Sav 102
102
Mboya ya Mũndũ wĩ Thĩnanĩ.
Savulĩ ĩno nĩ mboya ya mũndũ wĩ na mathĩna ayĩw'a e mwonzu. Enengane mavata make kũla kwĩ Mwĩai Ngai.
1Ame Mwĩai Ngai ĩw'a mboya yakwa,
na kĩĩo kyakwa nĩkĩũvikĩe!
2Ndũkambĩvithĩle yĩla nĩ thĩnanĩ!
Tea kũtũ kwaku wĩw'e;
nzũngĩe mĩtũkĩ nakwĩkaĩla!
3Nũndũ mĩthenya yakwa yĩthela ta syũki,
na mavĩndĩ makwa makanĩte ta me ĩikonĩ yĩ mwaki.
4Ngoo yakwa nĩngũnĩku na ĩkavova ta nyeki,
na nĩngũemwa nĩ kũya lĩu wakwa.
5Nũndũ wa wasya wa kũluma kwakwa,
nĩmũmosu ngatiala o kĩkonde na mavĩndĩ.
6Nyie nĩilyĩ ta nyũnyi ya weũnĩ,
ta ndunduuli yĩ kũndũ kwatiiwe.
7Ngomaa nĩsalukĩtye;
nĩilyĩ ta nyũnyi yĩ yoka nyũmba ĩũlũ.
8Amaitha makwa manumangaa mũthenya w'onthe;
ala mambũthasya matũmĩaa ĩsyĩtwa yakwa kũumanĩa.
9Nĩĩsaa mũu ta w'o lĩu wakwa,
na ngĩvulany'a kyaũnyw'a kyakwa na methoi makwa,
10nũndũ wa ũthatu na ũthilĩku waku,
nĩkwĩthĩwa nũmbosete na ũkambĩkya ĩtheka.
11Mĩthenya yakwa ĩilyĩ ta kyuu kya ĩa mawĩoo,
na nĩnũmĩte ta nyeki.
12Ĩndĩ we Mwĩai Ngai nũsumbĩkaa tene na tene;
nzyawa syonthe ikakũlilikanaa.
13Ũkookĩla na ũyĩw'ĩa ndũa ya Saioni tei,
nũndũ ĩvinda ya kũmĩka nesa nĩ ĩviku;
ĩvinda yĩla yĩtw'ĩtwe nĩ ĩviku.
14Athũkũmi maku nĩmamyendete, o na vala nĩ mbanange;
nĩmeũmĩw'ĩa tei, o na vala nĩ mbomboku.
15Andũ ma mbaĩ ingĩ makakĩa Mwĩai Ngai;
asumbĩ onthe ma nthĩ makakĩa ũkumyo wake.
16Nũndũ Mwĩai Ngai akaaka Saioni,
akaumĩla e ũkumyonĩ wake.
17Akeew'a mboya sya athĩni,
na ndakavũthya kwĩsũvana kwoo.
18Andĩkĩa nzyawa ila ikoka maũndũ ala Mwĩai Ngai wĩkĩte,
nĩ kana o na andũ ala matanamba kũsyawa memũtaĩa.
19Mwĩai Ngai nĩwasyaisye nthĩ kuma vandũnĩ vake vatheu ĩũlũ,
nĩwasyaisye nthĩ kuma ĩtunĩ,
20eew'a kĩĩo kya ala ove,
na athasya ala matw'ĩĩwe kũawa.
21Kwoou ĩsyĩtwa ya Mwĩai Ngai yĩkatavanw'a Saioni,
na akataĩwa Yelũsalemu,
22yĩla andũ na mosumbĩ meũmbanĩa vamwe,
na kũthaitha Mwĩai Ngai.
23Mwĩai Ngai nũndw'ĩkĩthĩtye kyonze nĩo wa mũika,
nũkuvĩvĩtye thayũ wakwa.
24Kwoou nĩnaneenie nasya atĩĩ,
“Ame Ngai ndũkambetange yu ndanamba ũkũa.
We Mwĩai Ngai, ũtũaa tene na tene.”
25 #
Aevl 1.10-12
Mwambĩlĩĩlyonĩ nue woombie nthĩ,
na ĩtu o nayo nĩ wĩa wa moko maku.
26Ĩtu na nthĩ ikathela, ĩndĩ we ũkekalaa tene na tene;
syonthe ikakũa ta ngũa,
ũkaikũany'a ta ngũa na ikekw'a ĩtheka.
27Ĩndĩ we ndũalyũkaa,
na we ndũkakw'a o na ĩndĩĩ.
28Syana sitũ ithyĩ athũkũmi maku ikatũaa ũsũvĩonĩ,
nzyawa syasyo ikalũlũmĩĩlw'a mbee waku.
Currently Selected:
Sav 102: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
