Sav 118
118
Mboya ya Kũtũnga Mũvea nũndũ wa Ũsindi
1 #
1Mav 16.34; 2Mav 5.13; 7.3; Esa 3.11; Sav 100.5; 106.1; 107.1; 136.1; Yel 33.11 Tũngĩai Mwĩai Ngai mũvea nũndũ nĩ mũseo,
nũndũ wendo wake ũtaolekaa nĩwĩkalaa tene na tene.
2Andũ ma Ĩsilaeli nĩmasye,
“Wendo wake ũtaolekaa nĩwĩkalaa tene na tene.”
3Nzyawa sya Alũni nĩsyasye,
“Wendo wake ũtaolekaa nĩwĩkalaa tene na tene.”
4Ala makĩaa Mwĩai Ngai nĩmasye,
“Wendo wake ũtaolekaa nĩwĩkalaa tene na tene.”
5Yĩla naĩ thĩnanĩ nĩneekaĩlile Mwĩai Ngai;
Mwĩai Ngai nĩwanzũngĩie na anthasya.
6 #
Aevl 13.6
Mwĩai Ngai e ngalĩkonĩ ĩla yakwa ndikakĩa kĩndũ;
mũndũ atonya kũmbĩka ata?
7Mwĩai Ngai e ngalĩkonĩ ĩla yakwa andetheesye;
nakwa ngasyaĩĩsya amaitha makwa maisindwa.
8Nĩ kavaa kwĩvitha nthĩnĩ wa Mwĩai Ngai,
kũte kwĩkwatya mũndũ.
9Nĩ kavaa kwĩvitha nthĩnĩ wa Mwĩai Ngai,
kũte kwĩkwatya atongoi ma nthĩ.
10Mbaĩ syonthe nĩsyanthyũlũlũkĩte,
ĩndĩ ĩsyĩtwanĩ ya Mwĩai Ngai nĩnamaminie.
11Nĩmanthyũlũlũkĩte kĩla ngalĩko,
ĩndĩ ĩsyĩtwanĩ ya Mwĩai Ngai nĩnamaminie.
12Nĩmanthyũlũlũkĩte ta nzũkĩ,
ĩndĩ mathelile mĩtũkĩ ta mĩw'a yakwata mwaki;
ĩsyĩtwanĩ ya Mwĩai Ngai nĩnamaminie.
13Nĩnathĩniw'e mũno weethĩa nĩkilĩlye kũsindwa,
ĩndĩ Mwĩai Ngai nĩwandetheeisye.
14 #
Kuma 15.2; Ĩsa 12.2 Mwĩai Ngai nĩ we vinya wakwa mũnene;
nũtw'ĩkĩte ũtangĩĩo wakwa.
15Wasya mũnene wa ũtanu na wa ũsindi,
nũkwĩw'ĩka maeemanĩ ma andũ ala alũngalu mayasya atĩĩ,
“Mwĩai Ngai nĩwĩkĩte maũndũ manene ũtonyinĩ wake.
16Vinya wake nũtumĩte twĩthĩwa na ũsindi,
Mwĩai Ngai nĩwĩkĩte maũndũ manene ũtonyinĩ wake.”
17Ndikakw'a ĩndĩ ngekala thayũ,
na kũtavany'a maũndũ ala Mwĩai Ngai wĩkĩte.
18Mwĩai Ngai nũnganĩtye mũno,
ĩndĩ ndaaekana nakwa nĩkw'e.
19Mbingũĩe mĩvĩa ya ũlũngalu nĩ kana nĩmĩlikĩle,
na ngĩtũngĩa Mwĩai Ngai mũvea.
20Ũũ nĩw'o mũvĩa wa Mwĩai Ngai;
ala alũngalu makalikĩla vo.
21We Mwĩai Ngai nĩngũũtũngĩa mũvea nũndũ nũnzũũngĩĩte,
na nũtw'ĩkĩte ũtangĩĩo wakwa.
22 #
Lk 20.17; Meko 4.11; 1Vet 2.7 #Mat 21.42; Mk 12.10-11 Ĩvia yĩla aki ma myako maleile,
nĩyĩtw'ĩkĩte ĩvia yĩla ya vata mũno mwakonĩ.
23Mwĩai Ngai nĩ we wĩkĩte ũndũ ũsu,
na w'o nĩ wa kũseng'ya methonĩ maitũ.
24Ũũ nĩw'o mũthenya ũla Mwĩai Ngai ũseũvĩtye;
nĩtũtanei na kwĩw'a mũyo nũndũ waw'o.
25 #
Mat 21.9; Mk 11.9; Yoa 12.13 Ame Mwĩai Ngai nĩtũũkwĩsũva tũtangĩĩe!
Ame Mwĩai Ngai nĩtũũkwĩsũva tũnenge ũsindi!
26 #
Mat 21.9; 23.39; Mk 11.9; Lk 13.35; 19.38; Yoa 12.13 Nĩ mũathime mũndũ ũla wũkaa ĩsyĩtwanĩ ya Mwĩai Ngai;
nĩtũũmũathima inyw'ĩ twĩ Ĩkalũnĩ ya Mwĩai Ngai.
27Mwĩai Ngai nĩ we Ngai,
na nũtũnengete kyeni.
Ambĩĩai mboka mũkwete mbonge,
na mũĩthi mwĩlingĩle kĩthembeo.
28Nue Ngai wakwa na nĩngũũtũngĩa mũvea;
nue Ngai wakwa na nĩngũtavany'a ũnene waku.
29Tũngĩai Mwĩai Ngai mũvea nũndũ nĩ mũseo,
nũndũ wendo wake ũtaolekaa nĩwĩkalaa tene na tene.
Currently Selected:
Sav 118: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
