Nee 9
9
Andũ ma Ĩsilaeli Mayumbũla Naĩ syoo
1Mũthenyanĩ wa mĩongo ĩlĩ na inya wa mwei ũsu wa mũonza, andũ ma Ĩsilaeli nĩmoombanie vamwe. Nĩmatĩĩte kũya monany'e kana maĩ na kĩmako nũndũ wa naĩ syoo. Nĩmeekĩĩte ngũa ngaamu sya makunia na makeyũmba kĩtoo mũtwe monany'e kana me na kyeva. 2Andũ onthe ma Ĩsilaeli nĩmeevathanĩte na aeni onthe. Nĩmaũngamie na maumbũla naĩ syoo, na mothũku ma aaũmae moo. 3Nĩmasomeiwe Mĩao ya Ngai vandũ va ĩvinda ya ta masaa atatũ, na masaa ala angĩ atatũ maatĩĩe maumbũla naĩ syoo, na mathaitha Mwĩai Ngai, Ngai woo.
4Kĩtaanĩ kĩla kyaĩ kya Alivai vaungyĩ Yesua, Mbani, Katimieli, Sevania, Mbuni, Selevia, Mbani na Kenani. Nĩmavoyie Mwĩai Ngai, Ngai woo na wasya mũnene.
5Alivai aa: Yesua, Katimieli, Mbani, Asavineia, Selevia, Otia, Sevania na Vethaia nĩmeetie andũ mathaithe. Nĩmaneenie masya atĩĩ,
“Ũkĩlai mũtaĩe Mwĩai Ngai, Ngai wenyu;
ũla ũtũaa tene na tene!
Taĩai ĩsyĩtwa yake ĩtheu,
yĩla nĩ ĩnene kwĩ ũathimo na ũkumyo w'onthe.”
Mboya ya Kumbũla
6Nĩvo ĩndĩ andũ ma Ĩsilaeli mavoyie mboya ĩno:
“We Mwĩai Ngai, nue weka Mwĩai Ngai.
Nue woombie ĩtu na ndata sya ĩtunĩ.
Nĩwoombie nthĩ, ũkanga, na syĩndũ syonthe,
ila syĩ kũndũnĩ kũu.
Nue wanengie syĩndũ syonthe thayũ.
Syĩndũ syonthe ila syĩ ĩtunĩ nikũthaithaa.
7 #
Mwa 11.31; 12.1; 17.5 We Mwĩai Ngai, nue wanyuvie Avalamu,
na wamũtongoesya kuma Ulu ĩla yĩ Mbavilonĩ;
nĩwaalyũlile ĩsyĩtwa yake wamwĩta Avalaamu.
8 #
Mwa 15.18-21
Nĩweethĩie e mũĩkĩĩku kũla ũĩ,
na waseũvya ũtianĩo nake,
wa kũnenga nzyawa syake nthĩ ya Akanaani, Aititi, Aamoli, Avelisi, Ayevusi, na ya Angilikasi.
Nĩwĩanĩsye watho waku, nĩkwĩthĩwa wĩ mũĩkĩĩku.
9 #
Kuma 3.7; 14.10-12 “Nĩwoonie ũndũ aaũmae maitũ mathĩnĩie nthĩ ya Misili;
nĩweewie kĩĩo kyoo yĩla maĩ Ũkanganĩ Mũtune.
10 #
Kuma 7.8—12.32
Nĩweekie syama na maũndũ ma kũseng'ya,
kũla kwĩ mũsumbĩ wa Misili, anini make, na andũ onthe ma nthĩ yake.
Nĩweesĩ ũndũ andũ ma nthĩ ĩsu mathĩnisye andũ maku.
Nĩwatumie ĩsyĩtwa yaku yĩthĩwa na ndaĩa kũvika ũmũnthĩ.
11 #
Kuma 14.21-29; 15.4-5 Nĩwaanisye ũkanga ũla waĩ mbee wa andũ maku,
nĩ kana mesĩle nthĩnĩ makinyĩle nthĩ nyũmũ;
ĩndĩ nĩwalikilye ala mamaatĩĩe kĩw'ũnĩ kĩliku,
ũndũ ĩvia yĩlikaa kĩw'ũnĩ kĩliku.
12 #
Kuma 13.21-22
Nĩwamatongoeasya mũthenya na kĩtuĩ kya mũumbĩ,
na ũtukũ ũimatongoesya na kĩtuĩ kya mwaki,
nĩ kana ũmanenge kyeni kya kũmamulĩkĩla me nzĩanĩ maendete.
13 #
Kuma 19.18—23.33
Nĩwatheeie Kĩĩmanĩ kya Sinaĩ kuma ĩtunĩ,
na waneena na andũ maku.
Nĩwamanengie myamũlo, mĩao yaw'o, na motw'ĩo maseo na mĩao.
14Nĩwamamanyĩisye kwĩkalya mũthenya wa Savato wĩ mũtheu,
na wamanenga myamũlo, motw'ĩo, na mĩao kwĩsĩla kwa mũthũkũmi waku Mwose.
15 #
Kuma 16.4-15; 17.1-7; Kũt 1.21 “Yĩla maĩ na nzaa, nĩwamanengie lĩu kuma ĩtunĩ;
yĩla maĩ na waũni, nĩwamanengie kĩw'ũ kuma ĩvianĩ.
Nĩwameie nĩmathi makose nthĩ ĩla wathanie kana ũkamanenga.
16 #
Mot 14.1-4; Kũt 1.26-33 Ĩndĩ aaũmae maitũ nĩmeethĩiwe na ngathĩĩo na moomya ngoo,
na malea kwĩanĩsya mĩao yaku.
17 #
Kuma 34.6; Mot 14.18 Nĩmaleile kwĩw'a,
na weethĩa maililikana syama ila weekie katĩ woo.
Nĩmoomisye ngoo, na nũndũ wa ũng'endu woo,
manyuva mũtongoi amatũnge ũkombonĩ nthĩ ya Misili.
Ĩndĩ wĩ Ngai ũekeaa, mũseo na wĩ tei.
Ndũthataa mĩtũkĩ, na wĩ wendo mwingĩ ũtaolekaa.
Kwoou ndwaamatia.
18 #
Kuma 32.1-4
O na yĩla meeseũvĩisye ngai ya mũvw'anano ya kasaũ na masya,
‘Ĩno nĩyo ngai yenyu ĩla yamumisye nthĩ ya Misili:’
na maneena ndeto nthũku sya ũkũuma, ndwaamatia.
19 #
Kũt 8.2-4
Ndwaamatia me weũnĩ,
nĩkwĩthĩwa we wĩ tei mwingĩ.
Kĩtuĩ kya mũumbĩ kĩla kyamatongoeasya me nzĩanĩ mũthenya kĩyaaĩveta,
na kĩtuĩ kya mwaki kĩla kyamatongoeasya ũtukũ kĩyaaĩveta.
20Nĩwamatavasya ũndũ maĩlĩte kwĩka,
nĩkwĩthĩwa we wĩ mũseo;
nĩwamanengie mana maya,
na wamanenga kĩw'ũ manyw'a.
21Myaka mĩongo ĩna yĩla maĩ weũnĩ,
nĩwamasũvĩie na vai kĩndũ kyaamaĩa;
ngũa syoo iyaatw'ĩka na mayaaimba maũũ.
22 #
Mot 21.21-35
“Nĩwamanengie ũtonyi wa kũsinda nthĩ, na mosumbĩ,
na wamanenga nthĩ sya andũ asu.
Kwoou nĩmoosie nthĩ ya Esivoni, vala Sioni wasumbĩkĩte,
na nthĩ ya Mbasani vala Oku wasumbĩkĩte.
23 #
Mwa 15.5; 22.17; Yos 3.14-17 Nĩwamanengie syana mbingĩ ta ndata sya ĩtunĩ,
na watuma masinda, na kũtũa nthĩ ĩla wathĩte aaũmae moo kana ũkamanenga.
24 #
Yos 11.23
Ana moo nĩmaendie malika na mamesya nthĩ ĩsu;
nĩwavetangie Akanaani mbee woo, ala matwĩe nthĩ ĩsu.
Nĩwanenganie Akanaani, vamwe na asumbĩ moo,
na andũ ma nthĩ ĩsu mokonĩ moo,
nĩ kana mameke ũndũ mekwenda.
25 #
Kũt 6.10-11
Andũ maku nĩmakwatie ndũa mbiĩĩe,
nthĩ nou, nyũmba syusĩe ũthwii,
ithima mbĩnze, mĩthata, mĩtunda,
na mĩũnda ya mĩsavivũ.
Nĩmaĩte syĩndũ syonthe ila mendaa makanoa;
nĩmatanĩie syĩndũ syonthe nzeo ila wamanengie.
26 #
Asi 2.11-16
“Ĩndĩ andũ maku nĩmakũng'endeie na malea ũkwĩw'a;
nĩmaleile kwĩanĩsya mĩao yaku.
Nĩmooaie athani ala watũmĩte makamakany'e,
ala mameie nĩmakũsyokee.
Andũ maku nĩmakothaa ũkũumanga.
27Kwoou nĩwatumie amaitha moo mamasinda na kũmasumbĩka.
Ĩndĩ yĩla mathĩniw'e nĩ amaitha, nĩmakwĩkaĩlile.
Nĩwamasũngĩie kuma ĩtunĩ.
Nũndũ wa tei waku mwingĩ nĩwatũmie atongoi,
ala mamatangĩĩie kuma kwa amaitha moo.
28Ĩndĩ mamina kwĩthĩwa na mũuo oou, nĩmeekie naĩ ĩngĩ.
Nĩvo ĩndĩ watumie amaitha moo mamasumbĩka.
O na mekĩte ũu yĩla makwĩkaĩlile ĩngĩ wĩ ĩtunĩ nĩwamewie,
na nũndũ wa tei waku nĩwamatangĩĩaa mavinda maingĩ.
29 #
Ali 18.5
Nĩwamakanisye maatĩĩe momanyĩsyo maku,
ĩndĩ nũndũ wa ngathĩĩo syoo nĩmaleanile na mĩao yaku,
o na kau mũndũ ekalaa thayũ eanĩsya mĩao ĩsu.
Nĩmoomisye ngoo, na malea ũkwĩthukĩĩsya;
nĩmeethĩiwe na ngũlũ, na malea kwĩw'a.
30 #
2Asu 17.13-18; 2Mav 36.15-16 Nĩwoomĩĩisye myaka mingĩ ũimakany'a,
na Veva waku nĩwamakanisye kwĩsĩla ndetonĩ sya athani,
ĩndĩ andũ maku mayaaĩw'a.
Kwoou nĩwatumie masindwa,
nĩ andũ ma nthĩ ila syamathyũlũlũkĩte.
31Ĩndĩ nũndũ wĩ tei mwingĩ,
ndwaamatia kana ũkamamina,
nĩkwĩthĩwa wĩ Ngai mũseo na wĩ tei.
32 #
2Asu 15.19,29; 17.3-6; Esa 4.2,10 Ame Ngai, Ngai waitũ, wĩ mũnene mũno!
Wĩ wa kũkĩwa, na wĩ ũtonyi!
Wĩ mũĩkĩĩku kwĩanĩsya mawatho na ũtianĩo waku.
Kuma ĩvinda yĩla asumbĩ ma Asuli matũthĩnasya,
o na kũvika yu, nĩtũthĩnĩte mũno!
Asumbĩ maitũ, atongoi, athembi, athani,
aaũmae maitũ, na andũ onthe maitũ nĩmathĩnaa.
Lilikana thĩna ũla twĩthĩĩtwe naw'o.
33Wĩkĩte ũla waĩlu kũtũkany'a;
wĩthĩĩtwe wĩ mũĩkĩĩku, o na kau nĩtũvĩtĩtye.
34Asumbĩ maitũ, atongoi, athembi na aaũmae maitũ,
mayaaĩanĩsya mĩao yaku.
Mayaaĩka ũndũ mĩao na mokany'o ala wamanengete maĩtye.
35O na yĩla maĩ ũsumbĩnĩ woo,
maendee kũtanĩa maũndũ maseo ala wamekĩte me nthĩ nene na nou ĩla wamanengie,
mayaakũthũkũma, kana kũeka kwĩka maũndũ mathũku.
36Yu ũmũnthĩ twĩ ngombo,
nthĩ ĩla wanengie aaũmae maitũ, nĩ kana maĩsae matunda mayo,
na syĩndũ ingĩ nzeo ila syumaa vo.
37Nũndũ wa naĩ sitũ,
ngetha mbingĩ ĩla yumaa vo ĩtũmĩawa nĩ asumbĩ ala ũekete matũsumbĩke;
mekanaa naitũ na indo sitũ ũndũ mekwenda,
na twĩ thĩnanĩ mũnene vyũ!”
Andũ ma Ĩsilaeli Maitianĩa Kũatĩĩa Mĩao
38Nũndũ wa maũndũ asu onthe, nĩtũũseũvya ũtianĩo mũlũmu na tũiũandĩka, na anene maitũ, Alivai, na athembi maiũtumba mũulĩ.
Currently Selected:
Nee 9: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
