Wa 4
4
Mũtwaani
1Kwa w'o, wĩ mwanake mwendwa wakwa,
kwa w'o, wĩ mwanake!
Metho maku nĩ mauu ta ma ĩvũĩ,
me ungu wa suka waku mũvũthũ wa kwĩvw'ĩka ũthyũ.
Nzw'ĩĩ yaku ĩilyĩ ta ndĩthya ya mbũi,
itheete Kĩĩmanĩ kya Ngileati.
2Maeo maku meũvĩte ta malondu maka matilwa w'ĩa mĩtũkĩ,
na maumĩte kũthambw'a,
ala onthe masyaa mavatha,
na vai yĩmwe yamo yĩkw'ĩĩwe nĩ katena.
3Ilomo syaku iilyĩ mũkumbũ mũtune mũno,
kanyw'a waku nĩ wa kwendeesya.
Matau maku mailyĩ ta nyusu ya ĩkũngũmanga,
me ungu wa suka waku mũvũthũ wa kwĩvw'ĩka ũthyũ.
4Ngingo yaku ĩilyĩ ta mwako mũtũlu wa Ndeviti,
wakĩtwe kwondũ wa kwiwa mĩio ya kaũ,
wanĩkĩtwe ngao ngili ĩmwe,
syonthe syĩ ngao sya ngũmbaũ.
5Nondo syaku ilĩ iilyĩ ta tũtena twĩlĩ,
tũtena mavatha twa nthwaia,
tũla tũĩsaa malaanĩ ma lili.
6Nginya kũkye, na kĩvindu kĩithela,
nĩngũthi kĩĩmanĩ kya mauta ma manemane,
na kalĩmanĩ ka ũvani wa thooa mũnene wĩtawa ũvumba.
7Mwendwa wakwa, wĩ mwanake mũno,
ndwĩ vandũ ve kĩema o na vamwe!
8Mũtwawa wakwa, ũka tume Iĩmanĩ sya Levanoni;
ũka tũendany'e kuma Levanoni.
Theea kuma mũthya wa Kĩĩma kya Amana,
kuma mũthya wa Kĩĩma kya Senili na kya Elimoni,
kuma ngunganĩ sya mĩnyambũ,
kuma iĩmanĩ sya ngo.
9Mwĩĩtu-a-ia, mũtwawa wakwa, nũtanĩthĩtye ngoo yakwa,
nũtanĩthĩtye ngoo yakwa kwa kũnzisya o ĩmwe na metho maku,
na kwa ĩsoa yaku yĩla wĩkĩĩte ngingo.
10Wendo waku ko nĩ mũseo mwa mwĩĩtu-a-ia, mũtwawa wakwa!
Wendo waku nĩ mũseo kwĩ ndivai,
na mũuke wa mauta maku nĩ mũseo kwĩ mauta ala angĩ onthe!
11Ilomo syaku we mũtwawa wakwa, ilovotasya mũyo ta ĩwa,
kwakwa ũĩmĩ waku nĩ ta ĩia na ũkĩ wa nzũkĩ;
mũuke mũseo wa ngũa syaku nĩ ta mũuke wa Levanoni.
12Mwĩĩtu-a-ia mũtwawa wakwa, nĩ ta mũũnda mwiĩĩe,
nĩ ta mũũnda mwiĩĩe, na nĩ ta kĩthima kĩkunĩke.
13Nthongoo syaku nĩ ta mũũnda wa makũngũmanga wĩ na matunda ala maseo vyũ,
wĩ na mũtĩ wa kũseũvya syĩndũ sya kwĩyanakavya, wĩtawa ina na ũngĩ wĩtawa nando,
14na mĩtĩ yonthe mĩseo ĩla ĩnyungaa nesa: Nando na manukato,
kalamusi na sinamoni,
mĩtĩ yonthe ĩla ĩseũvasya ũvani wa thooa mũnene wĩtawa ũvumba,
mauta ma manemane na uuti.
15We wĩ nthongo yĩ mũũndanĩ,
kĩthima kya kĩw'ũ kya thayũ,
na tũlũsĩ tũtheete kuma Levanoni.
Mũtwawa
16Ambĩĩa kũuutana we kĩseve kya ngalĩko ya ĩũlũ,
ũka we kĩseve kya ngalĩko ya ĩtheo;
Uutanĩai mũũndanĩ wakwa,
nĩ kana mũuke waw'o mũseo ũnyaĩĩkĩe kĩla vandũ.
Mwendwa wakwa nĩoke mũũndanĩ wake,
na aiya matunda maw'o ala maseo vyũ.
Currently Selected:
Wa 4: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
