Nth 30
30
Ndeto sya Akuli
1Ii nĩ ndeto sya ũtao sya Akuli mwana wa Yake.
Mũndũ ũũ nĩwaneenie na Ithieli,
ĩĩ, Ithieli na Ukali amea atĩĩ:
2“Kwa w'o, nyie nĩ mũtumanu mbee wa andũ onthe,
nyie ndi na ũmanyi wa mũndũ.
3Ndyaaĩmanyĩsya ũĩ,
o na ndi na ũmanyi wa Ũla Mũtheu.
4Nũũ ũla wambatie ĩtunĩ na atheea?
Nũũ ũla wakumbatĩlye kĩseve mokonĩ make?
Nũũ ũla walingile kĩw'ũ na ngũa?
Nũũ ũla weekĩie mĩvaka yonthe ya kũla nthĩ ĩthelele?
Etawa ata? Mwana wake etawa ata?
Ethĩwa nĩwĩsĩ ndavye.
5“Ngai nĩwĩanĩasya maũndũ onthe ala waneena;
nĩ ngao ya ala mevithaa vala ũĩ.
6Ndũkongele kĩndũ ndetonĩ syake,
ndakese ũkũkany'a na ũyoneka wĩ mũkengani.
7Ame Mwĩai Ngai, nĩkũvoya maũndũ aa elĩ,
ndũkambate mo ndanamba kũkw'a:
8Nziĩĩe ndikaneene ũvũngũ kana kũkengana;
ndũkanenge ũthwii kana ũkya;
nenga lĩu ũla ũmbĩanĩe,
9ndikese kũvũna na ngĩũkaĩa,
na kwasya, ‘Mwĩai Ngai nũũ?’
Kana nĩse kũtw'ĩka ngya nũye,
na kwa nzĩa ĩsu ngĩvũthya ĩsyĩtwa ya Ngai wakwa.
10“Ndũkasuke mũthũkũmi vala ve mũnene wake,
mũthũkũmi ũsu ndakese ũkũumanĩa na ũiĩvĩa nũndũ wa ũu.
11“Ve andũ maumanĩaa aaĩthe,
na maiathimaa aainyia.
12Ve andũ monaa me atheu,
ĩndĩ mayaathew'a kuma kĩkonĩ kyoo.
13Ve andũ angĩ me mĩtũlyo mingĩ,
mavũthasya kĩndũ o na kĩva kĩla moona.
14Ve andũ angĩ maeo moo mailyĩ mbyũ,
na ngambu syoo ta syĩ na tũvyũ,
nĩ kana matanyuke ngya syume kũũ nthĩ,
athĩni maume katĩ wa andũ.
15Nthambaa yĩ eĩtu elĩ,
ala makayaa mayasya, ‘Nenge, nenge.’
16“Ve syĩndũ itatũ itesaa kwĩanĩwa,
ĩĩ, syĩndũ inya itesaa kwasya nĩneany'a:
Vala maveva ma ala akw'ũ mekalaa,
ĩvu ya mũndũ mũka ngũngũ,
nthĩ ĩtakolaa kĩw'ũ,
na mwaki ũtesaa kwasya, ‘Nũu.’
17Itho ya mũndũ ũla ũvũthasya ĩthe wake,
na kũvũthĩĩsya kwĩw'a inyia wake,
yĩkathong'olw'a nĩ ngũngũũ sya mwandanĩ,
na kũĩwa nĩ ndei.
18Ve maũndũ atatũ manzeng'asya,
ĩĩ, maũndũ ana ndamamanyaa:
19Ũndũ ndiũ ĩũlũkaa yayayanĩ,
ũndũ nzoka ĩendaa ĩvianĩ,
ũndũ meli ĩendaa ũkanganĩ,
na ũndũ mũndũ-ũme wendanaa na mwĩĩtu.
20“Ũũ nĩw'o mũndũ mũka kĩlaalai ũilyĩ:
Aĩsaa na ayĩvangũla mũnuka na ayasya, ‘Ndi ĩvĩtyo nĩneeka!’
21“Ve maũndũ atatũ matumaa nthĩ ĩtetema,
ĩĩ, maũndũ ana matumaa ĩtomĩĩsya:
22Ngombo yatw'ĩka mũsumbĩ,
ndia yavũna lĩu,
23mũndũ mũka ũmenetwe atwawa,
na mwĩĩtu mũthũkũmi oosa mũũme wa kĩveti kĩla kĩmũandĩkĩte.
24“Ĩũlũ wa nthĩ ve syũmbe inya nini,
ĩndĩ syĩ ũĩ mwingĩ:
25Nditikũ nĩ syũmbe ite vinya,
ĩndĩ nĩsyũmbanasya lĩu wasyo ĩvindanĩ ya syũa.
26Inyowe nĩ syũmbe ite vinya,
ĩndĩ niseũvasya nyũmba syasyo mavianĩ.
27Ngie iyĩthĩawa na mũsumbĩ,
ĩndĩ iendanasya syũmbanĩte nguthu.
28Ĩng'ala noyĩkwatwe na moko,
ĩndĩ nĩyĩkalaa nyũmbanĩ sya asumbĩ.
29“Ve syĩndũ itatũ syendeeasya mũkinyĩlenĩ wasyo,
ĩĩ, syĩndũ inya ila itambasya nesa:
30Mũnyambũ, ũla nĩ nyamũ yĩ vinya kwĩ ila ingĩ,
na ndũkĩaa nyamũ o na yĩva;
31nzamba yĩ nzasũ, nthenge,
na mũsumbĩ atambĩtye e mbee wa asikalĩ make.
32“Ethĩwa wĩthĩĩtwe wĩ mũtumanu na ũkekathĩĩa we mwene,
kana ethĩwa wĩthĩĩtwe ũivanga kwĩka ũndũ mũthũku,
kunĩka kanyw'a waku na kw'oko kwaku.
33Nũndũ o ũndũ kũthuka ĩia kũetae mauta,
na kũmila ĩnyiũũ kumasya nthakame,
now'o kũtuma andũ mathata kũetae ĩteta.”
Currently Selected:
Nth 30: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
