Nth 28
28
1Ala athũku makĩaa o na vate mũndũ ũmaatĩĩe,
ĩndĩ ala alũngalu me ũkũmbaũ ta mũnyambũ.
2Nthĩ yĩ ithokoo yĩthĩawa na asumbĩ aingĩ,
ĩndĩ atongoi me na ũmanyi na ũĩ matumaa ĩendeea nesa.
3Mũtongoi#28.3 Mũtongoi: Kana mũndũ ngya. ũla ũthĩnasya ngya,
ailyĩ mbua nthũku ĩla yanangaa lĩu.
4Andũ ala matũlaa mĩao makathĩĩaa ala athũku,
ĩndĩ ala maatĩĩaa mĩao nĩmaleanaa na ala athũku.
5Andũ athũku mayĩsĩ sila wa katĩ nĩ kyaũ,
ĩndĩ ala maatĩĩaa Mwĩai Ngai nĩmawĩsĩ nesa.
6Nĩ kavaa ngya ĩla ĩtatũlwa mũtĩ,
kũte mũthwii ũla wĩ mwĩkalĩle mũthũku.
7Ũla ũkwataa mĩao nĩ mwana wĩ kĩlĩko,
ĩndĩ ũla ũtindanasya na ala mendete kũya lĩu ekĩĩthasya ĩthe wake nthoni.
8Mũndũ ũla ũtw'ĩkaa mũthwii nũndũ wa kwongela thooa wa syĩndũ ila ũkũthoosya,
ombanĩasya ũthwii ũsu mũndũ ũngĩ ũla wĩw'ĩaa ngya tei.
9Ũla ũleaa kũkwata mĩao,
o na mboya yake nĩthatasya Ngai.
10Mũndũ ũla ũtongoeasya ala alũngalu malike naĩnĩ,
akakwatw'a nĩ mũteo wake mwene,
ĩndĩ ala matatũlwa mũtĩ,
makeethĩwa na ũtiĩwa mũseo.
11Mũthwii onaa e mũĩ,
ĩndĩ ngya yĩna mosũanĩo maseo nĩmwĩsĩ nesa mbeange.
12Yĩla ũla mũlũngalu wakwata ũnene, andũ matanaa mũno,
ĩndĩ mũndũ mũthũku asumbĩka, andũ mekalaa mevithĩte.
13Ũla ũvithaa mavĩtyo make ndakaendeea nesa,
ĩndĩ ũla ũmaumbũlaa na kũekana namo akeew'ĩwa tei.
14Mũndũ ũla wĩ kĩkĩo kya Mwĩai Ngai nĩ mũathime,
ĩndĩ ũla wũmasya ngoo yake alikaa thĩnanĩ mũnene.
15Mũndũ mũthũku asumbĩkĩte ngya,
ailyĩ mũnyambũ ũũluluma,
kana nyamũ mbai yĩtawa nduva ĩkũsyĩma.
16Mũtongoi ũte na ũmanyi athĩnasya andũ ate na tei,
ĩndĩ ũla ũmenete syĩndũ syosetwe na nzĩa ĩte nzeo akekala thayũ ĩvinda ĩasa.
17Mũndũ ũkũthĩna nũndũ nĩwũaĩte ũngĩ,
aekanwe nake athĩne nginya kũkw'a,
ndakatetheew'e nĩ mũndũ.
18Mũndũ ũla mũlũngalu akasũvĩwa,
ĩndĩ ũla wĩ na ngũlũ mĩendelenĩ yake akavalũka mĩtũkĩ.
19Ũla ũĩmaa mũũnda wake akeethĩwa na lĩu mwingĩ,
ĩndĩ ũla ũatĩĩaa maũndũ matauna akeethĩwa na ũkya mwingĩ.
20Mũndũ mũĩkĩĩku akakwata ũathimo mwingĩ,
ĩndĩ ũla wĩ na wendi wa kũkwata ũthwii mĩtũkĩ ndakalea kũkanw'a.
21Ti ũseo kwĩthĩwa na wendeesyo,
ĩndĩ mũndũ no avĩtye nĩ kana anengwe kĩlungu kya mũkate.
22Mũndũ ũte mũlau endaa kũthua mĩtũkĩ,
na ndesĩ kana eteelwe nĩ ũkya.
23Mũndũ ũla ũkanasya mũnyanyae ĩtina akoona ũseo,
kwĩ mũndũ ũla wĩyendeeasya vala ve ũngĩ na ndeto.
24Ũla wũyĩaa ĩthe kana nyinyia na ayasya ti ĩvĩtyo,
nde kĩvathũkany'o na kĩng'ei.
25Mũndũ wĩ ĩtomo nĩwũkĩlasya ĩteta,
ĩndĩ ũla wĩkwatasya Mwĩai Ngai akaendeea nesa.
26Ũla wĩyĩĩkĩĩaa mwene nĩ ndia,
ĩndĩ ũla wĩkalaa na ũĩ akeethĩwa ũsũvĩonĩ.
27Ũla ũtetheeasya ngya ndakaĩwa nĩ kĩndũ,
ĩndĩ ũla ũleaa kũsisya ngya akaumanĩwa nĩ andũ aingĩ.
28Andũ athũku masumbĩka, andũ nĩmevithaa,
ĩndĩ mavetangwa, ala alũngalu nĩmaingĩvaa.
Currently Selected:
Nth 28: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
