Mat 6
6
Ũmanyĩsyo ĩũlũ wa Kũnengane Motethyo
1 #
Mat 23.5
“Sisyai mũikekae meko ma mũĩkĩĩo andũnĩ nĩ kana mwĩyonany'e kũla maĩ. Mwoona mweeka ũu, mũikakwata ĩtuvi kuma kwa Ĩthe wenyu ũla wĩ ĩtunĩ.
2“Kwoou yĩla we ũũnenga ngya ũtethyo, ndũkony'e andũ kana nũũnengane. Andũ ma mĩseũvyo nĩmo mekaa ũu me nyũmbanĩ sya Ayuti sya kũthaithĩa na kũmbanĩa, na me nzĩanĩ, nĩ kana manengwe ndaĩa nĩ andũ. Nĩmũtavya w'o, nĩmakwatĩte ĩtuvi yĩla yoo. 3Kwoou ĩndĩ wanengane ũtethyo, ndũkatavye mũndũ o na wĩva ũndũ ũsu, 4na kwa nzĩa ĩsu vai mũndũ emanya ũndũ weeka. Ĩthe waku ũla wonaa maũndũ ala mekawa kĩmbithĩnĩ, akakũtuva.
Ũmanyĩsyo ĩũlũ Wa Mboya
(Lk 11.2-4)
5 #
Lk 18.10-14
“Mũikavoyae ta andũ ma mĩseũvyo! Mendete kũvoya maũngamĩte me nyũmbanĩ sya Ayuti sya kũthaithĩa na kũmbanĩa, na makomanĩonĩ ma nzĩa nĩ kana moneke nĩ andũ. Nĩmũtavya w'o, nĩmakwatĩte ĩtuvi yĩla yoo. 6Kwoou yĩla ũkwenda kũvoya, lika nyũmbanĩ yaku na ũivinga mũomo, na ĩndĩ ũivoya Ĩthe waku ũla ũtonekaa na metho. Nake Ĩthe waku ũla wonaa maũndũ ala mekawa kĩmbithĩnĩ akaũtuva.
7“Mũivoya mũikaneenae ndeto mbingĩ ite mũthya na ĩtina, o tondũ Andũ-ma-mbaĩ-ingĩ mekaa. Masũanĩaa kana Ngai atonya kũmew'a mavoya mboya ndaasa mũno. 8Mũikethĩwe mũilyĩ ta mo, nũndũ Ĩthe wenyu nĩwĩsĩ kĩla mũkwenda o na mũtanamba kũmwĩtya. 9Voyaai ta ũũ ĩndĩ:
‘Asa waitũ ũla wĩ ĩtunĩ,
ĩsyĩtwa yaku nĩyĩkumw'e;
10ũsumbĩ waku nĩwũke;
kwenda kwaku nĩkwĩkwe kũũ nthĩ o tondũ kwĩkawa ĩtunĩ.
11Tũnenge kĩla mũthenya lĩu ũtwĩanĩe.#6.11 ũtwĩanĩe: Ndeto ya Kĩkiliki ila ĩtũmĩĩtwe vaa no ĩtonya kũalyũlwa wa ũmũnthĩ kana wa ũnĩ
12Tũekee mavĩtyo maitũ, o tondũ tũmaekeaa ala matũvĩtĩasya.
13Ndũkatũlikye matatwanĩ;
ĩndĩ ũtũvonokye kuma kwa Ũla Mũthũku.’#6.13 Maandĩko amwe ma tene ma Ndeto ya Ngai nĩmongelete Nũndũ ũsumbĩ na vinya na ndaĩa nĩ syaku. Ameni
14 #
Mk 11.25-26
“Kwoou ethĩwa mũkaekea andũ ala mamũvĩtĩasya, nake Ĩthe wenyu ũla wĩ ĩtunĩ akamũekea mavĩtyo menyu. 15Ĩndĩ mwalea kũmaekea, o nake Ĩthe wenyu ndakamũekea mavĩtyo menyu.
Ũmanyĩsyo ĩũlũ wa Kũtĩĩa Kũya
16“Yĩla mwatĩĩa kũya, mũikekale mũtukĩtye ũthyũ o tondũ andũ ma mĩseũvyo mekaa. Matukasya ũthyũ nĩ kana andũ mone nĩmatĩĩte kũya. Nĩmũtavya w'o, nĩmakwatĩte ĩtuvi yĩla yoo. 17Kwoou yĩla we watĩĩa kũya, ĩkalasya ũthyũ waku wĩ mũkenũku na ũisanũa nzw'ĩĩ, nĩ kana 18andũ maikamanye kana nũtĩĩte kũya. No Ĩthe waku ũla ũtonekaa na metho ũkamanyaa, nake Ĩthe waku ũla wonaa maũndũ ala mekawa kĩmbithĩnĩ akaũtuva.
Kwia Ũthwii Ĩtunĩ
(Lk 12.33-34)
19 #
Yak 5.2-3
“Mũikeyiĩe ũthwii kũũ nthĩ, kũla ngulu na nganga itonya kũwananga, na ing'ei itonya kũtũla ikawũya. 20Ĩndĩ ĩyiĩei ũthwii ĩtunĩ, vala ngulu na nganga itawananga, na ing'ei itatonya kũtũla ikawũya. 21Nũndũ vala ũthwii waku ũĩ, novo ngoo yaku yĩthĩawa.
Kyeni Kya Mwĩĩ
(Lk 11.34-36)
22“Metho nĩmo taa wa mwĩĩ. Ethĩwa metho maku nĩ maseo, mwĩĩ waku w'onthe ũkakomanwa nĩ kyeni, 23ĩndĩ ethĩwa metho maku nĩmathũku, mwĩĩ waku w'onthe ũkeethĩwa kĩvindunĩ. Kwoou ethĩwa nthĩnĩ waku vandũ va kyeni nĩ kĩvindu, kĩvindu kĩla kĩ nthĩnĩ waku kote kya ũtelemya!
Mũndũ Ndatonya Kũthũkũma Anene Elĩ
(Lk 16.13)
24“Vai mũndũ ũtonya kwĩthĩwa e mũthũkũmi wa anene elĩ, nũndũ akamwenda ũmwe na aimena ũla ũngĩ, kana amwĩw'e ũmwe na aivũthya ũla ũngĩ. Kwoou mũitonya kũthũkũma Ngai mũkwatanĩsye na ũthwii.
Yesũ Aimanyĩsya Andũ Maeke Kwĩmakĩa
(Lk 12.22-31)
25“Kwoou nyie nĩmwĩa mũikemakĩe nũndũ wa kĩla mũkaĩsaa kana mũkanyusaa nĩ kana mũendee kwĩkala thayũ; o na mũikemakĩe nũndũ wa kũla mũkaumasya ngũa sya kwĩkĩa. Kwĩthĩwa thayũ nĩkũthonokete lĩu, naw'o mwĩĩ nũthonokete ngũa. 26Kwa sisyai nyũnyi: Iivandaa kana kũmbany'a ngetha ikekĩa makũmbĩnĩ, ĩndĩ Ĩthe wenyu ũla wĩ ĩtunĩ nũiĩthasya! Inyw'ĩ mũi vata mũno mbee wa nyũnyi? 27Ve ũmwe wenyu ũtonya kwĩyongela matukũ ma thayũ wake kũũ ĩũlũ wa nthĩ#6.27 kwĩyongela matukũ ma thayũ wake kũũ ĩũlũ wa nthĩ: Ndeto sya Kĩkiliki ila itũmĩĩtwe vaa no itonya kũalyũlwa kwĩyongela ũasa wake kwa kwĩmakĩa?
28“Nĩkĩ ĩndĩ mũkwĩmakĩa nũndũ wa ngũa? Kwa sũanĩai ũndũ malaa ma kĩthekanĩ mameaa: Maithũkũmaa kana kũtuma ngũa. 29#1Asu 10.4-7; 2Mav 9.3-6 Ĩndĩ ekai nĩmũtavye, o na Mũsumbĩ Solomoni athuĩte ũndũ wathuĩte, ndaaĩthĩwa na ngũa syanakavĩte ta yĩmwe ya malaa asu. 30Ngai nĩwe ũnengae mĩmea ya kĩthekanĩ wanake ũsu, o na kau yĩthĩawa vo ũmũnthĩ na ũnĩ ĩitw'ĩkĩthw'a ngũ. Kwa w'o akamwĩka inyw'ĩ nesa mbee! Nĩkĩ mwĩ na mũĩkĩĩo ũnyivĩte ũu?
31“Kwoou ekai kwĩmakĩa mũyasya atĩĩ, ‘Twĩumya lĩu va?’ Kana, ‘Twĩumya kĩndũ tũnyw'a va?’ Kana, ‘Twĩumya ngũa va?’ 32Andũ-ma-mbaĩ-ingĩ nĩmo mathĩnaw'a nĩ syĩndũ isu. Ĩthe wenyu ũla wĩ ĩtunĩ nĩwĩsĩ kana inyw'ĩ mwĩ na vata wa syĩndũ isu syonthe. 33Thĩnĩkĩai ĩndĩ maũndũ ma ũsumbĩ wa Ngai, na mũimantha kwĩkaa ũla waĩlu methonĩ make, nake akamũnenga syĩndũ isu ingĩ syonthe. 34Kwoou mũikemakĩe nũndũ wa ũnĩ; ũnĩ wĩ na mawĩmakĩo ala maw'o. Kĩla mũthenya wĩ na mathĩna maw'o ala mawĩanĩe.
Currently Selected:
Mat 6: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011