Mat 2
2
Andũ Oĩ Maithokea Kana Yesũ
1Yesũ asyaĩwe Mbetheleemu nthĩ ya Yutia, ĩvinda yĩla Elote waĩ mũsumbĩ. Ĩtina wa ũu, andũ oĩ kuma wumĩlonĩ wa syũa nĩmookie Yelũsalemu na makũlya atĩĩ, 2“Aĩva mwana ũla ũsyaiwe ethĩwe Mũsumbĩ wa Ayuti? Nĩtwonie ndata yake wumĩlonĩ wa syũa, na nĩtwooka kũmũthaitha.”
3Mũsumbĩ Elote eew'a ũu, nĩwakwatiwe nĩ kĩũũyũ kingĩ, we o vamwe na andũ onthe ala mekalaa Yelũsalemu. 4Nĩwoombanisye athembi anene onthe na amanyĩsya ma Mĩao, na amakũlya atĩĩ, “Klĩsto atw'ĩkaa akasyaĩwa va?”
5Namo mamũsũngĩa mamwĩa atĩĩ, “Mbetheleemu nthĩ ya Yutia o tondũ mwathani ũandĩkĩte akasya,
6 #
Mika 5.1
‘We Mbetheleemu, nthĩnĩ wa nthĩ ya Yuta,
ndwĩ mũnini nongi katĩ wa ndũa ila syĩ nguma sya Yuta,
nũndũ kwaku kũkauma mũsumbĩ,
ũla ũkasumbĩka andũ makwa Ĩsilaeli.’ ”
7Nĩvo ĩndĩ Elote wametie ala andũ oĩ vandũ me oka, na amakũlya mamũtavye ĩvinda yĩla ndata ĩsu yaumĩlile. 8Nĩvo ĩndĩ wamatũmie amea atĩĩ, “Endai Mbetheleemu mũkamanthe mwana ũsu vo na kĩthito. Mwamwona, ndeteei ũvoo nĩ kana o nakwa nĩthi ngamũthaithe.”
9Andũ asu mamina kwĩthukĩĩsya mũsumbĩ, nĩmakwatie nzĩa mathi. Na sisya, ĩla ndata moonete wumĩlonĩ wa syũa yaĩ ĩendie mbee woo na yaũngama ĩũlũ wa vala vaĩ kala kana. 10Yĩla moonie ndata ĩsu, nĩmatanie mũno na ũtanu mwingĩ. 11Nĩmalikile nyũmba na moona kala kana kena Meli inyia wako, na matulya ndu makathaitha. Nĩvo ĩndĩ mathaisye mĩio yoo makanenga mĩthĩnzĩo: Thaavu, ũvani wa thooa mũnene wĩtawa ũvumba na mauta me mũuke mũseo metawa manemane.
12Nĩmakaniw'e nĩ Ngai ndotonĩ maikasyokele kwa Elote, na kwoou menũkĩla nzĩanĩ ĩngĩ.
Kũkĩa na Kũthi Misili
13Andũ oĩ mamina kũthi, mũlaĩka wa Mwĩai nĩwamumĩlĩĩle Yosevu ndotonĩ na amwĩa atĩĩ, “Ũkĩla wose kana na inyia wako na ũikĩa ũthi nthĩ ya Misili. Ĩkala kũu kũvika yĩla ngakũtavya, nũndũ Elote e vakuvĩ kwambĩĩa kũmantha kana kaa akoae.”
14Yosevu nĩwookĩlile, oosa kana na inyia wako, na mauma ũtukũ mathi Misili, 15#Osea 11.1 vala mekalile kũvika Elote akw'a. Ũu weekĩkie nĩ kana wĩanĩsye ũndũ Mwĩai waneenete kwĩsĩla kwa mwathani akasya atĩĩ, “Nĩnamwĩtie Mwana wakwa aume nthĩ ya Misili.”
Kũawa Kwa Syana Nini
16Yĩla Elote wamanyie kana nũkengiwe nĩ ala andũ oĩ, nĩwathatie mũno. Nĩweeaie tũvĩsĩ tũla twĩ Mbetheleemu na ndee syayo, tũla twĩ na ũkũũ wa myaka ĩlĩ na kũtheea, tũkoawe. Eekie ũu athimanĩtye na ĩvinda yĩla wamanyĩthiw'e nĩ ala andũ oĩ.
17Kwa nzĩa ĩsu, ndeto ii syaneeniwe nĩ mwathani Yelemia nĩsyeanĩie:
18 #
Yel 31.15
“Wasya nĩweew'ĩkie Lama,
kyeva na kĩĩo kĩ woo.
Laeli akĩĩa nũndũ wa syana syake,
na ndaaĩtĩkĩla kũkiakiw'a,
nĩkwĩthĩwa syonthe syaĩ ngw'ũ.”
Kũsyoka Kuma Misili
19Yĩla Elote wakwie, mũlaĩka wa Mwĩai nĩwamumĩlĩĩle Yosevu ndotonĩ e Misili amwĩa atĩĩ, 20“Ũkĩla wose kana na inyia wako, na mũisyoka nthĩ ya Ĩsilaeli, nũndũ ala mendaa kũaa kana nĩ akw'ũ.” 21Yosevu nĩwookĩlile, oosa kana na inyia wako, na masyoka nthĩ ya Ĩsilaeli.
22Ĩndĩ yĩla Yosevu weewie kana Alikelau nĩwe ũsumbĩkĩte Yutia vandũ va Elote ĩthe wake, nĩwakĩie kũthi kw'o. Ĩtina wa kũkanw'a nĩ Ngai ndotonĩ nĩwaekie kũthi kũu athi kĩsionĩ kĩtawa Kalilii, 23#Mk 1.24; Lk 2.39; Yoa 1.45 na atũa ndũanĩ yĩtawa Nasaleti. Kwoou kĩla kyaneenetwe nĩ athani kyeanĩa kana, “Klĩsto akeetwa Mũnasaleti.”
Currently Selected:
Mat 2: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011