrî, “Maketha nî meengî nwatî aruti wîra nî anini. 38Kwoguo voyani nîguo mwene maketha atûme aruti wîra nîguo makaûnganie maketha make.”

Currently Selected:

Mat 9: KKB

Highlight

Copy

Compare