Mat 3
3
Mavunjio ma Johana Mûvatithania
(Mar 1.1-8; Luka 3.1-18; Joh 1.19-28)
1Kavindarî kau Johana Mûvatithania nîwathiîre werûrî wa Judea na akîambîrîria kûvunjia 2#Mat 4.17; Mar 1.15 akiugaga atîrî, “Îîrireni mevia menyu nîûndû ûthamaki wa Îgûrû ûrî vakuvî!” 3#Isa 40.3 Johana aarî mûndû ûrîa Mûrathi Isaia aaragia ûvoro wake rîrîa aaugire atîrî,
“Kûrî na mûndû ûranîrîra arî werûrî akiugaga:
‘Thondekani njîra ya Mwathani,
na mûrûngarie tûcîra twake!’ ”
4 #
2Atha 1.8
Johana eekagîra nguo yathondeketwe na guoya wa ngamîîra. Eeyovaga mûcivi wa rûûo kîûnûrî, na irio irîa aarîcaga ciarî ngige na ûûkî wa kîthaka. 5Nao andû nîmaathiîre kûrî ke maumîte îtûûrarî rîa Jerusalemu vûrûrirî wa Judea kuonthe na kuuma vûrûri wonthe ûrîa ûrî vakuvî na rûnjî rwa Jorodani. 6Andû acio nîmaaumbûrire mevia mao, na Johana akîmavatithîria rûnjîrî rwa Jorodani.
7 #
Mat 12.34; 23.33 Na rîrîa Johana oonire Afarisai na Asadukai eengî mathiîte kûrî ke nîguo amavatithie, nîwamerire atîrî, “Mue andû aya mûrî na wara ta wa njoka, nû wamûmenyithirie atî ciira ya Ngai îrî vakuvî; nîguo mûmîûrîre. 8Îkani maûndû ma kwonania atî nîmwîrirîte mevia menyu. 9#Joh 8.33 Mûtigecirie atî mûtikaaverithua mûkîîraga atî Iburahimu nî îthe wenyu wa tene. Nîramwîra ûguo nîûndû Ngai nwa atûme rûciaro rwa Iburahimu rûciarwe kuuma mathigarî mama. 10#Mat 7.19 Ngai nîmûvarîriu îthanwa rîa gûtema mûtî; mûtî wa wonthe ûtaciaraga maciaro maro, nîûgaatemwa na wikue mwakirî. 11Nie nîmûvatithagia na manjî ngîenda kwonania atî nîmwîrirîte mevia menyu. Nwatî ûrîa ûgûûka vuva wakwa, arî na vata kûngîra na nie ndirî mwagîrîru wa gûkuua iratû ciake. Ke akaamûvatithia na Roho Mûtheru na mwaki. 12Ke nîmûvarîriu gîtaararû gîa kûgûrûkia ngano, nîguo aige ngano makûmbîrî, namo macaki amavîvie na mwaki ûrîa ûtavorekaga.”
Jesû nîwavatithirue
(Mar 1.9-11; Luka 3.21-22)
13Na kavinda wa kau, Jesû nîwaumire Galili na akîthiî rûnjîrî rwa Jorodani nîguo akavatithue nî Johana. 14Nwatî Johana nîwageririe kûmûgiria akîmwîraga atîrî, “Ûraûka kûrî nie nîkî na nînie mbagîrîrwe nî gûka kûrî we nîguo ûmvatithie?”
15Nwatî Jesû nîwamûcokerie atîrî, “Tiga gûtuîke guo rîu, nîûndû nîkwagîrîrîte tue tûvingie wendi wa Ngai.” Kwoguo Johana nîwetîkîre kûvatithia Jesû.
16Nake Jesû aarîkia kûvatithua, nîwaumîrire manjîrî wa rîmwe. Narîo îgûrû nîrîavingûkire, na akîona Roho wa Ngai akînyûrûrûka ta ndutuura na agîkara îgûrû rîake. 17#Kîam 22.2; Tha 2.7; Isa 42.1; Mat 12.18; 17.5; Mar 1.11; Luka 9.35 Naguo mûgambo nîwaumire îgûrû ûkiugaga atîrî, “Ûyû nîke Mûriû wakwa ûrîa mendete, na nîrîmûkenie mûno nîke.”
Currently Selected:
Mat 3: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019