Wa 7
7
Mũtwaani
1Mwa mwĩĩtu wa kĩ-ũsumbĩ,
maũũ maku ko nĩmakwendeesya me iatũnĩ!
Matako maku nĩ ma kĩthyũlũlũ ta mavia ma thooa mũnene,
wĩa wa mũndũ wĩ na ũĩ mwingĩ.
2Mũkautĩ waku nĩ ta mbakũli ya kĩthyũlũlũ,
ĩla kĩla ĩvinda yĩthĩawa na ndivai mbulany'e,
ĩvu yaku nĩ ta kĩvumbu kya nganũ,
kĩthyũlũlũkĩtwe nĩ malaa ma lili.
3Nondo syaku iilyĩ ta tũtena twĩlĩ mavatha twa nthwaia.
4Ngingo yaku ĩilyĩ ta mwako mũtũlu wakĩtwe na maeo ma nzou,
metho maku nĩ ta ndia ila syĩ ndũanĩ ya Esivoni,
vakuvĩ na mũvĩa wa Mbathi-lavimi.
Ĩnyiũũ yaku yĩilyĩ ta mwako mũtũlu wa Levanoni,
ũla ũsyaĩtye Ndamasikũ.
5Mũtwe waku nĩ ta Kĩĩma kya Kalimeli,
na nzw'ĩĩ yaku ndaasa yĩna wiũ ũũtisa,
wanake wayo nĩũkwatya mũsumbĩ.
6Kwa sisya ũndũ wanakavĩte na wĩ wa kwendeesya,
we mwendwa, mũtwawa ũla ũtanĩthasya!
7Kĩũngamo kyaku nĩ ta kya mũkĩndũ,
na nondo syaku nĩ ta itũngo sya matunda maw'o.
8Naisye nĩngũlĩsa mũkĩndũ,
na ngĩkwatĩla mbonge syaw'o.
Mwa nondo syaku nĩsyĩthĩwe iilyĩ ta itũngo sya nzavivũ,
mũuke wa mĩthũmũ yaku wĩthĩwe wĩ mũseo ta matunda ma mũevo. 9Kanyw'a waku nĩ ta ndivai yĩ mũyo,
ĩla ĩtheeaa nesa yĩsĩlĩte ilomonĩ na maeonĩ.
Mũtwawa
10Nyie nĩ wa mwendwa wakwa,
nake nũmbĩw'ĩaa mea.
11Ũka we mwendwa wakwa,
nĩtũthi kũya isesinĩ,
na tũikomela motũinĩ.
12Nĩtũthi kwakya tene mĩũndanĩ ya mĩsavivũ,
tũkasisye kana mĩsavivũ nĩ mĩlaũku na kana malaa mayo nĩ mavingũku,
na kana mĩkũngũmanga o nayo nĩ mĩlaũku.
Kũu nĩkw'o ngũthi ũkũnengea wendo wakwa.
13Mũtĩ wa kũtetheesya iveti kũitava wĩumya mũuke mũseo,
na mũomonĩ witũ ve matunda onthe ala maseo,
ala ma yu na ala makũũ,
ala ngwiĩe ame mwendwa wakwa.
Currently Selected:
Wa 7: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
