Isa 2
2
Thayû wa gûtûûra tene na tene
(Mika 4.1-3)
1Îno nîyo ndûmîrîri îrîa Isaia mûvîcî wa Amozu aveerwe îgiî Juda na Jerusalemu:
2Mavinda nî magaakinya rîrîa kîrîma kîrîa hekarû ya Ngai-Mûnene îtumîtwe,
gîgaatuwa kîrîma kîraca gûkîra irîma cionthe,
na gîtûgîrue gûkîra tûrîma tuonthe.
Mavûrûri monthe nîmakaathiî kuo.
3Andû eengî nîmakaathiî kuo na mauge atîrî,
“Ûkani, tunûkie kîrîmarî Kîam Ngai-Mûnene,
tûthiîni nyombarî ya Ngai wa Jakovu,
nîguo atûthomithie mîthiîre yake,
natue tûrûmagîrîre njîra ciake.
Nîûndû watho ûkaauma Zayuni,
na ndûmîrîri ya Ngai-Mûnene îkaauma Jerusalemu.”
4 #
Joe 3.10; Mika 4.3 Ngai nîagaatuithania ciira gatagatî ka mavûrûri,
na nîakeguîthania ndûrîrî nyîngî;
magaatura mviû ciao cia njûra ituîke macembe ma mîraû,
namo matumû mao matuîke tûviû twa gûcaa.
Vûrûri ndûkaarûa na vûrûri ûrîa wîngî,
kana merute kûrûa rîngî.
5Rîu, mue njiarwa cia Jakovu,
ûkani tûthiîre ûtherirî wa Ngai-Mûnene.
Mwîtîîo nîûkaathirua
6Rîu we Ngai, nîûtiganîrîtie andû aku, njiarwa cia Jakovu,
nîûndû aringi a mbûgû kuuma mwena wa îrathîro mecûrîte kwao,
na oni maûndû ta Afilisiti,
na nîmanyitanagîra na andû ageni.
7Vûrûri wao wîcûrîte sîlûva na thaavu,
na mûthithû wao ndûngîthira.
Vûrûri wao wîcûrîte mbarathi,
na ikaari ciao cia mbaara itingîtarîka.
8Vûrûri wao wîcûrîte mîvuanano,
na magoocaga indo irîa marûthîte na njara ciao.
9Kwoguo wa mûndû nîakegwithua nthoni na aconorithue.
We Ngai ndûkamovere wanarî vanini!
10 #
Kûguû 6.15; 2Ath 1.9 Tonyani îthigarî na mwîthithe marimarî,
nîguo mûrîre marakara ma Ngai-Mûnene na riiri wa vinya wake!
11Mwîtîîo wa andû nîûkaathirua,
na mwîcaaro wa andû onthe ûcûkangue,
na Ngai-Mûnene tu nîke ûgaakumua mûthenya ûcio.
12Mûthenya wa Ngai-Mûnene, mwene vinya wonthe nîûgaakinya,
nîakaaverithia arîa onthe metîîaga na meyonaga marî aro,
na arîa onthe metûgagîria.
13Nîagaakinda mîtarakwe yonthe ya Lebanoni,
îrîa mîraca na mîaro,
na mîvuru yonthe vûrûrirî wa Bashani.
14Nîakeeganania irîma cionthe irîa ndaca na îgûrû,
wana tûrîma tuonthe tûrîa tûnini.
15Nîakoomomora nyomba cionthe irîa ndaca,
wana nthingo cionthe cia vinya cia kwîgitîra.
16Nîagaacûkangia meri cia Tarishishi,
na acûkangie matarû monthe mathaka.
17Mwîtîîo wonthe wa andû nîûkaanyivua,
na mwîcaaro wa andû nîûkaathirua,
na Ngai-Mûnene wenga tu nîke ûgaakumua mûthenya ûcio.
18Mîvuanano yonthe nîkaathira viû.
19Andû nîmagaatonya ngurungarî cia mathiga,
na matonye marimarî ma nthî,
nîguo maûrîre marakara ma Ngai-Mûnene,
na vinya wa riiri wake,
rîrîa agaaûka kûmakia nthî.
20Mûthenya ûcio, andû nîmagaaikîria mbuko na mvuvu,
mîvuanano yao ya sîlûva na ya thaavu,
îrîa meerûthîre nîguo mamîgoocage.
21Andû nîmakethitha ngurungarî cia mathiga,
na mîanyarî ya mathiga,
nîguo maûrîre marakara ma Ngai-Mûnene,
na riiri wa vinya wake rîrîa agaaûka kûmakia nthî.
22Ndûkevoke mûndû wa gûkû nthî.
Ûtûûro wake ûthiraga ta mîvevû.
Mûndû nîwa vata ûrîkû?
Currently Selected:
Isa 2: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
