Sav 132
132
Wathi wa Kũkumya Ĩkalũ
1Mwĩai Ngai lilikana Ndeviti,
na mathĩna onthe ala woomĩĩisye.
2Lilikana ũndũ wakwathie we Mwĩai Ngai,
wĩvĩto ũla weevĩtie kũla ũĩ we Ngai wa Yakovo Ũla wĩ Ũtonyi ayasya,
3“Ndikalika nyũmba kwakwa,
kana nĩlĩse ũkomonĩ wakwa,
4ndikakoma kana nĩthũmũe,
5nginya yĩla nĩona vandũ va Mwĩai Ngai,
wĩkalo wa Ngai wa Yakovo Ũla wĩ Ũtonyi.”
6 #
2Mav 6.41-42
Twĩ Evilatha nĩtweewie ũvoo wa Ĩsandũkũ ya Ũtianĩo,
na twayĩthĩa isesinĩ sya Yealimu.
7Nĩtwaisye, “Nĩtũendei wĩkalonĩ wa Mwĩai Ngai;
nĩtũthaithe twĩ mbee wa kĩvĩla kyake kya ũsumbĩ!”
8We Mwĩai Ngai ũkĩla ũthi wĩkalonĩ waku,
ũkĩla wĩ na Ĩsandũkũ ya Ũtianĩo ya ũtonyi waku.
9Athembi maku mekae ũla ũlũngalu;
atheu maku nĩmokĩlye mawasya na ũtanu.
10Kwondũ wa mũthũkũmi waku Ndeviti,
ame Mwĩai Ngai, ndũkaeke mwĩtĩkĩw'a mauta waku.
11 #
2Sam 7.12-16; 1Mav 17.11-14; Sav 89.4-5; Meko 2.30 Mwĩai Ngai nĩweevĩtĩie Ndeviti wĩvĩto wa w'o,
wĩvĩto ũla ũtaalyũla ayasya,
“Ngatw'ĩkĩthya ũmwe wa ana maku mũsumbĩ,
asumbĩke ĩtina waku.
12Ethĩwa ana maku makeanĩasya ũtianĩo wakwa,
na mokũsĩ makwa ala nĩmamanyĩsya,
ana moo o namo makatw'ĩka asumbĩ taku ĩvindanĩ yonthe yĩla yũkĩte.”
13Nũndũ Mwĩai Ngai nũnyuvĩte Saioni,
nũkwenda kũmĩtw'ĩkĩthya wĩkalo wake.
14Nĩwaisye atĩĩ, “Vaa nĩvo ngekalaa tene na tene,
nĩvo wĩkalo wakwa nũndũ nĩnĩvendete.
15Ngaathima ndũa ya Saioni mũno mavatanĩ mayo onthe;
ngavũnĩthya ngya syayo na lĩu.
16Ngatuma athembi mayo makwata ũtangĩĩo,
na atheu mayo makookĩlya wasya wa ũtanu.
17 #
1Asu 11.36
Ngatuma vauma mũsumbĩ ngũmbaũ kuma nzyawanĩ sya Ndeviti,
na ngĩsũvĩa ũsumbĩ wa mwĩtĩkĩw'a mauta wakwa ũendee kwĩkala.
18Ngatuma amaitha make makwatwa nĩ nthoni,
ĩndĩ ũsumbĩ wake ũkaendeea nesa.”
Currently Selected:
Sav 132: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
