Wa 1
1
1 #
1Asu 4.32
Wathi ũla mũseo mbee wa mbathi syonthe, ũla waandĩkiwe nĩ Solomoni.
Wathi wa Mbee
Mũtwawa
2Ngethye na ngethi ya wendo,
mumunye na ilomo syaku,
nũndũ wendo waku nĩ mũseo kwĩ ndivai.
3Mauta maku menyunga nesa,
na ĩsyĩtwa yaku nĩ ta mauta me mũuke mũseo me monosye,
kwoou eĩtu nĩmakwendete!
4Ngusye ngũatĩĩe, nĩtwĩkalaate.
Mũsumbĩ nĩwandete tũsũmbanĩ twake twa nthĩnĩ.
Tũkatana na kwĩw'a mũyo nũndũ waku;
tũkakatha wendo waku kwĩ ndivai,
eĩtu mailea ũkwenda!
5Inyw'ĩ eĩtu ma Yelũsalemu,
nyie nĩ mwiũ ĩndĩ nĩ mũmbe nesa ta maeema ma Ketali,
ta vasia ila syĩ kwa Solomoni.
6Mũikangetee nũndũ nĩ mwiũ,
nũndũ nĩmbĩvĩtw'e nĩ syũa.
Ana-a-ia nĩmanthatĩie,
mandw'ĩkĩthisye mũsũvĩi wa mĩũnda ya mĩsavivũ,
ĩndĩ ndyaasũvĩa mũũnda wakwa wa mĩsavivũ!
7Kwa ndavye, we mwendwa wakwa,
vala ũĩthĩasya ndĩthya yaku ya mbũi na malondu,
vala ũmĩtindiasya mũthenya katĩ;
ve kĩtumi kyaũ ngũmanthe,
ndĩthyanĩ sya aĩthi ala angĩ?
Mũtwaani
8We ũla mwanake kwĩ aka onthe,
ethĩwa ndwĩsĩ ĩka atĩĩ:
Atĩĩa malata ma ndĩthya ya mbũi na malondu,
na ũiĩthĩsya tũtena twaku twa mbũi ũtee wa maeema ma aĩthi.
9Mwendwa wakwa,
nĩkũvw'anany'a na mbalasi ila ikusasya makasya ma mũsumbĩ wa Misili.
10Matau maku manakavĩtw'e nĩ syĩndũ sya wanake,
na ngingo yaku ĩkanakavw'a nĩ masoa ma thooa mũnene.
11Ĩndĩ ithyĩ tũkakũseũvĩsya masoa ma thaavu,
manakavĩtw'e nesa na silĩva.
Mũtwawa
12Yĩla mũsumbĩ wathũmũĩte kĩtandanĩ kyake,
mũuke mũseo wa mauta makwa metawa nando nĩwanyaĩĩkĩie kĩla vandũ.
13Mwendwa wakwa kwakwa nĩ ta kamũvuko ka mauta me mũuke mũseo metawa manemane,
kailĩĩlwe katĩ wa nondo syakwa.
14Mwendwa wakwa kwakwa nĩ ta malaa me mũuke mũseo ma mũtĩ wa kwĩyanakavya wĩtawa ina,
me mũũndanĩ wa mĩsavivũ wa Eni-ngeti
Mũtwaani
15Kwa w'o wĩ mwanake, mwendwa wakwa;
kwa w'o wĩ mwanake,
metho maku nĩ mauu ta ma ĩvũĩ!
Mũtwawa
16Kwa w'o wĩ mwanake mwendwa wakwa,
ĩĩ, wĩ wa kwendeesya!
Nyeki mbĩũ nĩyo kĩtanda kitũ;
17mĩkũũ nĩyo mĩamba ya nyũmba yaitũ,
nayo mĩsonovali nĩyo kĩala kitũ.
Currently Selected:
Wa 1: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
