Sav 135
135
Wathi wa Kũtaĩa Ngai!
1Mũtaĩei Mwĩai Ngai.
Taĩai ĩsyĩtwa ya Mwĩai Ngai,
inyw'ĩ athũkũmi ma Mwĩai Ngai mũtaĩei;
2inyw'ĩ ala mũũngamĩte nyũmbanĩ ya Mwĩai Ngai,
iwanzanĩ sya nyũmba ya Ngai waitũ.
3Taĩai Mwĩai Ngai,
nũndũ nĩ mũseo.
Inai mũikumya ĩsyĩtwa yake,
nũndũ ũsu nĩ ũndũ mũseo.
4Nũndũ Mwĩai Ngai nĩweenyuvĩie Yakovo;
andũ ma Ĩsilaeli methĩwe make.
5Nĩnĩsĩ kana Mwĩai Ngai nĩ mũnene,
na kana Mwĩai waitũ nĩ mũnene kwĩ ngai syonthe.
6Mwĩai Ngai ekaa ũndũ o na wĩva ũla ũkwenda ĩtunĩ na kũũ nthĩ,
mokanganĩ na kũndũ kũliku kw'onthe.
7Nũtumaa matu mokĩla kuma kũla nthĩ ĩthelele;
nũetae mbua yĩna ũtisi,
na kũete kĩseve kuma makũmbĩnĩ make.
8Nĩwe wooaie kĩla kĩsyaĩtwe mbee kya nthĩ ya Misili;
andũ na nyamũ o nasyo.
9Nĩweekie syama na maũndũ ma kũseng'ya katĩ waku we Misili,
akany'e mũsumbĩ na athũkũmi make onthe.
10Nĩwaanangie mbaĩ mbingĩ,
na ooaa asumbĩ me ũtonyi:
11Sioni mũsumbĩ wa Aamoli,
Oku mũsumbĩ wa Mbasani,
na asumbĩ onthe ma Kanaani.
12Nĩwanenganie nthĩ sya asumbĩ asu syĩthĩwe ũtiĩwa,
ũtiĩwa wa andũ make Ĩsilaeli.
13We Mwĩai Ngai ĩsyĩtwa yaku nĩyĩkalaa tene na tene,
ũkalilikanawa nĩ nzyawa syonthe.
14Mwĩai Ngai akatetea andũ make,
na kwĩw'ĩa athũkũmi make tei.
15 #
Sav 115.4-8; Ũvu 9.20 Mĩvw'anano ya ngai sya mbaĩ ingĩ iseũvĩtw'e na silĩva na thaavu,
ĩseũvĩtw'e na moko ma andũ.
16Yĩna makanyw'a ĩndĩ ndĩneenaa,
yĩna metho ĩndĩ ndyonaa.
17Yĩna matũ ĩndĩ ndĩw'aa,
o na ndĩtonya kũveva.
18Ala mamĩseũvasya nĩmekale ta yo,
ĩĩ, ala mekwatasya mĩvw'anano ĩsu nĩmekale ta yo.
19Inyw'ĩ andũ ma Ĩsilaeli mũtaĩei Mwĩai Ngai!
Inyw'ĩ athembi mũtaĩei Mwĩai Ngai!
20Inyw'ĩ Alivai mũtaĩei Mwĩai Ngai!
Inyw'ĩ ala mũkĩaa Mwĩai Ngai mũtaĩei!
21Nĩataĩwe Mwĩai Ngai kũu Saioni,
ũla ũtũaa Yelũsalemu.
Mũtaĩei Mwĩai Ngai.
Currently Selected:
Sav 135: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
