Mat 20

Ngelekany'o ya Atethya ma Wĩa Mũũndanĩ wa Mĩsavivũ

1Yesũ nĩwaendeeie kũneena asya atĩĩ, “Ũsumbĩ wa ĩtu no ũvw'ananw'e na mũndũ ũmwe ũla waĩ na mũũnda wa mĩsavivũ. Nĩwaumaalile mũthenya ũmwe kwakya tene, athi kũandĩka andũ mathũkũme mũũndanĩ wake. 2Nĩweetĩkĩlanile namo amaĩve ndinalĩ ĩmwe kwa mũthenya, na amatũma makathũkũme mũũndanĩ wake wa mĩsavivũ. 3Ta saa itatũ sya kwakya, nĩwaumaalile ĩngĩ athi ndũnyũ na eethĩa andũ angĩ maũngyĩ kũu mate na wĩa, 4nake amea atĩĩ, ‘Inyw'ĩ o nenyu endai mũũndanĩ wakwa wa mĩsavivũ, nakwa nĩngũmũĩva kĩla kĩmwaĩlĩte.’ 5Na kwoou mathi. Nĩweekie oou ĩngĩ syũa yaũngama na saa kenda. 6Ta saa kũmi na ũmwe, nĩwaumaalile athi ndũnyũ na eethĩa andũ angĩ maũngyĩ vau na amakũlya atĩĩ, ‘Mũtindie mũũngyĩ vaa mũthenya mũima mũte ũndũ mũkwĩka nĩkĩ?’ 7Namo mamũsũngĩa mamwĩa atĩĩ, ‘Nĩkwĩthĩwa vai mũndũ ũnatũandĩka tũkamũthũkũme.’ Nake amea, ‘Aaya, endai ĩndĩ o nenyu mũkathũkũme mũũndanĩ wakwa wa mĩsavivũ.’

8 # Ali 19.13; Kũt 24.15 “Syũa yĩ vakuvĩ kũthũa, mwene mũũnda nĩwatavisye mũndũ ũla waũngamĩĩte athũkũmi amwĩa atĩĩ, ‘Ĩta athũkũmi ũmanenge mũsaala, na ũyambĩĩa na ala maandĩkwa ĩtina na kũminĩa na ala maandĩkiwe mbee.’ 9Andũ ala mambĩĩe kũthũkũma saa kũmi na ũmwe nĩmookie maĩvwe, na manengwa kĩla ũmwe ndinalĩ ĩmwe. 10Yĩla ala maandĩkiwe mbee mookie maĩvwe, moonaa ta mekũnengwa mbesa mbingangĩ kũte ila sya andũ ala angĩ, ĩndĩ o namo manengwa kĩla mũndũ ndinalĩ ĩmwe. 11Yĩla maminie kwosa mbesa syoo, nĩmambĩĩie kũnyungunyĩĩsya mwene mũũnda, 12mayasya atĩĩ, ‘Mbona andũ aa waandĩka ĩtina mathũkũma ĩsaa o yĩmwe na wamaĩva ũndũ ũmwe naitũ, tũtindie tũthũkũmĩte mũthenya mũima na syũa yu yonthe.’

13“Nĩvo ĩndĩ mwene mũũnda wasũngĩie ũmwe woo amwĩa atĩĩ, ‘Mũnyanyawa ĩthukĩĩsye, nyie ndinakũmbĩa! Twĩw'anie ũthũkũme mũthenya mũima, nakwa ngĩkũĩva ndinalĩ ĩmwe. 14Osa kĩla kyaku na ũithi. Nĩ ngenda yakwa kũĩva aa maandĩkwa ĩtina o ũndũ ũmwe nenyu. 15Teene no nĩ na mwanya wa kwĩka ũndũ ngwenda na mbesa syakwa? Kana ko ũũnzisya na itho ĩthũku nũndũ wa ũlau wakwa?’ ”

16 # Mat 19.30; Mk 10.31; Lk 13.30 Yesũ nĩwaminĩie na kwasya atĩĩ, “Kwoou, ala yu matongoew'e makatongosya, na ala yu matongoetye makatongoew'a.”

Yesũ Aineena Ĩvinda ya Katatũ ĩũlũ wa Kũkw'a na Kũthayũũka Kwake

(Mk 10.32-34; Lk 18.31-34)

17Yesũ aendete Yelũsalemu nĩweetie amanyĩw'a make ĩkũmi na elĩ nzama, na o maendete na nzĩa amea atĩĩ, 18“Ĩthukĩĩsyei, yu tũendete Yelũsalemu, na Mwana wa Mũndũ nũkũthi kũnenganwe mokonĩ ma athembi anene na amanyĩsya ma Mĩao. Makamũtw'ĩĩa kũawa, 19na maimũnengane kwa Andũ-ma-mbaĩ-ingĩ ala namo makamũthekeea na kũmũvũa na kũmwamba ngelany'onĩ. Ĩndĩ akathayũũka kuma kwa akw'ũ ĩtina wa mĩthenya ĩtatũ.”

Inyia wa Yakovo na Yoana Akĩmetĩsya Ndaĩa

(Mk 10.35-45)

20Nĩvo ĩndĩ mũka wa Nzevetii wookie e na ana make elĩ vala ve Yesũ, na atulya ndu mbee wake amũvoye kĩndũ. 21Yesũ nĩwamũkũlilye atĩĩ, “Wĩenda kyaũ?” Nake asũngĩa atĩĩ, “Nĩenda ana aa makwa elĩ wĩmekalya, ũmwe ngalĩko ya kw'oko kwaku kwa aũme, na ũla ũngĩ ngalĩko ya kw'oko kwaku kwa aka watw'ĩka mũsumbĩ.”

22Yesũ atavya ana asu amea atĩĩ, “Inyw'ĩ mũyĩsĩ kĩla mũũkũlya. Nĩmũtonya kũmĩĩsya kũnyw'a kĩkombe kya mathĩna kĩla ngilĩlye kũnyw'a?” Namo mamũsũngĩa mamwĩa atĩĩ, “Ĩĩ, nĩtũtonya.” 23Yesũ amea atĩĩ, “Inyw'ĩ mũkanyw'a kĩkombe kya mathĩna kĩla nĩnyw'a, ĩndĩ ndi na ũtonyi wa kũnyuva ũla wĩĩkala ngalĩko ya kw'oko kwakwa kwa aũme kana ngalĩko ya kw'oko kwakwa kwa aka. Ĩthe wakwa ũla wĩ ĩtunĩ aiĩte myanya ĩsu kwondũ wa ala ũnyuvĩte meĩkala vo.”

24Yĩla amanyĩw'a ala angĩ ĩkũmi meewie kĩla Yesũ ũkũkũlaw'a, nĩmathatiw'e mũno nĩ aũme asu elĩ masyaanĩw'e. 25#Lk 22.25-26 Nĩvo ĩndĩ Yesũ wametie onthe vamwe na amea atĩĩ, “Inyw'ĩ nĩmwĩsĩ kana andũ ala masumbĩkaa Andũ-ma-mbaĩ-ingĩ, mamasumbĩkaa na ũkũmũ w'onthe, na anene moo nĩmameaĩaa. 26#Mat 23.11; Mk 9.35; Lk 22.26 Ũu ti w'o kwaĩlĩte kwĩthĩwa kũilyĩ katĩ wenyu. Ethĩwa ũmwe wenyu nũkwenda kwĩthĩwa e mũnene, no nginya ethĩwe mũthũkũmi wa ala angĩ. 27Na ethĩwa ũmwe wenyu eenda kwĩthĩwa e mũtongoi wa ala angĩ, no nginya ethĩwe ngombo yenyu inyw'onthe. 28Aĩle kwĩka o ũndũ Mwana wa Mũndũ weekie. Ndaaũka kũthũkũmwa nĩ andũ, ĩndĩ ookie kũmathũkũma ne we, na kwĩnengane akw'e nĩ kana ovosye andũ aingĩ kuma naĩnĩ.”

Yesũ Aivosya Ilalinda Ilĩ

(Mk 10.46-52; Lk 18.35-43)

29Yesũ na amanyĩw'a make mayuma Yeliko nĩmaatĩĩiwe nĩ ĩkomano ĩnene. 30Aũme elĩ ilalinda nĩmailyĩ nthĩ ũtee wa nzĩa, na yĩla meewie kana nĩ Yesũ ũvĩtĩte, nĩmeetanie na wasya mũnene mayasya atĩĩ “Mwĩai, Mwana wa Ndeviti, twĩw'ĩe tei!”

31Ĩkomano nĩyamakanisye yamea atĩĩ, “Vindyai.” Ĩndĩ meetana na wasya mũnene mũno mbee atĩĩ, “Mwĩai, Mwana wa Ndeviti, twĩw'ĩe tei!”

32Yesũ nĩwaũngamie na ameta amakũlya atĩĩ, “Mwĩenda nĩmwĩke ata?” 33Namo mamũsũngĩa mamwĩa atĩĩ, “Mwĩai, twĩenda ũtũtonyethye kwona nthĩ.”

34Yesũ nĩwamew'ĩie tei, na amakiita metho moo, na o vau kwa vau mambĩĩa kwona nthĩ na mamũatĩĩa.

Currently Selected:

Mat 20: KAMBA

Highlight

Copy