Tov 14
14
1Ũsu nĩw'o mũthya wa wathi wa Toviti.
Ndeto sya Mũthya sya Ũtao sya Toviti
2Toviti akwie na mũuo e na ũkũũ wa myaka ĩana na ĩkũmi na ĩlĩ. Athikiwe na ndaĩa ndũanĩ ya Nineva. Atw'ĩkie kĩlalinda e na ũkũũ wa myaka mĩongo thanthatũ na ĩlĩ. Amina kũvow'a nĩwaendeeie nesa, na nĩwatetheeasya ngya, na o ta ũu nĩwataĩaa Ngai na kũtavany'a ũnene wake.
3Akilĩlye kũkw'a, nĩweetie mwana wake Toviasi na amũnenga motao aya: 4#Nee 1.2—3.19 “Mwana wakwa osa syana syaku na ũithi nasyo Metia na mĩtũkĩ, nũndũ nĩngũĩkĩĩa kana ndeto ila syaneeniwe nĩ mwathani Naũmu ĩũlũ wa Nineva ikeanĩa. Maũndũ onthe ala athani ma Ngai matavisye andũ ma Ĩsilaeli ĩũlũ wa Nineva na Asuli makeekĩka ĩvindanĩ yamo. Vai ũndũ o na ũmwe maneenie ũkalea kwĩanĩa. Inyw'ĩ mũkeethĩwa mwĩ ũsũvĩonĩ mbeange mwĩ kũu Metia mbee wa mwĩ Asuli kana Mbavilonĩ. Nĩnĩsĩ vyũ kana maũndũ onthe ala Ngai waneenie makeanĩa, na vai ndeto o na ĩmwe katĩ wa ila syathaniwe ĩkalea kwĩanĩa.
“Ana-a-ĩthe maitũ ala matwĩe nthĩ ya Ĩsilaeli onthe makatalwa, na maikwatwa matwawe kũasa me ove maumw'e nthĩ ĩsu yoo nzeo. Nthĩ yonthe ya Ĩsilaeli ĩkatw'ĩka weũ, na ndũa sya Samalia na Yelũsalemu ikathamwa; nyũmba ya Ngai ĩkavĩvw'a na kũtiwa yĩ mbomboku vandũ va ĩvinda. 5Ĩndĩ Ngai akeew'ĩa andũ make tei ĩngĩ, na akamatũnga nthĩ ya Ĩsilaeli. Makaaka Ĩkalũ ĩngĩ, ĩndĩ yĩikethĩwa yĩ ĩseo ta yĩla ya mbee, nginya ĩvinda yĩla yaĩlĩte yĩvike. Yĩla ĩvinda yĩu yĩvika, andũ onthe ma Ĩsilaeli makasyoka kuma kũla meĩthĩwa matavĩtwe makatwawa, na makaaka ndũa ya Yelũsalemu ĩngĩ yĩkale ũndũ yailyĩ mbeenĩ. Makaaka Ĩkalũ ya Ngai ĩngĩ Yelũsalemu, o tondũ athani ma Ĩsilaeli mathanie.
6“Nĩvo ĩndĩ andũ onthe ĩũlũ wa nthĩ makatangĩĩwa na kũmwĩw'a Ngai kwa ũw'o. Onthe makaekana na ngai syoo sya mĩvw'anano ila itumaa meka maũndũ mathũku, na maimũtaĩa Ngai wa ĩvinda yonthe kwa kwĩthĩwa me alũngalu. 7Andũ onthe ma Ĩsilaeli ala makethĩwa matialĩte ĩvindanĩ yĩu makalilikana Ngai na thayũ woo w'onthe. Makooka na kũmbanĩa vamwe Yelũsalemu, na ĩtina mayĩkala me ũsũvĩonĩ nthĩ ya Avalaamu ĩla ĩkeethĩwa yoo. Onthe ala mendete Ngai kwa ũw'o makatana, ĩndĩ ala mekaa naĩ na maũndũ mathũku makaa kuma ĩũlũ wa nthĩ. 8Yu ĩndĩ ana makwa, ĩkai ũndũ ngũmwĩa. Thaithai Ngai kwa ũĩkĩĩku na mũyĩka maũndũ ala mamwendeeasya. 9Eai syana syenyu kwa kũimanyĩsya kwĩka ũla waĩlu, kũtetheesya ngya, kũlilikana Ngai na kũtaĩaa ĩsyĩtwa yake kĩla ĩvinda, na ngoo syoo na vinya wasyo w'onthe.
10“Toviasi mwana wakwa, yu uma Nineva; ndũkekale vaa. Wamina kũthika inyia waku vakuvĩ nakwa oou, enda. Ndũkekale ũtukũ ũngĩ vaa ndũanĩ. Ĩno nĩ ndũa mbuku na yusũĩte ũlaalai; andũ mayo mai nthoni o na vanini. Lilikana ũndũ Natavu weekie Aikalĩ mwendw'a-ĩthe wake ũla wamũeete. Natavu nĩwatatie kũaa Aikalĩ kwa nzĩa ya kũtuma alika mbũanĩ e thayũ. Ĩndĩ Ngai nĩwatumie mũndũ ũsu mũthũku weetawa Natavu akwata ũkany'o wa ũthũku wake asyaĩĩw'e nĩ Aikalĩ, nĩkwĩthĩwa Aikalĩ nĩwaumĩlile ĩngĩ kyeninĩ kya mũthenya, ĩndĩ Natavu nĩwalikile kĩvindunĩ kya tene na tene, ta w'o ũkany'o wa mũvango wake wa kũaa Aikalĩ. Aikalĩ ndaakwatw'a nĩ mũteo wa Natavu nũndũ wa meko make maseo, ĩndĩ Natavu nĩwakwatĩiw'e mũteonĩ ũsu na wamũaa. 11Yu ĩndĩ ana makwa, nĩmwoona ũseo ũla ala matethasya ngya makwataa, na ũndũ kĩkw'ũ kyeteelaa ala mekaa andũ angĩ naĩ. Ĩndĩ yu nĩ mwonzu vyũ!”
Nĩvo ĩndĩ makomisye Toviti ũkomonĩ wake. Nĩwakwie na athikwa na ndaĩa. 12Ĩtina, mũka wa Toviti nĩwakwie na athikwa vakuvĩ na mũũme. Toviasi na mũka wake nĩmaendie Ekivatana ĩla yĩ Metia, mathi kwĩkala na Lakueli ũla waĩ mũthoni wa Toviasi. 13Toviasi nĩwasũvĩie Etina na Lakueli ũkũũnĩ woo, na amanenga ndaĩa mbingĩ. Yĩla makwie nĩwamathikie Ekivatana nthĩ ya Metia. Toviasi nĩwatiĩwe ũthwii wa Lakueli o tondũ watiĩwe ũthwii wa ĩthe wake Toviti.
14Toviasi akwie e na ũkũũ wa myaka ĩana na ĩkũmi na mũonza. 15Atanamba kũkw'a, nĩwoonie Nineva ĩyanangwa. Nĩwoonie andũ ma Nineva maikwatwa me ove na kũtwawa Metia nĩ Saikasalesi mũsumbĩ wa Metia. Toviasi nĩwataĩie Ngai nũndũ wa maũndũ onthe ala Ngai weekie akany'e andũ ma Nineva na ma Asuli. Atanamba kũkw'a nĩweethĩiwe na mwanya wa kũtana nũndũ wa maũndũ ala meekĩkie Nineva, na ataĩa Mwĩai Ngai tene na tene. Ameni.
Currently Selected:
Tov 14: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011