Mk 7

Momanyĩsyo ĩũlũ wa Syĩndũ Ntheu na ila Mbuku

(Mat 15.1-9)

1Avalisi amwe na amanyĩsya ma Mĩao nĩmaumie Yelũsalemu na mooka kũmbanĩa vala ve Yesũ. 2Nĩmoonie amanyĩw'a amwe ma Yesũ maĩya lĩu na moko mate matheu, namo nĩ moko mate mathambye. 3(Avalisi na Ayuti onthe maiĩsaa lĩu matathambĩte moko kwĩanana na mokũũ ma aaũmae moo. 4Yĩla mauma ndũnyũ, maiĩsaa kĩndũ o na kĩmwe matathambĩte makethesya. Na ve mokũũ angĩ maingĩ maatĩĩaa ta kũthesya ikombe, mbisũ na mĩio ĩngĩ yĩ vata.#7.4 Maandĩko amwe ma tene ma Ndeto ya Ngai nĩmongelete na itanda)

5Nĩvo ĩndĩ Avalisi na amanyĩsya ma Mĩao makũlilye Yesũ atĩĩ, “Nĩkĩ amanyĩw'a maku mataatĩĩaa mokũũ ma aaũmae maitũ? Mbona maĩsaa matathambĩte moko?” 6#Ĩsa 29.13 Yesũ amasũngĩa amea atĩĩ, “Mwathani Ĩsaia athanie w'o na ndeto sya Ngai ĩũlũ wenyu, inyw'ĩ andũ ma mĩseũvyo ayasya:

‘Andũ aa mandaĩaa o vaa ilomonĩ,

ĩndĩ ngoo syoo syĩ vaasa nakwa.

7Vai vata woo kũnthaitha,

nũndũ mamanyĩasya mĩao ĩseũvĩtw'e nĩ andũ ta yo mĩao yakwa!’

8“Mũtiĩte Mĩao ya Ngai nĩ kana mũatĩĩe mokũũ ma andũ.”

9Yesũ nĩwaendeeie kũneena namo amea atĩĩ, “Mwĩona mwĩkĩte nesa mũno, kũlea Mĩao ya Ngai nĩ kana mũatĩĩae mokũũ menyu! 10#Kuma 20.12; 21.17; Ali 20.9; Kũt 5.16 Mĩaonĩ Mwose aĩtye, ‘Nenga ĩthe waku na inyia waku ndaĩa,’ na o ta ũu, ‘Ũla wĩuma ĩthe kana nyinyia, nĩoawe.’ 11Ĩndĩ inyw'ĩ mũmanyĩasya kana ethĩwa mũndũ akeea ĩthe kana nyinyia, ‘Kĩla wĩĩ ũkwata kuma vala nĩĩ nĩ Kolivani,’ (ũalyũlo wayo nĩ, nĩkĩnengetwe Ngai), 12inyw'ĩ mwĩthĩawa mũtamwĩtĩkĩlya ĩngĩ atethye ĩthe kana nyinyia. 13Kwoou mũtusaa ndeto ya Ngai kwĩthĩwa ya mana kwĩsĩla mokũũnĩ ala mũmanyĩasya. Ve maũndũ maingĩ mathũkĩte o ta asu ala mwĩkaa.”

Maũndũ ala Mavukasya Mũndũ

(Mat 15.10-20)

14Nĩvo ĩndĩ Yesũ wametie andũ ĩngĩ mooka vala ũĩ na amea atĩĩ, “Inyw'onthe mbĩthukĩĩsyei nesa na mũitata kũelewa nĩ kĩla ngũneena. 15Vai kĩndũ mũndũ ũĩsaa kĩkamũvukya, ĩndĩ no kĩla kyumaa ngoonĩ yake kĩmũvukasya. [ 16Ũla wĩ kũtũ, nĩew'e.”]#7.16 Mũsoa ũũ nũtiĩtwe maandĩkonĩ amwe ma tene ma Ndeto ya Ngai

17Ĩtina wa Yesũ na amanyĩw'a make kuma vau andũnĩ na kũlika nyũmba, amanyĩw'a make nĩmamũkũlilye amaelesye ngelekany'o ĩsu. 18Nake amakũlya atĩĩ, “Nũndũ o nenyu mũtanaelewa nĩ kĩla ngũwetaa? Manyai kana lĩu ũla mũndũ ũĩsaa ndũtonya kũmũvukya, 19nũndũ ndũendaa ngoonĩ yake, ĩndĩ ũendaa ĩvunĩ na ĩtina ũyuma.” (Aneenie ũu kwonany'a kana malĩu onthe nĩmaĩlĩte kũĩwa.)

20Yesũ nĩwaendeeie na kũmea atĩĩ, “Kĩla kyumaa ngoonĩ ya mũndũ nĩkyo kĩmũvukasya. 21Nũndũ ngoonĩ ya mũndũ nĩvo vaumaa mosũanĩo mathũku ma kũmanyana kĩ-mwĩĩ kwa andũ matatwaanĩte, ũng'ei, wũaani, ũlaalai, 22kwĩw'ĩa syĩndũ syeene ĩtomo, mothũku, ũkengani, mĩmeo mĩthũku, kwĩw'ĩa andũ ala angĩ kĩwĩu, nzukũ, ngathĩĩo na ũtumanu. 23Maũndũ aa onthe mathũku maumaa ngoonĩ ya mũndũ, na nĩmo mamũvukasya.”

Kĩveti Kyoonanisye Mũĩkĩĩo Mũnene

(Mat 15.21-28)

24Yesũ nĩwaumie vau athi kĩsionĩ kĩla kĩ vakuvĩ na ndũa sya Tile na Sitoni.#7.24 Maandĩko amwe ma Ndeto ya Ngai nĩmatiĩte Sitoni Nĩwekalile kũu vandũ nyũmba na ndendaa andũ mamanye kana e vo, ĩndĩ ndaatonya kũsiĩĩa andũ maikamanye. 25Kĩveti kĩmwe kelĩtu kakyo kalikĩtwe nĩ ĩimũ nĩkyeewie kana Yesũ e kũu na kyathi mĩtũkĩ kyatulya ndu mbee wake. 26Kĩveti kĩu kyaĩ Kĩmũkiliki na kyasyaĩtwe kĩsionĩ kĩtawa Voenisia nthĩ ya Silia. Nĩkyamwĩsũvie Yesũ mũno nĩ kana alũngye ĩimũ yĩu yume kelĩtunĩ kakyo. 27Ĩndĩ Yesũ akĩsũngĩa, “Eka syana syambe kũya ivũne, nũndũ ti ũseo mũndũ kwosa lĩu wa syana na ayĩkĩsya ngitĩ.” 28Nakyo kyamwĩa atĩĩ, “Ĩĩ, ũu now'o Mwĩai, ĩndĩ o nasyo ngitĩ no iĩsaa matialyo ma lĩu ũla ũĩsawa nĩ syana!” 29Yesũ akĩtavya akĩa atĩĩ, “Kwondũ wa ndeto isu waneena, no wĩnũke yu; ĩimũ yĩu nĩyauma kelĩtunĩ kaku.” 30Mũndũ mũka ũsu nĩwenũkie, na eethĩa kana kakomete kĩtandanĩ, ĩimũ yumie.

Yesũ Aivosya Mũndũ Ũtaneenaa na Ũteew'aa Nthĩ

31Yesũ nĩwaumie kĩsionĩ kĩu kĩ vakuvĩ na ndũa ya Tile, esĩla Sitoni na atheelela kĩsionĩ kĩtawa Ndekavolisi athi Ĩianĩ ya Kalilii. 32Andũ amwe nĩmamũeteie mũndũ ũtaneenaa na ũtew'aa nthĩ, na mamwĩsũva Yesũ amwilĩĩle moko. 33Yesũ nĩwaumisye mũndũ ũsu andũnĩ, na amũtwaa vandũ ũtee me elĩ, na eekĩa syaa syake matũnĩ ma mũndũ ũsu. Nĩwatw'ĩlile mata kyaanĩ kyake na amũkiita ũĩmĩ. 34Yesũ asyaĩtye ĩũlũ ĩtunĩ, nĩwavevũũkie mũno na eea mũndũ ũsu atĩĩ, “Evavatha,” nayo nĩ kwasya, “Vingũka.”

35Vau kwa vau, matũ make nĩmambĩĩie kwĩw'a, na kĩla kyoovete ũĩmĩ wake kyathalĩka, ambĩĩa kũneena nesa. 36Yesũ nĩweeaĩie andũ maikatavye mũndũ o na ũmwe, ĩndĩ o ũndũ waendeeie kũmeaĩa maikatavany'e, now'o namo mongeleeile kũtavany'a ũvoo ũsu. 37Andũ asu nĩmaseng'ie mũno vyũ na masya atĩĩ, “Maũndũ ala wĩkĩte onthe kote maseo; o na nũtumaa andũ matew'aa nthĩ mew'a, na mataaneena maneena!”

Currently Selected:

Mk 7: KAMBA

Highlight

Copy

Compare