Isa 50
50
1Ngai-Mûnene arauga atîrî,
“Maarûa îrîa yonanagia atî nîndete nyûkwe-î, îrî kû?
Kana nî mûndû ûrîkû wa arîa nîrî na thirî wao nakwenderie?
Ririkanani mevia menyu nîmo maatûmire mwendue,
na waganu wenyu nîguo watûmire nyûkwe atewe.
2“Nîndûî gîatûmire vethîrwe vatarî mûndû vîndî îrîa naûkire?
Nîndûî gîatûmire ndure mûndû wa kûnjokeria vîndî îrîa netanire?
Nîkwa vinya wa njara yakwa wî mûnini,
ûndû îtangîvota gûkûûra andû?
Kana nîkwa ndarî na vinya wa kûvonokania?
Taroriani nie nîmvûîthagia îria na uuge wakwa,
na ngatûma nyûnjî ituîke werû,
na nthamaki ciakuo igakua nî kûnyonda,
na ikanunga nî gûtura manjî.
3Nînie ndûmaga îgûrû kûgîe nduma,
na ngarîkunîka na nguo cia macakaya.”
Wathîki wa ndungata ya Ngai-Mûnene
4Mwathani Ngai-Mûnene nîanthomithîtie ûrîa nguga,
nîguo mvote kûmîrîria arîa mathirîte vinya.
Wa kîraûko nîamvecaga wendi wa kûthikîrîria ûrîa arenda kûnthomithia.
5Mwathani Ngai-Mûnene nîavingûrîte matû makwa,
na ndiatuîka mûregi,
kana nîmûtiganîria.
6 #
Mat 26.67; Mar 14.65 Nînavecanire mûkurukuthu wakwa kûrî arîa maandivire,
nao arîa maangûûrire nderu ciakwa ngîmavûgûrîra makai makwa,
ndiathitha ûthiû wakwa atî nîguo ndigaconorithue
kana nduîrwa mata.
7Nîûndû Mwathani Ngai-Mûnene nîke ûndethagia;
kwoguo ndirî mûmaku.
Ndûmîte ûthiû wakwa ûme ta îthiga,
na nîmbîcî atî ndigaaconorithua;
8 #
Aro 8.33-34
nîûndû Ngai arî vakuvî.
Nû ûgaaciira nanie?
Nîaûke tûthiî îgootirî tûgaciire vamwe.
Nthû yakwa nû?
Nîaûkaûke vakuvî nanie.
9Taroria Mwathani Ngai-Mûnene nîke ûndethagia.
Nû ûngîvota kûnduîra atî nîrî na mavîtia ciirarî?
Onthe makaathira ta nguo;
nîmakaarîwa nî igunyû.
10Nû gatagatîrî kenyu wîtigîrîte Ngai-Mûnene
na wathîkagîra mûgambo wa ndungata yake,
wana ethîrwa athiîcagîrîra ndumarî atarî na ûtheri,
nîevokete Ngai-Mûnene na nîevokaga Ngai wake.
11Nwatî mue mwakagia mwaki,
mue mûkanagîrîra na icinga icio cienyu.
Thiîcagîrîrani ûtherirî wa mwaki ûcio,
nînîmbîrî cia mwaki ûcio mwakîtie mue ene.
Kîrîa mûûkaanyita kuuma kûrî Ngai-Mûnene nî gîkî,
mûkaamama nthî mûrî na mathîna meengî.
Currently Selected:
Isa 50: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
