Nth 8
8
Kwĩthĩwa na Ũĩ Kũitaĩwa
1 #
Nth 1.20-21
Ĩthukĩĩsyei! Ũĩ nũkwĩtana!
Ũmanyi nũkũkĩlya wasya.
2Nũũngamaa ĩũlũ kũndũnĩ kũtũlu vakuvĩ na nzĩa,
nũũngamaa vala nzĩa ikomanĩe.
3Nĩwĩtanĩaa na wasya mũnene mũvĩanĩ wa ndũa,
nĩwĩtanĩaa na wasya mũnene vala andũ malikĩlaa ũyasya:
4“Inyw'ĩ andũ onthe, nĩngũmwĩta!
Wĩtano wakwa nĩ kwa andũ onthe.
5Inyw'ĩ ala mũte na ũmanyi, ĩmanyĩsyei kwĩthĩwa na ũĩ,
inyw'ĩ andũ atumanu, ĩthĩwai na ngoo yĩ na ũmanyi.
6Ĩthukĩĩsyei, nũndũ nĩngũneena maũndũ ma vata,
nĩngũneena maũndũ ala maw'o.
7Nĩkwĩthĩwa nĩneenaa ũw'o,
na nĩnĩmenete kũneena ndeto nthũku.
8Ndeto syonthe ila nĩneenaa nĩ ndũngalu,
vai ũndũ mũthyoeku kana ũte wa w'o nthĩnĩ wasyo.
9Syonthe nimanyĩkaa nĩ ũla wĩ na ũmanyi,
syonthe nĩ syaw'o kwa ala me na ũĩ.
10Nyuva motao makwa vandũ va silĩva,
na ũĩ vandũ va thaavu ũla mũseo mũno.
11Nĩkwĩthĩwa ũĩ nĩ mũseo mbee wa mavia me thooa mũnene,
na kyonthe kĩla ũtonya kwendeew'a nĩkyo kĩyĩananw'a na ũĩ.
12Nyie ũĩ, nĩkalanasya na ũmanyi,
nĩ na kĩlĩko vamwe na ũmanyi wa kũsila nesa.
13Kũmũkĩa Mwĩai Ngai nĩ kũmena ũthũku,
nĩnĩmenete ngathĩĩo, kwĩnenevya,
mĩendele mĩthũku na ndeto sya ngũlũ.
14Nĩna ũtonyi wa kũtaa na nĩ na ũĩ mwĩanĩu,
nĩ na ũmanyi na nĩ na ũtonyi.
15Nĩnĩtetheeasya asumbĩ kũsumbĩka,
na ngĩtetheesya atongoi kũtw'a sila wa katĩ.
16Kwa ũtonyi wakwa atongoi nĩmasumbĩkaa,
na andũ me ndaĩa nĩmatongoeasya nthĩ.
17Nĩnĩmendaa ala mambendaa,
na ala mamanthaa na kĩthĩng'ĩĩsyo nĩmambonaa.
18Ũthwii na ndaĩa nĩ syakwa,
ĩĩ, ũthwii ũla wĩkalaa na kũendeea nesa nĩ syakwa.
19Matunda makwa nĩ maseo kwĩ thaavu ũla mũseo vyũ,
na ũsyao wakwa nĩ mũseo kwĩ silĩva ũla mũseo.
20Nĩsĩlaa nzĩanĩ ya ũlũngalu,
na nĩatĩĩaa nzĩa sya ũsili wa katĩ.
21Nĩnĩnengae ala mambendete ũthwii,
na nĩnusũasya kũndũ kwoo kwa kwia ũthwii.
22 #
Ũvu 3.14
“Mwĩai Ngai nĩwambũmbie mwambĩlĩĩlyonĩ wa wĩa wake,
ũmwe wa mawĩa make ma tene.
23Nĩnoombiwe ĩvindanĩ ya tene mũno,
mwambĩlĩĩlyonĩ nthĩ ĩtanamba kwĩthĩwa.
24Nasyaiwe yĩla kũtaĩ ũkanga o na ũmwe,
yĩla kũtaĩ nthongo syĩ kĩw'ũ kingĩ.
25Nasyaiwe iĩma itanamba kũmbwa,
na tũlĩma tũtanamba kwĩthĩwa.
26Ĩvindanĩ yĩu Ngai ndaĩ anamba kũmba nthĩ kana mĩũnda,
kana mwambĩlĩĩlyo wa kĩtoo kya nthĩ.
27Naĩ vo yĩla Ngai waiie matu vala maĩ,
yĩla weekĩie vala ĩtu na ũkanga ikomanĩe,#8.27 vala ĩtu na ũkanga ikomanĩe: Nĩ vala andũ monaa ĩtu na nthĩ iilyĩ ta itinanĩte.
28yĩla walũlũmĩĩlye matu ĩũlũ yayayanĩ,
na atw'ĩkĩthya ithima ila syusũasya ũkanga.
29Naĩ vo yĩla Mwĩai Ngai weekĩie mĩvaka ya ũkanga,
nĩ kana kĩw'ũ kĩikalee kwĩanĩsya mwĩao wake,
yĩla weekĩie myambĩlĩĩlyo ya nthĩ.
30Naĩ vakuvĩ na Mwĩai Ngai,
ngĩmũtetheesya kũvanga na kwaka.
Nĩnatumaa ethĩwa na ũtanu kĩla mũthenya,
na nĩ vakuvĩ nake nĩneethĩawa na ũtanu.
31Nĩnendeeiw'e nĩ nthĩ yake,
na nendeew'a nĩ andũ mayo.
32“Yu ĩndĩ ana makwa, mbĩthukĩĩsyei;
nĩ atanu ala maatĩĩaa nzĩa syakwa.
33Ĩthukĩĩsyei momanyĩsyo makwa na nĩmũkwĩthĩwa mwĩ oĩ,
mũikamalee.
34Nĩ mũtanu mũndũ ũla ũmbĩw'aa,
ũla wĩkalaa kĩla mũthenya eteelete mũvĩanĩ wa mũsyĩ wakwa;
ũla wĩkalaa eteelete mĩomonĩ ya nyũmba yakwa.
35Ũla ũmbonaa onaa thayũ,
na Mwĩai Ngai nũmwĩkaa nesa.
36Ĩndĩ ũla ũtambonaa eyũnũvaa we mwene,
na onthe ala mamenaa mendaa kĩkw'ũ.”
Currently Selected:
Nth 8: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
