Sil 4
4
1Mwana wakwa, ndũkavate ngya kĩla yĩna vata nakyo,
kana kũtuma mũndũ wĩ na thĩna atinda eteelete.
2Ndũkathatye mũndũ wĩ na nzaa,
kana kwĩw'ĩthya mũndũ wĩ na thĩna woo.
3Ndũkaendee kwongeleela mũndũ ũkw'ĩte ngoo mathĩna,
kana kwĩkalya ũtethyo waĩlĩte kũnenga mũndũ wĩ na thĩna.
4Ndũkalee kũtethya mũndũ ũkũvoya ũtethyo,
kana ũlee kũtethya ngya.
5Ndũkalee kũsisya mũndũ wĩ na thĩna,
na ndũkamũnenge mwanya akũumanĩe,
6nĩkwĩthĩwa akũumanĩa nũndũ wa ũthatu ũla wĩ naw'o,
Mũmbi wake akeew'a mboya yake.
7Tuma ndũũ na andũ onthe ala wĩkalaa namo;
kumanasya mũtwe waku ũnenge anene ndaĩa.
8Teaa kũtũ wĩthukĩĩsye mũndũ ngya,
na kũsũngĩa ngethi yake na mũuo na ũuu.
9Tangĩĩa andũ ala meũthĩnw'a maume ũtonyinĩ wa ala mekũmathĩny'a,
na ĩthĩawa wĩ na ũlũmu ũyumya ũtw'ĩo.
10Ĩthĩawa ũilyĩ ta ĩthe kwa syana ikw'ĩĩwe nĩ aaĩthe,
na kwĩthĩwa ũilyĩ ta mũũme kwa mũndũ mũka ũsu ndiwa;
nĩvo ĩndĩ wĩĩthĩwa ta mwana wa Ũla wĩ Ĩũlũ Mũno,
nake akakwenda mbee wa ũndũ inyia waku ũkwendete.
Ũĩ nĩ Mũmanyĩsya
11Ũĩ nũnenevasya ana maw'o,
na nũtetheeasya ala maũmanthaa.
12Ũla wendete ũĩ endaa thayũ,
na ala maũmanthaa kuma kwakya tene nĩmausũawa nĩ ũtanu.
13Ũla ũlũmasya ũĩ nũkumaw'a,
na Mwĩai akaathima vala wĩendaa.
14Ala mathũkũmaa ũĩ methĩawa maimũthũkũma Ũla Mũtheu,
Mwĩai nĩwendete ala mendete ũĩ.
15Ũla ũnengae ũĩ ndaĩa akasilĩla mbaĩ,
na ũla wĩthukĩĩasya ũĩ akekala e ũsũvĩonĩ.
16Ethĩwa akekala e mũĩkĩĩku akwata ũĩ,
nzyawa syake ikaendeea kwĩthĩwa na ũĩ.
17Nĩkwĩthĩwa o na vala ũĩ ũkamba kũmwĩsĩlya nzĩanĩ syĩ mathĩna,
na kũtuma ethĩwa na nzika na w'ĩa,
ũimũthĩny'a na motw'ĩo maw'o nginya ũmũĩkĩĩe,
na kũmũthima na myamũlo yaw'o,
18ĩtina ũĩ ũkamũsyokea mĩtũkĩ na kũmũtanĩthya,
na kũmũvuanĩsya syĩmbithĩ syaw'o.
19Mũndũ ũsu avĩtya, ũĩ ũkamũtia,
na kũmũeka eyanange we mwene.
20Sisya ĩvinda yĩla yaĩlĩte, na ũyĩsũvĩa ũthũku,
na ndũkeyĩetee nthoni we mwene.
21Nĩkwĩthĩwa ve nthoni ietae naĩ,
na ve nthoni ietae nguma na ndaĩa.
22Ndũkonany'e wendeesyo ũtume wĩyĩetee ũthũku,
kana ũtaĩe andũ ala angĩ na kwĩyaĩsya ndaĩa.
23Ndũkalee kũneena ĩvindanĩ yĩla ve vata,
na ndũkavithe ũĩ waku.
24Ũĩ wa mũndũ ũmanyĩkaa kumana na ũneeni wake,
na ũmanyi wake kumana na ndeto ila waneena.
25Ndũkaaneene ũvinganĩsye ũw'o;
lilikana kana ve maũndũ ũtesĩ.
26Ndũkew'e nthoni kumbũla naĩ syaku,
na ndũkatate kũsiĩĩa kĩw'ũ kĩvĩtĩte ũsĩnĩ.
27Ndũketĩkĩle kũũngamĩwa nĩ ndia,
kana kwony'a mũtongoi wendeesyo.
28Ũkitĩa ũw'o o na kũvika kũkw'a,
nake Mwĩai Ngai akakũkitĩa.
29Ndũkethĩwe mũndũ wa kũneena ndeto sya mana,
kana kwĩthĩwa wĩ mũtulu na kũlea kũtethya wĩa waku.
30Ndũkethĩwe ũilyĩ ta mũnyambũ mũsyĩnĩ waku,
kana mũndũ wa kũmantha mavĩtyo athũkũminĩ maku.
31 #
Meko 20.35
Ndũkethĩwe mũndũ wendete kũnengwa,
na ĩvinda ya kũĩva yavika ũyĩw'a vinya wa kũĩva.
Currently Selected:
Sil 4: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011