Isa 46
46
1“Beli nîînamîrîrîte, Nebo nî ngwîu nthî;
mîvuanano ya ngai icio îkuuîtwe nî nyamû na ng'ombe,
indo ino ititikithîtue mvunda,
nî mîrigo îrî mîrukuthurî ya nyamû icio nogu.
2Irenamîrîra na ikagwa irî vamwe,
ngai icio itingîîvonokia,
nwatî wanacio nîikaathiî îthamîriorî.
3“Tathikîrîriani mue nyomba ya Jakovu,
mue muonthe arîa mûtigarîte a nyomba ya Isiraeli.
Naamûmbire na ndwîre nîmûmenyererete kuuma rîrîa mwaciarirwe.
4Nie nînie Ngai wenyu na nîndûûra nîmûmenyagîrîra
nginya ûkûrûrî wenyu wana rîrîa mûkaauma mbuî.
Nie nînie namûmbire na nîndûûra nîmûmenyagîrîra;
nîngaamûkuua na nîmûvonokie.
5“Mûngîningithania na û nîguo tûvuanane nake?
Mûngîmbîganania na û nîguo twîganane nake?
6Andû arîa metûrûraga thaavu kuuma mîvukorî yao,
makîthimaga sîlûva na ithimi ciao,
mandîkaga mûturi wa thaavu,
nake akathondeka mûvuanano wa ngai yao;
nao macokaga makamîturîria maru makamîgooca!
7Maûkagîrîria mûvuanano ûcio makawigîrîra iturorî ciao, magaûkuua;
mawigagîrîra vandû va guo, naguo ûkarûngama vo,
mûvuanano ûcio ndûngîvota kuuma vandû vau va guo.
Mûndû angîûkaîra ndûngîvota gûcokia ûndû,
kana ûmûvonokia kuuma mathînarî marîa arî namo.
8“Ririkanani ûndû ûyû na mwîcirie,
îririkanieni ûndû ûyû mue evia aya.
9Ririkanani maûndû marîa meekirwe tene;
nîûndû Nie nînie Ngai na gûtirî wîngî,
nie nînie Ngai na gûtirî wîngî tanie.
10Nînie managîrîra maûndû ma mûthiia kuuma Kîammbîrîria;
na ngaumbûra maûndû marîa matanekwa kuuma tene,
ngiugaga atî mworoto wakwa nîûkaavinga,
na nîngaavingia mîvango yakwa yonthe.
11Nîngeta mûndû kuuma mwena wa îrathîro;#46.11 mûndû kuuma mwena wa îrathîro: Roria 41.2.
mûndû kuuma vûrûri wî kûraca,
nîguo eke maûndû marîa mbîrîgîrîrîte gwîka.
Nînie mbugîte ûguo na nîngaavingia;
nînie mvangîte ûguo na nîngeka guo.
12“Tathikîrîriani mue andû aya aûmû ngoro,
mue mûrî kûraca na ûvonokio.
13Nîngûrete mûthenya wakwa wa kûmûvonokia vakuvî, ndûrî varaca,
mûthenya wa kûmûvonokia tîwîkara mûno.
Nîngaavonokia Zayuni na monie Isiraeli riiri wakwa.”
Currently Selected:
Isa 46: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
