Mat 4
4
Yesũ Aitatwa nĩ Satani
(Mk 1.12-13; Lk 4.1-13)
1 #
Aevl 2.18; 4.15 Nĩvo ĩndĩ Yesũ watongoeiw'e nĩ Veva wa Ngai athi weũnĩ nĩ kana akatatwe nĩ Satani. 2Nĩwatĩĩie kũya vandũ va mĩthenya mĩongo ĩna, na kwoou mĩthenya ĩsu ĩithela nĩweew'ĩte nzaa. 3Satani nĩwaendie vala ũĩ na amwĩa atĩĩ, “Ethĩwa we wĩ Mwana wa Ngai, ĩaĩe mavia aa matw'ĩke mĩkate.”
4 #
Kũt 8.3
Ĩndĩ Yesũ amũsũngĩa amwĩa atĩĩ, “Maandĩko Matheu maĩtye, ‘Mũndũ ndatũaw'a thayũ nĩ lĩu w'oka, ĩndĩ nĩ vamwe na kĩla ndeto ĩneenetwe nĩ Ngai.’ ”
5Satani nĩwasyokie amũtwaa Yesũ Yelũsalemu, na amũũngamya Ĩkalũnĩ ĩũlũ vandũnĩ vala vatũlu mũno, 6#Sav 91.11-12 na amwĩa atĩĩ, “Ethĩwa we wĩ Mwana wa Ngai, ĩyĩkye ũkakinye nthĩ, nũndũ Maandĩko Matheu maĩtye,
‘Ngai akeeaĩa alaĩka make makũsũvĩe,
namo makaũkwatĩĩa na moko moo,
nĩ kana o na maũũ maku maikaũmĩw'e nĩ mavia.’ ”
7 #
Kũt 6.16
Yesũ amũsũngĩa amwĩa atĩĩ, “O ĩngĩ Maandĩko Matheu maĩtye, ‘Ndũkamũtate Mwĩai Ngai waku.’ ”
8Nĩvo ĩndĩ Satani wamũtwaie Yesũ kĩĩmanĩ kĩtũlu mũno, na amwony'a mosumbĩ onthe ma nthĩ na ndaĩa syamo, 9na amwĩa atĩĩ, “Aa onthe nĩngũũnenga, ethĩwa nũũtulya ndu ũnthaithe.”
10 #
Kũt 6.13
Nĩvo ĩndĩ nake Yesũ wamwĩie atĩĩ, “Thi naku we Satani! Maandĩko Matheu maĩtye, ‘Mũthaithae Mwĩai Ngai waku na mũthũkũmae we e weka.’ ”
11Kwoou Satani nĩwamũtiie Yesũ, na alaĩka mooka na mamũtetheesya mavatanĩ make.
Yesũ Ayambĩĩa Ũthũkũmi wake Kalilii
(Mk 1.14-15; Lk 4.14-15)
12 #
Mat 14.3; Mk 6.17; Lk 3.19-20 Yĩla Yesũ weewie kana Yoana nũvingĩiwe yela, nĩwaendie Kalilii. 13#Yoa 2.12 Nĩwaumie Nasaleti, athi kũtũa Kavelinaũmu nayo nĩ ndũa nini yĩ ũtee wa ĩia ya Kalilii, kĩsionĩ kya Nzevuluni na Navutalĩ. 14Ũu w'onthe weekĩkie nĩ kana wĩanĩsye kĩla kyaneeniwe nĩ Mwĩai kwĩsĩla kwa mwathani Ĩsaia ayasya atĩĩ,
15 #
Ĩsa 9.1,2 “Ĩthukĩĩsye we kĩsio kya Nzevuluni na kya Navutalĩ,
na isio ila syĩ vakuvĩ na ũkanga,
na ila syĩ ngalĩko ya wumĩlonĩ wa syũa ya Ũsĩ wa Yolotani,
vamwe na kĩsio kya Kalilii vala vatũĩte Andũ-ma-mbaĩ-ingĩ!
16Andũ ala matũaa kĩvindunĩ,
nĩmonete kyeni kĩnene.
O na kau matũaa kĩvindunĩ na mũisyonĩ wa kĩkw'ũ,
nĩmeũkenewa nĩ kyeni.”
17 #
Mat 3.2
Kuma ĩvinda yĩu Yesũ nĩwambĩĩie kũtavany'a ayasya atĩĩ, “Ĩlilei kwondũ wa naĩ syenyu, nũndũ ũsumbĩ wa ĩtu nĩ mũthengeeu.”
Yesũ Ayĩta Atei Ana ma Makũyũ Matw'ĩke Amanyĩw'a Make
(Mk 1.16-20; Lk 5.1-11)
18Yesũ atembeangĩte ũtee wa ĩia ya Kalilii, nĩwoonie andũ elĩ ma inyia ũmwe maĩ atei ma makũyũ maitea makũyũ. Ũmwe aĩ Simioni, ũla wĩtawa Vetelo, na ũla ũngĩ aĩ Endelea. 19Nĩwameie atĩĩ, “Ngatĩĩai, na ngamũtw'ĩkĩthya atei ma andũ.” 20Vau kwa vau nĩmatiie itei syoo na mamũatĩĩa.
21Maendanga vanini, Yesũ nĩwoonie andũ angĩ elĩ ma inyia ũmwe; namo maĩ Yakovo na Yoana, ana ma Nzevetii. Maĩ ĩsiwanĩ me na Nzevetii ĩthe woo maiseũvya itei syoo. Yesũ nĩwametie mamũatĩĩe, 22na o vau kwa vau matia ĩsiwa vamwe na ĩthe woo na mamũatĩĩa Yesũ.
Yesũ Aimanyĩsya Andũ na Kũvosya ala Awau
(Lk 6.17-19)
23 #
Mat 9.35; Mk 1.39 Yesũ nĩwathyũũkie Kalilii yonthe, akĩmanyĩsya andũ nyũmbanĩ sya Ayuti sya kũthaithĩa na kũmbanĩa, na kũmatavya Ũvoo Mũseo ĩũlũ wa Ũsumbĩ wa ĩtu. Nĩwavoisye andũ mowau ma kĩla mũthemba, o vamwe na iema ila maĩ nasyo. 24Kwa kĩtumi kĩu nguma yake nĩyanyaĩĩkie kĩla vandũ nthĩ ya Silia, na kwoou andũ mamũetee andũ onthe ala mawaĩte mowau ma kĩla mũthemba na ala maĩ na mathĩna me kĩvathũkany'o ta kũlikwa nĩ maimũ, mũng'athũko, na mamutha monzu. Yesũ nĩwamavoisye onthe. 25Andũ aingĩ mũno kuma kũndũ kwĩ kĩvathũkany'o nĩmamũatĩĩie: Amwe kuma Kalilii, angĩ kuma Ndekavolisi, Yelũsalemu, Yutia, o na angĩ kuma kĩsionĩ kĩla kĩ mbee wa Ũsĩ wa Yolotani.
Currently Selected:
Mat 4: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011