Ĩsa 64
64
1Nenda kethĩwa nũtembũa matu na ũitheea nthĩ,
iĩma iteteme nĩ w'ĩa syĩ mbee waku!
2Ikatetema ta mwaki ũũvĩvya kĩtheka,
kana ta mwaki ũũtheũkya kĩw'ũ.
Theea nĩ kana amaitha maku makũmanye,
na mbaĩ iitetema syĩ mbee waku!
3Yĩla weekie maũndũ ma kũtĩsya ala tũtasũanĩĩte ĩũlũ wamo,
nĩwatheeie kũũ nthĩ, nasyo iĩma syatetema nĩ w'ĩa syĩ mbee waku.
4 #
1Ako 2.9
Kuma tene vai mũndũ waaĩw'a, kana kwona Ngai ũngĩ ate o we,
Ngai ũla wĩkaa maũndũ kwondũ wa ala mamwĩkwatasya!
5We nũtetheeasya andũ ala mekaa ũlũngalu me atanu,
ala malilikanaa nzĩa syaku.
Nĩtwaendeeie kwĩka naĩ naku wathata;
nĩtweekie naĩ ĩvinda ĩasa, tũtonya ata ĩndĩ kũtangĩĩwa?
6Ithyonthe tũtw'ĩkĩte ta andũ avuku,
na meko maitũ onthe ma ũlũngalu nĩ ta ngũa nthokoanu.
Ithyonthe nĩtũvovaa ta ĩtũ,
na mavĩtyo maitũ matũkuaa ta kĩseve.
7Vai mũndũ o na ũmwe ũkwĩkaĩlaa,
kana wũkaa kũla ũĩ ũmũtethye;
nĩkwĩthĩwa nĩwĩthyũũĩte ũkatũtia,
nũtũekete tũminwe nĩ mavĩtyo maitũ.
8Ĩndĩ we Mwĩai Ngai, nue Ĩthe waitũ,
ithyĩ twĩ yũmba, naku nue mũmbi waitũ;
ithyonthe twĩ wĩa wa moko maku.
9Ame Mwĩai Ngai, ndũkatũthatĩe mũno,
ndũkalilikane mavĩtyo maitũ tene na tene,
Twĩw'ĩe tei, nĩkwĩthĩwa ithyonthe twĩ andũ maku!
10Ndũa syaku ntheu nitw'ĩkĩte weũ,
o na Saioni nĩtw'ĩkĩte weũ,
Yelũsalemu ĩtiĩtwe yĩ nthei.
11Ĩkalũ yitũ ĩtheu na yanakavye vala aaũmae maitũ makũtaĩĩaa,
nĩyĩvĩvĩtw'e na mwaki,
na kũndũ kwitũ kw'onthe kũla kwaĩ kũseo nĩ kwanangĩku.
12Ame Mwĩai Ngai, o na ĩtina wa maũndũ aa onthe,
wĩendeea kũlea kwĩka ũndũ?
Wĩendeea kũvindya ki na kũtũthĩny'a mũno?
Currently Selected:
Ĩsa 64: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
